MPENDWA

1 Nupya Yeova walanzile na Mose umu lwanga lwa Sinai, umwi tenti lya kupepelapo, pa wanda wa kutandikilako umu mwezi wakwe ciili, umu mwaka wakwe ciili ukufuma pano Aina Izlaeli yafumiile umu mpanga ya Ijipti. Wamunenyile ati: 2 “Penda Aina Izlaeli yonsi cila yano ukulingana ni ndupwa zyao, kulingana ni mitundu yao, nupya aonsi yonsi uyalembe mazina. 3 Wemo kumwi na Aloni mulembe yonsi aali ni myaka ukutandikila pali 20 nu kuya papela ukulingana na maumba yao, aangaomba usilika umu Izlaeli.

4 “Usoolole umonsi wenga ukufuma umu mutundu onga na onga; cila wino alaya u mukalamba mu mutundu wakwe. 5 Aonsi yano mulasoolola kuti yamwazwilizya aeya: mu mutundu wakwe Lubeni, a Elizuli mwana Syedeuli; 6 mu mutundu wakwe Simyoni, a Syelumieli mwana Zulisyadai; 7 mu mutundu wakwe Yuda, a Nasyoni mwana Aminadabu; 8 mu mutundu wakwe Isakali, a Netaneli mwana Zuali; 9 mu mutundu wakwe Zebuluni a Eliabu mwana Heloni; 10 mu mutundu wakwe ya mwana Jozefu, kuli kuti ukufuma muli Efulemu, a Elisyama mwana Amiudi; nupya ukufuma muli Manase, a Gamalieli mwana Pedazuli; 11 mu mutundu wakwe Benjamini, a Abidani mwana Gidyoni; 12 mu mutundu wakwe Dani, a Ahieza mwana Amisyadai; 13 mu mutundu wakwe Asyeli, a Pagieli mwana Okilani; 14 mu mutundu wakwe Gadi, a Eliyasafu mwana Deueli; 15 mu mutundu wakwe Nafutali, a Ahila mwana Enani. 16 Yakwene aasoolwilwe ukufuma umu Ina Izlaeli. Yaali ali yakalamba ya mitundu ya vikolwe vyao, nupya yaali ali yakalamba ya maumba ya mu Izlaeli.”

17 Fwandi Mose na Aloni yasenzile aonsi yaa aasoolwilwe. 18 Yakolonganike Aina Izlaeli yonsi pa wanda wa kutandikilapo umu mwezi wakwe ciili, pakuti yalembe cila wino izina lyakwe ukulingana nu lupwa lwakwe alino nu mutundu wakwe, kufuma pali wino ali ni myaka 20 ukuya papela, 19 kulingana na vino Yeova wanenyile Mose. Fwandi Mose wayalemvile umu lwanga lwa Sinai.

20 Ya mwana Lubeni, iyeli lyakwe Izlaeli, yalemvilwe mazina yao ukulingana ni ndupwa zyao alino ni mitundu yao. Aonsi yonsi aali ni myaka 20 nu kuya papela aangaomba usilika yapenzilwe, 21 nupya aalemvilwe umu mutundu wakwe Lubeni yaali 46,500.

22 Aafumile muli Simyoni yalemvilwe ukulingana ni ndupwa zyao alino ni mitundu yao. Aonsi yonsi aali ni myaka 20 nu kuya papela aangaomba usilika yapenzilwe, 23 nupya aalemvilwe umu mutundu wakwe Simyoni yaali 59,300.

24 Aafumile muli Gadi yalemvilwe mazina yao ukulingana ni ndupwa zyao alino ni mitundu yao. Aonsi yonsi aali ni myaka 20 nu kuya papela aangaomba usilika yapenzilwe, 25 nupya aalemvilwe umu mutundu wakwe Gadi yaali 45,650.

26 Aafumile muli Yuda yalemvilwe mazina yao ukulingana ni ndupwa zyao alino ni mitundu yao. Aonsi yonsi aali ni myaka 20 nu kuya papela aangaomba usilika yapenzilwe, 27 nupya aalemvilwe umu mutundu wakwe Yuda yaali 74,600.

28 Aafumile muli Isakali yalemvilwe mazina yao ukulingana ni ndupwa zyao alino ni mitundu yao. Aonsi yonsi aali ni myaka 20 nu kuya papela aangaomba usilika yapenzilwe, 29 nupya aalemvilwe umu mutundu wakwe Isakali yaali 54,400.

30 Aafumile muli Zebuluni yalemvilwe mazina yao ukulingana ni ndupwa zyao alino ni mitundu yao. Aonsi yonsi aali ni myaka 20 nu kuya papela aangaomba usilika yapenzilwe, 31 nupya aalemvilwe umu mutundu wakwe Zebuluni yaali 57,400.

32 Aafumile muli Jozefu ukupitila muli Efulemu yalemvilwe mazina yao ukulingana ni ndupwa zyao alino ni mitundu yao. Aonsi yonsi aali ni myaka 20 nu kuya papela aangaomba usilika yapenzilwe, 33 nupya aalemvilwe umu mutundu wakwe Efulemu yaali 40,500.

34 Aafumile muli Manase yalemvilwe mazina yao ukulingana ni ndupwa zyao alino ni mitundu yao. Aonsi yonsi aali ni myaka 20 nu kuya papela aangaomba usilika yapenzilwe, 35 nupya aalemvilwe umu mutundu wakwe Manase yaali 32,200.

36 Aafumile muli Benjamini yalemvilwe mazina yao ukulingana ni ndupwa zyao alino ni mitundu yao. Aonsi yonsi aali ni myaka 20 nu kuya papela aangaomba usilika yapenzilwe, 37 nupya aalemvilwe umu mutundu wakwe Benjamini yaali 35,400.

38 Aafumile muli Dani yalemvilwe mazina yao ukulingana ni ndupwa zyao alino ni mitundu yao. Aonsi yonsi aali ni myaka 20 nu kuya papela aangaomba usilika yapenzilwe, 39 nupya aalemvilwe umu mutundu wakwe Dani yaali 62,700.

40 Aafumile muli Asyeli yalemvilwe mazina yao ukulingana ni ndupwa zyao alino ni mitundu yao. Aonsi yonsi aali ni myaka 20 nu kuya papela aangaomba usilika yapenzilwe, 41 nupya aalemvilwe umu mutundu wakwe Asyeli yaali 41,500.

42 Aafumile muli Nafutali yalemvilwe mazina yao ukulingana ni ndupwa zyao alino ni mitundu yao. Aonsi yonsi aali ni myaka 20 nu kuya papela aangaomba usilika yapenzilwe, 43 nupya aalemvilwe umu mutundu wakwe Nafutali yaali 53,400.

44 Yakwene ayano Mose na Aloni ni ntunguluzi 12 izya mu Izlaeli yalemvile, cila muntu pa ntunguluzi zizyo wimililangako umutundu wakwe. 45 Aina Izlaeli yonsi aali ni myaka 20 nu kuya papela aangaomba usilika umu Izlaeli, yalemvilwe ukulingana ni mitundu yao, 46 nupya yonsi aalemvilwe yaali 603,550.

47 Lelo Aina Levi yene yataalemvilwe ukulingana ni mitundu ya vikolwe vyao. 48 Lyene Yeova wanenyile Mose ati: 49 “Amu mutundu wakwe Levi yene utalinzile ukuyalemba, nupya utalinzile ukulunda impendwa yao pa Ina Izlaeli yauze. 50 Ulinzile ukusonta Aina Levi kuti yasakamala icikuulwa ca muzilo umwaya Imbokosi ya Upangano kumwi ni viya vyonsi ivyayamo. Yalaasenda icikuulwa ca muzilo kumwi ni viya vyonsi ivyayamo, nupya yalaaombela pa cikuulwa kwene cico, yalaapanga ni nkambi ukuzinguluka icikuulwa ca muzilo. 51 Lyonsi lino calondekwa ukukuusya icikuulwa ca muzilo, Aina Levi yalinzile ukucikuululula; nupya lino calondekwa ukucikuula, Aina Levi aalakuula; nupya umuntu ali wensi aatazumiliziwa uwapalamako alinzile ukukomwa.

52 “Umwina Izlaeli wensi alinzile ukupangila itenti lyakwe pa ncende ino watapeelwa, cila muntu akaye umwi umba lyakwe kulingana ni mitundu itatu. 53 Nupya Aina Levi yalinzile ukupanga inkambi ukuzinguluka icikuulwa ca muzilo umuli Imbokosi ya Upangano, pakuti ukali wane utaca wize pa Ina Izlaeli yonsi; nupya Aina Levi yace yasakamala icikuulwa ca muzilo umuli Imbokosi ya Upangano.”

54 Aina Izlaeli yacisile vyonsi vino Yeova wanenyile Mose. Vivyo kwene avino yacisile.

2 Lyene Yeova wanenyile Mose na Aloni ati: 2 “Aina Izlaeli yalinzile ukupangila inkambi pa ncende ino imitundu yao itatu yapeelwa, cila muntu alinzile ukuya umupiipi ni ncende ya cikolwe cakwe. Yalinzile ukupanga inkambi ukuzinguluka itenti lya kupepelapo.

3 “Imitundu itatu yakwe Yuda, ilaapangila inkambi uku ufumondaka kuno ilanzi likatunkila kulingana na maumba yao; intunguluzi yakwe ya mwana Yuda a Nasyoni mwana Aminadabu. 4 Aalemvilwe umwi umba lyakwe yaali 74,600. 5 Umutundu wakwe Isakali ulaapangila inkambi umupiipi nu mutundu wakwe Yuda; intunguluzi yakwe ya mwana Isakali a Netaneli mwana Zuali. 6 Aalemvilwe umwi umba lyakwe yaali 54,400. 7 Lyene palaakonka umutundu wakwe Zebuluni; intunguluzi yakwe ya mwana Zebuluni a Eliabu mwana Heloni. 8 Aalemvilwe umwi umba lyakwe yaali 57,400.

9 “Yonsi aalemvilwe umu maumba umu nkambi yakwe Yuda yaali 186,400. Nupya yakwene aliyo yalaatandikilapo ukupangulula inkambi.

10 “Imitundu itatu yakwe Lubeni ilaapangila inkambi lwa ku kaeya kulingana na maumba yao; intunguluzi yakwe ya mwana Lubeni a Elizuli mwana Syedeuli. 11 Aalemvilwe umwi umba lyakwe yaali 46,500. 12 Umutundu wakwe Simyoni ulaapangila inkambi umupiipi nu mutundu wakwe Lubeni; intunguluzi yakwe ya mwana Simyoni a Syelumieli mwana Zulisyadai. 13 Aalemvilwe umwi umba lyakwe yaali 59,300. 14 Lyene palaakonka umutundu wakwe Gadi; intunguluzi yakwe ya mwana Gadi a Eliyasafu mwana Leweli. 15 Aalemvilwe umwi umba lyakwe yaali 45,650.

16 “Yonsi aalemvilwe umu maumba umu nkambi yakwe Lubeni yaali 151,450, nupya aalaalondelelapo ukupangulula inkambi.

17 “Lino yakukuusya itenti lya kupepelapo, umutundu wa Ina Levi ulinzile ukuya pakasi ka mitundu yuze.

“Amu mitundu yalinzile ukupita ukulingana ni mitundu ino yayelilemo, kuli kuti umu mitundu yao itatu.

18 “Mitundu itatu yakwe Efulemu ilaapangila inkambi lwa ku uwondaka ukulingana na maumba yao; intunguluzi yakwe ya mwana Efulemu a Elisyama mwana Amiudi. 19 Aalemvilwe umwi umba lyakwe yaali 40,500. 20 Lyene palaakonka umutundu wakwe Manase; intunguluzi yakwe ya mwana Manase a Gamalieli mwana Pedazuli. 21 Aalemvilwe umwi umba lyakwe yaali 32,200. 22 Lyene palaakonka umutundu wakwe Benjamini; intunguluzi yakwe ya mwana Benjamini a Abidani mwana Gidyoni. 23 Aalemvilwe umwi umba lyakwe yaali 35,400.

24 “Yonsi aalemvilwe umu maumba umu nkambi yakwe Efulemu yaali 108,100, nupya aliyo aalaya yakwe citatu ukupangulula inkambi.

25 “Mitundu itatu yakwe Dani ilaapangila inkambi uku katutu kulingana na maumba yao; intunguluzi yakwe ya mwana Dani a Ahieza mwana Amisyadai. 26 Aalemvilwe umwi umba lyakwe yaali 62,700. 27 Lyene ulaakonkapo u mutundu wakwe Asyeli; intunguluzi yakwe ya mwana Asyeli a Pagieli mwana Okilani. 28 Aalemvilwe umwi umba lyakwe yaali 41,500. 29 Alino lyene palaakonka umutundu wakwe Nafutali; intunguluzi yakwe ya mwana Nafutali a Ahila mwana Enani. 30 Aalemvilwe umwi umba lyakwe yaali 53,400.

31 “Yonsi aalemvilwe umu nkambi yakwe Dani yaali 157,600. Yakwene aalaasyalikizya ukupangulula inkambi kulingana ni mitundu yao itatu.”

32 Yakwene ali Ina Izlaeli aalemvilwe ukulingana ni vikolwe vyao; yonsi pamwi aalemvilwe umu nkambi yaali 603,550. 33 Lelo Aina Levi yataalembiilwe pamwi na Ina Izlaeli yauze, wakwe vino Yeova wanenyile Mose. 34 Aina Izlaeli yacisile vyonsi vino Yeova wanenyile Mose. Vikwene avino yapanzile inkambi ukulingana na maumba yao umwali mitundu itatu nupya vivyo kwene avino yapangululanga inkambi, cila muntu ukulingana nu lupwa lwakwe ni vikolwe vyakwe.

3 Zii izyali ali ndupwa zyakwe Aloni na Mose pa nsita ino Yeova walanzile na Mose pa mwamba wa Sinai. 2 Amazina yakwe ya mwana Aloni aonsi aeya: Nadabu ali yeli, alino palondelela Abihu, Elieza, na Itamali. 3 Yakwene ali ya mwana Aloni aonsi aasonsilwe kuti yaomba usimapepo. 4 Lelo Nadabu na Abihu yaafwile pa nkoleelo yakwe Yeova lino yapeezile ivinunkile kuli Yeova pa moto uutazumiliziwe umu lwanga lwa Sinai, nupya yataakwetipo ana ali yonsi. Elieza na Itamali yene yatwalilile ukuomba usimapepo pamwi na Aloni isi.

5 Lyene Yeova wanenyile Mose ati: 6 “Leta amu mutundu wakwe Levi nu kuimika pa nkoleelo yakwe Aloni simapepo, nupya yalaamwavwilizya imilimo. 7 Yalaamwavwilizya imilimo nu kwavwilizya Aina Izlaeli yonsi api tenti lya kupepelapo lino yakuomba imilimo yao pa cikuulwa ca muzilo. 8 Yalaasakamala iviya vyonsi ivya pi tenti lya kupepelapo nu kuomba imilimo ya pa cikuulwa ca muzilo, nupya nga yakucita vivyo ala yakwazwilizya Aina Izlaeli. 9 Uce upeele Aina Levi kuli Aloni nu ku yana yakwe. Pano yene yapeelwa kuli aliwe ukufuma umu Ina Izlaeli. 10 Ulinzile ukusonta Aloni na ana yakwe aonsi, nayo yalaaomba imilimo yakwe usimapepo, nupya umuntu ali wensi aatazumiliziwa* uwapalamako, alinzile ukukomwa.”

11 Yeova watwalilile ukunena Mose ati: 12 “Lola! Ninsoolola Aina Levi aakupyanikizya pa mayeli yonsi aa Ina Izlaeli, nupya yalaya antu yane. 13 Pano iyeli lyonsi i lyane. Pa wanda uno nakomile mayeli yonsi umu mpanga ya Ijipti, nailenzile ukuya uwa muzilo ku mayeli yonsi amu Izlaeli ukutandikila pa muntu ukufika uku nyama. Yalaya aane. Nene Yeova.”

14 Nupya kwene Yeova wanenyile Mose umu lwanga lwa Sinai ati: 15 “Lemba ya mwana Levi aonsi kulingana ni vikolwe vyao alino ni ndupwa zyao. Ulinzile ukulemba umonsi ali wensi ali nu mwezi onga nu kuya papela.” 16 Mose wayalemvile ukulingana na vino Yeova wamunenyile. 17 Mazina yakwe ya mwana Levi aonsi aeya: Gesyoni, Koati, na Melali.

18 Nupya mazina yakwe ya mwana Gesyoni aonsi ukulingana ni ndupwa zyao aeya: Libini na Syimei.

19 Mazina yakwe ya mwana Koati aonsi ukulingana ni ndupwa zyao aeya: Amulamu, Izali, Hebuloni, na Uzieli.

20 Mazina yakwe ya mwana Melali aonsi ukulingana ni ndupwa zyao aeya: Maali na Musyi.

Zikwene i zyali indupwa zya Ina Levi ukulingana ni vikolwe vyao.

21 Muli Gesyoni u mwafumile ulupwa lwa Ina Libini nu lwa Ina Syimei. Zikwene i zyali indupwa zya Ina Gesyoni. 22 Aonsi yonsi aalemvilwe aali nu mwezi onga nu kuya papela yaali 7,500. 23 Indupwa zya Ina Gesyoni zyapanzile inkambi ukwi tundu lya cikuulwa ca muzilo lwa ku uwondaka. 24 Eliyasafu mwana Laeli u wali intunguluzi umu lupwa lwa Ina Gesyoni. 25 Umulimo uno ya mwana Gesyoni yaombanga umwi tenti lya kupepelapo wali uwa kusakamala icikuulwa ca muzilo, kumwi ni tenti lya kuvimbapo, iketani lya pa mulyango wi tenti lya kupepelapo, 26 maketani aakucingilizya umusolo, iketani lya pa mulyango wa kwingilila umu musolo uwazinguluka icikuulwa ca muzilo nu ulambo, kumwi ni ntambo zya kwi tenti, na vyonsi ivyakumile umulimo uwo.

27 Muli Koati u mwafumile ulupwa lwa Ina Amulamu, ulupwa lwa Ina Izali, ulupwa lwa Ina Hebuloni alino nu lupwa lwa Ina Uzieli. Zikwene i zyali indupwa zya Ina Koati. 28 Aonsi yonsi aali nu mwezi onga nu kuya papela yaali 8,600; yaakweti mulimo wa kusakamala incende ya muzilo. 29 Indupwa zyakwe ya mwana Koati zyapanzile inkambi ku kaeya ka cikuulwa ca muzilo. 30 Elizafani mwana Uzieli u wali ali ntunguluzi umu lupwa lwa Ina Koati. 31 Mulimo wao wali uwa kusakamala Imbokosi ya Upangano, tebo, ca kuteekapo ya lampi, maulambo, iviya ivyaomviwanga umu ncende ya muzilo, iketani lya mukasi, na vyonsi ivyakumile umulimo uwo.

32 Elieza mwana Aloni simapepo uwali ntunguluzi ya Ina Levi, u wangalilanga aombanga imilimo pa ncende ya muzilo.

33 Muli Melali u mwafumile ulupwa lwa Ina Maali nu lwa Ina Musyi. Zikwene i zyali indupwa zya ina Melali. 34 Aonsi yonsi aali nu mwezi onga nu kuya papela aalemvilwe yaali 6,200. 35 Zulieli mwana Abihaili u wali ali ntunguluzi umu ndupwa zya Ina Melali. Yapangiile inkambi ku katutu ka cikuulwa ca muzilo. 36 Ya mwana Melali yaakweti umulimo wa kusakamala mafulemu ya ku cikuulwa ca muzilo, tumiti ututali, incesi, twakwimikapo mafulemu, ni viya vyonsi ivya mu cikuulwa ca muzilo, na vyonsi ivyakumile mulimo uwo, 37 kumwi ni ncesi izyazingulwike umusolo nu twakwimikapo incesi, impopo, alino ni ntambo zya kwi tenti.

38 Mose na Aloni na ana yakwe yapangiile inkambi uku nkoleelo ya cikuulwa ca muzilo lwa ku ufumondaka, mupiipi ni tenti lya kupepelapo lwa kuno kukatunkila ilanzi. Yaakweti mulimo wa kusakamala incende ya muzilo ukwimililako Aina Izlaeli. Umuntu wensi aatazumiliziwe* uwapalamako wali nu kukomwa.

39 Aonsi yonsi Aina Levi aali nu mwezi onga nu kuya papela, yano Mose na Aloni yalemvile ukulingana ni ndupwa zyao nupya wakwe vino Yeova walanzile, yaali 22,000.

40 Lyene Yeova wanenyile Mose ati: “Lemba aonsi yonsi mayeli aa Ina Izlaeli aali nu mwezi onga nu kuya papela, uyapende nu kuyalemba mazina yao. 41 Umpatwileko Aina Levi pakuti yapyane pa mayeli yonsi aa Ina Izlaeli, nene Yeova, nupya umpatwile iviteekwa vya Ina Levi pakuti vipyane pa mayeli ya viteekwa vyonsi ivya Ina Izlaeli.” 42 Lyene Mose walemvile mayeli yonsi amu Izlaeli, wakwe vino Yeova wamunenyile. 43 Aonsi yonsi mayeli aalemvilwe mazina aali nu mwezi onga nu kuya papela yaali 22,273.

44 Yeova watwalilile ukunena Mose ati: 45 “Mpatwile Aina Levi aakupyanikizya pa mayeli ya Ina Izlaeli yonsi, nupya soolola iviteekwa vya Ina Levi ivya kupyanikizya pa viteekwa vya Ina Izlaeli, Aina Levi yalaya aane. Nene Yeova. 46 Pa kukulula mayeli aonsi 273 aa Ina Izlaeli aatiyavula ukucila Aina Levi, 47 masyekele* 5 yalinzile ukulipilwa pi yeli lyonga ukulingana ni cipimo cakwe syekele icikaomviwa pa ncende ya muzilo. Syekele wenga alinzile ukulingana na magela* 20. 48 Uce upeele Aloni na ana yakwe impiya zya kukulwila mayeli ya Ina Izlaeli aatiyacila Aina Levi.” 49 Fwandi Mose watozile impiya izya kukulwilako mayeli ya Ina Izlaeli aacizile Aina Levi. 50 Watozile impiya uku mayeli ya Ina Izlaeli izyali masyekele 1,365 kulingana ni cipimo cakwe syekele icaomviwanga pa ncende ya muzilo. 51 Lyene Mose wapeezile Aloni na ana yakwe aonsi impiya zizyo kulingana na vino Yeova walanzile, nupya wakwe viivi kwene vino Yeova wanenyile Mose.

4 Lyene Yeova wanenyile Mose na Aloni ati: 2 “Mupende ya mwana Koati aonsi ukufuma muli ya mwana Levi aonsi, muyapende ukulingana ni ndupwa zyao ni vikolwe vyao, 3 mupende yonsi ali ni myaka 30 ukufika kuli 50 aali umwi umba ilyapeelwa umulimo wa kuombela umwi tenti lya kupepelapo.

4 “Umulimo uwa muzilo sana uno ya mwana Koati aonsi yalaaomba umwi tenti lya kupepelapo aewu: 5 Aloni na ana yakwe yalaingila umwi tenti lya kupepelapo lino Aina Izlaeli yakupangulula inkambi, yalaatola ketani uwalekanya umuputule wa muzilo nu wa muzilo sana nu kuvimba Imbokosi ya Upangano. 6 Yalaavimbapo impapa itontekane ni insalu yakwe bulu itikame nupya yalaasomekamo nu tumiti ututali utwa kusendelako.

7 “Yace yaanza ni insalu yakwe bulu itikame pali tebo wa mikate ya muzilo, nupya yace yaikapo imbale izisaalale, makapu, imbale izifunkane ni insembo ivya kuomvya ku upe wa vyakumwa; nupya yafwile kuswilizya umukate pali tebo uukapeelwa lyonsi kuli Leza. 8 Lyene yace yavimbapo insalu iyenzu alino ni mpapa itontekane nupya yace yasomekamo nu tumiti ututali utwa kusendelako. 9 Nupya yace yaatola insalu yakwe bulu nu kuvimba pa ca kuteekapo ya lampi aakapeela uluswepo kumwi na ya lampi kwene, ivyakulemelako umoto alino ni viya vyonsi muno yakasungila mafuta aakwika muli ya lampi. 10 Yalaacipombelezya umu mpapa itontekane kumwi ni viya vyonsi vya pa ca kuteekapo ya lampi nu kuciika pa lumbao lwa kusendelapo. 11 Nupya yalaavimba ulambo wakwe goldi ukuomvya insalu yakwe bulu, yalaavimbapo ni impapa itontekane, nupya yalaingizyamo nu tumiti ututali utwa kusendelako. 12 Lyene yalaatola iviya vyonsi vino yakaomvya lyonsi lino yakuombela umu ncende ya muzilo, yalaavika umu nsalu yakwe bulu nu kuvimbapo ni mpapa itontekane alino iyavika pa lumbao lwa kusendelapo.

13 “Yace yafumyapo itwi* pa ulambo alino iyanzapo insalu iyenzulukile. 14 Lyene yace yaikapo iviya vyonsi ivikaomviwa lino yakuombela pa ulambo, kuli kuti ivyakulemelako umoto, ya foloko, ya fosyolo, ya beseni ni viya vyonsi vya pa ulambo; nupya yace yavimbapo impapa itontekane nu kusomekamo utumiti ututali utwa kusendelako.

15 “Aloni na ana yakwe yalinzile ukumalilila ukuvimba iviya vyonsi vya pa ncende ya muzilo lino Aina Izlaeli yakupangulula inkambi. Lyene ya mwana Koati aonsi yalaiza mukusenda ivintu vivyo, lelo yatalinzile ukuvilemamo pano nga yacita vivyo yalafwa. Ikwene ali milimo ino ya mwana Koati aonsi yalaaomba pi tenti lya kupepelapo.

16 “Elieza mwana Aloni simapepo alaomba umulimo wa kusakamala mafuta aakukozezya muli ya lampi, kusakamala ivinunkile, upe wa vyakulya uukapeelwa lyonsi alino na mafuta ya muzilo. Aliwe alaangalila icikuulwa ca muzilo consi na vyonsi ivyayamo kumwi ni incende ya muzilo ni viya vyonsi ivyayamo.”

17 Yeova watwalilile ukunena Mose na Aloni ati: 18 “Mutaca muleke Aina Koati amu mutundu wakwe Levi yafwe. 19 Lelo pakuti yataca yafwe pa mulandu wa kupalama uku vintu vya muzilo sana, Aloni na ana yakwe aonsi yalaingila umwi tenti lya kupepelapo nu kupeela cila muntu umulimo uno alinzile ukuomba na vino alinzile ukusenda. 20 Aina Koati yatalinzile ukwingila umwi tenti lya kupepelapo pakuti yalole ivintu vya muzilo nanti sile apa kasita kanono, pano nga yacita vivyo yalafwa.”

21 Lyene Yeova wanenyile Mose ati: 22 “Ulinzile ukupenda ya mwana Gesyoni aonsi ukulingana ni vikolwe vyao alino ni ndupwa zyao. 23 Uce ulembe yonsi aali ni myaka 30 ukufika kuli 50 aali umwi umba ilyapeelwa umulimo wa kuombela umwi tenti lya kupepelapo. 24 Umulimo uno Aina Gesyoni yalaaomba ni viya vino yalaasenda aevi: 25 Yalaasenda insalu zya ku cikuulwa ca muzilo, insalu zya kuvimba umukasi ki tenti lya kupepelapo nu kunzi alino ni impapa itontekane iya kuvimba papela, ketani wa pa mulyango uwi tenti lya kupepelapo, 26 maketani ya pa musolo, ketani wa pa mulyango wa kwingilila umu musolo uno wazinguluka icikuulwa ca muzilo nu ulambo, intambo zya kwi tenti kumwi ni viya vyonsi ivikaomviwa ku mulimo wa pi tenti lya kupepelapo. Ukwene ali mulimo uno yalaaomba. 27 Aloni na ana yakwe aliyo yalaangalila imilimo yonsi ino Aina Gesyoni yalaaomba; muce mwayapeela imilimo yii yonsi. 28 Iyo kwene ali milimo ino Aina Gesyoni yalaaomba umwi tenti lya kupepelapo, nupya Itamali mwana Aloni simapepo aliwe alayangalila.

29 “Lyene uce ulembe ya mwana Melali aonsi kulingana ni ndupwa zyao alino ni cikolwe cao. 30 Uce ulembe yonsi ali ni myaka 30 ukufika kuli 50 aali umwi umba ilyapeelwa umulimo uwa kuombela umwi tenti lya kupepelapo. 31 Ivintu vino yalaasenda pi tenti lya kupepelapo aevi: mafulemu ya pa cikuulwa ca muzilo, tumiti ututali, incesi, umwakusomeka incesi; 32 incesi izyazinguluka umusolo, umwakwingizya incesi, impopo, intambo zya kwi tenti kumwi ni viya vyonsi alino na vyonsi ivikumile umulimo uwo. Muce muyapeele cila muntu vino alinzile ukusenda. 33 Ukwene ali mulimo uno indupwa zyakwe ya mwana Melali aonsi zilaaomba pi tenti lya kupepelapo, yalaatungululwa na Itamali mwana Aloni simapepo.”

