1 Yamwene
2 Lino Devedi wali umupiipi nu kufwa, wanenyile Solomoni umwanakwe ati: 2 “Indi umupiipi nu kufwa. Fwandi komeleka nupya uye wa monsi. 3 Uwauvwila Yeova Leza wako kupitila umu kusunga masunde yakwe, wakwe vino yalembwa umu masunde yakwe Mose; lyene ulaya na mano muli vyonsi vino ukucita na konsi kuno waya. 4 Nupya Yeova alafikilizya ulayo uno walafile kuli nene ati: ‘Ndi cakuti ana yako yali ni miyele isuma nupya yali ni cisinka ni myenzo yao yonsi nu umi wao onsi, lyonsi umu lupwa lwako mulaaya uwa kwikala pa cilimba ca wene umu Izlaeli.’
5 “Nupya wamanya ningo vino Yoabu mwana Zeluya wacisile kuli nene, vino wacisile uku yakalamba ya yasilika ya mu Izlaeli yaili, kuli kuti Abineli mwana Neli na Amasa mwana Yeteli. Wayakomile nu kuzwisya uwazi umu nsita ya mutende, nupya wisile uwazi uku musipi uno wazwite nu ku ndyatu. 6 Uce ucite ukulingana na mano yako nupya utaca uleke afwe mu ukote wakwe nu kuya ukwi lindi* umu mutende.
7 “Lelo uce uye nu kutemwa kwa cumi kuli ya mwana Bazilai Umwina Gilyadi, nupya yace yaye pali yano yalaalya naawe, pano yantungilile lino nutukanga Abusalomu umwinako.
8 “Nupya kuli na Syimei mwana Gela uwa mu mutundu wakwe Benjamini kufuma uku Baulimu. Wantifiile sana pa wanda uno nayanga uku Mahanaimu; lelo lino wizile umu kunkomenkanya uku Luzi Lwa Yodani, nalafile kuli aliwe umwi zina lyakwe Yeova inti: ‘Ntalakukoma nu lupanga.’ 9 Utaca umuleke sile ukwaula ukumufulula, pano waya na mano nupya umanyile cino ulinzile ukucita kuli aliwe; utaca uleke afwe mu ukote wakwe nu kuya ukwi lindi* umu mutende.”
10 Lyene Devedi wafwile nu kuziikwa ukwalaala ivikolwe vyakwe umu Musumba Wakwe Devedi. 11 Imyaka yonsi ino wateesile umu Izlaeli yali 40. Myaka ino wateesile umu Hebuloni yali 7, mu Yelusalemu namo yali 33.
12 Pa cisila Solomoni wikazile pa cilimba ca wene cakwe Devedi isi, nupya umu kuya kwa nsita uwene wakwe wakomile sana.
13 Lyene Adoniya mwana Hagiti waile kuli Batisyeba nyina wakwe Solomoni. Nawe wamuzizye ati: “Uzye watuwiza umu mutende?” Lyene waswike ati: “Ee.” 14 Adoniya wanenyile Batisyeba ati: “Kuli cimwi cino nkulonda ukumunena.” Nawe watiile: “Landa.” 15 Watwalilile ukulanda ati: “Mwamanya ningo ukuti nene nali nu kuya umwene, nupya Aina Izlaeli yonsi yalolekesyanga pali nene ukuya pa wene; lelo ivintu vizile ivisenuka, uwene wizile iuya uwa mwinane, pano avino Yeova walondanga. 16 Nomba lyene kuli sile icintu conga cino nkulenga kuli mwemwe. Mutangima.” Nawe watiile: “Landa.” 17 Lyene walanzile ati: “Napaapata, mulenge Umwene Solomoni pano atamamukaanya, kuti ampeele Abisyagi umwina Syunemu aye a mamane.” 18 Lyene Batisyeba walanzile ati: “Pali sile ningo! Namakulandilako uku mwene.”
19 Fwandi Batisyeba waile uku Mwene Solomoni pakuti akalandileko Adoniya. Lilyo kwene sile umwene wakatwike nu kuyamufukamila. Lyene wikazile pa cilimba cakwe ica wene nupya wapekinye icilimba ca wene icakuti Batisyeba nyina aikalepo ukwi kasa lyakwe ilya kwi lunji. 20 Lyene watiile: “Kuli icintu conga icinono cino nkulonda ukulenga. Utangima.” Fwandi umwene wamunenyile ati: “Mayo lengini; nsikumwima.” 21 Walanzile ati: “Leka Abisyagi Umwina Syunemu aye umuci wakwe Adoniya umwinako.” 22 Lino Umwene Solomoni uvwile vivyo waswike nyina ati: “U mulandu ci uno mukulengela ukuti Abisyagi aye umuci wakwe Adoniya? Mumulengele nu wene kwene, pano atatalenzi nupya Abiata simapepo na Yoabu mwana Zeluya yakumutungilila.”
23 Lyene Umwene Solomoni walafile umwi zina lyakwe Yeova ati: “Si Leza amfulule ndi cakuti Adoniya atafwile pa mulandu na vino walenga. 24 Nupya nkulapa umwi zina lyakwe Yeova Leza wa umi uwankomya nupya uwampeela uwene wakwe Devedi tata kumwi na ana yane wakwe vino walafile, ilelo kwene Adoniya amakomwa.” 25 Lilyo kwene sile Umwene Solomoni watumile Benaya mwana Yeoyada, nawe wapisile nu kuyakoma Adoniya.
