Ezaya
43 Yeova Kaumba wako we Yakobo,
Uwakupanzile we Izlaeli, walanda wati:
“Utuvwa intete, pano nakukulula.
Nakwama umwi zina lyako.
Wewe wakwane.
2 Nga wapita pa manzi ndaya nawe,
Nupya nga wapita pa nguzi utalamwela.
Nga wapita pa moto, utalapya
Ni cimbilimbili citalakuwayula.
3 Pano nene indi Yeova Leza wako,
Uwa Muzilo Wakwe Izlaeli, Kapususya wako.
Napeela Ijipti ukuya ilambo pali wewe,
Nu ku kukauzya na Etiopia na Seba.
4 Pano wacindama kuli nene,
Nakucindika nupya nakutemwa.
Ndapeela antu ni nko
Pakuti nkupususye.
5 Utuvwa intete, pano indi naawe,
Ndasenda ana yako ukufuma uku ufumondaka
Nupya ndayasenda ukufuma uku uwondaka.
6 Ndanena katutu inti, ‘Yalekeleko!’
Nupya ndanena kaeya inti, ‘Utayalemelela.
Leta ana yane aonsi ukufuma ukutali, na ana yane akazyana ukufuma uku mpela ya nsi.
7 Yonsi aakaamilwa ukwi zina lyane
Nupya yano naumvile pakuti nacindikwa,
Yano napanzile.’
8 Letini antu aasilola nanti cakuti yakwata manso,
Na aasiuvwa nanti cakuti yakwata matwi.
9 Lekini inko zyonsi zikolongane pa ncende yonga,
Nupya lekini antu yonsi yakolongane pamwi.
A leza ci aangatunena ivintu vii?
Nanti uzye yangatunena vintu ivilatandikilapo ukucitika?
Lekini yatupeele usininkizyo pakuti tulole ndi cakuti aacumi,
Nanti lekini yauze yuvwe nu kulanda ukuti, ‘Vii ivya cumi!’”
10 Yeova walanda wati: “Mwemwe ya nte yane,
Mwemwe yaomvi yano nasoolola,
Pakuti mumanye nu kuntaila
Mumanye nu kuti naya sile icili cimwi.
Kutatala kwaya Leza muze,
Nupya kutalatala kuye.
11 Nene Yeova, nupya kutaaya kapususya muze ukucila pali nene.”
12 Fwandi ne Yeova nkumunena ukuti, “Nene nalanzile pa vintu ivyali nu kucitika nu kumupususya,
Nu kulenga ukuti vintu vii vimanyikwe lino kutaali leza ali wensi pali mwemwe.
Mwemwe ya nte yane, nupya nene indi Leza wa cumi.
13 Nupya naya sile icili cimwi;
Kusi aangampokolola icili consi.
Nga nalonda ukucita cimwi kusi aangandesya.”
14 Yeova Kakulula winu Uwa Muzilo wakwe Izlaeli walanda wati:
“Ndatuma asilika uku Babiloni pa mulandu winu nu konona impongolo zyonsi,
Nupya Aina Kalideya yalaloosya umu ulanda ala yali umu mawato yao.
15 Nene Yeova Uwa Muzilo winu, nupya Umwene winu, Kaumba wakwe Izlaeli.
16 Vii avino Yeova walanda,
Aakapanga inzila pali yemba
Nanti sile apa manzi ya mukuku,
17 Aakaleta maceleta ya nkondo ni mfwalasi,
Na asilika, wati:
“Yalalaala ukwaula ukukatuka.
Yalazima wa utambi uukwaka.”
18 “Mutaiusya ivintu vya mpiti
Nanti ukuvyelenganyapo.
19 Nimapanga icintu icipya;
Nanti sile aelikwene icitandika ukupangwa.
Uzye musikucilola?
Ndapanga inzila umu mpanga umutaaya ivili vyonsi
Ni nguzi umu lwanga.
20 Vilyanyi vya mu mpanga i vilancindika,
Kumwi na ya nkusa ni mbuni,
Pano ndaleta manzi umu ncende umutaaya cimwi,
Ni nguzi umu lwanga,
Pakuti antu yane yano nasoolola yamwa.
21 Antu yano naiumbiile ne mwineco
Pakuti yandumbanya.
22 Lelo usyalilila kuli nene, we Yakobo
Pa mulandu wakuti watonta nani, we Izlaeli.
23 Utaatala wandetelapo imfwele yi lambo lya koca
Nanti ukuncindika ukuomvya malambo yako.
Ntakupatikizyapo kuti umpeele ivya upe,
Nupya ntakutonsya ukupitila umu kukupatikizya kuti umpeele ivinunkile.
24 Utankalilapo ivinunkile ukuomvya impiya zyako
Nupya mafuta yano wapeezile nga malambo yatanzanzizye.
Lelo watwalilile ukunjembukila
Nu kuntonsya ni membu zyako.
25 Nene nkufuuta imembu zyako pa mulandu wane,
Nupya ntalaziusyapo.
26 Njiusyeko; londolola umulandu wako;
Pakuti tulole nga wewe wa kaele.
27 Cikolwe cako cayembwike,
Na aakakulandilako* yampondokiile.
28 Fwandi ndalola ya cilolo ya pa ncende ya muzilo ukuti aakowele,
Ndaleka ukuti Yakobo aononwe
Na Izlaeli atukwe.