34 Lyene Mose na Aloni kumwi ni ntunguluzi zya Ina Izlaeli yalemvile ya mwana Koati aonsi ukulingana ni ndupwa zyao alino ni cikolwe cao, 35 yalemvile yonsi ali ni myaka 30 ukufika kuli 50 aali umwi umba ilyapeezilwe umulimo wa kuombela umwi tenti lya kupepelapo. 36 Yonsi pamwi aalemvilwe ukulingana ni ndupwa zyao yali 2,750. 37 Yonsi yaa aombelanga api tenti lya kupepelapo yalemvilwe ukufuma umu ndupwa zya Ina Koati. Mose na Aloni yayalemvile ukulingana na vino Yeova walanzile ukupitila muli Mose.

38 Ya mwana Gesyoni aonsi yalemvilwe ukulingana ni ndupwa zyao alino ni cikolwe cao, 39 yalemvile yonsi aali ni myaka 30 ukufika kuli 50 aali umwi umba ilyapeezilwe umulimo uwa kuombela umwi tenti lya kupepelapo. 40 Yonsi aalemvilwe ukulingana ni ndupwa zyao alino ni cikolwe cao yali 2,630. 41 Zikwene aali ndupwa zyakwe ya mwana Gesyoni aonsi aalemvilwe, kuli kuti yonsi aombelanga api tenti lya kupepelapo. Mose na Aloni yayalemvile ukulingana na vino Yeova walanzile.

42 Ya mwana Melali aonsi yalemvilwe ukulingana ni ndupwa zyao alino ni cikolwe cao, 43 yalemvile yonsi aali ni myaka 30 ukufika kuli 50 aali umwi umba ilyapeezilwe umulimo uwa kuombela umwi tenti lya kupepelapo. 44 Yonsi aalemvilwe ukulingana ni ndupwa zyao yali 3,200. 45 Zikwene aali ndupwa zyakwe ya mwana Melali aonsi aalemvilwe, yano Mose na Aloni yalemvile ukulingana na vino Yeova wanenyile Mose.

46 Mose na Aloni ni ntunguluzi zya Ina Izlaeli yalemvile Aina Levi yaa yonsi ukulingana ni ndupwa zyao alino ni vikolwe vyao; 47 aalemvilwe yali ni myaka 30 ukufika kuli 50, nupya yonsi yapeezilwe umulimo wa kuomba nu kusenda iviya ivyaomviwanga pi tenti lya kupepelapo. 48 Yonsi aalemvilwe yali 8,580. 49 Yalemvilwe ukulingana na vino Yeova walanzile ukupitila muli Mose, cila muntu kulingana nu mulimo uno waombanga alino ni viya vino wasendanga; yalemvilwe wakwe viivi kwene vino Yeova wanenyile Mose.

5 Yeova watwalilile ukunena Mose ati: 2 “Nena Aina Izlaeli uti yafumye umu nkambi umuntu wensi uwalwala tembwe, na wensi akufuma vimwi alino na wensi uwaikowezya ku citumbi ca muntu. 3 Aye u monsi nanti u mwanaci, mulinzile ukumufumya ukunzi. Mulinzile ukumutwala ukunzi ya nkambi, pakuti atakowezya inkambi muno nkaikala.” 4 Fwandi Aina Izlaeli yacisile vivyo kwene, yatwazile antu yayo ukunzi ya nkambi. Viivi kwene vino Yeova wanenyile Mose avino yacisile.

5 Yeova watwalilile ukunena Mose ati: 6 “Nena Aina Izlaeli uti, ‘Ndi cakuti umonsi nanti umwanaci wayembukila Yeova ukupitila umu kucita iciipe uku muntu muze, ala umuntu wiyo waya nu mulandu. 7 Alinzile ukusokolola uluyembu luno watacita nu kulipila malipilo aakumanile pa mulandu uwo, nupya alinzile ukulundapo icalenga 5 ica malipilo yayo; alapeela malipilo yayo kuli wino watacitako iciipe. 8 Lelo ndi cakuti wino yacisile iciipe wafwa nupya atakweti lupwa umupalamisye uwa kupoka malipilo yayo, ale malipilo yayo yafwile ukupeelwa kuli Yeova nupya yalaya akwe simapepo, kufumyako sile suuku wa kufuutilako uluyembu wino simapepo alaomvya uku kufuutila uluyembu lwa muntu uwaluvyanyizye.

9 “‘Umusangulo onsi uwa muzilo onsi uno Aina Izlaeli yapeela kuli simapepo, ulaya u wakwe simapepo kwene. 10 Ivya muzilo vino umuntu wensi wapeela vilaya i vyakwe simapepo. Consi cino umuntu wapeela kuli simapepo, cilaya i cakwe simapepo.’”

11 Yeova watwalilile ukunena Mose ati: 12 “Nena Aina Izlaeli uti, ‘Ndi cakuti umuci wapondokela iya 13 nupya umonsi muze walaala nawe, lelo iya ataamanyile nupya icaticicitika citasokolwike, nupya wataikowezya lelo kusi kambone nanti uwamulemwile, vino cifwile ukuya aevi: 14 Ndi cakuti iya waya nu uzuwa nupya akutwisika ucisinka wa muci wakwe lino wataikowezya nanti lino ataikowizye, 15 alinzile ukutwala umuci kuli simapepo kumwi nu upe wa muci, kuli kuti fulaulo wakwe baale aangalingana na kilogilamu wenga. Atalinzile ukwitilapo mafuta nanti ukwikapo ivinunkile, pano uupe wa vyakulya uwa pa uzuwa, uwa kumanyilako ndi cakuti umwanaci ali nu mulandu nanti foo.

16 “‘Simapepo alatwala umwanaci pa nkoleelo nu kumwimika pa nkoleelo yakwe Yeova. 17 Lyene alatola manzi ya muzilo aali umu nsembo, nupya alatola ulutukumbu lumwi ulwa mu cikuulwa ca muzilo nu kulwika umu manzi. 18 Nupya simapepo alimika umwanaci pa nkoleelo yakwe Yeova nu kumusapula inyele, alamwikila nu upe wa vyakulya umu minwe uwa kumanyilako ndi cakuti ali nu mulandu nanti foo, kuli kuti upe wa vyakulya uwa pa uzuwa, nupya simapepo alalema manzi alule umu minwe yakwe aakaleta icitiipu.

19 “‘Lyene simapepo alaleka umwanaci alape, alamunena ati: “Ndi cakuti kusi umonsi muze uwaizi naawe ukufuma pano watwalilwa nupya utaamupondokela nu kuikowezya, uye umuntungwa uku manzi yaa alule aakaleta icitiipu. 20 Lelo ndi cakuti wapondokiile uwako ale watwalwa ukupitila umu kuikowezya nupya ndi cakuti waizi nu monsi muze ukucila pa wako—” 21 Lyene simapepo alalenga umwanaci ukulapa umulapo wa citiipu, alamunena ati: “Si Yeova aleke antu yalolele kuli wewe lino yakulapa imilapo ya vitiipu, ndi cakuti umu cumi avino watucita Yeova alalenga ukuti utaca ukwate ana* nupya alalenga ulunda lwako ukuvimba. 22 Amanzi yaa aakaleta icitiipu yamaingila umu mala yako nu kulenga ulunda lwako ukuvimba nupya utalakwata ana.” Umwanaci nawe alalanda ati: “Ameni! Ameni!”*

23 “‘Lyene simapepo alinzile ukulemba ivitiipu vivyo mu lupapulo nu kulutimpika umu manzi alule. 24 Lyene simapepo alaleka umwanaci ukumwa manzi alule aakaleta icitiipu nupya yalingila muli aliwe nu kumulenga ukuti auvwe ukuwaya. 25 Nupya simapepo alatola upe wa vyakulya uwa uzuwa ukufuma umwi kasa lya mwanaci nu kuuzulunzya pa nkoleelo yakwe Yeova, nupya alautwala umupiipi nu ulambo. 26 Simapepo alatola upe wa vyakulya ukuzuuzya ikufi nu kuoca pa ulambo pakuti upokelelwe, lyene pa cisila alaleka ukuti umwanaci amwe amanzi alule. 27 Ndi cakuti simapepo waleka umwanaci wamwa manzi alule, nga wacita ucende nu kupondokela iya, amanzi aakaleta icitiipu yalingila muli aliwe nu kulenga ukuti auvwe ukuwaya nupya ulunda lwakwe lulavimba, alata nu kuvyala ana nupya antu yalaamulumbula umu milapo yao. 28 Lelo ndi cakuti umwanaci ataikowizye nupya u musanguluke, ale atalafululwa, nupya alaavyala ana.

29 “‘Lii ali sunde lya pa uzuwa, ndi cakuti umwanaci wapondokela iya nanti ukuikowezya lino acili watwalwa kuli aliwe, 30 nanti ndi cakuti iya waya nu uzuwa nu kutunganya umuci ukuti watacita ucende; alinzile ukwimikwa pa nkoleelo yakwe Yeova, nupya simapepo alinzile ukucita kuli aliwe vyonsi ivili umwi sunde lii. 31 Umonsi atalaya nu mulandu, lelo umuci nga ali nu mulandu alafululwa.’”

6 Yeova watwalilile ukunena Mose ati: 2 “Nena Aina Izlaeli uti, ‘Ndi cakuti umonsi nanti umwanaci walapa umulapo uiyele uwa kuya Umunazili* kuli Yeova, 3 atalinzile ukumwa waini ni vyakumwa vyuze ivikakola. Atalinzile ukumwa waini umukantuke nanti icakumwa icili consi icikantuke icikakola. Nupya atalinzile ukumwa ivyakumwa ivili vyonsi ivyapangilwa ni myangazi, nanti ukulya imyangazi iisi nanti iyume. 4 Manda yonsi yano alaya Umunazili, atalinzile ukulya icili consi icapangilwa ni myangazi, atafwile ukulya imyangazi iisi nanti sile i vipaapa kwene.

5 “‘Manda yonsi yano alalapa ukuya Umunazili, atalinzile ukupela inyele uku mutwe. Alatwalilila ukuya uwa muzilo ukupitila umu kuleka inyele zyakwe ukukula ukufikila manda yano waipeela kuli Yeova yace yakumane. 6 Atalinzile ukupalama uku citumbi ca muntu umu manda yonsi yano waipeela kuli Yeova. 7 Nanti isi wafwa nanti nyina nanti umwinakwe nanti kaci wakwe, atalinzile ukuikowezya, pano icimanyililo ca Unazili icakuti waipeela kuli Leza caya pa mutwe wakwe.

8 “‘Alaya uwa muzilo kuli Yeova manda yonsi yano alaya Umunazili. 9 Lelo ndi cakuti umwi wafwila umupiipi nawe umu kupumikizya nupya wakowezya inyele, icaya icilangililo cakuti waipeela kuli Leza, alinzile ukupela inyele pa wanda uno akusangululwa, kuli kuti pa wanda uwalenga 7. 10 Nupya pa wanda uwalenga 8, alinzile ukutwala inkunda ziili nanti vipeele viili kuli simapepo pa mulyango wi tenti lya kupepelapo. 11 Simapepo alaomvya icunyi conga ukuya ilambo lya pa luyembu alino ni cuze ukuya ilambo lya koca nupya alafuutila umuntu wiyo uluyembu pa mulandu wa kukoweziwa ni citumbi. Lyene umuntu wiyo alasangulula umutwe wakwe pa wanda kwene uwo. 12 Nupya kwene alinzile ukuipeela kuli Yeova pa manda yaya kwene yano walavile ukuya Umunazili, alinzile nu kutwala suuku wa mwaka onga ukuya ilambo lya pa mulandu. Lelo kutalaya ukupenda manda ya ku cisila pano waikowizye lino wali Umunazili.

13 “‘Lyene vino cifwile ukuya uku Munazili aevi: Ndi cakuti manda yakwe aakuya Umunazili yakumana, alinzile ukutwalwa pa mulyango wi tenti lya kupepelapo. 14 Paapa kwene apano alinzile ukupeelela malambo yakwe kuli Yeova, kuli kuti suuku wenga umusuma uwa mwaka onga pakuti aye ilambo lya koca, imfwele yonga iya kaci iya mwaka onga kuti iye ilambo lya pa luyembu, suuku wenga umusuma kuti aye ilambo lya mutende, 15 Basiketi umuli imikate iyaula icitutumusi iulungane iikweti ivipongo iyapangilwa na fulaulo umusuma umusaakanye na mafuta, alino ni mikate ipapatane iyaula icitutumusi iisaakanye na mafuta, alino nu upe wa vyakulya nu upe wa vyakumwa. 16 Simapepo alavitwala pa nkoleelo yakwe Yeova nupya alapeelela umuntu wiyo ilambo lyakwe ilya pa luyembu ni lambo lya koca. 17 Alapeela suuku ukuya ilambo lya mutende kuli Yeova kumwi na basiketi umuli imikate iyaula icitutumusi, nupya simapepo alapeelela suuku wiyo pamwi nu upe wa vyakulya nu upe wa vyakumwa.

18 “‘Lyene Umunazili alinzile ukupelela inyele pa mulyango wi tenti lya kupepelapo, nupya alatola inyele izyakuzile lino wali Umunazili nu kuzyoca pa moto uwa pi lambo lya mutende. 19 Nupya simapepo alinzile ukutola ikasa lyakwe suuku ilyeleke, umukate onga uwaula icitutumusi ukufuma muli basiketi, nu mukate upapatane onga uwaula icitutumusi, nu kuvika umu makasa ya Munazili pa cisila cakuti wapela inyele. 20 Lyene simapepo alinzile ukuzulunzya ivintu vivyo ukuya upe wa kuzulunzya kuli Yeova. Vilaya ivya muzilo vyakwe simapepo, kumwi ni cisao ca upe wa kuzulunzya alino ni kulu ilyatilipeelwa ukuya umusangulo. Lyene pa cisila Umunazili angamwa waini.

21 “‘Lyene vino cifwile ukuya uku Munazili uwalapa umulapo aevi: Ndi cakuti walapa umulapo nupya angakwanisya ukupeela ilambo kuli Yeova ilicizile pali vino vikalondekwa uku Yanazili, alinzile ukufikilizya umulapo pa mulandu nu kucindika isunde lya Yanazili.’”

22 Lyene Yeova wanenyile Mose ati: 23 “‘Nena Aloni na ana yakwe aonsi uti, ‘Pa kupaala Aina Izlaeli, mulinzile ukulanda ukuti:

24 “Si Yeova amupaale nu kumucingilila.

25 Si uluswepo lwakwe Yeova luye pali mwemwe, nupya amulange uluse.

26 Si Yeova amulolekesye nu kumupeela umutende.”’

27 Nupya yalinzile ukulumbula izina lyane pa Ina Izlaeli, pakuti njapaale.”

7 Pa wanda uno Mose wamazile ukupanga icikuulwa ca muzilo, wasansileko mafuta nu kucisangulula kumwi ni viya vyonsi ivyaomviwanga pa cikuulwa cico, ulambo kumwi ni viya vyonsi ivyaomviwanga pa ulambo. Lino wasansako mafuta nu kuvisangulula, 2 intunguluzi zya mu Izlaeli, kuli kuti akalamba ya mitundu, yapeezile upe. Intunguluzi kwene zii izya mitundu izyangalilanga yano yalemvile, 3 zyatwazile maceleta 6 aafupilizye kuli Yeova umwali ivya upe, nupya yano ya masaye 12 yatiintanga, cila ntunguluzi ziili zyatwazile iceleta lyonga na cipambasi wenga; nupya yavitwazile pa nkoleelo ya cikuulwa ca muzilo. 4 Lyene Yeova wanenyile Mose ati: 5 “Tola ivintu vino iyaleta, pano vilaaomviwa umu mulimo wa pi tenti lya kupepelapo, nupya uvipeele uku Ina Levi, cila wino ukulingana ni milimo yakwe.”

6 Fwandi Mose watozile maceleta ni ng’ombe nu kupeela ku Ina Levi. 7 Wapeezile maceleta yaili na ya masaye 4 kuli ya mwana Gesyoni, kulingana ni vyalondekwanga umu milimo ino yaombanga; 8 Nupya wapeezile maceleta 4 na ya masaye 8 kuli ya mwana Melali, kulingana ni vyalondekwanga umu milimo ino yaombanga, nupya Itamali mwana Aloni simapepo u wangalilanga imilimo iiyo. 9 Lelo ataapeezile icili consi kuli ya mwana Koati pano yene yaombanga milimo ya mu ncende ya muzilo, nupya yasendanga ivintu vya muzilo pa viye.

10 Lyene intunguluzi zyapeezile upe pa wanda uno ulambo wapeelwanga kuli Leza, pa wanda kwene uno yasansile mafuta uku ulambo. Lino intunguluzi zyapeezile upe pa nkoleelo ya ulambo, 11 Yeova wanenyile Mose ati: “Cila wanda intunguluzi yonga ilaapeela upe pa wanda wa kupeela ulambo.”

12 Uwapeezile upe pa wanda uwa kutandikilako a Nasyoni mwana Aminadabu uwa mu mutundu wakwe Yuda. 13 Wapeezile imbale yonga yakwe siuva iyafinyile masyekele* 130 ni imbale yonga ifunkane yakwe siuva iyafinyile masyekele 70 kulingana ni cipimo cakwe syekele icaomviwanga pa ncende ya muzilo, mu mbale zyoili mwaziile fulaulo umusuma umusaakanyemo na mafuta pakuti aye upe wa vyakulya; 14 kapu* wenga wakwe goldi uwafinyile masyekele 10 nupya uwaziilemo ivinunkile; 15 cipambasi wenga, suuku wenga, ni mfwele yonga iya kalume iya mwaka onga pakuti viye ilambo lya koca; 16 imbuzi yonga pakuti iye ilambo lya pa luyembu; 17 ing’ombe ziili, ya suuku 5, ya sawe 5, ni mfwele 5 izya kalume izili nu mwaka onga pakuti viye ilambo lya mutende. Ukwene ali upe uno Nasyoni mwana Aminadabu wapeezile.

18 Pa wanda wakwe ciili, Netaneli mwana Zuali, intunguluzi ya mutundu wakwe Isakali, wapeezile upe. 19 Wapeezile imbale yonga yakwe siuva isaalale iyafinyile masyekele 130 ni mbale ifunkane yonga yakwe siuva iyafinyile masyekele 70 kulingana ni cipimo cakwe syekele icaomviwanga pa ncende ya muzilo, mu mbale zyoili mwaziile fulaulo umusuma umusaakanyemo na mafuta pakuti aye upe wa vyakulya; 20 kapu wenga wakwe goldi uwafinyile masyekele 10 nupya uwaziilemo ivinunkile; 21 cipambasi wenga, suuku wenga, ni mfwele yonga iya kalume iya mwaka onga pakuti viye ilambo lya koca; 22 imbuzi yonga pakuti iye ilambo lya pa luyembu; 23 ing’ombe ziili, ya suuku 5, ya sawe 5, ni mfwele 5 izya kalume izili nu mwaka onga pakuti viye ilambo lya mutende. Ukwene ali upe uno Netaneli mwana Zuali wapeezile.

24 Pa wanda wakwe citatu, Eliabu mwana Heloni, intunguluzi yakwe ya mwana Zebuluni, 25 wapeezile imbale yonga yakwe siuva isaalale iyafinyile masyekele 130 ni mbale ifunkane yonga yakwe siuva iyafinyile masyekele 70 kulingana ni cipimo cakwe syekele icaomviwanga pa ncende ya muzilo, mu mbale zyoili mwaziile fulaulo umusuma umusaakanyemo na mafuta pakuti aye upe wa vyakulya; 26 kapu wenga wakwe goldi uwafinyile masyekele 10 nupya uwaziilemo ivinunkile; 27 cipambasi wenga, suuku wenga, ni mfwele yonga iya kalume iya mwaka onga pakuti viye ilambo lya koca; 28 imbuzi yonga pakuti iye ilambo lya pa luyembu; 29 ing’ombe ziili, ya suuku 5, ya sawe 5, ni mfwele 5 izya kalume izili nu mwaka onga pakuti viye ilambo lya mutende. Ukwene ali upe uno Eliabu mwana Heloni wapeezile.

30 Pa wanda uwalenga 4, Elizuli mwana Syedeuli, intunguluzi yakwe ya mwana Lubeni, 31 wapeezile imbale yonga yakwe siuva isaalale iyafinyile masyekele 130 ni mbale ifunkane yonga yakwe siuva iyafinyile masyekele 70 kulingana ni cipimo cakwe syekele icaomviwanga pa ncende ya muzilo, mu mbale zyoili mwaziile fulaulo umusuma umusaakanyemo na mafuta pakuti aye upe wa vyakulya; 32 kapu wenga wakwe goldi uwafinyile masyekele 10 nupya uwaziilemo ivinunkile; 33 cipambasi wenga, suuku wenga, ni mfwele yonga iya kalume iya mwaka onga pakuti viye ilambo lya koca; 34 imbuzi yonga pakuti iye ilambo lya pa luyembu; 35 ing’ombe ziili, ya suuku 5, ya sawe 5, ni mfwele 5 izya kalume izili nu mwaka onga pakuti viye ilambo lya mutende. Ukwene ali upe uno Elizuli mwana Syedeuli wapeezile.

36 Pa wanda uwalenga 5, Syelumieli mwana Zulisyadai, intunguluzi yakwe ya mwana Simyoni, 37 wapeezile imbale yonga yakwe siuva isaalale iyafinyile masyekele 130 ni mbale ifunkane yonga yakwe siuva iyafinyile masyekele 70 kulingana ni cipimo cakwe syekele icaomviwanga pa ncende ya muzilo, mu mbale zyoili mwaziile fulaulo umusuma umusaakanyemo na mafuta pakuti aye upe wa vyakulya; 38 kapu wenga wakwe goldi uwafinyile masyekele 10 nupya uwaziilemo ivinunkile; 39 cipambasi wenga, suuku wenga, ni mfwele yonga iya kalume iya mwaka onga pakuti viye ilambo lya koca; 40 imbuzi yonga pakuti iye ilambo lya pa luyembu; 41 ing’ombe ziili, ya suuku 5, ya sawe 5, ni mfwele 5 izya kalume izili nu mwaka onga pakuti viye ilambo lya mutende. Ukwene ali upe uno Syelumieli mwana Zulisyadai wapeezile.

42 Pa wanda uwalenga 6, Eliyasafu mwana Deueli, intunguluzi yakwe ya mwana Gadi, 43 wapeezile imbale yonga yakwe siuva isaalale iyafinyile masyekele 130 ni mbale ifunkane yonga yakwe siuva iyafinyile masyekele 70 kulingana ni cipimo cakwe syekele icaomviwanga pa ncende ya muzilo, mu mbale zyoili mwaziile fulaulo umusuma umusaakanyemo na mafuta pakuti aye upe wa vyakulya; 44 kapu wenga wakwe goldi uwafinyile masyekele 10 nupya uwaziilemo ivinunkile; 45 cipambasi wenga, suuku wenga, ni mfwele yonga iya kalume iya mwaka onga pakuti viye ilambo lya koca; 46 imbuzi yonga pakuti iye ilambo lya pa luyembu; 47 ing’ombe ziili, ya suuku 5, ya sawe 5, ni mfwele 5 izya kalume izili nu mwaka onga pakuti viye ilambo lya mutende. Ukwene ali upe uno Eliyasafu mwana Deueli wapeezile.

48 Pa wanda uwalenga 7, Elisyama mwana Amiudi, intunguluzi yakwe ya mwana Efulemu, 49 wapeezile imbale yonga yakwe siuva isaalale iyafinyile masyekele 130 ni mbale ifunkane yonga yakwe siuva iyafinyile masyekele 70 kulingana ni cipimo cakwe syekele icaomviwanga pa ncende ya muzilo, mu mbale zyoili mwaziile fulaulo umusuma umusaakanyemo na mafuta pakuti aye upe wa vyakulya; 50 kapu wenga wakwe goldi uwafinyile masyekele 10 nupya uwaziilemo ivinunkile; 51 cipambasi wenga, suuku wenga, ni mfwele yonga iya kalume iya mwaka onga pakuti viye ilambo lya koca; 52 imbuzi yonga pakuti iye ilambo lya pa luyembu; 53 ing’ombe ziili, ya suuku 5, ya sawe 5, ni mfwele 5 izya kalume izili nu mwaka onga pakuti viye ilambo lya mutende. Ukwene ali upe uno Elisyama mwana Amiudi wapeezile.

54 Pa wanda uwalenga 8, Gamalieli mwana Pedazuli, intunguluzi yakwe ya mwana Manase, 55 wapeezile imbale yonga yakwe siuva isaalale iyafinyile masyekele 130 ni mbale ifunkane yonga yakwe siuva iyafinyile masyekele 70 kulingana ni cipimo cakwe syekele icaomviwanga pa ncende ya muzilo, mu mbale zyoili mwaziile fulaulo umusuma umusaakanyemo na mafuta pakuti aye upe wa vyakulya; 56 kapu wenga wakwe goldi uwafinyile masyekele 10 nupya uwaziilemo ivinunkile; 57 cipambasi wenga, suuku wenga, ni mfwele yonga iya kalume iya mwaka onga pakuti viye ilambo lya koca; 58 imbuzi yonga pakuti iye ilambo lya pa luyembu; 59 ing’ombe ziili, ya suuku 5, ya sawe 5, ni mfwele 5 izya kalume izili nu mwaka onga pakuti viye ilambo lya mutende. Ukwene ali upe uno Gamalieli mwana Pedazuli wapeezile.

60 Pa wanda uwalenga 9, Abidani mwana Gidyoni, intunguluzi yakwe ya mwana Benjamini, 61 wapeezile imbale yonga yakwe siuva isaalale iyafinyile masyekele 130 ni mbale ifunkane yonga yakwe siuva iyafinyile masyekele 70 kulingana ni cipimo cakwe syekele icaomviwanga pa ncende ya muzilo, mu mbale zyoili mwaziile fulaulo umusuma umusaakanyemo na mafuta pakuti aye upe wa vyakulya; 62 kapu wenga wakwe goldi uwafinyile masyekele 10 nupya uwaziilemo ivinunkile; 63 cipambasi wenga, suuku wenga, ni mfwele yonga iya kalume iya mwaka onga pakuti viye ilambo lya koca; 64 imbuzi yonga pakuti iye ilambo lya pa luyembu; 65 ing’ombe ziili, ya suuku 5, ya sawe 5, ni mfwele 5 izya kalume izili nu mwaka onga pakuti viye ilambo lya mutende. Ukwene ali upe uno Abidani mwana Gidyoni wapeezile.

66 Pa wanda uwalenga 10, Ahieza mwana Amisyadai, intunguluzi yakwe ya mwana Dani, 67 wapeezile imbale yonga yakwe siuva isaalale iyafinyile masyekele 130 ni mbale ifunkane yonga yakwe siuva iyafinyile masyekele 70 kulingana ni cipimo cakwe syekele icaomviwanga pa ncende ya muzilo, mu mbale zyoili mwaziile fulaulo umusuma umusaakanyemo na mafuta pakuti aye upe wa vyakulya; 68 kapu wenga wakwe goldi uwafinyile masyekele 10 nupya uwaziilemo ivinunkile; 69 cipambasi wenga, suuku wenga, ni mfwele yonga iya kalume iya mwaka onga pakuti viye ilambo lya koca; 70 imbuzi yonga pakuti iye ilambo lya pa luyembu; 71 ing’ombe ziili, ya suuku 5, ya sawe 5, ni mfwele 5 izya kalume izili nu mwaka onga pakuti viye ilambo lya mutende. Ukwene ali upe uno Ahieza mwana Amisyadai wapeezile.

72 Pa wanda uwalenga 11, Pagieli mwana Okilani, intunguluzi yakwe ya mwana Asyeli, 73 wapeezile imbale yonga yakwe siuva isaalale iyafinyile masyekele 130 ni mbale ifunkane yonga yakwe siuva iyafinyile masyekele 70 kulingana ni cipimo cakwe syekele icaomviwanga pa ncende ya muzilo, mu mbale zyoili mwaziile fulaulo umusuma umusaakanyemo na mafuta pakuti aye upe wa vyakulya; 74 kapu wenga wakwe goldi uwafinyile masyekele 10 nupya uwaziilemo ivinunkile; 75 cipambasi wenga, suuku wenga, ni mfwele yonga iya kalume iya mwaka onga pakuti viye ilambo lya koca; 76 imbuzi yonga pakuti iye ilambo lya pa luyembu; 77 ing’ombe ziili, ya suuku 5, ya sawe 5, ni mfwele 5 izya kalume izili nu mwaka onga pakuti viye ilambo lya mutende. Ukwene ali upe uno Pagieli mwana Okilani wapeezile.

