2 Milandu
20 Lyene Aina Moabu na Ina Amoni pamwi na Ina Amonimu* yamwi izile umu kulwisya Yeosyafati. 2 Fwandi yanenyile Yeosyafati iyati: “Iumba ilikalamba iliza umu ku kulwisya ukufuma uku ncende ya kuli yemba* uku Edomu nupya yali uku Hazazoni-tamala, kuli kuti uku Eni-gedi.” 3 Lyene Yeosyafati uvwile intete, nupya wasoolwilepo ukulenga uwazwilizyo kuli Yeova. Walanzile ukuti kuye ukuta ukulya umu mpanga ya Yuda monsi. 4 Lyene amu mpanga ya Yuda yakolongine pakuti yuzye kuli Yeova; yafumile umu misumba yonsi ya mu mpanga ya Yuda pakuti yuzye kuli Yeova.
5 Lyene Yeosyafati wimilile pa nkoleelo ya Yayuda na antu ya mu Yelusalemu aali pa musolo wa ng’anda yakwe Yeova uno yazifizye, 6 nu kulanda ati:
“We Yeova Leza wa vikolwe vitu, wewe uli Leza sile wenga umwi yulu; wakwata maka ukucila mawene yonsi aa yantu. Wakwata maka nupya kusi ali wensi aangakulwisya. 7 We Leza witu, uzye asi wewe wazwile Aina Izlaeli antu yako ukuzinga antu ya mu mpanga yii nu kuipeela manda pe kuli ya mwana Abulahamu cuza wako? 8 Ikazilemo nupya yakuuzile ni tempele apa kucindikila izina lyako, yalanzile nu kuti, 9 ‘Ndi cakuti twaponelwa ni ntazi pa mulandu wakuti yamwi yatuzanza, twafululwa, twaponelwa ni cikuko, nanti kwaya icipowe, twakulaimilila pa nkoleelo ya ng’anda yii na pa nkoleelo yako, (pano pa ng’anda yii apaya izina lyako) twakulalenga ukuti utwazwe naawe si uwakutika nu kutupususya.’ 10 Lola vino Aina Amoni, Aina Moabu, na antu amu ncende ya myamba yakwe Seili yakucita, antu yano utaazumilizye Aina Izlaeli ukuzanza lino yafumile umu mpanga ya Ijipti. Yatayazanzile nupya yatayononyile. 11 Lelo yene iiza umu kutuzinga umu mpanga yako ino watupeela ukuti iye iitu. 12 We Leza witu, uzye utakuyafulula? Swemo tutakweti maka aakulwisizya iumba lii likulu ilyatiliza umu kutulwisya; nupya tutamanyile ivyakucita, lelo tukulolekesya kuli wewe.”
13 Pa nsita iiya antu yonsi amu Yuda iimilile pa nkoleelo yakwe Yeova, pamwi na ana yao akalamba na anono, alino na aci yao.
14 Lyene umupasi wakwe Yeova wizile pali Yaazieli mwana Zekaliya mwana Benaya mwana Yeiyeli mwana Mataniya Umwina Levi uwa mu yana yakwe Asafu. 15 Nawe walanzile ati: “Uvwini mwe yantu ya mu Yuda mwensi na mwe ya mu Yelusalemu naawe kwene Mwene Yeosyafati! Yeova walanda wati, ‘Mutuvwa intete nanti ukutiina pa mulandu ni umba lii likalamba, pano ulwi asi winu uwakwe Leza. 16 Mutondo muce mukayakomenkanye umu ulwi. Yalafumilila uku nzila iya Zizi nupya mulayazana uku mpela ya mukonko umupiipi nu lwanga lwa Yeluwele. 17 Mutalalondekwa ukulwa. Muce mutantame, ukwimilila, nu kulola kuno Yeova alamupususya. Mwe yantu ya mu Yuda nu mu Yelusalemu, mutuvwa intete nanti ukutiina. Mutondo muce muye mu kuyakomenkanya, nupya Yeova alaya namwe.’”
18 Lilyo kwene sile Yeosyafati wafupime, nupya antu yonsi amu Yuda na amu Yelusalemu nayo kwene yafukime pa nkoleelo yakwe Yeova nu kupepa Yeova. 19 Lyene Aina Levi aafumile umu Ina Koati na Ina Kola yakatwike nu kulumbanya Yeova Leza wa Ina Izlaeli umwi izwi ilikalamba sana.