26 Umwene Solomoni wanenyile Abiata simapepo ati: “Yanga uku mpanga yako iya Anatoti! Ulinzile ukufwa, nomba ilelo ntakukukoma pa mulandu wakuti wasenzile Imbokosi yakwe Yeova Umwene wa Papelapela lino wali na Devedi tata nupya watungilile tata muli vyonsi lino waculanga.” 27 Fwandi Solomoni wazinzile Abiata kuti ataaomba nga simapepo wakwe Yeova, pakuti afikilizye vino Yeova walanzile ukulozya uku ya mu ng’anda yakwe Eli mu Syilo.
28 Lino Yoabu uvwile ivyacitike, utukiile ukwi tenti lyakwe Yeova nu kuyalemelela impembe zya ulambo, wacisile vivyo pa mulandu wakuti watungilile Adoniya nanti cakuti ataatungilile Abusalomu. 29 Lyene yanenyile Umwene Solomoni iyati: “Yoabu atautukila ukwi tenti lyakwe Yeova nupya ali kuuku kwene mupiipi nu ulambo.” Fwandi Solomoni watumile Benaya mwana Yeoyada ati: “Pitanga, kamukome!” 30 Benaya nawe waile ukwi tenti lyakwe Yeova nu kuyanena Yoabu ati: “Umwene walanda wati, ‘Fuma papo!’” Lelo watiile: “Awe! Nimafwila pakwene.” Lyene Benaya waswilile uku mwene nu kuyamunena vino Yoabu walanzile. 31 Lyene umwene wanenyile Benaya ati: “Kacite vino watalanda; kamukome nu kumuziika nupya ufumye uwazi pali nene na pa ya mu ng’anda yakwe tata uno Yoabu wazwisizye ukwaula umulandu. 32 Yeova amamufulula pa wazi uno wazwisizye, pano wakomile aonsi yaili alungame ukumucila kwaula ukuti tata amanye, kuli kuti vino wakomile Abineli mwana Neli umukalamba wa yasilika ya mu Izlaeli na Amasa mwana Yeteli umukalamba wa yasilika ya mu Yuda. 33 Uwazi wao ulaswilila kuli Yoabu nu ku ya mu lupwa lwakwe manda pe; lelo si Yeova kapeele umutende kuli Devedi, ku ya mu lupwa lwakwe, ku ya mu ng’anda yakwe, nu ku wene wakwe manda pe.” 34 Lyene Benaya mwana Yeoyada wapisile aya akoma Yoabu nupya yamuzisile umupiipi ni ng’anda yakwe. 35 Lyene umwene wasonsile Benaya mwana Yeoyada kuti aye umukalamba wa yasilika ukupyana Yoabu, nupya wasonsile Sadoki simapepo kuti apyane Abiata.
36 Lyene umwene wamile Syimei nu kumunena ati: “Kakuule ing’anda umu Yelusalemu nupya uwaikala mumu kwene; utaca ufumemo nu kuya uku ncende ili yonsi. 37 Uwanda uno ulafumamo nu kulamba umukonko wa Kiduloni umanye ukuti ulafwa. Wewe ulaya nu mulandu pa wazi wako.” 38 Syimei wanenyile umwene ati: “Vino walanda vili ningo. Ne muomvi wako nimacita vino watulanda.” Fwandi Syimei wikazile manda aingi umu Yelusalemu.
39 Lelo pa cisila ca myaka itatu, aomvi yaili yakwe Syimei yapuusile iyaya kuli Akisyi mwana Maaka umwene wa ku Gati. Lino yanenyile Syimei iyati: “Aomvi yako yali uku Gati,” 40 lilyo kwene sile wakwezile pali punda wakwe nu kuya umu kulola Akisyi ku Gati umu kulonda aomvi yakwe. Lino Syimei wawezile na aomvi yakwe ukufuma uku Gati, 41 yamwi yanenyile Solomoni iyati: “Syimei wafumile umu Yelusalemu aya uku Gati nupya watawela.” 42 Lyene umwene wamile Syimei nu kumuzya ati: “Uzye ntalenzile ukuti ulape umwi zina lyakwe Yeova nu kukunena inti: ‘Uwanda uno ulafuma kuno nu kuya uku ncende yuze ulafwa’? Nupya uzye utalanzile uti, ‘Vino walanda vili sile ningo, avino nimacita’? 43 U mulandu ci lyene uno utaasungiile umulapo uno walafile kuli Yeova nu kulondela vino nakunenyile?” 44 Lyene umwene wanenyile Syimei ati: “Wamanya iviipe vyonsi vino wacisile kuli Devedi tata, nupya Yeova amakufulula pa viipe vino wacisile. 45 Lelo Umwene Solomoni alapaalwa nupya uwene wakwe Devedi ulaya ukome pa nkoleelo yakwe Yeova manda pe.” 46 Lyene umwene wanenyile Benaya mwana Yeoyada kuti akamukome, nawe waile amukoma, nupya wafwile.
Vikwene avino uwene wakwe Solomoni wakomile.