78 Pa wanda uwalenga 12, Ahila mwana Enani, intunguluzi yakwe ya mwana Nafutali, 79 wapeezile imbale yonga yakwe siuva isaalale iyafinyile masyekele 130 ni mbale ifunkane yonga yakwe siuva iyafinyile masyekele 70 kulingana ni cipimo cakwe syekele icaomviwanga pa ncende ya muzilo, mu mbale zyoili mwaziile fulaulo umusuma umusaakanyemo na mafuta pakuti aye upe wa vyakulya; 80 kapu wenga wakwe goldi uwafinyile masyekele 10 nupya uwaziilemo ivinunkile; 81 cipambasi wenga, suuku wenga, ni mfwele yonga iya kalume iya mwaka onga pakuti viye ilambo lya koca; 82 imbuzi yonga pakuti iye ilambo lya pa luyembu; 83 ing’ombe ziili, ya suuku 5, ya sawe 5, ni mfwele 5 izya kalume izili nu mwaka onga pakuti viye ilambo lya mutende. Ukwene ali upe uno Ahila mwana Enani wapeezile.

84 Ivya upe vino intunguluzi zya mu Izlaeli zyapeezile lino ulambo wasansilwe mafuta aevi: imbale zyakwe siuva izisaalale 12, ni mbale zyakwe siuva izifunkane 12, ma kapu yakwe goldi 12; 85 cila mbale yonga isaalale yakwe siuva yafinanga masyekele 130 nupya cila mbale yonga ifunkane yakwe siuva yafinanga masyekele 70, imbale zyonsi zyakwe siuva zyafinyile masyekele 2,400 kulingana ni cipimo cakwe syekele icaomviwanga pa ncende ya muzilo; 86 kapu wenga na wenga wakwe goldi pa makapu 12 aaziilemo ivinunkile wafinanga masyekele 10 kulingana ni cipimo cakwe syekele icaomviwanga pa ncende ya muzilo, makapu yonsi yakwe goldi yafinyile masyekele 120. 87 ya cipambasi yonsi aapeezilwe ukuya ilambo lya koca yaali 12, ya suuku 12, imfwele zya kalume 12 izyali nu mwaka onga, alino nu upe wa vyakulya, ni mbuzi 12 ukuya ilambo lya pa luyembu; 88 ya cipambasi yonsi aapeezilwe ukuya ilambo lya mutende yaali 24, ya suuku 60, ya sawe 60, ni mfwele zya kalume 60 izya mwaka onga. Ukwene ali upe uwapeezilwe pa cisila cakuti ulambo wasanswa mafuta.

89 Lyonsi lino Mose wingila umwi tenti lya kupepelapo umu kulanda na Leza, uvwanga umwi akulanda nawe ukufuma papela ya ntupiko ya mbokosi ya Upangano pakasi kakwe ya kelubi yaili; paapa kwene apano Leza walandilanga nawe.

8 Yeova wanenyile Mose ati: 2 “Nena Aloni uti, ‘Ndi cakuti wakozya ya lampi, ya lampi 7 yalinzile ukupeela uluswepo pa ncende iya pa nkoleelo iya ca kuteekapo ya lampi.’” 3 Vikwene avino Aloni wacisile, wakozizye ya lampi aakupeela uluswepo pa nkoleelo ya ca kuteekapo ya lampi, wakwe viivi kwene vino Yeova wanenyile Mose. 4 Vino ica kuteekapo ya lampi capanzilwe aevi: Capanzilwe na goldi; yaomvizye inondo pa kucipanga ukufuma uku mulundi ukufika uku maluwa. Ica kuteekapo ya lampi capanzilwe ukulingana ni cilolwa cino Yeova walanzile Mose.

5 Nupya kwene Yeova wanenyile Mose ati: 6 “Tola Aina Levi ukufuma umu Ina Izlaeli nu kuyasangulula. 7 Vino ulinzile ukucita pa kuyasangulula aevi: Ulinzile ukuyakanyila manzi aakusangulula uluyembu, nupya yalinzile ukupela inyele umwili onsi, kufula ivyakuzwala vyao nu kuisangulula. 8 Lyene yalatola cipambasi nu upe wa vyakulya wakwe fulaulo umusuma umusaakanye na mafuta, nupya ulatola cipambasi muze uwa kupeela ukuya upe wa pa luyembu. 9 Uce utwale Aina Levi pa nkoleelo yi tenti lya kupepelapo nupya uce ukolonganike Aina Izlaeli yonsi. 10 Lino ulaapeela Aina Levi pa nkoleelo yakwe Yeova, Aina Izlaeli yace iike makasa yao pali aliyo. 11 Nupya Aloni alapeela Aina Levi pa nkoleelo yakwe Yeova ukuya upe wa kuzulunzya ukufuma uku Ina Izlaeli, nayo yalaaomba imilimo yakwe Yeova.

12 “Lyene Aina Levi yalika makasa yao pa mitwe yakwe ya cipambasi. Pa cisila cipambasi wenga alapeelwa ukuya ilambo lya pa luyembu, muze nawe alapeelwa ukuya ilambo lya koca kuli Yeova pakuti Aina Levi yelelwe imembu. 13 Nupya uce uleke Aina Levi yimilile pa nkoleelo yakwe Aloni na pa nkoleelo ya yana yakwe aonsi nu kuyapeela ukuya upe wa kuzulunzya kuli Yeova. 14 Ulinzile ukupaatula Aina Levi ukufuma umu Ina Izlaeli, nupya Aina Levi yalaya aane. 15 Pa cisila Aina Levi yalaya umukuombela pi tenti lya kupepelapo. Vikwene avino ulayasangulula nu kuyapeela ukuya upe wa kuzulunzya. 16 Pano yene yapeelwa kuli nene ukufuma umu Ina Izlaeli. Yalaya aane ukupyanikizya pa mayeli yonsi aa Ina Izlaeli. 17 Pano mayeli yonsi amu Izlaeli aane, yaye antu nanti inyama. Nayapaatwile ukuya aane pa wanda uno nakomile mayeli yonsi amu Ijipti. 18 Ndatola Aina Levi kuti yace yapyanikizye pa mayeli yonsi aa Ina Izlaeli. 19 Ndapeela Aina Levi kuti yaye akwe Aloni na ana yakwe aonsi ukufuma umu Ina Izlaeli, kuti yace yaaomba imilimo ya Ina Izlaeli api tenti lya kupepelapo nu kufuutilako Aina Izlaeli imembu, pakuti icinkunka citaca cize pa Ina Izlaeli pa mulandu nu kupalama uku ncende ya muzilo.”

20 Mose na Aloni na Ina Izlaeli yonsi yacisile vikwene uku Ina Levi. Kulingana na vyonsi vino Yeova wanenyile Mose ukulozya uku Ina Levi, vivyo kwene avino Aina Izlaeli yacisile kuli aliyo. 21 Fwandi Aina Levi yaisangulwile nupya yafuzile ivyakuzwala vyao, pa cisila Aloni wayapeezile ukuya upe wa kuzulunzya kuli Yeova. Lyene Aloni wapeezile ivya upe pakuti imembu zyao zyelelwe nu kuya aasanguluke. 22 Pa cisila Aina Levi yaile umukuomba imilimo yao pi tenti lya kupepelapo pa nkoleelo yakwe Aloni na ana yakwe aonsi. Viivi kwene vino Yeova wanenyile Mose ukulozya uku Ina Levi avino yacisile kuli aliyo.

23 Lyene Yeova wanenyile Mose ati: 24 “Vino cifwile ukuya uku Ina Levi aevi: Umonsi aali ni myaka 25 nu kuya papela, alaya pali yano yalaaomba umulimo wa pi tenti lya kupepelapo. 25 Lelo nga wacila pa myaka 50, alata ukuomba umulimo uwo. 26 Angazwilizyako aina yakwe aakuomba imilimo ya pi tenti lya kupepelapo, lelo atalinzile ukupeelwako imilimo. Vikwene avino uce ucite uku Ina Levi nu ku milimo yao.”

9 Mu mwaka wakwe ciili, mu mwezi wa kutandikilapo pa cisila cakuti Aina Izlaeli yafuma umu mpanga ya Ijipti, Yeova wanenyile Mose umu lwanga lwa Sinai ati: 2 “Aina Izlaeli yalinzile ukupekanya ilambo lya Ucilo pa nsita iyasoololwa. 3 Pa wanda uwalenga 14 umu mwezi kwene uu lino kutatala kwafita sana, mulinzile ukupekanya Ucilo pa nsita iyasoololwa. Pa kupekanya, mulinzile ukulondela masunde yonsi aakalanda pa Ucilo.”

4 Lyene Mose wanenyile Aina Izlaeli ukupekanya ilambo lya Ucilo. 5 Yapekinye ilambo lya Ucilo umu mwezi wa kutandikilako, pa wanda uwalenga 14 lino kutatala kwafita sana umu lwanga lwa Sinai. Aina Izlaeli yacisile ukulingana na vyonsi vino Yeova wanenyile Mose.

6 Nomba kwali aonsi yamwi aaikowizye pa mulandu wa kulema uku citumbi, fwandi yafizilwe ukupekanya Ucilo pa wanda uwo. Lyene yaile kuli Mose na Aloni 7 nupya yayanenyile iyati: “Sweswe yakowele pano itulema uku citumbi. U mulandu ci uno tutange tupeelele ilambo kuli Yeova pa nsita isoololwe pamwi na Ina Izlaeli yanji?” 8 Mose nawe wayanenyile ati: “Lolelini, lekini nuvwe vino Yeova amalanda ukulozya kuli mwemwe.”

9 Lyene Yeova wanenyile Mose ati: 10 “Nena Aina Izlaeli uti, ‘Nanti cakuti umuntu ali wensi muli mwemwe nanti umu nkulo izilalondelelapo, wakowela pa mulandu wa kulema icitumbi nanti ali pa lwendo lwa kutali, nalyo kwene afwile ukupekanya ilambo lya Ucilo kuli Yeova. 11 Yafwile ukupekanya ilambo umu mwezi wakwe ciili, pa wanda uwalenga 14 lino kutatala kwafita sana. Yafwile ukuliliila pamwi nu mukate uwaula icitutumusi nu musalu ulule. 12 Yatalinzile ukusunga icili consi ukufika katondo, nupya yatalinzile ukuvuna ifupa ilili lyonsi uku nyama iiyo. Yalinzile ukupekanya ilambo lilyo kulingana na masunde aakalanda pa Ucilo. 13 Lelo ndi cakuti umuntu umwi u musanguluke nanti ataali pa lwendo nupya wakana ukupekanya ilambo lya Ucilo, alinzile ukukomwa, pano ataapeezile ilambo kuli Yeova pa nsita isoololwe. Umuntu wiyo alafululwa pa luyembu lwakwe.

14 “‘Nupya ndi cakuti umuntu uwafuma uku mpanga yuze akwikala namwe, nawe kwene afwile ukupekanya ilambo lya Ucilo kuli Yeova. Alinzile ukupekanya ukulingana na masunde aakalanda pa Ucilo. Isunde ilili limwi kwene i lilinzile ukuomba uku muntu uwafuma uku mpanga yuze nu ku muntu wa mu mpanga iiyo.’”

15 Lyene pa wanda uno icikuulwa ca muzilo cakuuzilwe, ikumbi lyavimvile pa cikuulwa cico, kuli kuti api tenti umwali imbokosi ya Upangano, lelo manguzi cimwi icalolekanga wa moto cikazile papela ya cikuulwa ca muzilo ukufika katondo. 16 Vikwene avino catwalilile ukucitika: Ikumbi lyavimbanga icikuulwa ca muzilo insita ya musanya, nupya insita ya usiku kwalolekanga icali wa moto. 17 Lyonsi lino ikumbi lyatenuka ukufuma api tenti, Aina Izlaeli nayo kwene yatandikanga ulwendo, nupya pano ikumbi limilila apano na Ina Izlaeli kwene yapangilanga inkambi. 18 Lyonsi lino Yeova wanena Aina Izlaeli ukutandika ulwendo, yatandikanga ulwendo, nupya lyonsi lino Yeova wayanena ukupanga inkambi yacitanga vivyo kwene. Aina Izlaeli yatwalililanga ukuya umu nkambi, lyonsi lino ikumbi lili papela ya cikuulwa ca muzilo. 19 Lyonsi lino ikumbi likala pa cikuulwa ca muzilo manda aingi, Aina Izlaeli yuvwilanga Yeova nupya yatatenukanga. 20 Insita zimwi ikumbi lyayanga papela ya cikuulwa ca muzilo pa manda anono. Ndi cakuti Yeova wayanena ukuti yapange inkambi yacitanga vivyo kwene, nupya nga Yeova wayanena ukuti yatenuke, yatenukanga. 21 Insita zimwi ikumbi lyayanga sile papela ya cikuulwa ca muzilo kutandika manguzi ukufika katondo, nupya katondo lino ikumbi lyatenuka, nayo kwene yatenukanga. Ciye umusanya nanti usiku ndi cakuti ikumbi lyatenuka, nayo kwene yatenukanga. 22 Ciye a manda yaili, umwezi nanti ukucilapo ndi cakuti ikumbi licili papela ya cikuulwa ca muzilo, Aina Izlaeli yatwalililanga ukuya umu nkambi nupya yatatenukanga. Lelo ndi cakuti lyatenuka, nayo kwene yatenukanga. 23 Lyonsi lino Yeova wayanena ukupanga inkambi, yacitanga vivyo kwene, nupya lyonsi lino Yeova wayanena ukutenuka, yatenukanga. Yatwalilile ukuvwila Yeova ukulingana na vino Yeova wanenyile Mose.

10 Lyene Yeova wanenyile Mose ati: 2 “Uipangile mapenga yaili; usule siuva pa kuyapanga, nupya uwayaomvya uku kwamilako Aina Izlaeli na pa kupasa inkambi. 3 Lino mapenga yoili yalila, Aina Izlaeli yonsi yalaiza kuli wewe pa mulyango wi tenti lya kupepelapo. 4 Ndi cakuti ipenga lyonga lyalila, intunguluzi na akalamba ya maumba ya Ina Izlaeli umuli antu masauzandi, aliyo yalaiza sile kuli wewe.

5 “Ndi cakuti mwalizya ipenga ukuomvya iciunda icipusaneko, antu ali umu nkambi zya ku ufumondaka yalinzile ukutenuka. 6 Ndi cakuti mwalizya iciunda icipusane umuku wakwe ciili, antu ali umu nkambi zya ku kaeya yalinzile ukutenuka. Vikwene avino lyonsi yalinzile ukulizya ipenga lino iumba limwi likutenuka.

7 “Lelo lino mukukolonganika Aina Izlaeli, mutalinzile ukulizya mapenga umu nzila ipusaneko. 8 Ya simapepo ya mwana Aloni aalinzile ukulizya mapenga, nupya vivyo kwene avino cilaaya umu nkulo zinu zyonsi.

9 “Ndi cakuti mwaya umu kulwa na alwani inu akumucuzya umu mpanga inu, mulinzile ukulizya mapenga ukuomvya iciunda ca mu nkondo, nupya Yeova Leza winu alamwiusya nu kumupususya uku yalwani inu.

10 “Nupya pa nsita ino mukusansamuka, kuli kuti pa mitebeto na pa manda ya kutandikilako umu myezi, muce mwalizya mapenga pa malambo inu aakoca na pa malambo ya mutende; mapenga yaa yalalenga Leza amwiusya. Nene Yeova Leza winu.”

11 Lyene umu mwaka uwalenga ciili, umu mwezi wakwe ciili, pa wanda uwalenga 20, ikumbi lyakatwike ukufuma pa cikuulwa ca muzilo umwali imbokosi ya Upangano. 12 Fwandi Aina Izlaeli yatenwike ukufuma umu lwanga lwa Sinai ukulingana na maumba yao, nupya ikumbi lyaile ilimilila umu lwanga lwa Palani. 13 Uu wali ali muku wa kutandikilako uno yatenwike kulingana na vino Yeova wanenyile Mose.

14 Lyene aali umu nkambi yakwe ya mwana Yuda umwali imitundu itatu, aatandikilepo ukutenuka ukulingana na maumba yao, nupya Nasyoni mwana Aminadabu u wayatungululanga. 15 Uwatungululanga umutundu wakwe ya mwana Isakali a Netaneli mwana Zuali. 16 Uwatungululanga umutundu wakwe ya mwana Zebuluni a Eliabu mwana Heloni.

17 Lino icikuulwa ca muzilo capangulwilwe, ya mwana Gesyoni na ya mwana Melali aasendanga ivya ku cikuulwa ca muzilo, yatenwike.

18 Lyene amu nkambi yakwe Lubeni umwali imitundu itatu, yatenwike ukulingana na maumba yao, nupya Elizuli mwana Syedeuli u wayatungululanga. 19 Uwatungululanga umutundu wakwe ya mwana Simyoni a Syelumieli mwana Zulisyadai. 20 Uwatungululanga umutundu wakwe ya mwana Gadi a Eliyasafu mwana Deueli.

21 Lyene Aina Koati aasenzile iviya vya muzilo, yatenwike. Icikuulwa ca muzilo cali nu kupangwa lino yatatala yafika.

22 Lyene amu nkambi yakwe ya mwana Efulemu umwali imitundu itatu yatenwike kulingana na maumba yao, nupya Elisyama mwana Amiudi u wayatungululanga. 23 Uwatungululanga umutundu wakwe ya mwana Manase a Gamalieli mwana Pedazuli. 24 Uwatungululanga umutundu wakwe ya mwana Benjamini a Abidani mwana Gidyoni.

25 Lyene amu nkambi yakwe ya mwana Dani umwali imitundu itatu, yatenwike ukulingana na maumba yao, yakwene aacingililanga inkambi zyonsi, nupya Ahieza mwana Amisyadai u wayatungululanga. 26 Uwatungululanga umutundu wakwe ya mwana Asyeli a Pagieli mwana Okilani. 27 Uwatungululanga umutundu wakwe ya mwana Nafutali a Ahila mwana Enani. 28 Vikwene avino Aina Izlaeli na maumba yao yalondelanga pa kutenuka.

29 Lyene Mose wanenyile Hobabu mwana Leweli* sivyala umwina Midyani ati: “Tukuya uku ncende ino Yeova walanzile ati, ‘Ndaipeela kuli mwemwe.’ Twapita, nupya tumakusunga ningo, pano Yeova walaya Aina Izlaeli ivintu ivisuma.” 30 Lelo Hobabu wamunenyile ati: “Nsikupita, nimaswilila uku mpanga yane na kuli ya lupwa yane.” 31 Lino Mose uvwile vivyo wamunenyile ati: “Awe utatusya, pano wewe umanyile kuno tulinzile ukupangila inkambi umu lwanga, nupya wewe ungatutungulula. 32 Nupya ndi cakuti wapita naswe, ivisuma vyonsi vino Yeova alatupeela, naawe kwene tulakupeela.”

33 Fwandi yafumile pa mwamba wakwe Yeova nu kupita ulwendo lwa manda yatatu, ni mbokosi yakwe Yeova yayakoleelile, nupya yafumile yakulonda incende apa kupuzila. 34 Nupya ikumbi lyakwe Yeova lyali papela yao umusanya lino yatenwike pa nkambi.”

35 Lyonsi lino yakukusya Imbokosi ya Upangano, Mose walandanga ati: “Yeova katuka, nupya leka alwani yako yutuke, leka aakupata nayo kwene yutuke.” 36 Nupya ndi cakuti yafisya Imbokosi ya Upangano, Mose walandanga ati: “We Yeova, si ya pamwi ni mintapendwa ya Ina Izlaeli.”

11 Lyene antu yatandike ukuilizyanya sana kuli Yeova. Lino Yeova uvwile vivyo, wasosile sana, nupya Yeova wayatumiile umoto nu koca yamwi aali kunzi ya nkambi. 2 Lino antu yatandike ukuilizyanya kuli Mose, wayapaapatile kuli Yeova, nupya umoto wazimile. 3 Fwandi incende iiya yaitemiile izina lyakuti Tabela,* pano umoto uwafumile kuli Yeova wayosile.

4 Lyene antu yamwi aataali Aina Izlaeli yali na ukaitemwe, nupya na Ina Izlaeli kwene yatandike ukulila iyati: “A weni amatupeela inyama iyakuti tulye? 5 Twiusya ni nswi zino twalyanga umu Ijipti ukwaula ukulipila, ni viimbi, vibilika, ya liki, ya onioni na galiki! 6 Nomba lyene tukusila maka. Pasi vyuze vino tukulola suka sile mana kwene wii.”

7 Mana wali wa tumbezu tunono,* nupya walolekanga wa vinyamuti. 8 Antu yayanga umu kusola mana nupya yamusyanga pa mawe nanti ukumuponda mu ciina. Lyene yamwelekanga umu mpoto nanti ukupangamo imikate iulungane, nupya walyompelelanga kwati a keke wino iikako mafuta. 9 Ndi cakuti ulumi lwapangika umu nkambi usiku, alino na mana kwene waponanga.

10 Mose uvwile antu yakulila umu ndupwa zyonsi, cila muntu pa mulyango wi tenti lyakwe. Yeova wasosile sana, na Mose kwene wasosile sana. 11 Lyene Mose uzizye Yeova ati: “U mulandu ci uno ukucuzizya umuomvi wako? U mulandu ci uno wansokela nu kwika icisendo ca yantu yaa yonsi pali nene? 12 Uzye nene indi nyina wa yantu yaa yonsi? Nanti uzye nene nayaviile, vino ukuneena ukuti njasendele pa cisao wakwe vino umuomvi aakasakamala umwana akamusenda, pakuti njatwale uku mpanga ino walavile ukupeela ivikolwe vyao? 13 Uzye aekwi kuno nimafumya inyama iyakuti mpeele antu yaa yonsi? Pano yakundilila ukuti tupeele inyama iyakuti tulye!’ 14 Ntanga nkwanisye ukuomba umulimo wa kutungulula antu yaa yonsi nenga; iunkulila sana. 15 Ndi cakuti vikwene avino umacita kuli nene, nkome sile pakwene. Ndi cakuti natemwikwa kuli wewe, utaleka iviipe na vyuze vincitikile.”

16 Yeova waswike Mose ati: “Nkolonganikile aonsi 70 ukufuma umu yakalamba ya mu Izlaeli, aonsi yano wamanya ukuti aakalamba nupya acindikwe sana umu yantu, uyatwale pi tenti lya kupepelapo, nupya paapa kwene apano yakimilile pamwi naawe. 17 Nimaiza nu kwizalanda naawe kuko kwene, nupya nizatola umupasi umwi pali wewe nu kwika pali aliyo, nayo yamakwazwanga ukutungulula antu pakuti utaaomba wenga. 18 Unene antu uti, ‘Ilelo muisangulule, pano mutondo mulalya inyama, pa mulandu wakuti Yeova watauvwa ukulila kwinu na vino imuilizyanya ukuti: “A weni amatupeela inyama iyakuti tulye? Twikalanga ningo umu Ijipti.” Yeova alamupeela inyama, nupya mulalya. 19 Mulalya inyama iiyo, asi sile pa wanda onga nanti pa manda yaili nanti pa manda 5 nanti pa manda 10 nanti pa manda 20, 20 lelo mulailya pa mwezi upuma, suka ice itandike ukufumila umu mpuno nu kumufiisya uku mwenzo, pano imukana Yeova aali pali mwemwe, nupya mwalilanga kuli aliwe mukuti: “U mulandu ci uno twafumiile umu Ijipti?”’”

21 Lyene Mose walanzile ati: “Indi na onsi 600,000 aakupita ulwa pansi, nomba lyene ukulanda ukuti, ‘Nimayapeela inyama, nupya yalalya pa mwezi upuma’! 22 Nanti cakuti yakoma imfwele zyonsi ni mbuzi ni ng’ombe, uzye vingayakumana? Nanti ndi yuma inswi zyonsi izya muli yemba, uzye zingayakumana?”

23 Lyene Yeova waswike Mose ati: “Uzye ikasa lyakwe Yeova iliipi sana? Fwandi lyene umalola ndi cakuti vino nkukunena vimacitika nanti foo.”

24 Fwandi Mose waile anena antu vino Yeova walanzile. Nupya wakolonganike aonsi 70 ukufuma pa yakalamba ya mu Izlaeli nu kuleka kuti yimilile ukuzinguluka itenti. 25 Lyene Yeova wizile umwi kumbi nu kulanda na Mose nupya watozile umupasi umwi pali Mose nu kuwika pa yakalamba 70. Lino umupasi wikazile sile pali aliyo, yatandike ukucita kwati aakasesema,* lelo yataatazile yasesemepo nupya.

26 Mu nkambi mwasiile aonsi yaili pali yayo. Mazina yao a Elidadi na Medadi. Umupasi wizile pali aliyo, vino nayo kwene yaali pa yantu aalemvilwe mazina nanti icakuti yataile ukwi tenti. Fwandi yatandike ukucita kwati aakasesema umu nkambi. 27 Nupya umulumendo umwi wasimwile nu kuyanena Mose ati: “Elidadi na Medadi yakucita kwati aakasesema umu nkambi!” 28 Lyene Yoswa mwana Nuni wino ukufuma uku wance wazwilizyanga Mose, wanenyile Mose ati: “Musambazi wane, yalesye!” 29 Lelo Mose wamuzizye ati: “Uzye ukuuvwa uzuwa pa mulandu wane? Ningatemwa ndi cakuti antu yakwe Yeova yonsi yaali aakasesema nupya ningatemwa ndi cakuti Yeova wisile umupasi wakwe pali aliyo!” 30 Pa cisila, Mose waswilile umu nkambi pamwi na akalamba ya mu Izlaeli.

31 Lyene umuza wafumile kuli Yeova nu kutandika ukupunga, nupya waleesile inkwale ukufuma kuli yemba nu kuleka kuti zyawa ukuzinguluka inkambi, nupya incende umwayelile inkwale umuntu angapitapo umupiipi nu wanda onsi pakuti apuzye incende iiyo, nupya pano inkwale zyapapukilanga pali mita wenga ukufuma pansi. 32 Fwandi antu yakatwike nu kutandika ukukolonganika inkwale uwanda uwa onsi nu usiku onsi alino nu wanda uwalondelilepo onsi, kusi uwakolonganike ukucepako pa maoma* 10 nupya yatwalilile ukuzyanika ukuzinguluka inkambi yonsi. 33 Lelo lino yatatala yamala ukulya inkwale zizyo, ukali wakwe Yeova wizile pali aliyo, nupya Yeova wayakomozile iciipisye.

34 Lyene yatemiile incende iiya iyati Kibuloti-hataava, pano paapa kwene apano yazikiile antu aali na ukaitemwe. 35 Lino antu yafumile uku Kibuloti-hataava yaile uku Hazeloti, nupya kuuku kwene akuno yaile iikala.

12 Lyene Milyamu na Aloni yatandike ukulanda iviipe pali Mose pa mulandu na mama Umwina Kusyi wino watwazile. 2 Yalandanga yakuti: “Uzye a muli Mose sile muno Yeova akalandila? Uzye asilandila na muli sweswe kwene? Yeova nawe uvwanga. 3 Mose wali umuntu umufuukisye pa yantu yonsi* aali pano nsi.

4 Papo kwene sile Yeova wanenyile Mose na Aloni na Milyamu ati: “Yangini ukwi tenti lya kupepelapo.” Fwandi yonsi yotatu yaile ukwi tenti lya kupepelapo. 5 Yeova wizile umwi kumbi nu kwimilila pa mulyango wi tenti lya kupepelapo nupya wamile Aloni na Milyamu. Nupya yoili yaile pa nkoleelo. 6 Lyene Leza walanzile ati: “Uvwini vino nkulanda. Ndi cakuti kasesema wakwe Yeova aya pali mwemwe, ngi injimanyisya kuli aliwe umu cilolwa, nupya ngi indanda nawe umu ciloto. 7 Lelo vivyo asi vino nkacita kuli Mose umuomvi wane! Wapeelwa umulimo wa kusakamala amu ng’anda yane yonsi. 8 Nkalanda nawe umukulungatika ala tukulolana, nsilandila umu tucole; nupya akalola vino ne Yeova nkaloleka. U mulandu ci uno mutuvwilile intete ukulanda iviipe pa muomvi wane Mose?”

9 Fwandi Yeova wayasokiile sana nupya wafumile pali aliyo. 10 Ikumbi lyafumile pi tenti lya kupepelapo, nupya tembwe wizile pali Milyamu icakuti aswepuluka wa usu wa mvula. Lino Aloni wapiliukile kuli Milyamu waweni ukuti ali nu ulwale wakwe tembwe. 11 Lyene papo kwene Aloni wanenyile Mose ati: “Napaapata, musambazi wane! Utaleka uluyembu luu luye pali sweswe! Itucita ica uwelewele. 12 Utaleka Milyamu atwalilile ukuya wa mwana uwavyalwa umufwe, wino umwili wakwe walika mbali!” 13 Lyene Mose watandike ukulilila kuli Yeova ala akuti: “We Leza, napaapata mupozye!”

14 Yeova waswike Mose ati: “Ndi cakuti isi wakwe Milyamu wamuswizile pa manso, uzye atanga azewane pa manda 7? Leka aikale wenga ukunzi ya nkambi pa manda 7, lyene pa cisila angaweziwa umu nkambi.” 15 Fwandi Milyamu wikazile wenga ukunzi ya nkambi pa manda 7, nupya antu yatapangulwile inkambi ukufikila lino Milyamu waweziwa. 16 Lyene antu yafumile uku Hazeloti nu kuyapangila inkambi umu lwanga lwa Palani.