20 Pa wanda uwalondelilepo yakatwike katondotondo iyaya uku lwanga lwa Tekoa. Lino yapitanga, Yeosyafati wimilile nu kulanda ati: “Uvwini kuno mwe ya mu mpanga ya Yuda na mwe ya mu Yelusalemu! Tailini Yeova Leza winu pakuti muye asipe. Tailini ya kasesema yakwe, alino mumacimvya.”
21 Pa cisila ca kulanzyanya na antu, wasonsile aonsi aakwimbila Yeova nu kumulumbanya ala iyazwala ivyakuzwala vya muzilo, yakoleelile aonsi aali ni vyanzo ala yakuti: “Taizyini Yeova pa mulandu wakuti ukutemwa kwakwe ukwa cumi kukaikalilila manda pe.”
22 Lino yatandike ukwimba inyimbo zya malumbo ni nsansa, Yeova walenzile ukuti Aina Amoni, Aina Moabu, na antu aikalanga umu ncende ya myamba yakwe Seili aali alwani ya Yayuda yazanzwe, nayo yatandike ukukomana. 23 Nupya Aina Amoni na Ina Moabu yatandike ukulwisya antu aikalanga umu ncende ya myamba yakwe Seili nu kuyalovya; nupya lino yamazile ukukoma antu yayo, yatandike ukukomana.
24 Nupya lino antu ya mu Yuda yaile uku lupungu lwa mu lwanga nu kulola ukwali iumba lya yalwani yao, yaweni sile ivitumbi; kutaali uwapuswike. 25 Lyene Yeosyafati na antu yano yaali nawe yaile umu kusenda ivintu vya yalwani yao, yazanyile ivintu vingi sana, ivyakuzwala, ni viya ivisuma icakuti iyafilwa nu kuvimala. Cayasendiile manda yatatu pakuti yamale ukusenda ivintu vivyo, pano vyali ivingi sana. 26 Pa wanda uwalenga 4, yakolongine uku mukonko wa Belaka nupya kuuku kwene akuno yalumbanyizye Yeova. Ali mulandu uno yatemiile incende iiya ukuti Mukonko wa Belaka* ukufika na ndakai.
27 Lyene aonsi ya mu Yuda yonsi na amu Yelusalemu, pamwi na Yeosyafati uwayatungululanga, yaswilile uku Yelusalemu ala yaali ni nsansa, pano Yeova walesile ukuti yacimvye alwani yao. 28 Fwandi yaile uku Yelusalemu ala yali na mabanjo, mazeeze, na mapenga, nupya yaile uku ng’anda yakwe Yeova. 29 Leza walenzile ukuti mawene ya mu mpanga yonsi yuvwe intete lino yuvwile vino Yeova wacimvizye alwani ya Ina Izlaeli. 30 Fwandi umu wene wakwe Yeosyafati mutaali icimvulunganya, pano Leza wakwe wamulenzile ukupuuza uku yalwani yakwe yonsi.
31 Yeosyafati watwalilile ukuteeka umu mpanga ya Yuda. Wali ni myaka 35 lino watandike ukuteeka, nupya wateesile imyaka 25 umu Yelusalemu. Nyina wali a Azuba mwana Syili. 32 Watwalilile ukulondela umu ngazo zyakwe Asa isi. Ataafumilemo, nupya wazanzyanga Yeova. 33 Lelo atononyile incende izya kupepelapo zino antu yalolanga ukuti izya muzilo, nupya walanga antu yatasoololapo ukulaombela Leza wa vikolwe vyao.
34 Ilyasi lyonsi ilyasyala ilikalanda pali Yeosyafati, ukufuma pa kutandika ukufika uku mpela, lyalembwa pamwi na mazwi yakwe Yeu mwana Hanani aaya umwi buku ilikalanda pali ya mwene ya mu Izlaeli. 35 Pa cisila Umwene Yeosyafati uwa ku Yuda wapangine upangano na Ahaziya umwene wa ku Izlaeli uwacitanga iviipe. 36 Fwandi waombiile pamwi nawe ukupanga mawato aakuti yaya uku Tasyisyi, nupya yaapangiile mawato yayo uku Ezioni-gebeli. 37 Lelo Elieza mwana Dodavau uwa ku Malesya wasesime pali Yeosyafati ati: “Pa mulandu wakuti wapangana upangano na Ahaziya, Yeova alonona ivintu vino wapanga.” Fwandi mawato yononike nupya yafizilwe ukuya uku Tasyisyi.