Isamu
Lwimbo luno Devedi wimvile.
103 Nkandumbanye Yeova;
Nkanalumbanya izina lyakwe ilya muzilo nu mwenzo wane onsi.
2 Nkandumbanye Yeova;
Ntalilila vyonsi vino wacita.
3 Akaelela imembu zyako zyonsi
Nu kupozya indwala zyako zyonsi;
4 Akakupususya uku mfwa.
Nu ku kuzwika ukutemwa kwakwe ukwa cumi nu luse.
5 Akakupeela ivintu visuma umu umi wako onsi,
Pakuti utwalilile ukuya na maka wakwe lyang’anda
6 Yeova Akacita ivilungame nupya waya nu mulinganya
Kuli yonsi aakacuziwa.
7 Walenzile inzila zyakwe zimanyikwe kuli Mose
Ni milimo yakwe ukumanyikwa uku Ina Izlaeli.
8 Yeova waya nu luse ni cikuuku,
Asisoka zuwa nupya waya sana nu kutemwa kwa cumi.
9 Asitwalilila ukulondelezya iviipe,
Nupya atalatwalilila ukusoka manda pe.
10 Asitucitila ukulingana ni membu zitu,
Nupya asitufulula ukulingana nu kuluvyanya kwitu.
11 Wakwe vino mayulu yatalimpa ukucila insi,
Avino ukutemwa kwakwe ukwa cumi kwakula kuli yayo aakamoopa.
12 Wakwe vino kuno kukatunkila ilanzi kwatalimpa na kuno likawila,
Avino wataalusya imembu zitu kufuma kuli sweswe.
13 Wakwe vino isi akaya nu luse uku yana yakwe,
Avino Yeova akaya nu luse kuli yayo aakamoopa.
14 Pano wamanya vino twaumbwa,
Akaiusya ukuti sweswe lukungu.
15 Umuntu umwina kufwa akaikala manda anono wi sote;
Waya wi luwa lya mu mpanga.
16 Lino umuza wapunga likaululwa,
Iciya kwati litalilili napo.
17 Lelo ukutemwa kwa cumi kwakwe Yeova u kwa manda pe
Kuli yayo aakamoopa,
Nu ulungami wakwe uku yana ya yana yao,
18 Kuli yayo aakasunga upangano wakwe
Na kuli yayo aakakonka masunde yakwe.
19 Yeova wika icilimba cakwe ica wene umu mayulu;
Nupya akateeka pa vintu vyonsi.
20 Lumbanyini Yeova mwe ya malaika mwensi mwe muno mwakwatisya amaka,
Mwe muno mukasenda izwi lyakwe nu kuvwila vino akalanda.
21 Lumbanyini Yeova mwe maumba yakwe,
Mwe yaomvi yakwe aakacita ukulonda kwakwe.
22 Lumbanyini Yeova mwe viumbwa vyakwe vyonsi,
Mwemuno mwaya umu ncende ino akateeka.
Nkanalumbanya Yeova nu mwenzo wane onsi.