13 Lyene Yeova wanenyile Mose ati: 2 “Tuma aonsi aakuti yakaceecete impanga ya Kenani ino nkupeela Aina Izlaeli. Muli cila mutundu utume umonsi wenga, kuli kuti intunguluzi ya mu mutundu uwo.”

3 Fwandi Mose wayatumile ukufuma umu lwanga ulwa Palani kulingana na vino Yeova walanzile. Aonsi yonsi yaali i ntunguluzi zya Ina Izlaeli. 4 Mazina yao aeya: mu mutundu wakwe Lubeni a Syamua mwana Zakuli; 5 mu mutundu wakwe Simyoni a Syafati mwana Holi; 6 mu mutundu wakwe Yuda a Kalebu mwana Yefune; 7 mu mutundu wakwe Isakali a Igali mwana Jozefu; 8 mu mutundu wakwe Efulemu a Hosyia mwana Nuni; 9 mu mutundu wakwe Benjamini a Paliti mwana Lafu; 10 mu mutundu wakwe Zebuluni a Gadieli mwana Sodi; 11 mu mutundu wakwe Jozefu kuli kuti umu mutundu wakwe Manase a Gadi mwana Susi; 12 mu mutundu wakwe Dani a Amiyeli mwana Gemali; 13 mu mutundu wakwe Asyeli a Setuli mwana Mikaeli; 14 mu mutundu wakwe Nafutali a Nabi mwana Vofusi; 15 mu mutundu wakwe Gadi a Geweli mwana Maki. 16 Yakwene ali mazina ya yonsi yano Mose watumile ukuyaceeceta impanga. Nupya Mose watemiile Hosyia mwana Nuni izina lyakuti Yoswa.*

17 Lino Mose wayatumanga ukuya umu kuceeceta impanga ya Kenani, wayanenyile ati: “Yangini uku Negebu, nupya pa cisila alino muce muye ku ncende ya myamba. 18 Muce mukalole vino impanga ili, ndi cakuti antu aakaikalamo aa maka nanti foo, nanti ndi cakuti anono nanti aingi, 19 nupya muce mukalole ndi cakuti impanga iisuma nanti iipe nanti ndi cakuti imisumba ino antu yakaikalamo yakwata malinga nanti foo. 20 Muce mukalole ndi cakuti impanga yakwata umuvundo nanti foo, nanti ndi cakuti yakwata imiti nanti foo. Muce muye asipe nupya muce mulete ivizao vimwi ivya mu mpanga iiyo.” Insita iiya, ale imyangazi ya kutandikilako yaca.

21 Fwandi yapisile nu kuyaceeceta impanga kutandikila uku lwanga lwa Zini ukufika uku Leobu mupiipi na Lebohamati.* 22 Lino yaile uku Negebu, yaile iyafika uku Hebuloni, ukwikalanga Ahimani, Syesyai na Talimai, aafumile muli Anaki. Pano umusumba wa Hebuloni wakuulilwe papisile imyaka 7 pakuti umusumba wa Zoani uwa mu Ijipti wize ukuulwe. 23 Lino yafisile umu mukonko wa Esyikoli yaputwile umusambo ukwali umukungo wa myangazi, uno aonsi yaili yasendiile uku kamuti, yasenzile na mapomegilaneti na masamvu. 24 Yatemiile incende iiyo ukuti umukonko wa Esyikoli* pa mulandu nu mukungo uno Aina Izlaeli yaputwile pa ncende iiyo.

25 Lino papisile manda 40, yawezile ukufuma umu kuceeceta impanga. 26 Yawezile kuli Mose na kuli Aloni nu ku Ina Izlaeli yonsi umu lwanga lwa Palani, uku Kadesyi. Yawezizye ilyasi uku Ina Izlaeli yonsi nupya yayalanzile ivizao vya mu mpanga iya Kenani. 27 Yanenyile Mose iyati: “Twaile umu mpanga ino watutumileko, yakwata umukaka nu uci nupya vii ali vizao ivyayamo. 28 Lelo antu aakaikala umu mpanga iiyo aa maka ni misumba iyakwata malinga iikalamba sana. Nupya kuuku kwene akuno twaweni na Aina Anaki. 29 Aina Amaleki yakaikala umu mpanga iya Negebu, nupya Aina Hiti, Aina Yebusi, na Ina Amoli nayo yakaikala umu ncende ya myamba, Aina Kenani nayo yakaikala umupiipi na yemba nu mu mbali ya luzi lwa Yodani.”

30 Kalebu wezizye ukuteekezya antu aimilile pa nkoleelo yakwe Mose, walanzile ati: “Vikwene twapiteni, nupya tulaya tukapoke impanga, pano tulacimvya antu aaikalamo.” 31 Lelo aonsi aapisile nawe yalanzile iyati: “Tutanga tukalwisye antu yaaya, pano yene yakweti amaka ukutucila.” 32 Nupya yatwalilile ukunena Aina Izlaeli ilyasi iliipe apa mpanga ino yaile iyaceeceta, yalandanga yakuti: “Impanga ino twapisilemo nu kuyaceeceta mutanga mupusuke nga mwingilamo, nupya aonsi yonsi yano twaweni a malamba. 33 Nupya kuuku kwene akuno twaweni Anefili ya mwana Anaki aafumile umu Yanefili, nupya ngu kuilinganya kuli aliyo swemo twalolekanga wa vipaso.”

14 Lyene Aina Izlaeli yonsi yapunzile, nupya yatwalilile ukulila nu kuloosya usiku uwa onsi. 2 Aina Izlaeli yonsi yatandike ukuilizyanya kuli Mose na Aloni, nupya yonsi yatandike ukulanda iviipe kuli aliyo ala yakuti: “Fwandi nga twafwilile sile umu mpanga ya Ijipti nanti ukufwila umu lwanga kwene luu! 3 U mulandu ci uno Yeova watuletela uku mpanga yii kuti twize tukomwe? Yalatupoka ya mama itu na ana. Uzye citanga cizipe sile ukuswilila uku Ijipti?” 4 Yalanzyanyanga nu kuti: “Lekini tusonte uwa kututungulula nu kuswilila uku Ijipti!”

5 Lino Mose na Aloni yuvwile vivyo, yafupime pa nkoleelo ya Ina Izlaeli yonsi aakolongine. 6 Yoswa mwana Nuni na Kalebu mwana Yefune aali pa yonsi aile umu kuceeceta impanga ya Kenani, yalepwile ivyakuzwala vyao, 7 yanenyile Aina Izlaeli yonsi iyati: “Impanga ino twaile umu kuceeceta i mpanga imwi isuma sana. 8 Ndi cakuti tukuzanzya Yeova, alatutwala umu mpanga yii, nupya alaipeela kuli sweswe, kuli kuti impanga umwaya umukaka nu uci. 9 Nomba mutapondokela Yeova, nupya mutatiina antu aakaikala umu mpanga ya Kenani, pano tulayacimvya zuwa sana. Yene yatakweti uwa kuyacingilila, swemo Yeova ali naswe.” Fwandi mutayatiina.”

10 Lelo Aina Izlaeli yonsi yatandike ukulanda pa kuyatama na mawe. Nomba ululumbi lwakwe Yeova lwalolekile pi tenti lya kupepelapo uku Ina Izlaeli yonsi.

11 Lyene Yeova wanenyile Mose ati: “Uzye antu yaa yalatwalilila ukunsaalula ukufika lilaci, nupya yalatwalilila ukukanantaila ukufika lilaci asi mulandu ni vizungusyo vyonsi vino nacita kuli aliyo? 12 Leka njaponyezye icikuko nu kuyalovya, nupya nimakulenga ukuya uluko ulukalamba nupya ulwa maka ukuyacila.”

13 Lelo Mose wanenyile Yeova ati: “Aina Ijipti kuno wafumizye antu yaa ukuomvya maka yako, yaluvwa, 14 nupya yalanenako aakaikala umu mpanga yii. Nayo kwene yuvwa ukuti wewe, we Yeova, waya na antu yaa nupya ukalolekela kuli aliyo apaswe. Wewe Yeova nupya ikumbi lyako likaimilila pali aliyo, umusanya ukayatungulula ukuomvya ikumbi nupya usiku ukayatungulula ukuomvya icimbilimbili ca moto. 15 Ndi cakuti wakoma antu yaa yonsi pa muku onga, inko izyuvwa pali wewe zilalanda ziti: 16 ‘Yeova wafizilwe ukutwala antu yaa umu mpanga ino walavile ukuti alayapeela, fwandi wayakomiile umu lwanga.’ 17 Acino we Yeova, leka maka yako yaloleke, wakwe vino walavile lino walanzile uti: 18 ‘Yeova aasisoka zuwa nupya uwaya sana nu kutemwa kwa cisinka, aakaelela aataya ni cuvwila kumwi na aakacita uluyembu, lelo aatalaleka sile antu aipe ukwaula ukuyafulula, aakafulula ana na izikulu ni vizikulula pa membu zyakwe ya isi.’ 19 Si elela antu yaa pa kuluvyanya kwao kulingana nu kutemwa kwako ukwa cisinka ukukalamba, wakwe vino wayelela ukufuma umu Ijipti ukufika na ndakai.”

20 Lyene Yeova walanzile ati: “Nayelela ukulingana na vino walanda. 21 Lelo nkulapa pa umi wane ukuti umu nsi yonsi mulazuula ululumbi lwakwe Yeova. 22 Lelo yonsi aalola ululumbi lwane ni vizungusyo vino nacisile umu Ijipti nu mu lwanga lelo aatwalilila ukungezya imiku 10 nu kukanauvwa ukwi zwi lyane 23 yatalalola impanga ino nalafile ukupeela uku vikolwe vyao. Na yano yakansaalula nayo kwene yatalailola. 24 Lelo Kalebu umuomvi wane vino wene wapusanako na auze nupya watwalilila ukundondela nu mwenzo onsi, ndamwingizya umu mpanga ino waileko, nupya anakwe yalaipyana. 25 Vino Aina Amaleki na Ina Kenani yakaikala umu mukonko, muce mupite mutondo uku lwanga ukuomvya inzila iyapita kuli Yemba Muyenzu.”

26 Yeova wanenyile Mose na Aloni ati: 27 “Uzye antu yaa aipe yalatwalilila ukuilizyanya kuli nene ukufika lilaci? Inuvwa vino Aina Izlaeli yakuilizyanya kuli nene. 28 Yanene uti: “Yeova walanda wati, ‘Nkulapa pa umi wane ukuti, “Ndacita kuli mwemwe kulingana na vino inuvwa mukulanda! 29 mu lwanga kwene muu amuno ivitumbi vinu vilalaala, mwensi kwene mwemuno mwalemvilwe ukutandikila pa ya myaka 20 nu kuya papela, kuli kuti mwensi mwemuno imuilizyanya pali nene. 30 Kusi nanti aumwi pali mwemwe aalingila umu mpanga ino nalafile ukumupeela, ukufumyako sile Kalebu mwana Yefune na Yoswa mwana Nuni.

31 “‘“Nupya ndingizya ana inu yano mwatangi yalatupoka, nayo yalamanya impanga ino imukana. 32 Lelo ivitumbi vinu vilalaala umu lwanga kwene luu. 33 Ana inu yalaya aakacema umu lwanga pa myaka 40, yalafululwa pa mulandu na ucipondoka winu suka mwensi muce mufwile umu lwanga. 34 Mulafululwa pa kuluvyanya kwinu pa myaka 40 kulingana na manda 40 yano mwamazile ukuceeceta impanga ya Kenani, kuli kuti uwanda onga ulalingana nu mwaka, alino mulamanya ivikafumamo umu kunkana.

35 “‘“Ne Yeova natimvwanga. Vikwene avino ndacita kuli yayo yonsi aipe atiyakolongana nu kumpondokela: Yalafwila umu lwanga kwene luu. 36 Aonsi yano Mose watumile uku kuceeceta impanga ya Kenani nupya alenzile ukuti Aina Izlaeli yonsi yatandike ukuilizyanya pali aliwe lino yalesile ilyasi iliipe ukulozya uku mpanga ino yaile umu kuceeceta, 37 yalafululwa nupya yalafwila pa nkoleelo yakwe Yeova. 38 Lelo Yoswa mwana Nuni na Kalebu mwana Yefune, aali pali yano yaile umu kuceeceta impanga, yene yatalafwa.”’”

39 Lino Mose walanzile mazwi yaa uku Ina Izlaeli yonsi, antu yatandike ukuloosya sana. 40 Nupya yakatwike katondotondo nu kwezya ukuya pa mwamba, yatiile: “Ituipekanya ukuya uku ncende ino Yeova walanzile, pano ituyembuka.” 41 Lelo Mose wayuzizye ati: “U mulandu cino uno mukulonda ukucitila vino Yeova atamunenyile? Vintu vitakumuzipila. 42 Mutayako, pano Yeova asi namwe; nupya mumacimviwa uku yalwani inu. 43 Pano Aina Amaleki na Ina Kenani yamamulwisya, nupya yamamukoma. Pa mulandu wakuti imupondokela Yeova, Yeova asikuya namwe.”

44 Lelo pa mulandu ni cilumba yalungime pa mwamba, nomba Mose ataafumile umu nkambi, ni mbokosi ya upangano yakwe Yeova nayo kwene yasyazile umu nkambi. 45 Lyene Aina Amaleki na Ina Kenani aaikalanga umu mwamba uwa yizile nu kuyazanza, nupya yayasalanginye ukufika nu ku Holima.

15 Yeova watwalilile ukunena Mose ati: 2 “Nena Ina Izlaeli uti, ‘Lino mulafika umu mpanga ino nkumupeela kuti mwaikalamo 3 nupya lino mulaapeela ilambo lya koca kuli Yeova ukufuma pa ng’ombe zinu nanti pa mfwele zinu nanti imbuzi pakuti viye ivinunkile kuli Yeova, nupya ndi cakuti ilambo lilyo i lambo lya koca nanti ilambo lya pa mulapo uiyele nanti ilambo lya kuitemelwa nanti ilambo lya mitebeto ya mu mwaka, 4 aakupeela ilambo lyakwe kuli Yeova alinzile ukulipeelela pamwi nu upe wa vyakulya vyakwe fulaulo umusuma, kuli kuti icipimo conga cakwe efa* pa vipimo 10, icisakaanye mupiipi na lita wenga uwa mafuta. 5 Mulinzile nu kupeela lita wenga wakwe waini ukuya upe wa vyakumwa kumwi ni lambo lya koca nanti ilambo lyakwe suuku wenga na wenga. 6 Nga mukupeela suuku mulinzile ukupeelela pamwi nu upe wa vyakulya vyakwe fulaulo umusuma aangalingana na makilogilamu yaili nupya umusaakanye na mafuta aacizile pali lita wenga. 7 Nupya mulinzile ukupeela waini ukuya upe wa vyakumwa aacizile pali lita wenga, pakuti aye upe uununkile kuli Yeova.

8 “‘Lelo nga mukupeela cipambasi ukuya ilambo lya koca nanti ndi cakuti mukupeela ilambo lya pa mulapo uiyele nanti malambo ya mutende kuli Yeova, 9 mulinzile ukupeela cipambasi pamwi nu upe wa vyakulya vyakwe fulaulo umusuma aalingine na makilogilamu yatatu na afu nupya umusaakanye na mafuta aali mupiipi na malita yaili. 10 Mulinzile nu kupeela malita mupiipi na yaili yakwe waini ukuya upe wa vyakumwa, ulaya upe wa koca nupya uununkile kuli Yeova. 11 Vikwene avino mulinzile ukucita kuli cipambasi wenga na wenga nanti kuli suuku nanti uku mfwele ya kalume nanti uku mbuzi. 12 Asi mulandu na malambo uwingi yano mukupeela, vikwene avino mulinzile ukucita ukwi lambo lyonga na lyonga. 13 Vikwene avino Umwina Izlaeli wensi alinzile ukucita pa kupeela upe wa koca pakuti uye uununkile kuli Yeova.

14 “‘Ndi cakuti umwi uwafuma uku mpanga yuze aakaikala namwe nanti uwikala namwe pa myaka iingi sana akulonda ukupeela upe wa koca uununkile kuli Yeova, nawe kwene alinzile ukucita wakwe vino mukacita. 15 Mwe Ina Izlaeli kumwi nu wafuma uku mpanga yuze aakaikala namwe, mulaalondela isunde lyonga. Lilaya isunde lya manda pe uku nkulo zinu zyonsi. Uwafuma uku mpanga yuze alaacita vino namwe kwene mukacita kuli Yeova. 16 Kufwile ukuya isunde lyonga nu upinguzi onga kuli mwemwe na kuli wino wafuma ku mpanga yuze aakaikala namwe.’”

17 Yeova watwalilile ukunena Mose ati: 18 “Nena Aina Izlaeli uti, ‘Lino mulafika umu mpanga ino nkumutwalako 19 nu kulyako ivyakulya ivili vyonsi ivya mu mpanga iiyo, mulinzile ukusangwilako kuli Yeova. 20 Mulinzile ukusangula fulaulo uwafuma ku vyakulya vino mwatandikilapo ukuzombola uwa kuomvya uku kupangilako imikate iulungane iikweti icipongo. Mulaasangula wakwe vino mukasangula umusangulo wa pa lwano. 21 Fulaulo umwi uwafuma pa vyakulya vino mwatandikilapo ukuzombola, mulaamusangwila kuli Yeova umu nkulo zinu zyonsi.

22 “‘Lelo ndi cakuti mwaluvyanya nu kufilwa ukulondela masunde yaa yonsi yano Yeova wanenyile Mose, 23 kuli kuti vyonsi vino Yeova wamunenyile ukupitila muli Mose ukufuma pa wanda uno Yeova wamupeezile masunde aali nu kuomba nu ku nkulo zinu zyonsi, 24 nupya ndi cakuti mwaluvyanya ukwaula ukumanya, mwensi pamwi mufwile ukupeela cipambasi wenga ukuya ilambo lya koca ilinunkile kuli Yeova, mufwile ukupeelela pamwi nu upe wa vyakulya nu upe wa vyakumwa kulingana ni sunde ilikakonkwa lyonsi, alino ni mbuzi yonga ukuya upe wa pa luyembu. 25 Simapepo alafuutila Aina Izlaeli yonsi uluyembu, nayo yalelelwa, pano yaluvyanyizye umu kukanamanya nupya yapeezile ilambo lya koca kuli Yeova ni lambo lya pa luyembu kuli Yeova pa kuluvyanya kwao. 26 Aina Izlaeli yonsi yalelelwa kumwi nu wafuma uku mpanga yuze aakaikala nayo, pano ala yonsi yaluvyanyizye umu kukanamanya.

27 “‘Ndi cakuti ali wensi wacita uluyembu umu kukanamanya, alinzile ukupeela imbuzi iya kaci iya mwaka onga ukuya ilambo lya pa luyembu. 28 Nupya simapepo alafuutila umuntu wiyo uluyembu luno aatacita kuli Yeova umu kukanamanya, nawe alelelwa. 29 Aina Izlaeli kumwi nu wafuma uku mpanga yuze aakaikala nayo, yonsi kwene nga yacita uluyembu umu kukanamanya, yalinzile ukulondela isunde ilili limwi kwene.

30 “‘Lelo uwacita uluyembu uku mufulo sile, aye u Mwina Izlaeli nanti uwafuma uku mpanga yuze, ala wapontela Yeova nupya alinzile ukukomwa. 31 Pa mulandu wakuti ale watasuula mazwi yakwe Yeova nu kutama masunde yakwe, muntu wiyo alinzile ukukomwa. Ala umulandu wakwe uli pali aliwe.’”

32 Lino Aina Izlaeli yaali umu lwanga yazanyile umonsi umwi akutiya inkwi pa wanda wi Sabata. 33 Aamuzanyile akutiya inkwi yamutwazile kuli Mose na kuli Aloni nu ku Ina Izlaeli yonsi. 34 Yamusunzile pano yataamanyile ningo cino yaali nu kumucita.

35 Yeova wanenyile Mose ati: “Umuntu wiyo alinzile ukukomwa, nupya antu yonsi yalinzile ukumutama na mawe ukunzi ya nkambi.” 36 Fwandi antu yonsi yamufumizye ukunzi ya nkambi nu kumutama na mawe suka afwa, wakwe vino Yeova wanenyile Mose.

37 Yeova watwalilile ukunena Mose ati: 38 “Nena Aina Izlaeli uti yalinzile ukulapanga insenkebele kwisika ya vyakuzwala vyao umu nkulo zyao zyonsi, nupya yalinzile ukulaika ututambo twakwe bulu papela ya nsenkebele. 39 Mulinzile ukukwata insenkebele zizyo pakuti nga mwazilola, imwiusya masunde yakwe Yeova yonsi nu kuyalondela. Mutaalondela vino imyenzo inu ikulonda na vino manso inu yakulola, ivikumutungulula uku kumpondokela. 40 Cico cilalenga mwaiusya nu kulondela masunde yane yonsi nu kuya amuzilo kuli Leza winu. 41 Nene indi Yeova Leza winu uwamufumizye umu mpanga ya Ijipti pakuti musininkizye ukuti nene Leza winu. Nene indi Yeova Leza winu.’”

16 Lyene Kola mwana Izali, mwana Koati, mwana Levi, wakatwike pamwi na Datani na Abilamu ya mwana Eliabu alino na Oni mwana Peleti uwa mu yana yakwe Lubeni. 2 Yene pamwi na onsi 250 Aina Izlaeli aali intunguluzi, aasontwe nupya acindikwe, yakatukiile Mose. 3 Fwandi yakolongine nu kuya kuli Mose na Aloni iyayanena iyati: “Mwemo icisila! Antu yaa yonsi amuzilo, nupya Yeova ali nayo. U mulandu ci lyene uno mukuitutumwila pa yantu yakwe Yeova?”

4 Lino Mose uvwile vivyo, lilyo kwene wafukime nu kufupama. 5 Lyene wanenyile Kola na yonsi amutungililanga ati: “Mutondo katondo Yeova alalenga ukuti umuntu wakwe nupya uwa muzilo amanyikwe, wino alinzile ukupalama kuli aliwe, nupya wino alasoolola aalapalama kuli aliwe. 6 Fwandi wemo Kola na yonsi aakukutungilila, mutole ivyakocelapo ivinunkile, 7 mutondo muce mwikemo umoto ni vinunkile pa nkoleelo yakwe Yeova, nupya umuntu wino Yeova alasoolola ale ali wa muzilo. Mwe ya mwana Levi ucipondoka winu iucilamo!”

8 Lyene Mose wanenyile Kola ati: “Uvwini kuno ya mwana Levi. 9 Uzye mukulola ukuti akantu akanono pakuti Leza uwa Ina Izlaeli amusoolole ukufuma umu Ina Izlaeli yonsi nu kumuzumilizya ukupalama kuli aliwe pakuti mwaomba umulimo umu cikuulwa cakwe Yeova ica muzilo, alino nu kwimilila pa nkoleelo ya Ina Izlaeli yonsi pakuti mwayaombela, 10 na pali vino wamupalamike kuli aliwe pamwi na Ina Levi yauzo yonsi? Uzye mukulonda na usimapepo kwene? 11 Fwandi wemo Kola kumwi na yonsi aakukutungilila atiyakolongana, mukulwisya Yeova. Uzye Aloni a weni uwakuti mwailizyanyizizyapo?”

12 Lyene Mose watumile akuya ama Datani na Abilamu ya mwana Eliabu, lelo yalanzile iyati: “Swemo tutakwiza! 13 Uzye a kantu akanono pa kutufumya umu mpanga umwaya umukaka nu uci pakuti uwize utukomele umu lwanga? Uzye lyene ukulonda nu kuisonta ukuya umwene witu? 14 Nupya utaatwingizya umu mpanga ili yonsi umwaya umukaka nu uci nanti ukuleka kuti tupyane ivyalo vya myangazi. Uzye ukulonda antu yakulondela kwati impafu? Swemo tutakwiza!”

15 Mose wasosile sana nupya wanenyile Yeova ati: “Utalolekesya upe wao uwa vyakulya. Ntapoka punda nanti wenga kuli aliyo nanti ukucitila ali wensi iciipe.”

16 Lyene Mose wanenyile Kola ati: “Mutondo uce uye pa nkoleelo yakwe Yeova kumwi na yonsi aakukutungilila, Aloni nawe kwene alazanwapo. 17 Cila muntu ace atole ica kocelapo ivinunkile nu kwikapo ivinunkile, nupya cila muntu alatwala ica kocelapo ivinunkile pa nkoleelo yakwe Yeova, vyonsi pamwi vilaya 250, naawe kwene kumwi na Aloni cila muntu ace atwale ica kocelapo ivinunkile.” 18 Fwandi yonsi yatozile ivya kocelapo ivinunkile, isilepo umoto ni vinunkile, nupya yimilile pa mulyango wi tenti lya kupepelapo kumwi na Mose na Aloni. 19 Lino Kola wakolonganike amutungililanga pa mulyango wi tenti lya kupepelapo, ululumbi lwakwe Yeova lwalolike kuli yonsi.

20 Lyene Yeova wanenyile Mose na Aloni ati: 21 “Ipaatulini ukufuma ukwi umba lilyo, pakuti njakome pakwene.” 22 Lino Mose na Aloni yuvwile vivyo, yafukime nu kufupama pansi nupya yalanzile iyati: “We Leza, wemuno ukapeela antu yonsi umi, uzye uluyembu lwa muntu wenga u lumalenga usokele antu yonsi?”

23 Lyene Yeova wanenyile Mose ati: 24 “Nena antu uti, ‘Fumini uku matenti yakwe Kola, Datani, na Abilamu!’”

25 Mose wakatwike nu kuya kuli Datani na Abilamu, na akalamba ya mu Izlaeli yamulondiile. 26 Lyene wanenyile antu ati: “Fumini uku matenti ya yantu yaa aipe, nupya mutakumya ku cintu cao icili consi, pakuti mutafwila umu membu zyao.” 27 Lilyo kwene yafumile uku matenti yakwe Kola, Datani, na Abilamu mu ncende zyonsi, nupya Datani na Abilamu yafumile nu kwimilila pa milyango ya matenti yao, kumwi na ya mama yao na ana yao aonsi na ana yao anono.

28 Lyene Mose walanzile ati: “Kuli cii akuno mumamanyila ukuti Yeova uwantuma ukucita vii vyonsi, ntaitandikila nemwineco. 29 Ndi cakuti antu yaa yamafwa wakwe vino antu yonsi yakafwa nu kufululwa wakwe vino antu yonsi yakafululwa, ale asi Yeova uwantuma. 30 Lelo ndi cakuti Yeova amacita cimwi iciiyele uku yantu yaa nu kuleka ukuti umusili uyulike nu kuyamila kumwi ni vintu vyao vyonsi nupya ndi cakuti yamaingila umwi Lindi* apuma, alino mumamanya ukuti antu yaa iyasaalula Yeova.”

31 Lino wamazile sile ukulanda mazwi yaa yonsi, umusili pano yaali walepwike. 32 Nupya wayulike nu kuyamila, kumwi ni ndupwa zyao na yonsi aali ku lusansa lwakwe Kola alino na vyonsi vino yaakweti. 33 Vikwene avino yaa yonsi iingile umwi Lindi,* apuma nu musili wayavimbilikizye nupya yafwile. 34 Lino antu yayo yapundanga, Aina Izlaeli yonsi ayazingulwike yutwike, ala yakuti: “Tuli ni ntete pano naswe kwene umusili ungatumila!” 35 Lyene umoto wafumile kuli Yeova nu koca antu 250 aapeelanga ivinunkile.

36 Lyene Yeova wanenyile Mose ati: 37 “Nena Elieza mwana Aloni simapepo kuti atole ivya kocelapo ivinunkile pa moto, pano i vya muzilo. Nupya umunene nu kuti asumbile umoto ukutali. 38 Ivya kocelapo ivinunkile ivya yantu atiyafwa pa mulandu nu luyembu lwao vilinzile ukuomviwa uku kupangilamo utuvyela utupapatane utwakwika uku ulambo, pano iyapeela ivintu vivyo pa nkoleelo yakwe Yeova, navyo iviya ivya muzilo. Vimaya icimanyililo ku Ina Izlaeli. 39 Fwandi Elieza simapepo watozile ivya kocelapo ivinunkile vyakwe koopa vino aapile nu moto yapeezile, wavisuzile nu kuvika uku ulambo, 40 wakwe vino Yeova wamunenyile ukupitila muli Mose. Viusyanga Aina Izlaeli ukuti kusi umuntu aatazumiliziwa asi wa mu lupwa lwakwe Aloni aalinzile ukupalama pa nkoleelo yakwe Yeova nu koca ivinunkile, nupya vyaiusyanga nu kuti kusi ali wensi aalinzile ukuya wakwe Kola na amutungililanga.

