Ezekeli

36 “Nupya we mwana wa muntu, sesema pa myamba ya mu Izlaeli uti, ‘Mwe myamba ya mu Izlaeli uvwini mazwi yakwe Yeova. 2 Yeova Umwene wa Papelapela walanda wati: “Alwani inu iyalanda pali mwemwe iyati, ‘Eya! Ni ncende zya mpiti kwene izitumpuke iziya izitu!’”’

3 “Fwandi sesema uti, ‘Yeova Umwene wa Papelapela walanda wati: “Pa mulandu wakuti yamusya ukwaula icili consi nupya yamuzanza umu ntunga zyonsi, pakuti muye umwa kwikala aapusuka aafuma umu nko zyuze nupya antu yatwalilile ukulanda pali mwemwe nu kumwamba, 4 fwandi mwe myamba ya mu Izlaeli, uvwini amazwi yakwe Yeova Umwene wa Papelapela! Yeova Umwene wa Papelapela walanda uku myamba ikalamba ni inono, ku nguzi nu ku mikonko, uku ncende izyononeka, nu ku misumba iyatazyelwa ino yapokolola ivintu ivyayamo nupya ino antu amu nko zyuze izyaizinguluka yatumfyanga; 5 Yeova Umwene wa Papelapela walanda uku vintu vii wati: ‘Mu ukali ndapingula antu ya mu nko aapusuka na Ina Edomu yonsi aasansamwike nu kulanda ni mitumfyo iyati mpanga yane iyao pakuti yapokolole incende ya mulemvwe iyayamo.’”’

6 “Fwandi sesema ukulozya uku mpanga ya Izlaeli nu kunena imyamba ikalamba ni inono, inguzi ni mikonko uti, ‘Yeova Umwene wa Papelapela walanda wati: “Pa mulandu wakuti inko zyamuzewanyizye, nani ndazipingula umu ukali.”’

7 “Fwandi Yeova Umwene wa Papelapela walanda wati: ‘Nene kwene nkukatusya ikasa lyane nu kulapa ukuti inko izyamuzinguluka zilazewana. 8 Lelo mwemo mwe myamba ya mu Izlaeli, mulakwata imisambo nu kuseeka ivizao vya yantu yane Aina Izlaeli, pano yasya yace yawele. 9 Pano indi namwe, nupya ndamipaala; mulalimwa nu kukomelwamo imbezu. 10 Ndavuzya antu inu, kuli kuti amu ng’anda yakwe Izlaeli yonsi, nupya umu misumba mulaya aakwikalamo ni ncende izyononeka zilakuulwa cipya cipya. 11 Mu cumi ndavuzya antu inu ni viteekwa vinu vilavula nu kusandana. Ndalenga ukuti antu iikale muli mwemwe wakwe vino cali uku cisila nupya mulaikala ningo ukucila vino cali mpiti; lyene mulamanya ukuti nene Yeova. 12 Ndalenga antu, kuli kuti antu yane Aina Izlaeli ukupita muli mwemwe. Nupya mulaya aakwao, yalaikala muli mwemwe, na ana yao yatalatala yafwe pa mulandu winu nupya.’”

13 “Yeova Umwene wa Papelapela walanda wati: ‘Pa mulandu wakuti yakumunena iyati, “Mwemwe mpanga iikalya antu nu kukoma ana ya nko zinu,”’ 14 ‘fwandi mulata ukulya antu nanti ukukoma ana ya nko zinu nanti ukulenga inko zinu ukusyala ukwaula ana,’ avino Yeova Umwene wa Papelapela walanda. 15 ‘Ntalaleka ukuti mutwalilile ukutukwa uku nko nanti ukuleka antu yamitumfya, nupya mutalalenga inko zinu ukupumika,’ avino Yeova Umwene wa Papelapela walanda.”

