Nehemiya
9 Pa wanda uwalenga 24 umu mwezi kwene uu, Aina Izlaeli yakolongine; yatiile ukulya ala iyazwala ivyakuzwala vino yapangilanga na masaaka* nupya yaipasile ulukungu. 2 Yonsi aafumile umu luko lwa Ina Izlaeli yaipaatwile ukufuma uku yantu ya mu mpanga zyuze, nupya imilile nu kutandika ukusokolola imembu zyao nu kuluvyanya kwa vikolwe vyao. 3 Lyene imilile pano yaali nu kutandika ukubelenga ni izwi lyuvwike umwi buku lya Masunde yakwe Yeova Leza wao pa maawazi yatatu; nupya pa maawazi na yauze yatatu yasokololanga imembu ala iyafukamila Yeova Leza wao.
4 Yesyua, Bani, Kadimiyeli, Syebaniya, Buni, Syelebiya, Bani, na Kenanai, iimilile pali pulatifomu itumpuke iya Ina Levi nupya yapefile kuli Yeova Leza wao ni izwi ilikalamba. 5 Nupya Aina Levi, kuli kuti Yesyua, Kadimiyeli, Bani, Hasyabineya, Syelebiya, Hodiya, Syebaniya, na Petaya, yalanzile iyati: “Katukini, nupya lumbanyini Yeova Leza winu manda pe. Leka yalumbanye izina lyako ilya lulumbi ilyacila mapaalo yonsi nu mucinzi.
6 “Wewe sile wenga we Yeova, wapanzile iyulu, kuli kuti iyulu lya mayulu na vyonsi ivyayamo, insi na vyonsi ivyayamo, ya yemba na vyonsi ivyayamo. Nupya ukalenga vyonsi ukutwalilila ukuya nu umi, ni vya mwi yulu vikakufukamila. 7 Wewe uli Yeova Leza wa cumi, uwasoolwile Abulamu nupya wamufumizye uku mpanga iya Uli iya Ina Kalideya nu kumupeela izina ilyakuti Abulahamu. 8 Waweni ukuti wali uwa cumi kuli wewe, fwandi wapangine nawe upangano uwa kumupeela impanga iya Ina Kenani, Aina Hiti, Aina Amoli, Aina Pelizi, Aina Yebusi, na Ina Giligasi, nupya waipeezile uku yana yakwe, wasunzile nu ulayo wako pano wewe mulungami.
9 “Waweni ukucula kwa vikolwe vitu umu Ijipti nupya uvwile ukulila kwao pali Yemba Muyenzu. 10 Lyene wacisile ivimanyililo ni vizungusyo kuli Falao nu ku yaomvi yakwe yonsi nu ku yantu yonsi aali umu mpanga yakwe, pano wamanyile ukuti yaali ni cilumba uku yantu yako. Walenzile izina lyako ukumanyikwa nupya lyatwalilila ukumanyikwa ningo ukufika na ndakai. 11 Nupya wankiinye yemba pakasi ala yakulola nako, icakuti yalamvile pa musili uume, wasumbiile alwani yao pazike kwati iwe lino yasumbila umu manzi ya mukuku. 12 Wayatungululanga umusanya ukuomvya ikumbi, nupya wayatungululanga usiku ukuomvya icimbilimbili ca moto. 13 Nupya wizile pa Mwamba uwa Sinai nu kulanda nayo ukufuma ukwi yulu wayapeezile na masunde alungame, acumi, nupya asuma. 14 Wayalenzile ukuti yamanye Isabata lyako ilya muzilo, nupya wayapeezile masunde ukupitila muli Mose umuomvi wako. 15 Wayapeezile ivyakulya ukufuma ukwi yulu lino yaali ni inzala, nupya wayapeezile manzi ukufuma umu ciliwe lino yaali nu lusala, wayanenyile nu kuti ingile nu kwikala umu mpanga ino walafile ukuyapeela.
16 “Lelo ivikolwe vitu vyali ni cilumba nupya vyakomizye imyenzo, vituvwilile na masunde yako. 17 Yakanyile ukuvwa nupya yatiwisye ivizungusyo vino wacisile kuli aliyo, yaisontiile intunguluzi pakuti yaswilile umu uzya uku Ijipti. Lelo wewe Leza aakaelela, uwaya ni cikuuku nu luse, aasisoka zuwa nupya uwaya sana nu kutemwa kwa cumi, nupya utayalekelizye. 18 Nanti sile alino yapanzile icilubi ca kwengulula ica kana ka ng’ombe nu kulanda iyati, ‘Wikwene ali leza witu uwatufumizye umu Ijipti,’ nupya yakusaalwile sana, 19 nalyo kwene, pa mulandu nu luse lwako ulukalamba, utayalekelizye umu lwanga. Ikumbi litafumanga pali aliyo umusanya pakuti uyatungulule umu nzila, ni cimbilimbili ca moto cayanga pali aliyo usiku pakuti uyakozezye umu nzila ino yalinzile ukupitamo. 20 Wayapeezile umupasi wako usuma pakuti uyazwe ukwiluka nupya utaaimile mana, wayapeezile na manzi lino yaali nu lusala. 21 Pa myaka 40 wayapeelanga ivyakulya umu lwanga. Yatuulizye nanti acimwi. Ivyakuzwala vyao vitatazile visile, ni ngazo zyao zitatazile zivimbe.