41 Uwanda uwalondelilepo, Aina Izlaeli yonsi yatandike ukuilizyanya kuli Mose na Aloni iyati: “Mwemwe mweili imukoma antu yakwe Yeova.” 42 Aina Izlaeli yakolongine nu kukatukila Mose na Aloni, lyene yapiliwike nu kulola ukwi tenti lya kupepelapo, yaweni ukuti ikumbi ilivimbilikizya itenti lya kupepelapo nu lulumbi lwakwe Yeova lwatandike ukuloleka.

43 Mose na Aloni yaile ukwi tenti lya kupepelapo, 44 nupya Yeova wanenyile Mose ati: 45 “Fumini pa yantu yaa pakuti njakome likwene.” Lino Mose na Aloni yuvwile vivyo, yafukime nu kufupama pansi. 46 Lyene Mose wanenyile Aloni ati: “Tola ica kocelapo ivinunkile nu kwikapo umoto wa pa ulambo, uwikepo ni vinunkile nu kuya zuwa zuwa uku yantu pakuti ukayafuutile uluyembu, pano Yeova wataleta ukali wakwe. Icikuko icitandika mpiti!” 47 Lilyo kwene Aloni watozile ica kocelapo ivinunkile wakwe vino Mose walanzile, nu kusimula ukuya ukwali antu, pano walanga icikuko icitandika ukukoma antu. Fwandi wisile ivinunkile pa ca kocelapo nu kutandika ukufuutila antu uluyembu. 48 Aloni watwalilile ukwimilila pakasi ka yantu afwe na aumi, nupya icikuko casusile icisila. 49 Aafwile uku cikuko yaali 14,700, ukufumyako aafwile pa mulandu wakwe Kola. 50 Pa cisila ca cikuko, Aloni waswilile kuli Mose pa mulyango wi tenti lya kupepelapo.

17 Lyene Yeova wanenyile Mose ati: 2 “Nena Aina Izlaeli ukuti yakuletele intuwa yonga yonga ukufuma muli cila mutundu, kuli kuti ukufuma uku ntunguluzi ya mutundu onga na onga, intuwa zyonsi pamwi zifwile ukuya 12. Pa ntuwa yonga na yonga ulembepo izina lya ntunguluzi ya mutundu. 3 Ulinzile ukulemba izina lyakwe Aloni pa ntuwa ya mutundu wakwe Levi, pano cila ntunguluzi ya mutundu onga na onga ifwile ukukwata intuwa yonga. 4 Ukike intuwa zizyo mwi tenti lya kupepelapo pa nkoleelo ya Mbokosi ya Upangano, pano nkalolekela kuli wewe lyonsi. 5 Nupya intuwa ya muntu wino nimasoolola imawalula, nimaleka nu kuti Aina Izlaeli yate ukuilizyanya kuli nene na kuli mwemwe.”

6 Fwandi Mose wanenyile Aina Izlaeli ukumutwalila intuwa, intunguluzi zyao zyonsi zyamutwalile intuwa, kuli kuti cila ntunguluzi ya mutundu yatwazile intuwa yonga, intuwa zyonsi pamwi zyali 12, nupya pa ntuwa zizyo paali ni ntuwa yakwe Aloni. 7 Lyene Mose waile aika intuwa zizyo pa nkoleelo yakwe Yeova umwi tenti lya kupepelapo umwali Mbokosi ya Upangano.

8 Pa wanda uwalondelilepo lino Mose wingile umwi tenti lya kupepelapo umwali Mbokosi ya Upangano, wazanyile intuwa yakwe Aloni iya mu mutundu wakwe Levi yatileemba, nupya yatwalilile ukuleemba nu kuwalula alino nu kuseeka maaumondi ace. 9 Lyene Mose watozile intuwa zyonsi izyali pa nkoleelo yakwe Yeova nu kuzitwala uku Ina Izlaeli yonsi. Nayo yaziceecesile, nupya cila ntunguluzi yatozilepo intuwa ya mutundu waiko.

10 Lyene Yeova wanenyile Mose ati: “Swilizya intuwa yakwe Aloni ukaike pa nkoleelo ya Mbokosi ya Upangano, nayo ilaya icimanyililo kuli ya cipondoka, pakuti yate ukuilizyanya kuli nene na pakuti yatafwa.” 11 Lilyo kwene sile Mose wacisile vino Yeova wamunenyile. Vivyo kwene avino wacisile.

12 Aina Izlaeli yanenyile Mose iyati: “Lyene tumafwa, i cumi kwene tumafwa, swensi kwene tumafwa tusile! 13 Wensi kwene uwapalama ku cikuulwa cakwe Yeova ica muzilo amaafwa! Uzye i cumi vivyo kwene avino tumafwanga?”

18 Lyene Yeova wanenyile Aloni ati: “Wemo na ana yako aonsi alino na amu mutundu wako mulapeelwa umulandu nga mwatama masunde ali yonsi aapa ncende ya muzilo, nupya wemo kumwi na ana yako mulapeelwa umulandu nga mwatama masunde pa mulimo winu uwa usimapepo. 2 Nupya palamika aina yako amu mutundu wakwe Levi, kuli kuti amu mutundu wa cikolwe cako, pakuti yakwazwilizyako imilimo nu kwazwilizya ana yako pa nkoleelo yi tenti lya kupepelapo umwaya Imbokosi ya Upangano. 3 Yalaaomba imilimo yonsi ino wayapeela kumwi ni milimo yonsi iya pi tenti lya kupepelapo. Lelo yatalinzile ukupalama uku viya vya mu ncende ya muzilo nu ku ulambo, pakuti yene nanti wewe mutaca mufwe. 4 Yalaya pamwi naawe, nupya yalaaomba imilimo yao iya pi tenti lya kupepelapo ni milimo yonsi iya pi tenti, nupya kusi umuntu aatazumiliziwa* alinzile ukupalama kuli wewe. 5 Mulinzile ukuomba imilimo inu umu ncende ya muzilo na pa ulambo, pakuti ukali utaca wize nupya pa Ina Izlaeli. 6 Nene nasoolola aina inu, kuli kuti Aina Levi ukufuma umu Ina Izlaeli kuti yaye upe kuli mwemwe. Yene yapeelwa kuli Yeova pakuti yaomba umulimo wa pi tenti lya kupepelapo. 7 Wewe pamwi na ana yako aonsi mwakulaomba imilimo ya usimapepo iikumile ivya pa ulambo ni vya mu muputule wa muzilo sana. Imupeela mulimo wa usimapepo ukuya upe winu, nupya umuntu ali wensi aatazumiliziwa* uwapalamako alinzile ukukomwa.”

8 Yeova watwalilile ukunena Aloni ati: “Inkusoolola ukuti waangalila imisangulo ino Aina Izlaeli yakunsangwila. Wemo pamwi na ana yako aonsi imupeelapo vimwi pa vintu vyonsi ivya muzilo vino Aina Izlaeli yakulasangula, kuti viye ivintu vinu amanda pe. 9 Ivintu ivilaya ivinu ukufuma pa malambo ya koca amuzilo sana aevi: malambo yonsi yano Aina Izlaeli yakaleta, kumwi nu upe wao uwa vyakulya na malambo yao aapa luyembu alino na malambo yao aapa mulandu yano yakaleta kuli nene. Ulaya upe wa muzilo sana kuli wewe nu ku yana yako aonsi. 10 Muce mwaviliila umu ncende ya muzilo sana. Umonsi wensi angalyako. Vilaya ivya muzilo sana kuli mwemwe. 11 Vyuze ivilaya ivinu aevi: ivya upe vino yasangula kumwi ni vya upe vyonsi ivya kuzulunzya ivya Ina Izlaeli. Nimvipeela kuli wewe nu ku yana yako aonsi na anako akazyana pakuti viye ivinu manda pe. Umuntu wensi umusanguluke uwa mu ng’anda yako angalyako.

12 “Mafuta yonsi asuma sana na waini wensi umupya ni ngano, kuli kuti ivyakulya vyonsi vino yakatandikilapo ukuzombola nu kuvipeela kuli Yeova, nakupeela. 13 Ivyakulya vyonsi ivyatandikilapo ukuca umu vyalo vyao, vino yalaaleta kuli Yeova, vilaya ivyako. Umuntu wensi umusanguluke uwa mu ng’anda yako angalyako.

14 “Icintu consi icapeelwa kuli Leza umu Izlaeli cilaya icako.

15 “Iyeli lya cintu consi ica umi lino yalaapeela kuli Yeova, liye u muntu nanti inyama, lilaya ilyako. Lelo ulinzile ukukulula iyeli lya muntu ni yeli lya nyama izikowele. 16 Ulinzile ukukulula iyeli lilyo pa mutengo wa kukulwilapo lino lili nu mwezi onga nanti ukucilapo, ulalikulula pa mutengo wa masyekele* 5 yakwe siuva, kulingana ni cipimo cakwe syekele icikaomviwa pa ncende ya muzilo. Syekele wenga angalingana na magela* 20. 17 Suka sile cipambasi iyeli nanti suuku iyeli nanti imbuzi iyeli vyene utalinzile ukuvikulula. Pano vyene ivya muzilo. Ulinzile ukusansa uwazi wa nyama zizyo pa ulambo, nupya ulinzile ukoca mafuta ya nyama zizyo pakuti yaye ilambo lya koca ilinunkile kuli Yeova. 18 Nupya umunyefu wa nyama zizyo ulaya uwako, wakwe vino ni cisao ca upe wa kuzulunzya ni kulu lya kwi lunji i vyako. 19 Imisangulo yonsi iya muzilo ino Aina Izlaeli yalaasangula kuli Yeova, injipeela kuli wewe nu ku yana yako aonsi na akazyana kuti viye ivinu manda pe. Uu uupangano wa musilya* uno Yeova watapangana naawe na ana yako.”

20 Yeova watwalilile ukunena Aloni ati: “Mu mpanga iya Izlaeli utalakwatamo ica upyanyi, nupya utalakwatamo impanga. Nene indi ca upyanyi cako umu Ina Izlaeli.

21 “Lola impeela Aina Levi icikumi icili consi umu Izlaeli kuti ciye ica upyanyi pa mulimo uno yakaomba pi tenti lya kupepelapo. 22 Aina Izlaeli yatalinzile ukupalama ukwi tenti lya kupepelapo, pano yangaya nu luyembu nu kufwa. 23 Aina Levi aalinzile ukulaomba imilimo ya pi tenti lya kupepelapo, nupya aalaya nu mulandu pa kuluvyanya kwa yantu api tenti lya kupepelapo. Isunde ilya manda pe uku nkulo zizyo zyonsi i lyakuti Aina Levi yatalinzile ukukwata impanga umu Ina Izlaeli. 24 Pano impeela Aina Levi icikumi cino Aina Izlaeli yalaasangula kuli Yeova kuti ciye ica upyanyi cao. Ali mulandu uno injanenela ukuti, ‘Yatalinzile ukukwata impanga umu Ina Izlaeli.’”

25 Lyene Yeova wanenyile Mose ati: 26 “Unene Aina Levi ukuti, ‘Aina Izlaeli yalaamupeela icikumi cino imupeela ukufuma kuli aliyo ukuti ciye ica upyanyi cinu, nupya ukufuma pa cikumi cico namwe kwene mufwile ukulasangwila icikumi kuli Yeova. 27 Musangulo uwo ulaalolwa wa ngano zinu nanti wakwe waini nanti wa mafuta. 28 Vikwene avino mulaasangula kuli Yeova ukufuma pa vikumi vyonsi vino mwapokelela ukufuma uku Ina Izlaeli, nupya pa misangulo kwene iiyo apano mulaapeela Aloni simapepo, imisangulo yakwe Yeova. 29 Mulaasangwila Yeova imisangulo ipusanepusane iya muzilo ukufuma pa vya upe vyonsi ivisuma sana ivyapeelwa kuli mwemwe.’

30 “Nupya unene Aina Levi uti, ‘Lino mwasangula ivisuma sana ukufuma pa vintu vino imupeelwa, Leza alaalola umusangulo uwo ukuti u wa Ina Levi, wakwe vino akalola umusangulo wa ngano, umusangulo wakwe waini nu wa mafuta. 31 Mwemwe pamwi na amu mang’anda inu, mungaliila umusangulo uwo umu ncende ili yonsi, pano ali malipilo inu pa mulimo uno mukaomba pi tenti lya kupepelapo. 32 Nga mukusangula ivintu ivisuma sana ukufuma pali vino mwapeelwa, mutalaya nu luyembu, nupya mutalinzile ukukowezya ivintu vya muzilo ivya Ina Izlaeli, pano nga mwacita vivyo mulafwa.’”

19 Nupya kwene Yeova wanenyile Mose na Aloni ati: 2 “Lii ali sunde lino Yeova watapeela, watalanda ati, ‘Nena Aina Izlaeli yakuletele ing’ombe isuma iya kaci iyenzu iitakweti ulema nupya iitaatala yaombapo umulimo uli onsi. 3 Uce upeele Elieza simapepo ing’ombe iiyo, nawe alaitwala ukunzi ya nkambi, nupya ilakomwa ala akulolako. 4 Lyene Elieza simapepo alatola uwazi umwi ku munwe nu kuusansa imiku 7 lwa ku nkoleelo yi tenti lya kupepelapo. 5 Lyene ing’ombe ilociwa ala Elieza akulolako. Impapa, umunyefu nu wazi kumwi na citindi navyo kwene vilociwa. 6 Nupya simapepo alatola kamusambo ka mukedali, kamuti kakwe isopu, ni nsalu iyenzu nu kuvisumbila umu moto umuli ing’ombe iikupya. 7 Lyene simapepo alafula ivyakuzwala vyakwe alino nu kufulala umu manzi, lyene alino angaya umu nkambi; lelo alaya umukowele ukufika manguzi.

8 “‘Uosile ing’ombe iiyo alafula ivyakuzwala vyakwe nu kufulala umu manzi, nupya alaya umukowele ukufika manguzi.

9 “‘Umuntu umusanguluke alazyola itwi lya ng’ombe nu kulitwala ukunzi ya nkambi mu ncende ya usaka, nupya lilinzile ukusungwa pakuti Aina Izlaeli yonsi yace yaliomvya uku manzi ya kusangulwilako. Pano i lambo lya pa luyembu. 10 Uwazyola itwi lya ng’ombe alafula ivyakuzwala vyakwe, nupya alaya umukowele ukufika manguzi.

“‘Lii lilaya isunde lya manda pe uku Ina Izlaeli nu ku yantu afuma uku mpanga zyuze aakaikala nayo. 11 Uwakumya icitumbi ca muntu ali wensi alaya umukowele pa manda 7. 12 Umuntu wiyo alinzile ukuisangulula ukuomvya manzi pa wanda wakwe citatu, nupya pa wanda uwalenga 7 alaya umusanguluke. Lelo ndi cakuti ataisangulwile pa wanda uwalenga citatu, ale pa wanda uwalenga 7 atalaya umusanguluke. 13 Uwakumya uku citumbi ca muntu ali wensi nu kukanaisangulula ala wakowezya icikuulwa ca muzilo cakwe Yeova, nupya umuntu wiyo alinzile ukukomwa ukufuma umu Ina Izlaeli. Pa mulandu wakuti atasansilwe manzi ya kusangulula, alatwalilila ukuya umukowele.

14 “Isunde lino mulinzile ukulondela ndi cakuti umwi wafwila umwi tenti aeli: Wensi uwingila umwi tenti na wensi uwalali umwi tenti lino umuntu wiyo walakufwa, alaya umukowele pa manda 7. 15 Iciviya consi icitatupikwepo intupiko cilaya icikowele. 16 Wensi ali mu mpanga uwakumya icitumbi ca muntu wino yakoma nanti icitumbi ca muntu uwaifwila sile nanti ifupa lya muntu nanti ilindi, alaya umukowele pa manda 7. 17 Yalinzile ukutolela umuntu wiyo umukowele itwi limwi ilya pi lambo lya pa luyembu ilya ng’ombe ino yosile, nupya yalitilapo manzi aali umu civiya atiyatapwa umu luzi ulukupita. 18 Lyene umuntu umusanguluke alatola kamuti kakwe isopu nu kukatimpika umu manzi nupya alasansila manzi yayo api tenti na pa viya vyonsi alino na pa yantu aali umwi tenti umwafwilile umuntu, nupya alasansila na pa muntu uwakumizye ifupa lya muntu nanti icitumbi ca muntu uwakomilwe nanti icitumbi ca muntu uwaifwilile sile nanti ilindi. 19 Umuntu umusanguluke alasansila manzi umuntu umukowele pa wanda wakwe citatu na pa wanda uwalenga 7, nupya alamusangulula uku luyembu pa wanda uwalenga 7; lyene umuntu umukowele alinzile ukufula ivyakuzwala vyakwe nu kufulala umu manzi, nupya manguzi alino alaya umusanguluke.

20 “‘Lelo umuntu umukowele aatalaisangulula, alinzile ukukomwa, pa mulandu wakuti ala watakowezya incende yakwe Yeova iya muzilo. Alaya umukowele, pano ala atasansilwe na manzi ya kusangulwilako.

21 “‘Isunde lya manda pe lino yalaalondela aeli: aakusansa manzi ya kusangulwilako alinzile ukufula ivyakuzwala vyakwe, nupya wensi uwakumya manzi ya kusangulwilako, alaya umukowele ukufika manguzi. 22 Consi cino umukowele wakumya cilaya icikowele, nupya umuntu uwakumya icintu cico alaya umukowele ukufika manguzi.’”

20 Mu mwezi wa kutandikilako, Aina Izlaeli yonsi yafisile umu lwanga lwa Zini, nupya yatandike ukwikala umu Kadesyi. Mumu kwene amuno Milyamu wafwilile nu kuziikwa.

2 Lyene antu yonsi yataakweti manzi, nupya yakolongine nu kukatukila Mose na Aloni. 3 Yailizyanyanga kuli Mose ala yakuti: “Nga cazifile itufwa lili kwene lino aina itu yafwilile pa nkoleelo yakwe Yeova! 4 U mulandu ci uno watuletela antu yakwe Yeova umu lwanga luu? Uzye a pakuti amuno twize tufwile pamwi ni viteekwa vitu? 5 Nupya u mulandu ci uno watufumizye uku Ijipti nu kutuleta umu mpanga yii iipe? Musi imbezu, masamvu, imyangazi, mapomegilaneti, nupya musi na manzi ya kumwa.” 6 Lyene Mose na Aloni yafumile pali aliyo nu kuya pa mulyango wi tenti lya kupepelapo nupya yaile iyafukama ala yafupime, nu lulumbi lwakwe Yeova lwatandike ukuloleka pali aliyo.

7 Lyene Yeova wanenyile Mose ati: 8 “Tola intuwa nu kukolonganika Aina Izlaeli yonsi, wewe kumwi na Aloni umwinako, nupya unene iciliwe ukuti cifumye manzi ale na antu yonsi yakulolako, nupya uyafumizye manzi mu ciliwe nu kuyapeela ni viteekwa vyao pakuti yamwe.”

9 Mose watozile intuwa iyali pa nkoleelo yakwe Yeova, wakwe vino Leza wamunenyile. 10 Lyene Mose na Aloni yakolonganike antu pa nkoleelo ya ciliwe, nupya Mose wayanenyile ati: “Uvwini kuno ya cipondoka mwe! Uzye tumufumizye manzi umu ciliwe cii?” 11 Lyene Mose wakatwisye intuwa nu kuma umu ciliwe imiku iili, nupya manzi aingi yatandike ukufuma na antu kumwi ni viteekwa vyao yatandike ukumwa.

12 Pa cisila Yeova wanenyile Mose na Aloni ati: “Pa mulandu wakuti mutantaile nu kuncindika pa manso ya Ina Izlaeli, mutalingizya antu yaa umu mpanga ino ndayapeela.” 13 Yaa ali manzi ya ku Meliba* kuno Aina Izlaeli yailizyanyizye kuli Yeova, icakuti asuka aicindamika pali aliyo.

14 Lyene Mose watumile inkombe ukufuma ku Kadesyi nu kuya uku mwene Edomu, pakuti zikamunene ziti: “Aina Izlaeli ainako iyalanda ukuti, ‘Wamanya ningo ukucula konsi kuno twacula. 15 Ivikolwe vitu vyaile uku Ijipti, nupya kuuku kwene akuno twikazile pa myaka iingi, nupya Aina Ijipti yatucuzyanga nu kucuzya ivikolwe vitu. 16 Lyene twaliliile kuli Yeova, nawe uvwile ukulila kwitu, watumile malaika nu kutufumya umu Ijipti, lyene paa tuli umu Kadesyi umusumba uwayela pa mupaka wa ncende yako. 17 Leka tupiteko umu mpanga yako. Tutalapita umu calo cako icili consi nanti umu calo ca myangazi, nupya tutalamwa manzi umu cifula icili consi. Tulapita umu Museo wa Mwene ukwaula ukupaalukila kwi lunji nanti kuli cimani mpaka tuce tufume umu ncende yako.’”

18 Lelo umwene wa ku Edomu walanzile ati: “Mutaca mupite umu mpanga itu. Ndi cakuti mwaca mwapitamo, ndiza imukomenkanye nu lupanga nu kumulwisya.” 19 Aina Izlaeli nayo yamwaswike iyati: “Tulapita sile umu museo, nupya ndi cakuti swemo ni viteekwa vitu twaca twamwa manzi yako, tulakulipila. Kusi cuze cino tukulonda, tukulonda sile ukupita umu mpanga yako.” 20 Nupya kwene umwene wa ku Edomu walanzile ati: “Mutaca mupitemo.” Lyene waile umu kukomenkanya Aina Izlaeli ala watasenda na antu aingi ni umba lya yasilika amaka. 21 Vikwene avino umwene wa ku Edomu wakaanyizye Aina Izlaeli ukupita umu mpanga yakwe; fwandi Aina Izlaeli yafumileko.

22 Aina Izlaeli yonsi, yafumile uku Kadesyi nu kuya uku Mwamba wa Holi. 23 Lyene Yeova walanzile na Mose na Aloni umu Mwamba wa Holi umupiipi nu mupaka wa mpanga ya Edomu ati: 24 “Aloni amafwa nu kuziikwa wa vikolwe vyakwe. Atalingila umu mpanga ino ndapeela Aina Izlaeli, pano mwensi mweili mutuvwilile vino namunenyile ukucita ukulozya uku manzi ya ku Meliba. 25 Senda Aloni nu mwanakwe Elieza nu kuyatwala pa Mwamba wa Holi. 26 Uzuule Aloni ivyakuzwala nu kuzwika Elieza umwanakwe, nupya Aloni wene amafwila paapa kwene.”

27 Fwandi Mose wacisile wakwe vino Yeova wamunenyile, nupya yaakwezile Umwamba wa Holi ala na Ina Izlaeli yonsi yakulolako. 28 Lyene Mose wazuuzile Aloni vyakuzwala nu kuzwika Elieza umwanakwe. Lyene pa cisila Aloni wafwilile paapa kwene pa mwamba. Nupya Mose na Elieza yatentemwike ukufuma pa mwamba. 29 Lino antu yonsi yaamanyile ukuti Aloni watafwa, Aina Izlaeli yonsi yamuloosizye pa manda 30.

21 Lino umwene wa ku Aladi Umwina Kenani uwikalanga umu Negebu, uvwile ukuti Aina Izlaeli iyafika umupiipi nu museo wa ku Atalimu, wayalwisizye nu kusenda yamwi umu uzya. 2 Fwandi Aina Izlaeli yalafile umulapo kuli Yeova iyati: “Ndi cakuti waleka twacimvya antu yaa, tulonona ni misumba yao.” 3 Yeova uvwile uku Ina Izlaeli nupya walesile ukuti yacimvye Aina Kenani, yayakomile nu konona imisumba yao. Acino yatemiile incende iiya ukuti Holima.*

4 Lino yatwalilile nu ulendo wao ukufuma pa Mwamba wa Holi ukuomvya umuseo uwaya kuli Yemba Muyenzu pakuti yatapita umu mpanga ya Edomu, yatonsile sana. 5 Nupya yatwalilile ukulanda iviipe pali Leza na pali Mose ala yakuti: “U mulandu ci uno mwatufumizizye umu Ijipti kuti twize tufwile umu lwanga? Mu ncende yii, musi ivyakulya na manzi nupya ivyakulya vii ivya uwelewele iivifuula.” 6 Yeova wayatumiile inzoka zya usungu, nupya zyatandike ukuyalumoola icakuti Aina Izlaeli aingi yafwile.

7 Lyene antu yaile kuli Mose nu kulanda iyati: “Ituyembuka pa kulanda iviipe pali Yeova na pali wewe. Tupaapatileko kuli Yeova pakuti afumye inzoka zii pali sweswe.” Mose nawe wayapaapatileko. 8 Yeova wanenyile Mose ati: “Panga icikoline ni nzoka ya usungu nu kuciika uku muti uwololoke. Lyene wensi uwalumika nga walolekesya uku nzoka iiyo, ale asikufwa.” 9 Lilyo kwene Mose wapanzile inzoka yakwe koopa nu kuika ku muti uwololoke, nupya lyonsi lino inzoka yaluma umwi, nawe walolekesya uku nzoka yakwe koopa ale amapusuka.

10 Lyene Aina Izlaeli yapisile nu kuyapanga inkambi umu Oboti. 11 Yafumile uku Oboti nu kuyapangila inkambi umu Iye-abalimu, mu lwanga ulwalozyanya na Moabu lwa ku ufumondaka. 12 Kufuma kuko yakatwike nu kuyapangila inkambi mupiipi nu mukonko wa Zeledi. 13 Kufuma kuko yakatwike nu kuyapangila inkambi umu ncende ya Alinoni iyayela umu lwanga ulwafumilila uku mupaka wa Ina Amoli, pano incende ya Alinoni i yapaatukanya impanga ya Moabu ni ya Ina Amoli. 14 Ali mulandu uno Ibuku Lya Nkondo Zyakwe Yeova likalandila pali Vahebu uwayela umu Sufa na pa mikonko iya Alinoni, 15 alino na pa mutentemuko wa mikonko uwafumilila lwa ku Ali kufika nu ku mupaka wa Moabu.”

16 Lyene yaile uku Beeli. Kuu u kwayelile icifula cino Yeova waneniilepo Mose ukuti: “Kolonganika antu pakuti njapeele manzi.”

17 Pa nsita iiya, Aina Izlaeli yimvile ulwimbo luu:

We cifula we, fumya manzi!—Imbiniko ulwimbo luu!

Lyene yafumile umu lwanga nu kuya uku Matana, 19 kufuma uku Matana yaile uku Nahalieli, nupya ukufuma ku Nahalieli yaile uku Bamoti. 20 Yafumile uku Bamoti nu kuya uku mukonko uwayela umu ncende ya Moabu pa mulundu wa Pisiga, pano incende ya Yesyimoni* ikalolekela ningo sana.

21 Lyene Aina Izlaeli yatumile antu akuti yakanene Sihoni umwene wa Ina Amoli ukuti: 22 “Leka tupiteko umu mpanga yako. Tutalapita umu calo cako icili consi nanti umu calo ca myangazi. Nupya tutalamwa manzi mu cifula cako icili consi. Tulapita umu Museo wa Mwene mpaka tuce tufume umu ncende yako.” 23 Lelo Sihoni ataazumilizye Aina Izlaeli ukupita umu ncende yakwe. Sihoni wakolonganike antu yakwe nu kuya umu kukomenkanya Aina Izlaeli uku lwanga nupya waile uku Yahazi nu kutandika ukulwa nayo. 24 Lelo Aina Izlaeli yamucimvizye nu kumupoka impanga ukufuma uku Alinoni kufika uku Yaboki mupiipi na Ina Amoni, pano Yazeli ali mupaka wa ncende ya Ina Amoni.

25 Fwandi Aina Izlaeli yaposile imisumba yonsi yii, nupya yatandike ukwikala mu misumba yonsi iya Ina Amoli, mu Hesyiboni nu mu misumba inono iyazingulwike. 26 Pano Hesyiboni wali umusumba wakwe Sihoni umwene wa Ina Amoli, uwalwile nu mwene wa ku Moabu nu kupoka impanga yakwe yonsi ukufika nu ku Alinoni. 27 Ali mulandu uno kwayela imvwango ya mitumfyo iyakuti:

“Izini uku Hesyiboni.

Lekini umusumba wa Sihoni ukuulwe nupya uye ukome.

28 Pano umoto wafumile umu Hesyiboni, kuli kuti icimbilimbili ukufuma umu musumba wa Sihoni.

Osile umusumba wa Ali wa ku Moabu, kuli kuti yamwene ya ncende izicindame izya ku Alinoni.

29 Kalanda kuli wewe Moabu! Mulononwa mwe yantu yakwe Kemosyi!

Akalenga ana yakwe aonsi ukuya imbutusi na anakwe akazyana ukuya azya yakwe Sihoni umwene wa Ina Amoli.