16 Nupya kwene Yeova wanenyile ati: 17 “We mwana wa muntu lino amu ng’anda yakwe Izlaeli ikalanga umu mpanga yao yalenzile kuti ikowele pa mulandu ni miyele yao ni vicitwa. Miyele yao yali wa kukowela kwa mwanaci ali uku mwezi kuli nene. 18 Fwandi nayasokiile sana pa mulandu nu wazi uno yazwisizye umu mpanga na pali vino yaikowizye pa mulandu ni vilubi vyao ivya winyi.* 19 Nayasalanganyizizye umu nko nu mu mpanga zyuze. Nayapingwile ukulingana ni miyele yao alino ni vicitwa vyao. 20 Lelo lino yaile uku nko zizyo, antu yatandike ukusaalula izina lyane ilya muzilo pano yalandanga pali aliyo yakuti, ‘Yaa antu yakwe Yeova, lelo yasya impanga yakwe.’ 21 Fwandi ndacitapo cimwi api zina lyane ilya muzilo, lino amu ng’anda yakwe Izlaeli yazewanyizye umu nko zino yasalanganilemo.”

22 “Acino nena amu ng’anda yakwe Izlaeli uti, ‘Yeova Umwene wa Papelapela walanda wati: “Mwe ya mu ng’anda yakwe Izlaeli ntakucitapo cimwi pa mulandu namwe, lelo a pa mulandu ni zina lyane ilya muzilo lino mwazewanyizye umu nko zino mwasalanganilemo.”’ 23 ‘Ndalenga izina lyane ilikalamba lino mwazewanyizye umu nko ukuya ilya muzilo; nupya inko zilamanya ukuti nene Yeova,’ avino Yeova Umwene wa Papelapela walanda, ‘lino ndaicindamika muli mwemwe ale ni nko zikulolako. 24 Ndamufumya umu nko nupya ndamukolonganika ukufuma umu mpanga zyonsi nu kumuwezya umu mpanga inu. 25 Ndamusansa manzi aaswepe, nupya mulaya aasanguluke; ndamusangulula uku kukowela kwinu konsi nu ku vilubi vinu vyonsi vya winyi. 26 Ndamupeela umwenzo upya na melenganyo apya. Ndafumya umwenzo uwaya wi we umu mili inu nu kumipeela umwenzo utonte wa munyefu.* 27 Ndamupeela umupasi wane uwa muzilo, nupya ndalenga ukuti mwalondela masunde yane nu kucita vyonsi vino namunena. 28 Lyene mulikala umu mpanga ino napeezile ivikolwe vinu, nupya mulaya antu yane nani ndaya Leza winu.’

29 “‘Ndamupususya uku kukowela kwinu konsi nu kulenga ingaano ukuvula sana, nupya mutalatala mukwatepo icipowe. 30 Ndalenga ivimiti vyaseeka ni vimelwa ukuvula sana umu mpanga pakuti mutaca muzewane nupya uku nko pa mulandu ni cipowe. 31 Lyene muliusya imiyele inu iipe ni vicitwa vinu ivitaali ningo, nupya muluvwa sana uyi pa mulandu na vino mwaluvyanyizye alino na pa vicitwa vinu ivya winyi. 32 Lelo mumanye ukuti: Nsikucita vii pa mulandu winu,’ avino Yeova Umwene wa Papelapela walanda. ‘Lelo uvwini insonyi nu kuzewana pa mulandu ni miyele inu mwe ya mu ng’anda yakwe Izlaeli.’

33 “Yeova Umwene wa Papelapela walanda wati: ‘Mu wanda uno ndamusangulula uku membu zinu zyonsi, ndalenga imisumba imwi iikalwemo ni ncende zinu izyononike zikuulwe cipya cipya. 34 Impanga iyasiile umwaula icili consi ino ali wensi aakupita walolanga ilalimwa. 35 Nupya antu yalalanda yati: “Impanga iyasiile umwaula icili consi yatiya wa calo ca Edeni, ni misumba iyononike nupya iyasiile umwaula icili consi yatikuulwa na antu ya kwikalamo.” 36 Nupya inko izyasiile zimuzingulwike zilamanya ukuti nene ne Yeova inkuula ivyononike, nu kulema imiti umu mpanga umutaali ivili vyonsi. Nene ne Yeova indanda, nupya nene incita.’

37 “Yeova Umwene wa Papelapela walanda wati: ‘Ndaleka nu kuti amu ng’anda yakwe Izlaeli yalenge kuli nene ukuyavuzya wa mfwele: Nupya ndacita vivyo kwene. 38 Mu misumba iyononike mulavula maumba ya yantu, wi umba lya yantu ya muzilo na wi umba lya yantu atiyakolongana umu Yelusalemu lino kuli imitebeto; nupya yalamanya ukuti nene Yeova.’”