Isamu

5 Uvwa amazwi yane we Yeova;

Ika mano uku ulanda uno nkweti.

 2 Ika mano uku kulenga kwane,

We Mwene wane nupya Leza wane, pano kuli wewe akuno nkupepa.

 3 We Yeova uluvwa izwi lyane katondo;

Katondo ndakuneena vino vikunsakamika nu kutwalilila ukuloleela ukuti ungasuke.

 4 Pano wewe Leza aasizangila umu viipe;

Kusi umwipe ali wensi angatwalilila ukuya naawe.

Wapata yonsi aakacita iviipe;

 6 Ulonona aakalanda ivya ufi.

 7 Lelo ndiza umu ng’anda yako pa mulandu nu ukulu wa kutemwa kwako ukwa cumi;

Ndafukama ukulozya ukwi tempele lyako ilya muzilo pa mulandu nu mucinzi uno nakukwatila.

 8 Ntungulule we Yeova umu ulungami wako pa mulandu na alwani yane;

Ngavwe ukupita umu nzila yako ukwaula ivya kuncinga.

 9 Pano pasi vino yakalanda ivingatailwa;

Umu myenzo yao mwaya sile iviipe;

Imikolomilo yao yaya wa malindi ayulike;

Indimi zyao i zya usomvi.

10 Nomba Leza alayapeela umulandu;

Amapange yao yalalenga yononwe.

Si kayafumiziwepo pa mulandu ni vintu ivingi viipe vino yakacita,

Pano iyakupondokela.

11 Lelo yonsi aakafisama muli wewe yalasansamuka;

Yalaapunda nu luzango lyonsi.

Ulayacingilila.

Nupya yonsi aatemwa izina lyako yalasansamukila muli wewe.

12 Pano ulapaala umuntu wensi umulungame we Yeova;

Ulayalanga ukutemwa nu kuyacingilila wa cisyangu icikalamba.