31 Fwandi Aina Izlaeli yatandike ukwikala umu mpanga ya Ina Amoli. 32 Lyene Mose watumile aonsi yamwi ukuyaceeceta umusumba wa Yazeli. Yaposile imisumba inono iyazingulwike Yazeli nupya yazinzile na Ina Amoli aikalangamo. 33 Pa cisila yapisile umu nzila iyaya uku Basyani. Nupya Ogi umwene wa ku Basyani waile na antu yakwe yonsi uku kulwa nayo pa Edilei. 34 Yeova wanenyile Mose ati: “Utamutiina, pano namamupeela umu minwe yako pamwi na antu yakwe yonsi ni mpanga yakwe, nupya umacita kuli aliwe wakwe vino wacisile kuli Sihoni umwene wa Ina Amoli uwikalanga umu Hesyiboni.” 35 Fwandi Aina Izlaeli yamukomile kumwi na ana yakwe na antu yakwe yonsi, icakuti kusi nanti aumwi uwapuswike, nupya yatozile ni mpanga yakwe.

22 Lyene Aina Izlaeli yakatwike nu kuyapangila inkambi mu lwanga lwa Moabu ku mbalama ya Luzi Lwa Yodani, incende iyalozyanya na Yeliko. 2 Balaki mwana Zipoli waweni vyonsi vino Aina Izlaeli yacisile uku Ina Amoli, 3 nupya Aina Moabu yuvwile sana intete pa mulandu wakuti Aina Izlaeli yaali aingi sana, Aina Moabu yalwile pa mulandu wa kutiina Aina Izlaeli. 4 Lyene Aina Moabu yanenyile intunguluzi zya Ina Midyani iyati: “Antu yaa yamatuliila impanga itu yonsi, wakwe vino ing’ombe ikalya umulemvwe.”

Balaki mwana Zipoli wali u mwene wa Ina Moabu pa nsita iiya. 5 Balaki watumile antu yamwi kuli Balamu mwana Beoli ku Petoli, incende iyayela umupiipi nu Luzi* mu mpanga ino wavyalilwemo. Watumile mazwi aakuti: “Lola! Antu iiza ukufuma uku Ijipti. Iyakumana impanga yonsi, nupya yakwikala sile umupiipi nani. 6 Acino napaapata iza untiipileko antu yaa, pano yakweti maka ukuncila. Limwi ningayacimvya nu kuyazinga umu mpanga itu, pano imanya ukuti wino wapaala ala wapaalwa na wino watiipa ala watiipwa.”

7 Fwandi intunguluzi zya Ina Moabu ni ntunguluzi zya Ina Midyani zyapisile ala izisenda na malipilo ya kulipila pa kusapoola nu kuya kuli Balamu, nupya zyamunenyile vino Balaki walanzile. 8 Lino Balamu uvwile vivyo, wanenyile intunguluzi ati: “Laalini kukwene nupya ndamunena vyonsi vino Yeova amanena.” Fwandi ntunguluzi zya Ina Moabu zikazile na Balamu.

9 Lyene Leza waile kuli Balamu nu kumuzya ati: “Nga aonsi yaa yano uli nayo aaweni?” 10 Balamu nawe waswike Leza wa cumi ati: “Balaki mwana Zipoli umwene wa ku Moabu watantumila mazwi akuti, 11 ‘Lola! Antu atiyafuma uku Ijipti iyakumana impanga yonsi. Iza nu kuntiipilako antu yaa. Limwi ningalwa nayo nu kuyacimvya nu kuyazinga umu mpanga yane.’” 12 Lelo Leza wanenyile Balamu ati: “Utalinzile ukupita nayo. Nupya utalinzile ukutiipa antu, pano aapaalwe.”

13 Balamu wakatwike katondo nu kunena intunguluzi zyakwe Balaki ati: “Swililini uku mpanga inu, pano Yeova watandesya ukupita namwe.” 14 Intunguluzi zya ku Moabu zyaswilile kuli Balaki nu kuyamunena iziti: “Balamu watakana ukwiza naswe.”

15 Nomba Balaki nupya kwene watumile intunguluzi izingi sana nupya izicindikwe, ukucila na pali zino watumile pa muku wa kutandikilapo. 16 Zyafisile kuli Balamu nu kumunena iziti: “Balaki mwana Zipoli walanda wati, ‘Napaapata, utaleka icili consi cikulesye ukwiza kuli nene, 17 pano ndakucindamika sana nupya ndakucitila icili consi cino ulanena. Acino iza untiipileko antu yaa.’” 18 Lelo Balamu waswike aomvi yakwe Balaki ati: “Nanti icakuti Balaki angampeela ing’anda yakwe iizuuzilemo siuva na goldi, ntanga incite icili consi cino Yeova Leza wane atanenyile, ciye icinono nanti icikalamba. 19 Nomba laalini kuno namwe kwene, pakuti imanye vino Yeova amanena.”

20 Lyene Leza waile kuli Balamu usiku nu kumunena ati: “Ndi cakuti aonsi yaa iiza mu kukusenda, pita nayo. Lelo uce uvwange sile mazwi yano ndakunena.” 21 Balamu wakatwike katondo nu kukwela pali punda* wakwe, nupya wapisile pamwi ni ntunguluzi zya ku Moabu.

22 Lelo Leza wasosile sana pa mulandu wakuti Balamu wapisile, nupya malaika wakwe Yeova wikazile umu museo pakuti alesye Balamu. Balamu wali pali punda nupya wali na aomvi yakwe yaili. 23 Lino punda waweni malaika wakwe Yeova ala ataimilila umu museo nu lupanga umu minwe, wezizye ukupaalukila mu mpanga. Lelo Balamu watandike ukuma punda pakuti aswilile umu museo. 24 Lyene malaika wakwe Yeova wimilile umu kazila akafyenkane pakasi ka vyalo vya myangazi viili, nupya uku mbali zyoili kwali iviumba vya mawe. 25 Lino punda waweni malaika wakwe Yeova, watandike ukusungutila uku ciumba suka afyaninkizya nu lwazo lwakwe Balamu, Balamu watandike ukumuma nupya kwene.

26 Lyene malaika wakwe Yeova wasungutiile pa nkoleelo nu kwimilila pa kacende akafyenkane, apataali ukwa kupaalukila kwi lunji nanti kuli cimani. 27 Lino punda waweni malaika wakwe Yeova, waizi pansi, lyene Balamu wasosile sana icakuti watwalilile ukuma punda wakwe ni ntuwa. 28 Lyene Yeova walesile ukuti punda avwange, nupya punda uzizye Balamu ati: “I cani cino nakucita pakuti ungume vii pa miku itatu?” 29 Balamu waswike punda ati: “Pano wandenga ukuloleka wa ciwelewele. Nupya inkwata lupanga, ngi inkukoma!” 30 Lyene punda uzizye Balamu ati: “Uzye asi nene punda wako wino ukakwelapo lyonsi ukufika na ndakai kwene? Uzye natala nakucitapo ica musango uu?” Nawe waswike ati: “Awe!” 31 Lyene Yeova wayuzile Balamu manso, nupya waweni malaika wakwe Yeova ala ataimilila umu museo nu lupanga umu minwe. Papo kwene sile Balamu wafukime nu kufupama pansi.

32 Lyene malaika wakwe Yeova uzizye Balamu ati: “U mulandu ci uno umila punda wako pa miku yii itatu? Iniza kuti nkulesye, pano ntazumilizye ulwendo lwako. 33 Punda iwandola nu kwezya ukunsiila inzila pa miku itatu. Akana ukunsiila inzila, ngi inkukoma mpiti nu kuleka punda aye nu umi.” 34 Balamu wanenyile malaika wakwe Yeova ati: “Injembuka, pano ntalimanyile ukuti awewe watuwimilila umu museo kuti uncilikile. Ndi cakuti cisi ningo kuli wewe, leka nswilile.” 35 Lelo malaika wakwe Yeova wanenyile Balamu ati: “Pita pamwi na antu yaa, nomba uce ukalande sile mazwi yano ndakunena.” Fwandi Balamu watwalilile ukupita pamwi ni ntunguluzi zyakwe Balaki.

36 Lino Balaki uvwile ukuti Balamu wataiza, lilyo kwene waile umu kumukomenkanya umu musumba uwa ku Moabu uwayela umu mbali ya mukonko wa Alinoni, pa mupaka wa ncende ya Moabu. 37 Balaki uzizye Balamu ati: “Uzye ntaatumile aakuti ize yakwame? U mulandu ci uno utiziile? Uzye welenganyanga ukuti ningafilwa ukukucindamika sana?” 38 Balamu waswike Balaki ati: “Lyene niza. Lelo ntazumiliziwe ukulanda icili consi cino nkulonda. Nimalanda sile vino Leza wanena.”

39 Lyene Balamu na Balaki yaile uku Kilyati-huzoti. 40 Balaki wakomile ing’ombe ni mfwele nupya wapeezileko Balamu ni ntunguluzi izyali nawe. 41 Katondo Balaki wasenzile Balamu nu kumutwala pa Bamoti-baali; paapa kwene apano waile alola antu yonsi.

23 Lyene Balamu wanenyile Balaki ati: “Kuula maulambo 7 pa ncende yii, nupya umpekanyizizye ya cipambasi 7 na ya suuku 7.” 2 Lilyo kwene sile Balaki wacisile vino Balamu walanzile. Nupya Balaki na Balamu yapeezile cipambasi na suuku pa ulambo onga na onga. 3 Lyene Balamu wanenyile Balaki ati: “Ikala pakwene umupiipi ni lambo lyako ilya koca, nemo nimapita. Limwi Yeova amalolekela kuli nene. Nimakunena vyonsi vino amanena.” Fwandi waile pa mwamba usenguke.

4 Lyene Leza walolekile kuli Balamu, Balamu nawe wamunenyile ati: “Impekanya maulambo 7, nupya impeela cipambasi na suuku pa ulambo onga na onga.” 5 Yeova wanenyile Balamu ivya kuyalanda, nupya wamunenyile ati: “Swilila kuli Balaki, nu kuyamunena vino nakunena.” 6 Fwandi waswilile nupya wazanyile Balaki ni ntunguluzi zyonsi izya ku Moabu ale iimilila mupiipi ni lambo lya koca. 7 Lyene Balamu walandiile umwi pinda ati:

‘Iza untiipile Yakobo.

Iza ukalipile Izlaeli.’

 8 Ningatiipa uli antu yano Leza atatiifile?

Nupya ningakalipila uli antu yano Yeova atakalipile.

11 Lyene Balaki uzizye Balamu ati: “U mulandu ci uno wancitila vii? Nakuleesile pakuti uwize utiipwile alwani yane, nomba lyene utacisile vivyo, lelo watuyapaala.” 12 Balamu nawe waswike ati: “Uzye ntakunenyile ukuti nimalanda sile vino Yeova wataanena?”

13 Balaki walanzile ati: “Twapita uku ncende yuze kuno umaya ukimilile pakuti uyalole. Umaya ukalole sile yamwi; usikuya ukalole yonsi. Kuuku kwene akuno ukayantiipile.” 14 Fwandi wamutwazile uku ncende iya Zofimu, papela ya mwamba wa Pisiga, nupya wakuuzile maulambo 7 nu kupeela cipambasi na suuku pa ulambo onga na onga. 15 Balamu wanenyile Balaki ati: “Ikala pakwene umupiipi ni lambo lyako ilya koca, nemo nimaya umu kulanda na Leza.” 16 Yeova wanenyile Balamu ivya kuyalanda nupya wamunenyile ati: “Swilila kuli Balaki, nu kuyamunena vino nakunena.” 17 Balamu nawe waswilile kuli Balaki nupya wazanyile akumulolela mupiipi ni lambo lyakwe ilya koca, wali pamwi ni ntunguluzi zya ku Moabu. Balaki wamuzizye ati: “I vyani vino Yeova watalanda?” 18 Lyene walandiile umwi pinda ati:

“Balaki katuka, nupya uvwa kuno.

Uvwa vino nkulanda, we mwana Zipoli.

Nga walanda cimwi, uzye akafilwa ukucicita?

Nga walaya cimwi, uzye akafilwa ukufikilizya?

22 Leza aakuyafumya umu Ijipti.

Kuli aliyo waya wa mpembe zyakwe cipambasi wa mu mpanga.*

Pa nsita yii antu yangalanda pali Yakobo na Izlaeli ukuti:

‘Lolini vino Leza watacita!’

25 Lyene Balaki wanenyile Balamu ati: “Ndi cakuti utayatiipwizile ale utalinzile nu kuyapaala.” 26 Balamu waswike Balaki ati: “Uzye ntali nakunena ukuti, ‘Nimacita vyonsi vino Yeova walanda’?”

27 Balaki wanenyile Balamu ati: “Leka nkutwale uku ncende na yuze nupya kwene. Limwi kuuku kwene akuno Leza wa cumi angalola ukuti cili ningo ukuti untiipile Aina Izlaeli.” 28 Lyene Balaki wasenzile Balamu pa mwamba wa Peoli, uwalozyanya na Yesyimoni.* 29 Lyene Balamu wanenyile Balaki ati: “Kuula maulambo 7 pa ncende yii, nupya umpekanyizizye ya cipambasi 7 na ya suuku 7.” 30 Balaki wacisile viivi kwene vino Balamu walanzile, nupya wapeezile cipambasi na suuku pa ulambo onga na onga.

24 Lino Balamu waweni ukuti Yeova watauvwa ningo pa kupaala Aina Izlaeli, ataaile nupya umu kulondelezya ku vya ulozi, lelo walozizye manso uku lwanga. 2 Lino Balamu wakatwisye manso nu kulola Aina Izlaeli iyapanga inkambi ukulingana ni mitundu yao, umupasi wakwe Leza wizile pali aliwe. 3 Lyene Balamu walandiile umwi pinda ati:

10 Lyene Balaki wasokiile sana Balamu, atoota umu minwe ukali ukali nu kumunena ati: “Nakwamile ukuti uwize utiipe alwani yane, nomba utayatiifile lelo watuyapaala pa miku itatu. 11 Swilila ukwako likwene. Nalondanga ukukucindamika sana, nomba lyene Yeova wakana ukukucindamika.”

12 Balamu wanenyile Balaki ati: “Uzye ntaanenyile antu yano watumile inti, 13 ‘Nanti icakuti Balaki angampeela ing’anda yakwe iizuuzilemo siuva na goldi, ntanga njitandikile ukucita icili consi cino Yeova atanenyile, ciye icisuma nanti iciipe? Uzye ntalanzile inti ndalanda sile vino Yeova alanena’? 14 Lyene nkuswilila uku yantu yane. Iza nkunene vino antu yaa yalacita uku yantu yako uku nkoleelo.” 15 Lyene walanzile umwi pinda ati:

20 Lino waweni Amaleki, watwalilile ukulandila umwi pinda ati:

21 Lino waweni Aina Kenite watwalilile ukulandila umwi pinda ati:

“Ukaikala umucingililwe, incende yako yayela pa ciliwe.

22 Lelo umwi aloca Keni.

Uzye palapita insita itali uli pakuti Aina Asilya yakusende umu uzya?”

23 Nupya watwalilile ukulanda umwi pinda ati:

Kalanda we! Uzye a weni alapusuka lino Leza alacita cii?

Lelo nawe kwene alononwa.”

25 Lyene Balamu wakatwike nu kuswilila ukwakwe. Balaki nawe kwene wapisile.

25 Lino Aina Izlaeli ikalanga umu Syitimu, antu yatandike kucita uzelele na anaci aku Moabu. 2 Anaci yalaalike antu uku kupeela malambo kuli ya leza yao, nupya antu yatandike ukulya nu kufukamila ya leza yao. 3 Aina Izlaeli yatandike ukupepa Baali uwa ku Peoli, nupya Yeova wayasokiile. 4 Yeova wanenyile Mose ati: “Tola intunguluzi zyonsi izya yantu yaa, nupya uleke zikomwe nu kukowekwa pa vimiti pa nkoleelo yakwe Yeova ala na antu yonsi yakulolako, pakuti ukali wakwe Yeova ufume pa Ina Izlaeli.” 5 Lyene Mose wanenyile ya kapingula ya mu Izlaeli ati: “Cila muntu alinzile ukukoma antu yakwe atiyapepako Baali uwa ku Peoli.”

6 Nomba lilyo kwene sile kwizile Umwina Izlaeli umwi uwali nu mwanaci Umwina Midyani ala akupalama uku ina yakwe, nupya Mose na Ina Izlaeli yonsi yalolangako, lino yaloosyanga pa mulyango wi tenti lya kupepelapo. 7 Lino Finiasi mwana Elieza, mwana Aloni simapepo waweni vivyo, lilyo kwene sile wafumile umu yantu nu kutola isumo. 8 Lyene wakonsile umonsi Umwina Izlaeli umwi tenti, nupya waile ayatota yoili kwene, watosile isumo mu monsi Umwina Izlaeli nu kulipuzinkanya umu vya nzwalo vya mwanaci. Lino wacisile vivyo, icikuko icali pa Ina Izlaeli casizile. 9 Aafwile uku cikuko yafisile 24,000.

10 Lyene Yeova wanenyile Mose ati: 11 “Finiasi mwana Elieza mwana Aloni simapepo watafumya ukali wane pa Ina Izlaeli, pano atalesile Aina Izlaeli kuti yapepe leza muze suka sile nene. Ntalovizye Aina Izlaeli pano nkalonda ukupepwa sile nenga. 12 Fwandi umunene uti, ‘Nimapangana nawe upangano wa mutende. 13 Nupya ulaya upangano wa usimapepo uwa manda pe pali aliwe na pa yana yakwe aalalondelelapo, pano atalesile Aina Izlaeli ukupepa leza muze suka sile nene, nupya watafuutila Aina Izlaeli imembu.’”

14 Umonsi Umwina Izlaeli uwakomilwe pamwi nu mwanaci Umwina Midyani wali a Zimuli, intunguluzi ya mutundu wa Ina Simyoni mwana Salu. 15 Umwanaci Umwina Midyani uwakomilwe wali a Kozibi mwana Zuli; Zuli wali intunguluzi ya luko ulwa mu Midyani.

16 Pa cisila Yeova wanenyile Mose ati: 17 “Zanzini Aina Midyani nu kuyakoma, 18 pano iyamucuzya ukuomvya imicenjelo yao ukulozya kuli Peoli na pa mulandu na vino Kozibi umwana uwa ntunguluzi ya ku Midyani wacisile, uwakomilwe pa wanda wa cikuko pa mulandu wakwe Peoli.”

26 Pa cisila ca cikuko, Yeova wanenyile Mose na Elieza mwana Aloni simapepo ati: 2 “Pendini Aina Izlaeli yonsi ukutandikila pa wa myaka 20 nu kuya papela, kulingana ni ndupwa zyao, mupende yonsi aangaomba usilika umu Izlaeli.” 3 Fwandi Mose na Elieza simapepo yalanzile na Ina Izlaeli umu nyika zya Moabu, mupiipi nu Luzi Lwa Yodani pa ncende iyalozyanya na Yeliko, yalanzile iyati: 4 “Pendini antu ukutandikila pa ya myaka 20 ukuya papela, wakwe vino Yeova watalanda.”

Aina Izlaeli aafumile umu Ijipti aeya: 5 Lubeni iyeli lyakwe Izlaeli; ya mwana Lubeni aonsi aeya: muli Hanoki u mwafumile ulupwa lwa Ina Hanoki; muli Palu u mwafumile ulupwa lwa Ina Palu; 6 muli Heziloni u mwafumile ulupwa lwa Ina Heziloni na muli Kami u mwafumile ulupwa lwa Ina Kami. 7 Zikwene ali ndupwa izyafumile muli Lubeni, nupya aalemvilwe yaali 43,730.

8 Eliabu wali a mwana Palu. 9 Nupya ya mwana Eliabu yaali a Nemueli, Datani na Abilamu. Datani na Abilamu yaali aonsi aasontwe umu Izlaeli aalwisizye Mose na Aloni, nupya yaali pamwi ni umba lyakwe Kola lino yalwisizye Yeova.

10 Lyene umusili walepwike nu kuyamila. Lelo Kola wene wafwilile pamwi na onsi 250 yano umoto osile. Nupya yaya icilangililo ca kucelula kuli yauze. 11 Nomba ya mwana Kola yene yataafwile.

12 Ya mwana Simyoni ukulingana ni ndupwa zyao aeya: muli Nemueli u mwafumile ulupwa lwa Ina Nemueli; muli Yamini u mwafumile ulupwa lwa Ina Yamini; muli Yakini u mwafumile ulupwa lwa Ina Yakini; 13 muli Zela u mwafumile ulupwa lwa Ina Zela na muli Syauli u mwafumile ulupwa lwa Ina Syauli. 14 Zikwene ali ndupwa izyafumile muli Simyoni, aalemvilwe yaali: 22,200.

15 Ya mwana Gadi ukulingana ni ndupwa zyao aeya: muli Zefoni u mwafumile ulupwa lwa Ina Zefoni; muli Hagi u mwafumile ulupwa lwa Ina Hagi; muli Syuni u mwafumile ulupwa lwa Ina Syuni; 16 muli Ozini u mwafumile ulupwa lwa Ina Ozini; muli Ele u mwafumile ulupwa lwa Ina Ele; 17 muli Alodi u mwafumile ulupwa lwa Ina Alodi na muli Aleli u mwafumile ulupwa lwa Ina Aleli. 18 Zikwene ali ndupwa izyafumile muli ya mwana Gadi, nupya aalemvilwe yaali 40,500.

19 Ya mwana Yuda yaali a Ere na Onani. Lelo Ere na Onani yafwilile umu mpanga ya Kenani. 20 Nupya ya mwana Yuda ukulingana ni ndupwa zyao aeya: muli Syila u mwafumile ulupwa lwa Ina Syila; muli Pelezi u mwafumile ulupwa lwa Ina Pelezi na muli Zela namo u mwafumile ulupwa lwa Ina Zela. 21 Nupya ya mwana Pelezi aeya: muli Heziloni u mwafumile ulupwa lwa Ina Heziloni na muli Hamuli u mwafumile ulupwa lwa Ina Hamuli. 22 Zikwene izyali ali ndupwa zyakwe Yuda, nupya aalemvilwe yaali 76,500.

23 Ya mwana Isakali ukulingana ni ndupwa zyao aeya: muli Tola u mwafumile ulupwa lwa Ina Tola; muli Puva u mwafumile ulupwa lwa Ina Puva; 24 muli Yasyubu u mwafumile ulupwa lwa Ina Yasyubu na muli Syimuloni u mwafumile ulupwa lwa Ina Syimuloni. 25 Zikwene ali ndupwa zyakwe Isakali, nupya aalemvilwe yaali 64,300.

26 Ya mwana Zebuluni ukulingana ni ndupwa zyao aeya: muli Seledi u mwafumile ulupwa lwa Ina Seledi; muli Eloni u mwafumile ulupwa lwa Ina Eloni na muli Yaleeli u mwafumile ulupwa lwa Ina Yaleeli. 27 Zikwene ali ndupwa izyafumile muli Zebuluni, nupya aalemvilwe yaali 60,500.

28 Ya mwana Jozefu ukulingana ni ndupwa zyao aeya: Manase na Efulemu. 29 Ya mwana Manase aeya: muli Makili u mwafumile ulupwa lwa Ina Makili; nupya Makili wizile aya a isi wakwe Gilyadi, na muli Gilyadi u mwafumile ulupwa lwa Ina Gilyadi. 30 Ya mwana Gilyadi aeya: muli Iezeli u mwafumile ulupwa lwa Ina Iezeli; muli Heleki umwafumile ulupwa lwa Ina Heleki; 31 muli Asilieli u mwafumile ulupwa lwa Ina Asilieli; muli Syekemu u mwafumile ulupwa lwa Ina Syekemu; 32 muli Syemida u mwafumile ulupwa lwa Ina Syemida na muli Hefeli u mwafumile ulupwa lwa Ina Hefeli. 33 Zelofeadi mwana Hefeli ataakweti ana aonsi, wakweti sile akazyana, na mazina yao aeya: Maala, Nowa, Hogila, Milika na Tiliza. 34 Zikwene ali ndupwa izyafumile muli Manase, nupya aalemvilwe yaali 52,700.

35 Ya mwana Efulemu ukulingana ni ndupwa zyao aeya: muli Syutela u mwafumile ulupwa lwa Ina Syutela; muli Bekeli u mwafumile ulupwa lwa Ina Bekeli na muli Tahani u mwafumile ulupwa lwa Ina Tahani. 36 Nupya ya mwana Syutela aeya: muli Elani u mwafumile ulupwa lwa Ina Elani. 37 Zikwene ali ndupwa izyafumile muli ya mwana Efulemu, nupya aalemvilwe yaali 32,500. Yakwene ali yano yaali aa mwana Jozefu ukulingana ni ndupwa zyao.

38 Ya mwana Benjamini ukulingana ni ndupwa zyao aeya: muli Bela u mwafumile ulupwa lwa Ina Bela; muli Asyibeli u mwafumile ulupwa lwa Ina Asyibeli; muli Ahilamu u mwafumile ulupwa lwa Ina Ahilamu; 39 muli Syefufamu* u mwafumile ulupwa lwa Ina Syufamu na muli Hufamu u mwafumile ulupwa lwa Ina Hufamu. 40 Ya mwana Bela a Alidi na Naamani: muli Alidi u mwafumile ulupwa lwa Ina Alidi na muli Naamani u mwafumile ulupwa lwa Ina Naamani. 41 Yakwene ali ya mwana Benjamini ukulingana ni ndupwa zyao, nupya aalemvilwe yaali 45,600.

42 Ya mwana Dani ukulingana ni ndupwa zyao aeya: muli Syuamu u mwafumile ulupwa lwa Ina Syuamu. Zikwene ali ndupwa izyafumile muli ya mwana Dani. 43 Aalemvilwe umu ndupwa zyonsi izya Ina Syuamu, yaali 64,400.

44 Ya mwana Asyeli ukulingana ni ndupwa zyao aeya: muli Imuna u mwafumile ulupwa lwa Ina Imuna; muli Isyivi u mwafumile ulupwa lwa Ina Isyivi; muli Beliya u mwafumile ulupwa lwa Ina Beliya; 45 ya mwana Beliya aeya: muli Hebeli u mwafumile ulupwa lwa Ina Hebeli na muli Malikieli u mwafumile ulupwa lwa Ina Malikieli. 46 Mwana Asyeli umukazyana wali a Sela. 47 Zikwene ali ndupwa zino zyafumile muli ya mwana Asyeli, nupya aalemvilwe yaali 53,400.

48 Ya mwana Nafutali ukulingana ni ndupwa zyao aeya: muli Yazeeli u mwafumile ulupwa lwa Ina Yazeeli; muli Guni u mwafumile ulupwa lwa Ina Guni; 49 muli Yezeli u mwafumile ulupwa lwa Ina Yezeli na muli Syilemu u mwafumile ulupwa lwa Ina Syilemu. 50 Zikwene ali ndupwa izyafumile muli ya mwana Nafutali, nupya aalemvilwe yaali 45,400.

51 Aina Izlaeli yonsi aalemvilwe yaali: 601,730.

52 Pa cisila Yeova wanenyile Mose ati: 53 “Yakwene ayano uce uwankanye impanga kulingana ni mpendwa ya mazina atiyalembwa. 54 Indupwa izikweti antu aingi, uce uzipeele impanga ikalamba, nupya indupwa izikweti antu anono, uce uzipeele impanga inono. Cila lupwa lulinzile ukupeelwa impanga kulingana ni mpendwa ya yantu atiyalembwa. 55 Nomba pa kwankanya impanga, kufwile kwaya ukupendoola. Yafwile ukupeelwa impanga ukulingana na mazina ya mitundu ya vikolwe vyao. 56 Cila lupwa pa kulupeela impanga kufwile kwaya ukupendoola, luye u lukalamba nanti ulunono.”

57 Aina Levi aalemvilwe ukulingana ni ndupwa zyao aeya: muli Gesyoni u mwafumile ulupwa lwa Ina Gesyoni; muli Koati u mwafumile ulupwa lwa Ina Koati na muli Melali u mwafumile ulupwa lwa Ina Melali. 58 Indupwa zya Ina Levi aezi: ulupwa lwa Ina Libini, ulupwa lwa Ina Hebuloni, ulupwa lwa Ina Maali, ulupwa lwa Ina Musyi nu lupwa lwa Ina Kola.

Koati wizile aya a isi wakwe Amulamu. 59 Muci wakwe Amulamu wali a Yokebedi, mwana Levi, wino mamakwe wamuvyaliile umu Ijipti. Nupya Yokebedi wizile avyalila Amulamu ana yaa: Aloni, Mose na Milyamu kaci wao. 60 Lyene Aloni wakweti ana yaa: Nadabu, Abihu, Elieza na Itamali. 61 Lelo Nadabu na Abihu yafwile pa mulandu wa kupeela ivinunkile kuli Yeova pa moto utazumiliziwe.

62 Aina Levi yonsi aonsi aalemvilwe, ukutandikila pa ya mwezi onga nu kuya papela yaali 23,000. Yene yataalembiilwe pamwi na Ina Izlaeli, pano yene yataali nu kupeelwa impanga umu Ina Izlaeli.