22 Wayapeezile mawene na antu nu kuvyankanya umu viputulwa, icakuti yaposile impanga yakwe Sihoni, kuli kuti mpanga ya mwene wa ku Hesyiboni, kumwi ni mpanga yakwe Ogi umwene uwa ku Basyani. 23 Nupya wavuzizye ana yao wa ntanda izya mwi yulu. Lyene wayatwazile umu mpanga ino walavile ivikolwe vyao ukuti yalingilamo nu kwikalamo. 24 Fwandi ana yao yaile iingila umu mpanga iiyo nu kutandika ukwikalamo, nupya wacimvizye Aina Kenani aikalanga umu mpanga iiyo ala Aina Izlaeli yakulola nako, wayapeezile na ene yao na antu ya mu mpanga iiyo pakuti yayacite vino yakulonda. 25 Nupya yaposile imisumba ya malinga ni mpanga ivunde nu kutandika ukwikala umu mang’anda umwali ivintu visuma ivya misango yonsi, ivifula, vyalo vya myangazi, imiti ya miolivi, ni miti ya vizao ivingi. Fwandi yaaliile nu kwikuta nu kwina nupya yaipakizye ivintu visuma vino wayacitiile.
26 “Lelo yatiile ukuya ni cuvwila nupya yakupondokiile nu kuta ukulondela Masunde yako. Yakomile ya kasesema aayacelulanga pakuti yawele kuli wewe, nupya yakusaalwile sana. 27 Pa mulandu na vii, wayapeezile uku yalwani yao, aatwalilile ukuyacuzya. Lelo yalililanga kuli wewe lino yayacuzyanga, nupya uvwanga ukulila kwao ukufuma ukwi yulu; nupya pa mulandu nu luse lwako ulukalamba, wayatumilanga aakuyapususya uku yalwani yao.
28 “Nomba lino intazi zyasila sile, yatandikanga ukucita iviipe nupya kwene, nupya wayasyanga nu kuyapeela uku yalwani yao, aayacuzyanga. Lyene izanga kuli wewe nu kulenga uwazwilizyo, naawe uvwanga ukufuma ukwi yulu nu kuyapususya pa miku ingi pa mulandu nu luse lwako ulukalamba. 29 Nanti cakuti wayacelulanga pakuti yatandike ukuvwila Masunde yako nupya, yaali ni cilumba nupya yakanyile ukuvwa uku masunde yako; yayembukiile masunde yako, aangalenga umuntu ukuya nu umi ndi cakuti akuyalondela. Nupya yakupondokiile nu kukomya imyenzo yao alino nu kukana ukuvwa. 30 Wayatekeelile pa myaka iingi nupya watwalilile ukuyacelula ukuomvya umupasi wako ukupitila muli ya kasesema yako, lelo yatuvwile. Lyene wayapeezile uku yantu ya mu mpanga zyuze. 31 Nupya pa mulandu nu luse lwako ulukalamba, utayalovizye nanti ukuyasya pano wewe Leza wa cikuuku nupya uwa luse.
32 “Nomba we Leza witu, Leza umukulu, uwa maka nupya uwa kuzungusya, uwatwalilila ukusunga upangano wakwe nu kulanga ukutemwa kwa cumi, utilila vyonsi ivyatucitikila, ivyacitikila aene itu, ya cilolo, ya simapepo, ya kasesema, ivikolwe vitu, na antu yako yonsi, ukutandikila umu manda ya ene ya Ina Asilya ukufika na ndakai. 33 Wewe mulungami muli vyonsi ivikatucitikila, pano wemo watucitila ivya icumi; lelo sweswe twaluvyanya. 34 Aene itu, ya cilolo, ya simapepo, ni vikolwe vitu, yasilondela Masunde yako nanti ukwika mano uku masunde yano wayapeezile aa kuyacelula. 35 Nanti sile alino yakweti aene yao nu kuipakizya ivintu visuma ivingi vino wayapeezile alino nu kwikala umu mpanga ikulu nupya ivunde, yatakuombelanga nupya yataatiile ukucita iviipe. 36 Fwandi lyene paa sweswe yazya umu mpanga ino wapeezile ivikolwe vitu kuti viipakizye ukulya ivizao ni vintu vyuze ivisuma ivyayamo. 37 Ivyakulya ivingi ivyayamo i vya ene yano watusoolwela kuti yatutungulula pa mulandu ni membu zitu. Yakatungulula imili itu ni viteekwa vitu ukulingana na vino yakulonda, nupya tukacula sana.
38 Fwandi pa mulandu na vii vyonsi, tukulemba upangano nupya ya cilolo itu, Aina Levi na ya simapepo iyasainapo.”*