Yobo
1 Kwali umuntu umwi umu mpanga iya Uzi uwi zina lyakuti Yobo.* Wali u mulungami nupya uwa kaele; watiinanga Leza nu kutaluka uku viipe. 2 Wakweti ana aonsi 7 na akazyana yatatu. 3 Wakweti imfwele 7,000, ingamila 3,000, ing’ombe 1,000,* ya punda 500,* alino na aomvi aingi sana icakuti wizile acindikwa sana ukucila antu yonsi aikalanga uku Ufumondaka.
4 Cila mwana umonsi wakwatanga umutebeto pa ng’anda pakwe pa wanda uno umwineco wasoolola, nupya wamanga ya nkazi yakwe yatatu kuti yakalye nu kumwela pamwi. 5 Pa cisila cakuti yonsi yakwata imitebeto, Yobo wamanga anakwe pakuti ayasangulule. Lyene wakatukanga katondotondo nu kupeela malambo ya koca pali cila mwana wenga na wenga. Pano Yobo welenganyanga ukuti: “Limwi ana iyayembuka nu kutuka Leza umu myenzo.” Vikwene ali vino Yobo wacitanga lyonsi.
6 Uwanda umwi lino ana aonsi yakwe Leza wa cumi* yaile iimilila pa nkoleelo yakwe Yeova, Satana nawe kwene waile pali aliyo.
7 Lyene Yeova uzizye Satana ati: “Aekwi kuno wafuma?” Satana nawe waswike Yeova ati: “Nafuma nkuzinguluka nu kupitana umu nsi.” 8 Nupya Yeova uzizye Satana ati: “Uzye watulola Yobo umuomvi wane? Kutaaya uwaya wakwe aliwe umu nsi. Wene u mulungami nupya u wa kaele, akatiina Leza nu kutaluka uku viipe.” 9 Lyene Satana waswike Yeova ati: “Uzye Yobo akatiina Leza apa sile sile? 10 Uzye asi wewe ukamucingilila nu kucingilila ing’anda yakwe kumwi na vyonsi vino wakwata? Wapaala imilimo yakwe nupya walenga ukuti viteekwa vyakwe vivule umu mpanga. 11 Lelo ndi cakuti wakonzolola ikasa nu kupoka vyonsi vino wakwata, amakutuka ala ukulola nako.” 12 Lyene Yeova wanenyile Satana ati: “Vyonsi vino Yobo wakwata navipeela umu minwe yako. Lelo utacita icili consi kuli aliwe!” Fwandi Satana wafumile pa nkoleelo yakwe Yeova.
13 Lyene pa wanda uno anakwe aonsi na akazyana yalyanga nu kumwa waini umu ng’anda yakwe isilenzi, 14 muomvi wakwe Yobo waile kuli aliwe nu kumunena ati: “Ing’ombe iizikulima na ya punda iyakulya isote mupiipi ni ng’ombe. 15 Aina Seba iiza yatuzanza nu kusenda ing’ombe na ya punda, nupya iyakoma na aomvi. Nene sile impusuka pakuti nize imunene.”
16 Lino acili akulanda umuomvi na muze wizile kuli Yobo nu kumunena ati: “Umoto ukufuma kuli Leza* iwapona ukufuma umwi yulu nu koca imfwele na aomvi! Nene sile impusuka pakuti nize imunene.”
17 Lino acili akulanda umuomvi na muze wizile kuli Yobo nu kumunena ati: “Aina Kalideya iiza yapanga maumba yatatu nupya iyazanza ingamila nu kuzisenda, iyakoma na aomvi. Nene sile impusuka pakuti nize imunene.”
18 Lino acili akulanda umuomvi na muze wizile kuli Yobo nu kumunena ati: “Anako aonsi na akazyana iyakulya nu kumwa waini umu ng’anda yakwe isilenzi. 19 Iikwiza icimuza icikalamba ukufuma uku lwanga, icapungila pa makoona 4 aa ng’anda icakuti ing’anda iyaponela pa yakazyana na alumendo nupya iyafwa. Nene sile impusuka pakuti nize imunene.”
20 Lino Yobo uvwile vivyo wakatwike nu kulepula ivyakuzwala vyakwe nupya wapezile inyele uku mutwe; lyene waponyile pansi nu kufupama 21 nu kulanda ati
“Ntaakweti icili consi lino naviilwe,
Nupya ntalasenda icili consi lino ndafwa.*
Yeova wampeezile nupya Yeova watampokolola.
Si izina lyakwe Yeova litwalilile ukulumbanyiziwa.”
22 Muli vyonsi vii Yobo aatayembwike nanti ukupeela Leza umulandu.