63 Yakwene ali yano Mose na Elieza simapepo yalemvile lino yalembanga Aina Izlaeli mu nyika izya ku Moabu umupiipi nu Luzi Lwa Yodani pa ncende iyalozyanya na Yeliko. 64 Lelo pali yaayo pataali yano Mose na Aloni simapepo yalemvile lino yapendanga Aina Izlaeli umu lwanga lwa Sinai. 65 Pano Yeova walanzile ukulozya uku yantu yayo ati: “Yalafwila umu lwanga.” Fwandi pasi nanti a wenga uwasiile suka sile Kalebu mwana Yefune na Yoswa mwana Nuni.

27 Lyene kwizile akazyana ya mwana Zelofeadi mwana Hefeli, mwana Gilyadi, mwana Makili, mwana Manase, amu ndupwa zyakwe Manase mwana Jozefu. Mazina yao aeya: Maala, Nowa, Hogila, Milika, na Tiliza. 2 Yimilile pa nkoleelo yakwe Mose pa mulyango wi tenti lya kupepelapo, nupya paali na Elieza simapepo ni ntunguluzi na antu yonsi, nupya yalanzile iyati: 3 Tata witu wafwilile umu lwanga, lelo ataali pali yano yakatukile Yeova, kuli kuti aatungililanga Kola, wene wafwile pa mulandu nu luyembu lwakwe nupya ataakwetipo ana aonsi. 4 U mulandu ci uno izina lyakwe tata limapongela umu lupwa lwakwe pa mulandu sile uwakuti ataakweti umwana umonsi? Tupeelini impanga pamwi na ina yakwe tata.” 5 Fwandi Mose watwazile umulandu wao kuli Yeova.

6 Lyene Yeova wanenyile Mose ati: 7 “Vino ya mwana Zelofeadi yakulanda i vya cumi. Ulinzile ukuyapeela impanga pamwi na ina yakwe isi, nupya impanga ino isi wali nu kupeelwa iimaya iyao. 8 Nupya unene Aina Izlaeli uti, ‘Ndi cakuti umonsi wafwa ukwaula ukukwata umwana umonsi, mulinzile ukupeela impanga yakwe ku mwanakwe umukazyana. 9 Lelo ndi cakuti ataakwata umwana umukazyana, muce mupeele impanga yakwe uku ina yakwe. 10 Ndi cakuti ataakwata aina, muce mupeele impanga yakwe ku ina yakwe isi. 11 Ndi cakuti isi ataakwata aina, muce mupeele impanga yakwe kuli lupwa wakwe umupalamisye, nupya aalaya umwineco wa mpanga iiyo. Vikwene ivyati vipingulwa avino Aina Izlaeli yace yalondela, wakwe vino Yeova watalanda.’”

12 Lyene Yeova wanenyile Mose ati: “Yanga papela ya mwamba wa Abalimu, ukalole impanga ino ndapeela Aina Izlaeli. 13 Nga wailola, ulafwa nu kuzikwa wa vikolwe vyako, wakwe vino cali na kuli Aloni umwinako, 14 pano lino antu yailizyanyanga pali nene umu lwanga lwa Zini, mutaalondile vino namunenyile pakuti muncindike pa nkoleelo ya yantu kulozya uku manzi, kuli kuti amanzi ya ku Meliba pa Kadesyi umu lwanga lwa Zini.”

15 Lyene Mose wanenyile Yeova ati: 16 “We Yeova, Leza aakapeela umi ku yantu yonsi, sonta umuntu uwakuti 17 aatungulula antu yaa muli vyonsi vino yakuomba, pakuti antu yakwe Yeova yataya wa mfwele izyaula kacema.” 18 Lyene Yeova wanenyile Mose ati: “Tola Yoswa mwana Nuni umonsi umufikepo, nupya uwike makasa yako pali aliwe. 19 Lyene umwimike pa nkoleelo yakwe Elieza simapepo apali na antu yonsi, nupya ufwile ukumusonta ukuya intunguluzi ale na antu yonsi yakulolako. 20 Umupeeleko amaka yamwi, pakuti Aina Izlaeli yonsi yamuvwila. 21 Alaimilila pa nkoleelo yakwe Elieza simapepo aalaamuzizyako ukuomvya Ulimu pali vino Yeova wapingula. Antu yonsi Aina Izlaeli yalaalondela vino walanda.”

22 Mose wacisile viivi kwene vino Yeova wamunenyile. Wasenzile Yoswa nu kuyamwimika pa nkoleelo yakwe Elieza simapepo ala pali na antu yonsi, 23 nupya wisile makasa yakwe pali aliwe nu kumusonta ukuya intunguluzi, wakwe vino Yeova wamunenyile.

28 Lyene Yeova wanenyile Mose ati: 2 “Nena Aina Izlaeli uti, ‘Mulinzile ukusininkizya ukuti mukumpeela ivya upe, kuli kuti ivyakulya. Malambo ya koca anunkile yano mukumpeela mulinzile ukuyapeela pa nsita izyasoololwa.’

3 “Nupya uyanene uti, ‘Malambo ya koca yano mulinzile ukupeela lyonsi kuli Yeova aeya: cila wanda mulinzile ukupeela ya suuku yaili aa mwaka onga ukuya ilambo lya koca. 4 Mulaapeela suuku wenga katondo, muze nawe mulaamupeela manguzi lino patali pafiite sana, 5 mulaapeelela kumwi na kilogilamu* wenga wakwe fulaulo umusuma umusaakanye na mafuta ya miolivi mupiipi na lita wenga, ukuya upe wa vyakulya. 6 Lilaya ilambo lya koca lino mulaapeela lyonsi wakwe vino calanzilwe pa Mwamba wa Sinai ukuti lilaya ilambo lya koca ilinunkile kuli Yeova, 7 suuku wenga na wenga muce mwamupeelela pamwi nu upe wa vyakumwa, uungalingana umupiipi na lita wenga. Muce mwaitulwila ivyakumwa ivikakola umu ncende ya muzilo pakuti uye upe wa vyakumwa kuli Yeova. 8 Nupya muce mwapeela suuku muze amanguzi lino kutali kufiite sana. Nupya mulaapeela nu upe wa vyakulya nu upe wa vyakumwa wakwe uno mulaapeela katondo, pakuti viye upe wa koca uununkile kuli Yeova.

9 “‘Lelo pa wanda wi Sabata kulinzile kwaya ukupeela ya suuku yaili aa mwaka onga asuma na makilogilamu apiipi na yaili yakwe fulaulo umusuma umusaakanye na mafuta ukuya upe wa vyakulya nu upe wa vyakumwa. 10 Lii lilaya ilambo lya koca ilya pi Sabata, lilapeelelwa pamwi ni lambo lya koca ilikapeelwa lyonsi alino nu upe wa vyakumwa.

11 “‘Pa kutandika kwa mwezi uli onsi muce mwapeela ilambo lya koca kuli Yeova, kuli kuti ya cipambasi yaili, suuku wenga umukalamba na ya suuku 7 aa mwaka onga, 12 nupya pali cipambasi wenga na wenga muce mwapeelelapo na makilogilamu yatatu na afu yakwe fulaulo umusuma umusaakanye na mafuta ukuya upe wa vyakulya, na pali suuku wenga napo muce mwapeelelapo makilogilamu yaili yakwe fulaulo umusuma umusaakanye na mafuta ukuya upe wa vyakulya, 13 pali suuku munono wenga na wenga napo muce mwapeelelapo kilogilamu wenga wakwe fulaulo umusuma umusaakanye na mafuta ukuya upe wa vyakulya, vilaya upe wa koca uununkile kuli Yeova. 14 Nupya pali cipambasi muce mwaikapo amalita yakwe waini umupiipi na yaili ukuya upe wa vyakumwa, na pali suuku napo muce mwaikapo waini aacizile panono pali lita wenga alino na pali suuku munono muce mwaikapo lita wenga wakwe waini. Lii lilaya ilambo lya koca ililapeelwa cila mwezi umu mwaka onsi. 15 Nupya imbuzi yonga ifwile ukupeelwa kuli Yeova ukuya upe wa pa luyembu ukulunda pi lambo lya koca ilikapeelwa lyonsi pamwi nu upe wa vyakumwa.

16 “‘Uwanda uwalenga 14 mu mwezi wa kutandikilako, ulaaya u wanda wa kuzevya Ucilo kuli Yeova. 17 Nupya pa wanda uwalenga 15 umu mwezi kwene uwo, kulaaya umutebeto. Pa manda 7 kulaaya ukulya umukate uwaula icitutumusi. 18 Pa wanda wa kutandikilako, kulaaya ukongano wa muzilo. Mutaca mwaomba umulimo uli onsi ukome. 19 Nupya malambo ya koca yano mulaapeela kuli Yeova aeya: ya cipambasi yaili, suuku wenga umukalamba na ya suuku 7 aa mwaka onga. Muce mwapeela inyama izisuma. 20 Mulinzile ukupeelela malambo yayo pamwi nu upe wa vyakulya wakwe fulaulo umusuma umusaakanye na mafuta, kuli kuti makilogilamu yatatu na afu pali cipambasi wenga na makilogilamu yaili yakwe fulaulo pali suuku wenga. 21 Nupya pali ya suuku 7 anono pali wenga na wenga muce mwapeela kilogilamu wenga wakwe fulaulo, 22 alino ni mbuzi yonga iya pi lambo lya pa luyembu iya kufuutilako imembu zinu. 23 Mulaapeela ivintu vii ukulunda pi lambo lya koca ilikapeelwa lyonsi katondo. 24 Mulaapeela ivintu vii cila wanda pa manda 7 wa upe wa vyakulya, vilaya ilambo lya koca ilinunkile kuli Yeova. Vilinzile ukupeelelwa pamwi ni lambo lya koca ilikapeelwa lyonsi kumwi nu upe wa vyakumwa. 25 Pa wanda uwalenga 7 mulinzile ukukwata ukongano wa muzilo. Mutalinzile ukuomba umulimo uli onsi ukome.

26 “‘Pa wanda wa kuzevya kwa kuzombola ivyakulya ivyatandikilapo ukuca, lino mukupeela upe wa vyakulya ivipya kuli Yeova, mulinzile ukukwata ukongano wa muzilo uwa kuzevya umutebeto wa milungu. Mutalinzile ukuomba mulimo uli onsi ukome. 27 Mulaapeela ya cipambasi yaili, suuku wenga umukalamba na ya suuku 7 aali nu mwaka onga, pakuti viye ilambo lya koca ilinunkile kuli Yeova, 28 nupya pali cipambasi wenga na wenga mulaapeela makilogilamu yatatu na afu yakwe fulaulo umusuma umusaakanye na mafuta ukuya upe wa vyakulya, nupya pali suuku wenga mulaapeela makilogilamu yaili yakwe fulaulo umusuma, 29 nupya pali ya suuku 7 anono, pali wenga na wenga muce mwapeela kilogilamu wenga wakwe fulaulo, 30 mulaapeela ni mbuzi yonga iya kufuutilako imembu zinu. 31 Mulaapeela ivintu vivyo ukulunda pi lambo lya koca ilikapeelwa lyonsi kumwi nu upe wa vyakulya. Mufwile ukupeela inyama izisuma kumwi nu upe wa vyakumwa.

29 “‘Nupya pa wanda uwa kutandikilako, umu mwezi uwalenga 7, muce mwakwata ukongano wa muzilo. Mutaca mwaomba umulimo uli onsi ukome. Ulaya uwanda uno mulaalizya ipenga. 2 Malambo ya koca anunkile yano mulaapeela kuli Yeova aeya: cipambasi wenga, suuku wenga umukalamba, na ya suuku 7 aa mwaka onga, inyama zyonsi zifwile ukuya izisuma, 3 Mulaapeela nu upe wa vyakulya wakwe fulaulo umusuma umusaakanye na mafuta, pali cipambasi mulaapeela makilogilamu yatatu na afu yakwe fulaulo, pali suuku mulaapeela makilogilamu yaili yakwe fulaulo, 4 nupya pali ya suuku 7 aa mwaka onga, mulaapeela kilogilamu wenga wakwe fulaulo pali suuku wenga na wenga, 5 alino na sawe wenga ukuya ilambo lya pa luyembu ilya kufuutilako imembu zinu. 6 Vii vilaapeelwa ukuya ilambo lya koca ilinunkile kuli Yeova ukulunda pi lambo lya cila mwezi ilya koca kumwi nu upe wa vyakulya alino nu kulunda pi lambo lya koca ilikapeelwa lyonsi kumwi nu upe wa vyakulya alino nu upe wa vyakumwa, kulingana ni sunde ilikakonkwa lyonsi pa kupeela ivintu vivyo.

7 “‘Nupya pa wanda uwalenga 10 umu mwezi kwene uu uwalenga 7, muce mwakwata ukongano wa muzilo, muce mwaikaanya.* Mutaca mwaomba umulimo uli onsi. 8 Nupya malambo ya koca yano mulaapeela kuli Yeova ukuya anunkile aeya: cipambasi wenga, suuku wenga umukalamba na ya suuku 7 aa mwaka onga, inyama zyonsi zilinzile ukuya izisuma. 9 Pali cipambasi mulaapeela upe wa vyakulya uufisile ku makilogilamu yatatu na afu wakwe fulaulo umusuma umusaakanye na mafuta, pali suuku napo mulaapeela makilogilamu yaili yakwe fulaulo 10 na pali ya suuku anono 7 muce mwapeela kilogilamu wenga wakwe fulaulo pali suuku wenga na wenga, 11 muce mwapeela ni mbuzi yonga ukuya ilambo lya pa luyembu, ukulunda pi lambo lya pa luyembu ilya kufuutilapo imembu na malambo ya koca aakapeelwa lyonsi kumwi nu upe wa vyakulya alino nu upe wa vyakumwa.

12 “‘Nupya pa wanda uwalenga 15 umu mwezi uwalenga 7, muce mwakwata ukongano wa muzilo. Mutaca mwaomba umulimo uli onsi ukome, muce mwazevya nu mutebeto kuli Yeova pa manda 7. 13 Nupya malambo ya koca anunkile yano mulaapeela kuli Yeova aeya: ya cipambasi 13, ya suuku yaili akalamba na ya suuku 14 aa mwaka onga, inyama zyonsi zifwile ukuya izisuma. 14 Pali ya cipambasi 13 muce mwapeela nu upe wa vyakulya uufisile ku makilogilamu yatatu na afu wakwe fulaulo umusuma umusaakanye na mafuta pali cipambasi wenga na wenga, pali ya suuku yaili muce mwapeela makilogilamu yaili yakwe fulaulo pali suuku wenga na wenga, 15 nupya pali ya suuku 14 aa mwaka onga napo muce mwapeela kilogilamu wenga wakwe fulaulo pali suuku wenga na wenga, 16 muce mwapeela ni mbuzi yonga ukuya ilambo lya pa luyembu ukulunda pi lambo lya koca ilikapeelwa lyonsi kumwi nu upe wa vyakulya alino nu upe wa vyakumwa.

17 “‘Nupya pa wanda wakwe ciili muce mwapeela ya cipambasi 12, ya suuku yaili akalamba na ya suuku 14 aa mwaka onga, inyama zyonsi zifwile ukuya izisuma, 18 nupya muce mwapeela nu upe wa vyakulya nu upe wa vyakumwa pali ya cipambasi, pali ya suuku akalamba na pali ya suuku anono, kulingana ni mpendwa iikapeelwa lyonsi pa nyama zizyo, 19 muce mwapeela ni mbuzi yonga ukuya ilambo lya pa luyembu kulunda pi lambo lya koca ilikapeelwa lyonsi nu upe wa vyakulya pamwi nu upe wa vyakumwa.

20 “‘Nupya pa wanda wakwe citatu muce mwapeela ya cipambasi 11, ya suuku yaili akalamba na ya suuku 14 aa mwaka onga, inyama zyonsi zifwile ukuya izisuma, 21 nupya muce mwapeela nu upe wa vyakulya nu upe wa vyakumwa pali ya cipambasi, pali ya suuku akalamba na pali ya suuku anono, kulingana ni mpendwa iikapeelwa lyonsi pa nyama zizyo, 22 muce mwapeela ni mbuzi yonga ukuya ilambo lya pa luyembu kulunda pi lambo lya koca ilikapeelwa lyonsi nu upe wa vyakulya alino nu upe wa vyakumwa.

23 “‘Nupya pa wanda uwalenga 4 muce mwapeela ya cipambasi 10, ya suuku yaili akalamba na ya suuku 14 aa mwaka onga, inyama zyonsi zifwile ukuya izisuma, 24 nupya muce mwapeela nu upe wa vyakulya nu upe wa vyakumwa pali ya cipambasi, pali ya suuku akalamba na pali ya suuku anono, kulingana ni mpendwa iikapeelwa lyonsi pa nyama zizyo, 25 muce mwapeela ni mbuzi yonga ukuya ilambo lya pa luyembu kulunda pi lambo lya koca ilikapeelwa lyonsi nu upe wa vyakulya alino nu upe wa vyakumwa.

26 “‘Nupya pa wanda uwalenga 5 muce mwapeela ya cipambasi 9, ya suuku yaili akalamba na ya suuku 14 aa mwaka onga, inyama zyonsi zifwile ukuya izisuma, 27 nupya muce mwapeela nu upe wa vyakulya nu upe wa vyakumwa pali ya cipambasi, pali ya suuku akalamba na pali ya suuku anono, kulingana ni mpendwa iikapeelwa lyonsi pa nyama zizyo, 28 muce mwapeela ni mbuzi yonga ukuya ilambo lya pa luyembu kulunda pi lambo lya koca ilikapeelwa lyonsi nu upe wa vyakulya alino nu upe wa vyakumwa.

29 “‘Nupya pa wanda uwalenga 6 muce mwapeela ya cipambasi 8, ya suuku yaili akalamba na ya suuku 14 aa mwaka onga, inyama zyonsi zifwile ukuya izisuma, 30 nupya muce mwapeela nu upe wa vyakulya nu upe wa vyakumwa pali ya cipambasi, pali ya suuku akalamba na pali ya suuku anono, kulingana ni mpendwa iikapeelwa lyonsi pa nyama zizyo, 31 muce mwapeela ni mbuzi yonga ukuya ilambo lya pa luyembu kulunda pi lambo lya koca ilikapeelwa lyonsi nu upe wa vyakulya alino nu upe wa vyakumwa.

32 “‘Nupya pa wanda uwalenga 7 muce mwapeela ya cipambasi 7, ya suuku yaili akalamba na ya suuku 14 aa mwaka onga, inyama zyonsi zifwile ukuya izisuma, 33 nupya muce mwapeela nu upe wa vyakulya nu upe wa vyakumwa pali ya cipambasi, pali ya suuku akalamba na pali ya suuku anono, kulingana ni mpendwa iikapeelwa lyonsi pa nyama zizyo, 34 muce mwapeela ni mbuzi yonga ukuya ilambo lya pa luyembu kulunda pi lambo lya koca ilikapeelwa lyonsi nu upe wa vyakulya alino nu upe wa vyakumwa.

35 “‘Nupya pa wanda uwalenga 8 muce mwakwata ukongano uiyele. Mutaca mwaomba umulimo uli onsi ukome. 36 Malambo ya koca anunkile yano mulaapeela kuli Yeova aeya: cipambasi wenga, suuku wenga umukalamba na ya suuku 7 aa mwaka onga, inyama zyonsi zifwile ukuya izisuma, 37 nupya muce mwapeela nu upe wa vyakulya nu upe wa vyakumwa pali cipambasi, pali suuku mukalamba na pali ya suuku anono, kulingana ni mpendwa iikapeelwa lyonsi pa nyama zizyo, 38 muce mwapeela ni mbuzi yonga ukuya ilambo lya pa luyembu kulunda pi lambo lya koca ilikapeelwa lyonsi nu upe wa vyakulya alino nu upe wa vyakumwa.

39 “‘Yakwene ali malambo yano mulaapeela kuli Yeova pa kuzevya kuno mulaakwata, kulunda pa malambo ya pa milapo na pa malambo ya koca aakuitemelwa na pa upe wa vyakulya na pa upe wa vyakumwa alino na pa malambo ya mutende.’” 40 Mose wanenyile Aina Izlaeli vyonsi vino Yeova wamunenyile.

30 Lyene Mose wanenyile intunguluzi zya mitundu ya Ina Izlaeli ati: “Yeova walanda wati: 2 Ndi cakuti umonsi walapa umulapo kuli Yeova uwa kucita icintu cimwi nanti walapa umulapo uwa kukanacita icintu cimwi, afwile ukufikilizya vino walanda. Afwile ukucita vyonsi vino walafile ukuti alacita.

3 “Nupya ndi cakuti mwanaci walapa umulapo umwi kuli Yeova uwa kucita icintu cimwi nanti walapa umulapo uwa kukanacita icintu cimwi lino acili umwance nupya acili akaikala pali ya isi 4 na ya isi yuvwa imilapo ino watalapa nupya yatamulesizye, alafikilizya imilapo yonsi ino watalapa, nu mulapo onsi uno watalapa uwa kukanacita icintu cimwi nao kwene alaufikilizya. 5 Lelo ndi cakuti ya isi yamulesya lino yuvwa umulapo uno watalapa uwa kucita icintu cimwi nanti uwa kukanacita icintu cimwi, lyene ale atalafikilizya umulapo uwo. Yeova alamwelela pa mulandu wakuti ya isi iyamulesya.

6 “Lelo ndi cakuti watwalwa lino walapa mpiti umulapo wa kucita icintu cimwi nanti lino walaya cimwi ukwaula ukwelenganyapo 7 na iya uvwa imilapo iiyo lelo wakana ukumulesya pa wanda uno uvwa, ale umwanaci wiyo alafikilizya imilapo yonsi ino walapa. 8 Lelo ndi cakuti iya wamulesya pa wanda uno uvwa imilapo iiyo, angafuuta umulapo wa kucita icintu cimwi nanti icintu cino walavile ukwaula ukwelenganya, nupya Yeova alamwelela.

9 “Lelo ndi cakuti mukamfwilwa nanti umwanaci wino yata walapa umulapo, alafikilizya vyonsi vino watalapa.

10 “Lelo ndi cakuti umwanaci walapa umulapo wa kucita icintu cimwi nanti uwa kukanacita icintu cimwi lino acili na iya, 11 na iya uvwa nupya atamulesizye, alafikilizya imilapo yonsi ino watalapa. 12 Lelo ndi cakuti iya wafuusile imilapo ya muci pa wanda uno uvwile, atalaifikilizya. Iya wafuusile imilapo iiyo, nupya Yeova alelela umwanaci wiyo. 13 Kulozya ku milapo ya kucita icintu cimwi nanti iya kuikaanya ukucita icintu cimwi, iya angapingulapo ukuti muci afikilizye imilapo iiyo nanti foo. 14 Lelo ndi cakuti iya atamulesizye mu manda alondelelapo, ale watazumilizya uku milapo yakwe yonsi, pano ale ataamulesizye pa wanda uno uvwile imilapo yakwe. 15 Lelo ndi cakuti iya wamulesya pa cisila ca wanda wa kuvwa imilapo yakwe, ale umulandu wa muci ulaya pali iya.

16 “Yakwene ali masunde yano Yeova wanenyile Mose ukulozya kuli iya nu muci, alino na kuli isi nu mwanakwe umukazyana wino acili akaikala umu ng’anda yakwe isi.”

31 Lyene Yeova wanenyile Mose ati: 2 “Landwila Aina Izlaeli pali vino Aina Midyani yayacisile. Lyene pa cisila ulafwa nu kuzikwa wa vikolwe vyako.”

3 Fwandi Mose wanenyile antu ati: “Peelini aonsi ivyanzo akuya umu kulwisya Aina Midyani nu kuleta icilanduzi cakwe Yeova pali aliyo. 4 Mutume asilika 1,000 ukufuma muli cila mutundu wa Ina Izlaeli.” 5 Fwandi ukufuma pa Ina Izlaeli aali aingi, yasoolwile asilika 1,000 ukufuma muli cila mutundu, yonsi pamwi aipekinye ukuya umu ulwi yaali 12,000.

6 Lyene Mose watumile ukufuma muli cila mutundu asilika 1,000, pamwi na Finiasi mwana Elieza simapepo uwasenzile iviya vya muzilo na mapenga ya mu ulwi. 7 Yaile iyalwa na Ina Midyani wakwe vino Yeova wanenyile Mose, nupya yakomile aonsi yonsi. 8 Kulunda pali yauze aakomilwe, yakomile na yamwene 5 aa Ina Midyani, kuli kuti Evi, Lekemu, Zuli, Huli na Leba, yakomile na Balamu mwana Beoli uku lupanga. 9 Lelo Aina Izlaeli yasenzile anaci na ana ya Ina Midyani umu uzya. Yasenzile ni viteekwa vya Ina Midyani vyonsi alino ni vintu vyonsi vino yaakweti. 10 Yosile imisumba yao yonsi ino ikalangamo kumwi ni nkambi zyao izyacingililwa na malinga. 11 Yasenzile ivintu vyonsi, antu kumwi ni nyama. 12 Lyene yatwazile azya ni vintu vino yapokolwile umu ulwi kuli Mose na Elieza simapepo nu ku Ina Izlaeli yonsi, kuli kuti ku nkambi iyayelile mu lwanga lwa Moabu umupiipi nu Luzi Lwa Yodani incende iyalozyanya na Yeliko.

13 Lyene Mose na Elieza simapepo kumwi ni ntunguluzi zyonsi, yaile umu kuyakomenkanya ukunzi ya nkambi. 14 Lelo Mose wasokiile sana asilika ni ntunguluzi izyatungululanga antu masauzandi alino ni ntunguluzi izyatungululanga maumba umuli antu 100 aawezile ukufuma uku ulwi. 15 Mose wayuzizye ati: “U mulandu ci uno mwalekela anaci yaa yonsi ukuya nu umi? 16 Lolini yakwene ayano Balamu waomvizye ku kutunka Aina Izlaeli ukupondokela Yeova lino yapefile leza wa ku Peoli, icakuti icinkunka cizile pa yantu yakwe Yeova. 17 Fwandi mulinzile ukukoma umwana wensi umonsi nu mwanaci wensi uwalaalapo nu monsi. 18 Lelo mulinzile ukusya akazyana yonsi aatalaalapo nu monsi. 19 Nupya mulinzile ukuyaikala ukunzi ya nkambi pa manda 7. Umuntu wensi muli mwemwe uwakomile umwi na wensi uwakumizye uku citumbi alinzile ukuisangulula pa wanda wakwe citatu na pa wanda uwalenga 7, kuli kuti mwemwe na yano mwasenzile umu uzya. 20 Mulinzile nu kusangulula ivyakuzwala vyonsi uku luyembu kumwi ni vintu ivyapangilwa ni mpapa, na vyonsi ivyapangilwa na mavumbu ya mbuzi alino ni viya vyonsi ivyapangilwa ni mbao.”

21 Lyene Elieza simapepo wanenyile asilika aile umu ulwi ati: “Isunde lino Yeova wapeezile Mose i lyakuti, 22 ‘Goldi sile na siuva na koopa, ivyela ni mitovwe, 23 kuli kuti consi icingengululwa nu moto, mulinzile ukucipisya umu moto, nupya cilaya icisanguluke. Lelo mulinzile nu kucisangulula umu manzi ya kusangulwilako. Consi icitanga cengululwe nu moto, mulinzile ukucipisya umu manzi. 24 Nupya mulinzile ukufula ivyakuzwala vinu pa wanda uwalenga 7 nu kuya aasanguluke, lyene alino mungiza umu nkambi.’”

25 Lyene Yeova wanenyile Mose ati: 26 “Penda ivintu ivyaposilwe umu ulwi, upende na antu aasenzilwe umu uzya pamwi ni nyama; uombele pamwi na Elieza simapepo alino ni ntunguluzi zya mitundu ya Ina Izlaeli. 27 Uwankanye paili ivintu ivyaposilwe umu ulwi, vimwi vilapeelwa kuli yano yaile uku ulwi alino vyuze navyo ku Ina Izlaeli yonsi. 28 Ulinzile ukutola ivya kupeela kuli Yeova kufuma pali vino asilika aile uku ulwi iyapeelwa, ufwile ukutola umuntu wenga ukufuma pa yantu 500, vivyo kwene avino ufwile ukucita nu ku ng’ombe kuli ya punda nu ku mfwele ni mbuzi. 29 Ulinzile ukutola ukufuma pali afu wao nu kupeela kuli Elieza simapepo ukuya umusangulo kuli Yeova. 30 Kufuma pali afu uwatapeelwa ku Ina Izlaeli, ulinzile ukutola umuntu wenga pa yantu 50 nu kupeela Aina Levi aakaomba imilimo ya pa cikuulwa ca muzilo cakwe Yeova, vivyo kwene avino ufwile ukucita nu ku ng’ombe, kuli ya punda, ku mfwele ni mbuzi alino nu ku viteekwa vyonsi.”

31 Fwandi Mose na Elieza simapepo yacisile viivi kwene vino Yeova wanenyile Mose. 32 Vyonsi vino aile umu ulwi yaposile aevi: imfwele ni mbuzi zyali 675,000, 33 ing’ombe zyali 72,000 34 na ya punda yali 61,000. 35 Anaci ataatazile yalaalepo nu monsi yaali 32,000. 36 Pali afu wa vintu vino aile umu ulwi yapeezilwe paali imfwele ni mbuzi 337,500. 37 Imfwele ni mbuzi izyapeezilwe kuli Yeova zyali 675. 38 Nupya paali ing’ombe 36,000, izyapeezilwe kuli Yeova zyali 72. 39 Paali na ya punda 30,500, nupya aapeezilwe kuli Yeova yaali 61. 40 Antu nayo yaali 16,000, aapeezilwe kuli Yeova yaali 32. 41 Lyene Mose wapeezile Elieza simapepo ivyapeezilwe kuli Yeova, wakwe vino Yeova wamunenyile.

