Isamu
IBUKU 3
(Masamu 73 kufika uku 89)
Lwimbo luno Asafu wimvile.
73 Leza u musuma uku Ina Izlaeli, kuli yano yaya ni myenzo isanguluke.
2 Inganzo zyane, zyali umupiipi nu kupumbuka;
Intampulo zyane zyali umupiipi nu kusyelemuka.
3 Pano nakumbwanga antu aacilumba
Ndi cakuti nalola vino antu aipe yakweti umutende.
4 Pano yene yasicula pa kufwa;
Imiili yao ikaloleka ningo.
5 Yene yasisakamikwa wa yantu yauze,
Nupya yasicula wakwe vino antu yauze yakacula.
6 Fwandi cilumba acino yakazwala umu nsingo;
Unkalwe auno yakazwala kwati ivyakuzwala.
7 Amanso yao yatumbuka pa mulandu nu ukankala wao;
Yacila na pali vino imyenzo yao ikaelenganya.
8 Yakasaalula yauze nu kulanda ivintu iviipe;
Yakacuzya yauze cilumba cilumba.
9 Yakalanda kwati yatalimpa ukufika umwi yulu,
Nupya indimi zyao zikapitaana umu nsi cilumba cilumba.
10 Fwandi antu yakwe yakapiliukila kuli aliyo,
Nupya yakamwa umu manzi yao aingi.
11 Yakati: “Uzye Leza akamanya?
Uzye Uwa Papelapela akamanya uli ivintu vii?”
12 Yaa ali yantu aipe yano ivintu vikaangukila lyonsi.
Yakatwalilila ukuvuzya ivyuma vyao.
13 I cumi kwene nkaicuzya sile ukusunga umwenzo wane usanguluke
Nu kufulala makasa yane muli ukaele.
14 Nupya naculanga uwanda onsi;
Nakalipilwanga cila katondo.
15 Lelo ndi cakuti ndanda ivintu vii,
Nga napondokiile antu yako.
16 Lino nezizye ukwiluka icintu cii,
Catandike ukuncuzya
17 Ukufikila lino naile ningila umu ncende ikalamba iya muzilo yakwe Leza,
Alino nilwike ivilayacitikila uku nkoleelo.
18 I cumi kwene waiika apa musili utelepe.
Ulaleka ukuti yapone nu kononeka.
19 Iyee mwe vino yalononwa zuwa zuwa!
Iyee mwe vino impela yao ilipisya!
20 We Yeova, lino ulakatuka ulayakana,
Wakwe vino cikaya uku ciloto ndi cakuti umwi wazyuka.
21 Lelo umwenzo wawavile,
Nupya nuvwanga sana ukuwaika umukasi.
22 Ntelenganyanga nupya ntilukanga;
Nali wa nyama isielenganya pa nkoleelo yako.
23 Nomba lyene lyonsi nkaya naawe;
Wandema ukwi kasa li lunji.
24 Ukampanda amano pa kuntungulula,
Nupya pa cisila ulantungulula uku lulumbi.
25 Uzye a weni wino nakwata umu mayulu?
Nupya ukufumyako wewe nsikumbwa icili consi umu nsi.
26 Umwili wane nu mwenzo wane vingacepelwa amaka,
Lelo Leza ali ciliwe ca mwenzo wane nupya ali cilambu cane manda pe.
27 Cumi kwene, aakaitalusya kuli wewe yalalowa.
Ulonona umuntu wensi aataya ni cisinka aakafuma kuli wewe.
28 Lelo nemo ukupalama kuli Leza ali cintu cisuma,
Naleka Umwene Uwa Papelapela Yeova ukuya umwakufisama mwane,
Pakuti nalanda pa milimo yakwe yonsi.