Yelemiya
1 Vii avino Yelemiya* mwana Hilikiya wenga pali ya simapepo ya mu Anatoti umu mpanga yakwe Benjamini walanzile. 2 Yeova walanzile kuli aliwe umu manda yakwe Yosiya mwana Amoni umwene uwa ku Yuda mu mwaka uwalenga 13 uwa kuteeka kwakwe. 3 Nupya kwene walanzile kuli aliwe umu manda yakwe Yeoyakimu mwana Yosiya umwene uwa ku Yuda, kufika nu ku kusila kwa mwaka uwalenga 11 uwa kuteeka kwakwe Zedekiya mwana Yosiya umwene uwa ku Yuda mpaka nu mu mwezi uwalenga 5 lino antu ya mu Yelusalemu yasenzilwe umu uzya.
4 Yeova wanenyile ati:
5 “Lino ntatala nakupanga umunda muli mayo wako nakumanyile,
Nupya lino utatala wavyalwa nakusoolwile ukuomba umulimo wa muzilo.
Nakulenzile ukuya kasesema uku yantu ya mu nko.”
6 Lelo natiile: “Iyee we Yeova Mwene wa Papelapela!
Ntamanya ivya kulanda, pano nene mwance.”
7 Lyene Yeova wanenyile ati:
“Utalanda uti, ‘Nene mwance.’
Pano ulinzile ukuya kuli yonsi yano ndakutumako,
Nupya uce uyanene vyonsi vino ndakunena.”
8 Nupya Yeova walanzile ati: “Utuvwa intete pa mulandu na vino yakuloleka,
Pano ndaya naawe pakuti nkupususye.”
9 Lyene Yeova wakonzolwile ikasa nu kundema pa kanwa, nupya Yeova wanenyile ati: “Nika mazwi yane umu kanwa kako. 10 Lola, ilelo inkupeela umulimo wa kusesema uku yantu ya mu nko nu ku mawene, maka ya kwipula nu kuwisya, aakonona nu komoola, kukuula nu kulemeka.”
11 Nupya kwene Yeova wizile kuli nene nu kunguzya ati: “Yelemiya i cani cino ukulola?” Nani naswike inti: “Nkulola umusambo uwa mu omondi.”
12 Yeova nawe wanenyile ati: “Vino ukulola avivyo kwene, pano injiteyanya pakuti ince incite vino indanda.”
13 Nupya kwene Yeova wanguzizye umuku wakwe ciili ati: “I cani cino ukulola?” Nani naswike inti: “Nkulola impoto iikutopota, nupya itiyendama ukufuma uku katutu ukulozya uku kaeya.” 14 Lyene Yeova wanenyile ati:
“Uwononesi ulafumilila uku katutu
Nu kwiza pa yantu yonsi aamu mpanga.”
15 Yeova walanda wati: “Namaama indupwa zyonsi izya mu mawene ya ku katutu,
Nazyo ziliza; nupya ya mwene yonsi yaliika ivilimba vyao ivya wene
Pa mpongolo zya mu Yelusalemu,
Yalazanza malinga yakwe yonsi
Ni misumba ya mu Yuda yonsi.
16 Nupya ndaleta upinguzi pali aliyo pa mulandu ni viipe vyonsi vino yacita,
Pano yampondokela,
Nupya yakupeela malambo ya koca kuli ya leza yauze
Nu kufukamila ivintu vino yapanga aineco.
17 Lelo ulinzile ukuipekanya kuli vino vilacitika,
Nupya ulinzile ukuyayanena vyonsi vino ndakunena.
Utayatiina,
Pakuti ntaca nkulenge ukuya ni ntete pa nkoleelo yao.
18 Pano ilelo inkulenga ukuya umusumba ukome,
Lucesi lwa cela, nupya iviumba vyakwe koopa pakuti ulwisye impanga yonsi,
Na ya mwene yakwe Yuda, ya cilolo yakwe
Na ya simapepo yakwe.
19 Nupya yalakulwisya,
Lelo yatalakucimvya,
Pano ‘ndaya naawe pakuti nkupususye,’ avino Yeova walanda.”