Ezaya
26 Mu wanda uuwa ulwimbo lulimbwa umu mpanga yakwe Yuda ulwakuti:
“Tukweti umusumba ukome.
Kupususya kwakwe kwaya wa viumba nupya kwaya wa vya kucingilila iciumba.
2 Yulini imilyango pakuti uluko ulukacita ivilungame
Nupya ulwaya ni cisinka lwingile.
3 Ulacingilila yayo aataila sana muli wewe,
Ulalenga ukuti yatwalilile ukuya nu mutende,
Pano yataila wewe.
4 Mwataila Yeova manda pe
Pano Jah* Yeova i Ciliwe ca manda pe.
5 Watacefya antu aikala papela, kuli kuti umusumba uwaya ni cilumba.
Watauwisya,
Watauwisya pansi;
Watausumbila pansi.
6 Ulwazo lulaulyatola,
Ulalyatolwa na antu aakacuziwa, asuulwe.”
7 Inzila ya muntu mulungami yololoka.
Pa mulandu wakuti wewe mulungami,
Ulafumizya umulungami ivingalenga apumike.
8 Lino tukulondela upinguzi wako we Yeova,
Tukataila muli wewe.
Tukalondesya ukwiusya izina lyako na vino likapiliula.
9 Usiku onsi nkalondesya wewe nu umi wane onsi,
Icumi kwene umwenzo wane ukakulondesya;
Pano nga wapingula insi,
Antu ya mu nsi yakasambilila ulungami.
10 Umuntu umwipe
Asisambilila ulungami nanti cakuti yamuvwila uluse.
Nu mu mpanga ya yalungami kwene alacita iviipe,
Nupya atalalola ukulu wakwe Yeova.
11 We Yeova wakatusya ikasa lyako, lelo yasililola.
Yalalola vino watemwa sana antu yako.
Umoto wako uloca alwani yako.
12 We Yeova ulatupeela umutende,
Pano vyonsi vino twacita
Wewe walenga tukwanisye.
13 We Yeova Leza witu, twatungululwapo ni ntunguluzi zyuze,
Lelo tukalumbula sile izina lyako.
14 Yafwa; yatalaya nu umi nupya.
Yafwa, yatalakatuka nupya.
Wayafulula nu kuyonona
Nupya walovya mazina yao yonsi.
15 Watukuzya uluko we Yeova,
Watukuzya uluko;
Watuicindamika.
Watukuzya sana imipaka yonsi iya mu mpanga.
16 We Yeova, yapefile umu mwenzo
Nu kukunena vyonsi lino wayasunzile;
17 Wakwe vino umwanaci ali apiipi nu kupaapa
Akawaika nu kulila,
Avino twayuvwile pa mulandu naawe we Yeova.
18 Twakweti inda nupya twawaikwe pa mulandu nu ukali wa pa kupaapa,
Lelo cali kwati twavyala sile umuza.
Tutaalenga antu ya mu mpanga ukupusuka,
Nupya kutaya ali wensi uwavyalwa uwa kwikala umu mpanga.
19 “Antu yako afwa yalaya nu umi.
Vitumbi vya yantu yane vilakatuka.
Zyukini nu kupunda ni nsansa
Mwe yano mwikala umu lukungu!
Pano ulumi lwinu lulaya wa lumi lwa katondo,
Nupya insi ilaleka antu afwe ukuya nu umi nupya.
20 Mwe yantu yane, ingilini umu miputule inu iya mukasi,
Muyaleko ni visaasa.
Fisamini pa nsita inono
Mpaka ukali upite.
21 Pano lolini! Yeova akwiza ukufuma uku cifulo cakwe,
Umu kupingula antu ya mu mpanga pa luyembu lwao,
Nupya impanga ilasokolola uwazi uno antu aikalamo yazwisya
Nupya italatwalilila ukufisa antu aakomiilwemo.