Isamu
Lwimbo. Lwimbo luno ya mwana Kola iimvile. Ku mukalamba wakwe ya kiimba muli Mahalati,* lufwile ukwimbwa ala yakulekelana. Masikiu wakwe Hemani Umwina Ezala.
88 We Yeova Leza aakampususya,
Musanya nkalilila kuli wewe,
Nupya usiku nkaiza pa nkoleelo yako.
2 Si leka ipepo lyane liize kuli wewe,
Kutika kuli vino nkulenga uwazwilizyo.
3 Pano umi wane wazulamo intazi,
Nupya nasya inje ukwi Lindi.*
4 Napendelwa mpiti pa yantu akuya ukwi lindi;
Kusi uwa kungazwa,
5 Iyansya pamwi na aafwe
Wa muntu wino iyakoma aali umwi lindi,
Wino usiiusya
Nupya wino usisakamala.
6 Watunjika umwi lindi lya pansi sana,
Mu mfinzi, mu ciwina icikalamba icaula impela.
7 Icipyu cako pali nene iicikulisya,
Nupya maimbi yako aamaka iyantonsya. (Selah)
8 Watuzinga antu yano namanya ukufuma kuli nene;
Watulenga inje icawinyi kuli aliyo.
Indemwa nupya ntanga nutuke
9 Amanso yane iyatonta pa mulandu ni ntazi.
Wanda onsi nkulilila kuli wewe we Yeova;
Kuli wewe akuno nkukatusya makasa yane.
10 Uzye ulacitila afwe vizungusyo?
Uzye antu afwa aatakwata amaka yangakatuka nu ku kulumbanya? (Selah)
11 Uzye ukutemwa kwako ukwa cumi kungalandwa umwi lindi,
Uzye ucisinka wako ungazanwa umu ncende ya ononesi?
12 Uzye vizungusyo vyako vingamanyikwa mu mfinzi
Nanti ulungami wako umu mpanga yakwe yano antu iilila?
13 Lelo ncili nkalilila kuli wewe kuti ungazwe we Yeova,
Cila katondo ipepo lyane likaiza kuli wewe.
14 U mulandu ci we Yeova uno ukankanila?
Umulandu ci uno ukafisila cinso cako kuli nene?
15 Ukufuma ku wance wane,
Nkacuula nupya naipekanya ukufwa;
Natoovoka pa mulandu ni vintu viipe vino ukaleka ukuti vyancuzya.
16 Ukali wako uukupya wa moto iuntonsya;
Watulenga inje ni ntete cakuti indi mupiipi nu kufwa.
17 Vikanzinguluka wa manzi uwanda onsi;
Vikaiza pali nene ukufuma mu ntunga zyonsi.
18 Watunzingila antu yano natemwa na ya cuza yane ukutali;
I mfinzi iyatiya cuza ne.