42 Pali afu wa vintu ivyapeezilwe uku Ina Izlaeli, vino Mose wankiinye ukufuma pali vino aile umu kulwa yaali navyo, 43 paali imfwele ni mbuzi 337,500, 44 paali ni ng’ombe 36,000 45 na ya punda 30,500, 46 alino na antu 16,000. 47 Lyene ukufuma pali afu wa vintu ivyapeezilwe uku Ina Izlaeli, Mose watozile umuntu wenga pa yantu 50 nu kupeela Aina Levi aaombanga imilimo ya pa cikuulwa ca muzilo cakwe Yeova, vikwene avino wacisile nu ku nyama wakwe vino Yeova wamunenyile.

48 Lyene aonsi aasonsilwe aali pa yasilika masauzandi, yaile kuli Mose kumwi ni ntunguluzi izyangalilanga antu masauzandi alino ni ntunguluzi izyatungululanga maumba umuli antu 100, 49 yamunenyile iyati: “Aomvi yako iyapenda asilika yano tukwangalila, nupya pataponzile nanti a wenga. 50 Fwandi katupeele kuli Yeova vino twazanyile, kuli kuti iviya vyakwe goldi, maceni ya kuzwala ku makulu, vibango, imbalaminwe zya kufwatikilako, maelena ni viyembelo vyuze, pakuti tuifuutile imembu zitu kuli Yeova.”

51 Lyene Mose na Elieza simapepo yaposile goldi kuli aliyo ni viyembelo vyonsi. 52 Goldi wensi wino intunguluzi izyatungululanga antu masauzandi ni ntunguluzi izyatungululanga maumba umuli antu 100 zyasangwile kuli Yeova wali masyekele* 16,750. 53 Umusilika wenga na wenga, watozilepo ivintu vimwi pali vino yaposile umu ulwi. 54 Mose na Elieza yaposile goldi ukufuma uku ntunguluzi izyatungululanga antu masauzandi ni ntunguluzi izyatungululanga maumba umuli antu 100 nu kutwala umwi tenti lya kupepelapo pakuti aye iciusizyo ku Ina Izlaeli pali vino Yeova wayacitiile.

32 Lyene ya mwana Lubeni na ya mwana Gadi yaakweti iviteekwa ivingi sana, nupya yaweni ukuti impanga ya Yazeli ni ya Gilyadi yaali isuma uku viteekwa. 2 Fwandi ya mwana Gadi na ya mwana Lubeni yaile kuli Mose uwali pamwi na Elieza simapepo ni ntunguluzi zya yantu nu kulanda iyati: 3 “Impanga umwaya imisumba ya Ataloti, Diboni, Yazeli, Nimula, Hesyiboni, Eleale, Sibamu, Nebo na Beoni, 4 ino Yeova wazwilizye Aina Izlaeli ukucimvya, iisuma sana uku viteekwa, nupya swe yaomvi yako twakwata iviteekwa ivingi sana.” 5 Yatwalilile ukulanda iyati: “Ndi cakuti ungazumilizya, leka impanga yii ipeelwe kuli sweswe swe yaomvi yako. Utaleka tulambe Uluzi Lwa Yodani.”

6 Lyene Mose uzizye ya mwana Gadi na ya mwana Lubeni ati: “Uzye aina inu yangaya uku nkondo mwemo musyale mutenzi kuno? 7 U mulandu ci uno mukutoovwela Aina Izlaeli ukuti yataya uku mpanga ino Yeova wayapeela? 8 Vikwene avino ni vikolwe vinu vyacisile lino navitumile ukufuma uku Kadesyi-banea ukuya umu kulola impanga. 9 Lino yaile uku Mukonko wa Esyikoli nu kulola impanga, yatoovwile Aina Izlaeli ukuya uku mpanga ino Yeova walavile ukuti wali nu kuyapeela. 10 Yeova wasosile sana pa wanda uwa, nupya walafile ati: 11 ‘Aonsi aafumile umu mpanga ya Ijipti aali ni myaka 20 ukuya papela yatalalola impanga ino nalafile ukuti ndapeela Abulahamu, Isaki na Yakobo, pano yasimbombela nu mwenzo onsi, 12 kufumyako sile Kalebu mwana Yefune Umwina Kenizi na Yoswa mwana Nuni, pano yene yakaombela Yeova nu mwenzo onsi.’ 13 Fwandi Yeova wasokiile Aina Izlaeli, nupya walesile ukuti yalulumba umu lwanga pa myaka 40, kufikila inkulo yonsi isila iya yantu yano Yeova walolanga ukuti yacitanga iviipe. 14 Mwe yayembu mwe muli wa vikolwe vinu pano mukulenga Yeova ukusokela sana Aina Izlaeli. 15 Nga mwata ukumuombela, nawe kwene alayasya umu lwanga, nupya mulaleka ukuti yonsi yaa yononwe.”

16 Pa cisila yaile kuli Mose nu kulanda iyati: “Leka tukuulile iviteekwa vitu umwakwikala tukuulile na ana itu imisumba. 17 Lelo tulatwalilila ukuya aipekanye umu nkondo, nupya tulakoleelela Aina Izlaeli ukufikila tuce tukayafisye umu ncende yao, ale ana itu yatenzi mu misumba ya malinga iicingililwe ku yantu ya mu mpanga iiya. 18 Tutalaswilila uku mang’anda itu kufikila Aina Izlaeli yonsi yapeelwa impanga yao. 19 Pano tutalapeelwa impanga pamwi nayo ku mbalama ya Luzi Lwa Yodani nu kuya inkoleelo, pa mulandu wakuti swemo itukwata impanga ku ufumondaka wa Luzi Lwa Yodani.”

20 Mose wayaswike ati: “Nga vino mulacita, tolini ivyanzo vinu ale na Yeova akulolako nu kuya umu nkondo; 21 nupya ndi cakuti wensi muli mwemwe wasenda ivyanzo nu kulamba Uluzi Lwa Yodani pa nkoleelo yakwe Yeova lino akuzinga alwani yakwe 22 kufikila impanga yonsi yapokwa pa nkoleelo yakwe Yeova, lyene pa cisila mungaswilila, nupya mulaya aakaele kuli Yeova nu ku Ina Izlaeli. Lyene Yeova alaleka ukuti impanga yii ikaye iinu. 23 Lelo nga mutacisile vivyo, ale mwayembukila Yeova. Nga caya vivyo mumanye ukuti mulafululwa. 24 Mungakuulila ana inu imisumba nu kukuula umwakwikala iviteekwa vinu, lelo mulinzile nu kucita vino mwalaya.”

25 Ya mwana Gadi na ya mwana Lubeni yanenyile Mose iyati: “Musambazi, tulacita wakwe vino watunena. 26 Ana itu na ya mama itu yalaikala umu misumba ya Gilyadi kumwi ni viteekwa vitu vyonsi, 27 lelo swe yaomvi yako, kuli kuti umonsi wensi uwataipekanya ukuya umu ulwi pa nkoleelo yakwe Yeova, tulalamba Uluzi Lwa Yodani wakwe vino watulanda musambazi.”

28 Mose walanzile na Elieza simapepo, Yoswa mwana Nuni ni ntunguluzi zya mitundu ya Ina Izlaeli. 29 Wayanenyile ati: “Ndi cakuti ya mwana Gadi na ya mwana Lubeni yaca yalamba Uluzi Lwa Yodani pamwi namwe, kuli kuti umonsi wensi umuipekanye ukuya umu ulwi pa nkoleelo yakwe Yeova, nupya ni mpanga yaca yapokwa, lyene muce muyapeele impanga ya Gilyadi pakuti ice iye impanga yao. 30 Lelo nga yakana ukutola ivyanzo nu kupita namwe, lyene ale yalikala pamwi namwe umu mpanga ya Kenani.”

31 Lino ya mwana Gadi na ya mwana Lubeni yuvwile vivyo yaswike iyati: “Vino Yeova watanena swe yaomvi yako avino tumacita. 32 Tulatola ivyanzo nu kuya uku mpanga ya Kenani ala na Yeova akulolako, lelo ku lusansa kwene luu ulwa Yodani akuno tulikala.” 33 Lyene Mose wapeezile impanga kuli ya mwana Gadi, ya mwana Lubeni na afu wa mutundu wakwe Manase mwana Jozefu; wayapeezile impanga yakwe Sihoni umwene wa ku Amoli ni mpanga yakwe Ogi umwene wa ku Basyani, kuli kuti impanga yonsi ni misumba yonsi iyazingulwike.

34 Nupya imisumba ino ya mwana Gadi yakuuzile cipya cipya aeyi: Diboni, Ataloti, Aloeli, 35 Atiloti-syofani, Yazeli, Yogobeya, 36 Beti-nimula na Beti-halani, kuli kuti imisumba ya malinga, nupya yakuuzile nu mwakwikala iviteekwa. 37 Ya mwana Lubeni nayo yakuuzile imisumba yii: Hesyiboni, Eleale, Kilyataimu, 38 Nebo na Baali-meoni, yaipeezile na mazina yauze, yakuuzile nu musumba wa Sibima; nupya imisumba ino yakuulanga yaipeelanga mazina yauze.

39 Ya mwana Makili mwana Manase yaile iyalwisya umusumba wa Gilyadi nu kuupoka, nupya yazinzile na Ina Amoli aikalangamo. 40 Lyene Mose wapeezile umusumba wa Gilyadi kuli Makili mwana Manase, nawe watandike ukwikalamo. 41 Nupya Jaili mwana Manase waile azanza Aina Amoli nu kupoka imisumba yao inono, waipeezile ni zina lyakuti Havoti-jaili.* 42 Noba nawe waile azanza umusumba wa Kenati nu kuupoka kumwi ni misumba inono iyauzingulwike, nupya waupeezile izina lyakwe ilyakuti Noba.

33 Vii avino ulwendo lwa Ina Izlaeli lwali lino yafumile umu Ijipti ukulingana na maumba yao ala Mose na Aloni yakuyatungulula. 2 Mose walembanga incende zyonsi zino yapitangamo pa lwendo ukulingana na vino Yeova wamunenyile, nupya incende zino yapisilemo aezi: 3 Yafumile uku Lamesesi umu mwezi wa kutandikilako, pa wanda uwalenga 15. Pa wanda kwene uwa pa cisila ca Ucilo, Aina Izlaeli yafumile pa manso ya Ina Ijipti ukwaula intete. 4 Pa nsita kwene iiya, Aina Ijipti yaziikanga maeli yao yonsi yano Yeova wakomile, pano Yeova waleesile upinguzi pali ya leza yao.

5 Lyene Aina Izlaeli yafumile uku Lamesesi nu kuyapangila inkambi ku Sukoti. 6 Lyene yafumile uku Sukoti nu kuyapanga inkambi ku Etamu mupiipi nu lwanga. 7 Lyene yafumile uku Etamu nu kuswilila uku Pihailoti, impanga iyalozyanya na Baali-zefoni, nupya yaile iyapanga inkambi mupiipi na Migidoli. 8 Lyene pa cisila yafumile uku Pihailoti nu kuyapita pakasi kakwe yemba ukulungama uku lwanga, nupya yaatwalilile nu lwendo lwa manda yatatu mu lwanga lwa Etamu nu kuyapanga inkambi uku Mara.

9 Lyene yafumile uku Mara nu kuya uku Elimu. Ku Elimu kwali utufukoka twa manzi 12 nu tuncindu 70, fwandi yapanzile inkambi kuuku kwene. 10 Lyene yafumile uku Elimu nu kuyapanga inkambi umupiipi na Yemba Muyenzu. 11 Pa cisila yafumile kuli Yemba Muyenzu nu kuyapanga inkambi umu lwanga lwa Sini. 12 Lyene yafumile umu lwanga lwa Sini nu kuyapanga inkambi pa Dofuka. 13 Pa cisila yafumile pa Dofuka nu kupanga inkambi pa Alusyi. 14 Lyene yafumile pa Alusyi nu kuyapanga inkambi pa Lefidimu, apataali manzi yakuti antu yamwe. 15 Pa cisila yafumile pa Lefidimu nu kuyapanga inkambi mu lwanga lwa Sinai.

16 Yafumile umu lwanga lwa Sinai nu kuyapanga inkambi pa Kibuloti-hataava. 17 Lyene yafumile pa Kibuloti-hataava nu kuyapanga inkambi pa Hazeloti. 18 Pa cisila yafumile pa Hazeloti nu kuyapanga inkambi pa Litima. 19 Lyene yafumile pa Litima nu kuyapanga inkambi pa Limoni-pelezi. 20 Nupya yafumile pa Limoni-pelezi nu kuyapanga inkambi pa Libina. 21 Yafumile pa Libina nu kuyapanga inkambi pa Lisa. 22 Lyene yafumile pa Lisa nu kuyapanga inkambi pa Kehelata. 23 Lyene yafumile pa Kehelata nu kuyapanga inkambi pa Mwamba wa Syefeli.

24 Pa cisila yafumile pa Mwamba wa Syefeli nu kuyapanga inkambi pa Halada. 25 Lyene yafumile pa Halada nu kuyapanga inkambi pa Makeloti. 26 Lyene yafumile pa Makeloti nu kuyapanga inkambi pa Tahati. 27 Lino yafumile pa Tahati yaile iyapangila inkambi pa Tela. 28 Lyene yafumile pa Tela nu kuyapanga inkambi pa Mitika. 29 Pa cisila yafumile pa Mitika, nupya yaile iyapanga inkambi pa Hasyimona. 30 Lyene yafumile pa Hasyimona nu kuyapanga inkambi pa Moseloti. 31 Lino yafumile pa Moseloti yaile iyapanga inkambi pa Beni-yakani. 32 Nupya yafumile pa Beni-yakani nu kuyapanga inkambi pa Holi-hagidigadi. 33 Lyene yafumile pa Holi-hagidigadi nu kuyapanga inkambi pa Yotibata. 34 Lyene pa cisila yafumile pa Yotibata nu kuyapanga inkambi pa Abulona. 35 Lyene yafumile pa Abulona nu kuyapanga inkambi pa Ezioni-gebeli. 36 Pa cisila yafumile pa Ezioni-gebeli nu kuyapanga inkambi mu lwanga lwa Zini, kuli kuti pa Kadesyi.

37 Lyene yafumile pa Kadesyi nu kuyapanga inkambi pa Mwamba wa Holi, pa mupaka wa mpanga ya Edomu. 38 Aloni simapepo waile pa Mwamba wa Holi wakwe vino Yeova wamunenyile, nupya waile afwila paapa kwene umu mwaka uwalenga 40 kufuma pano Aina Izlaeli yafumiile umu Ijipti, umu mwezi uwalenga 5 pa wanda wa kutandikilapo. 39 Aloni wali ni myaka 123 lino wafwile pa Mwamba wa Holi.

40 Lyene umwene wa ku Aladi Umwina Kenani uwikalanga umu Negebu mu Kenani uvwile ukuti Aina Izlaeli yakwiza.

41 Mu kuya kwa nsita, yafumile pa Mwamba wa Holi nu kuyapanga inkambi pa Zalimona. 42 Pa cisila yafumile pa Zalimona nu kuyapanga inkambi pa Punoni. 43 Lyene yafumile pa Punoni nu kuyapanga inkambi pa Oboti. 44 Nupya yafumile pa Oboti nu kuyapanga inkambi pa Iye-abalimu pa mupaka wa Moabu. 45 Pa cisila yafumile pa Iyimu* nu kuyapanga inkambi pa Diboni-gadi. 46 Lyene yafumile pa Diboni-gadi nu kuyapanga inkambi pa Alimoni-dibulataimu. 47 Nupya yafumile pa Alimoni-dibulataimu nu kuyapanga inkambi mu myamba ya Abalimu mupiipi na Nebo. 48 Pa kusyalikizya yafumile mu myamba ya Abalimu nu kuyapanga inkambi umu lwanga lwa Moabu mupiipi nu Luzi Lwa Yodani incende iyalozyanya na Yeliko. 49 Yatwalilile ukupanga inkambi umu mbali ya Luzi Lwa Yodani, kufuma uku Beti-yesyimoti kufika uku Abeli-syitimu, umu lwanga lwa Moabu.

50 Yeova walanzile na Mose umu lwanga lwa Moabu mupiipi nu Luzi Lwa Yodani incende iyalozyanya na Yeliko, wamunenyile ati: 51 “Nena Aina Izlaeli uti, ‘Mumalamba Uluzi Lwa Yodani ukuya umu mpanga ya Kenani. 52 Mulinzile ukuzinga yonsi aakaikala umu mpanga nu konona ivilubi vyao vyonsi ivyapangilwa na mawe na vyonsi ivyapangilwa ni vyela vya kwengulula, mufwile nu kuwisya incende zyao zyonsi izya kupepelapo. 53 Nupya mulapoka impanga nu kwikalamo, pano ndamupeela pakuti iye iinu. 54 Mulinzile ukupendoola pa kupeela indupwa zinu impanga. Maumba akalamba uce uwayapeela impanga ikalamba nupya maumba anono uce uwayapeela impanga inono. Cila muntu ace aapeelwa impanga pano icipendwilo cakwe caponela. Cila muntu alapeelwa impanga ukufuma pa mpanga iilapeelwa ku mutundu wakwe.

55 “‘Lelo ndi cakuti mutazinzile aikazi ya mu mpanga, yano mulazumilizya ukusyala yalaya wa vintu ivya kumutongola umu manso nupya yalaya wa myunga iya kumutota umu mbazo, yalaamucuzya umu mpanga ino mulaikalamo. 56 Nupya ndacita kuli mwemwe vino nkupanga ukucita kuli aliyo.’”

34 Nupya Yeova watwalilile ukunena Mose ati: 2 “Nena Aina Izlaeli uti: ‘Nga mwingila umu mpanga ya Kenani, ilaya iinu yonsi ukulingana na muno yapeleela.

3 “‘Umupaka winu uwa ku kaeya ulafumilila uku lwanga lwa Zini ku mbalama ya Edomu, nupya ukufuma ku ufumondaka ulafumilila uku mpela yakwe Yemba wa Musilya.* 4 Nupya ulalemela uku kaeya ka Akilabimu nu kutwalilila ukuya uku Zini, ulapeleela uku kaeya ka Kadesyi-banea. Lyene ulapita uku Hazali-adali nu kuya uku Azimoni. 5 Lyene ukufuma uku Azimoni ulapita uku mukonko wa Ijipti, nupya ulapeleela kuli Yemba.*

6 “‘Yemba Mukalamba* ni nkumba vilaya ali mupaka winu uwa ku uwondaka.

7 “‘Lyene umupaka winu uwa ku katutu ulaya vii: Mulaputula umupaka ukufuma kuli Yemba Mukalamba kufika uku Mwamba wa Holi. 8 Nupya mulaputula umupaka ukufuma uku Mwamba wa Holi kufika uku Lebo-hamati,* ulapeleela uku Zedadi. 9 Mupaka ulapita uku Zifuloni, nupya ulapeleela uku Hazali-enani. Ukwene ulaya ali mupaka winu uwa ku katutu.

10 Lyene muce muputule umupaka winu uwa ku ufumondaka ukufumilila uku Hazali-enani kufika uku Syefamu. 11 Nupya ulafumilila uku Syefamu kufika uku Libula ku ufumondaka wa Aini, ulatelemuka nu kupita ku ncende iya ku ufumondaka wakwe Yemba wa Kineleti.* 12 Umupaka ulapita ku Luzi Lwa Yodani, nupya ulapeleela kuli Yemba wa Musilya. Ikwene ilaya ali mpanga inu alino ni mipaka iilaizinguluka.’”

13 Lyene Mose wanenyile Aina Izlaeli ati: “Ikwene ali mpanga ino mulankana ukupitila umu kupendoola, wakwe vino Yeova walanzile ukuti ikapeelwe uku mitundu 9 na afu. 14 Pano mutundu wa Ina Lubeni ni ndupwa zyao, nu mutundu wa Ina Gadi ni ndupwa zyao, na afu wa mutundu wakwe Manase yene yatola mpiti impanga zyao. 15 Mitundu iili na afu yene yatola mpiti impanga uku uwondaka wa Luzi Lwa Yodani incende iyalozyanya na Yeliko lwa kukatunkila ilanzi.”

16 Yeova watwalilile ukunena Mose ati: 17 “Aonsi alamwankanya impanga aeya: Elieza simapepo na Yoswa mwana Nuni. 18 Nupya muli cila mutundu muce musoololemo intunguluzi yonga ilaankanya impanga. 19 Intunguluzi zizyo aezi: mu mutundu wakwe Yuda, a Kalebu mwana Yefune; 20 mu mutundu wakwe ya mwana Simyoni, a Syemueli mwana Amiudi; 21 mu mutundu wakwe Benjamini, a Elidadi mwana Kisiloni; 22 mu mutundu wakwe ya mwana Dani, a Buki mwana Yogili; 23 muli ya mwana Jozefu ukufuma umu mutundu wakwe ya mwana Manase, a Hanieli mwana Efodi; 24 kufuma mu mutundu wakwe ya mwana Efulemu, a Kemueli mwana Syifutani; 25 mu mutundu wakwe ya mwana Zebuluni, a Elizafani mwana Palinaki; 26 mu mutundu wakwe ya mwana Isakali, a Palitieli mwana Azani; 27 mu mutundu wakwe ya mwana Asyeli, a Ahiudi mwana Syelomi; 28 mu mutundu wakwe ya mwana Nafutali, a Pedaeli mwana Amiudi.” 29 Yakwene ali yano Yeova wanenyile ukwankanya Aina Izlaeli impanga umu Kenani.

35 Yeova watwalilile ukulanda na Mose umu lwanga lwa Moabu mupiipi nu Luzi Lwa Yodani incende iyalozyanya na Yeliko, wamunenyile ati: 2 “Nena Aina Izlaeli uti yace yapeele Aina Levi imisumba ya kwikalamo ukufuma pa mpanga zino yalapeelwa, incende zya milemvwe izyazinguluka imisumba. 3 Aina Levi yalaikala umu misumba, nupya incende zya milemvwe zilaya izya viteekwa vyao nupya yalaasungilamo ivintu vyao alino ni nyama zyao zyuze. 4 Incende zya milemvwe izyazinguluka imisumba zino mulapeela Aina Levi zilaya mamita 445 ukufuma ukwi linga. 5 Muce mupime mamita mupiipi na 900 kunzi ya musumba ku ufumondaka, na mamita mupiipi na 900 ku kaeya, ku uwondaka nako mamita mupiipi na 900 alino na mamita mupiipi na 900 ku katutu, musumba ulaya pakasi. Zikwene i zilaya incende zya milemvwe umu misumba yao.

6 “Muce mupeele Aina Levi imisumba 6 iya kuutukilako, akuno umuntu uwakoma umuze alautukila, muce muyapeele ni misumba yuze 42. 7 Muce muyapeele imisumba yonsi pamwi 48 kumwi ni ncende zya mulemvwe. 8 Imisumba ino mulayapeela ilafuma pa mpanga ya Ina Izlaeli. Pa mutundu ukalamba mulaatolapo imisumba iingi, alino pa mutundu unono mulaatolapo imisumba inono. Cila mutundu ulapeela imisumba imwi ku Ina Levi kulingana nu ukulu wa mpanga ino ulapeelwa.”

9 Yeova watwalilile ukunena Mose ati: 10 “Nena Aina Izlaeli uti, ‘Mumalamba Uluzi Lwa Yodani nu kuya ku mpanga ya Kenani. 11 Mulinzile ukusoolola imisumba iingamuzipila iya kuutukilako, kuno uwakoma umuntu muze ukwaula ukwenekela alinzile ukuutukila. 12 Misumba iiyo ilaya iya kuutukilako kufuma kuli kalandula wa wazi, pakuti uwakoma umuntu atafwa kufikila lino wapingulwa pa nkoleelo ya yantu. 13 Vikwene ali vino imisumba 6 iya kuutukilako ino mulasoolola ilaaomba. 14 Muce musoolole imisumba itatu iya kuutukilako ku lusansa luu ulwa Yodani alino ni misumba yuze itatu umu mpanga ya Kenani. 15 Imisumba iiyo 6 akuno Aina Izlaeli yalautukila, kumwi nu mwenyi uwafuma uku mpanga yuze aakaikala nayo, akuno umuntu wensi uwakoma umuntu muze ukwaula ukwenekela alautukila.

16 “‘Lelo ndi cakuti umwi uma umuze ni cela nupya wafwa, ala umuntu wiyo i nkomi. Alinzile ukukomwa. 17 Nupya umuntu umwi nga watama umuntu muze ni iwe ilingalenga ukuti afwe nupya wafwa, ala i nkomi. Alinzile ukukomwa. 18 Nupya umuntu umwi nga uma umuntu muze ni cimuti icingalenga ukuti afwe nupya wafwa, ala i nkomi. Alinzile ukukomwa.

19 “‘Kalandula wa wazi aalakoma umuntu inkomi. Aliwe alamukoma ndi cakuti wamuzana. 20 Ndi cakuti wamusunsile pa mulandu nu lupato icakuti afwa nanti nga wamutamile ni cintu cimwi uku mufulo sile, 21 nanti nga wamumile ikofi pa mulandu nu lupato icakuti afwa, alinzile ukukomwa. Ala i nkomi. Kalandula wa wazi alakoma umuntu inkomi nga wamuzana.

22 “‘Lelo ndi cakuti wamusunsile ukwaula ukwenekela nupya asi pa mulandu wa lupato nanti nga wamutamile na cimwi ukusi uku mufulo, 23 nanti nga atamuweni nupya walesile ukuti iwe limuponele lelo ataali umulwani wakwe nupya atalondanga ukumucisa, nupya umuntu wiyo wafwile, 24 antu yalapingula pali wino wamukomile na kalandula wa wazi, kulingana na masunde kwene yaa. 25 Lyene antu yalapususya umuntu uwakomile umuntu muze ukwaula ukwenekela kuli kalandula wa wazi, nupya yalamuswilizya ku musumba wa kuutukilako, alikala kuuku kwene ukufikila simapepo mukalamba wafwa uwasonsilwe ukupitila umu kumwitila mafuta ya muzilo.

26 Lelo ndi cakuti umuntu uwakomile umuntu muze wafuma umu mupaka wa musumba uno utukileko 27 nupya kalandula wa wazi wamuzana ukunzi ya mupaka wa musumba wa kuutukilako nu kumukoma, ala atakweti umulandu wa wazi. 28 Pano alinzile ukwikala mu musumba wa kuutukilako ukufikila simapepo mukalamba wafwa. Lelo pa cisila cakuti simapepo mukalamba wafwa, uwakomile umuntu muze angaswilila uku mpanga yakwe. 29 Yakwene ali masunde yano mulaalondela umu nkulo zinu zyonsi mu ncende zinu zyonsi muno mukaikala.

30 “‘Umuntu wensi uwakoma umuntu muze alinzile ukukomwa pano ala i nkomi, pafwile ukuya ya kambone; lelo kusi afwile ukukomwa pali ukambone wa muntu sile wenga. 31 Mutalinzile ukutola impiya pa umi wa muntu inkomi wino aalinzile ukufwa, lelo alinzile ukukomwa. 32 Nupya mutalinzile ukupoka impiya pa muntu uutukila ku musumba wa kuutukilako nu kuleka kuti atwalilile ukwikala umu mpanga yakwe lino simapepo mukalamba atatala wafwa.

33 “‘Mutalinzile ukukowezya impanga ino mukwikalamo, pano uwazi ukakowezya impanga, kusi icingafuuta uluyembu pa wazi wa muntu uwatakomwa uku mufulo sile, suka sile ukukoma umuntu kwene wiyo uwatamukoma. 34 Mutalinzile ukukowezya impanga ino mukaikalamo ino nani kwene nkaikalamo; pano ne Yeova, nkaikala umu Ina Izlaeli.’”

36 Intunguluzi zya mu lupwa lwakwe Gilyadi mwana Makili mwana Manase umwafumile ya mwana Jozefu zyaile kuli Mose uwali pamwi ni ntunguluzi zya Ina Izlaeli. 2 Zyalanzile iziti: “Musambazi, Yeova wakunenyile ukwankanya Aina Izlaeli mpanga ukupitila umu kupendoola; nupya Yeova wakunenyile ukupeela impanga iyaali iyakwe Zelofeadi umwina witu ku yanakwe akazyana. 3 Ndi cakuti yaca yatwalwa ku yonsi Aina Izlaeli amu mutundu uze, impanga ya yanaci yaa nayo kwene ilapokwa ukufuma uku vikolwe vitu, ilapeelwa uku mutundu uno yalatwalwako, cilalenga ukuti ipokwe kuli sweswe. 4 Lyene lino Aina Izlaeli yakwata umwaka wa untungwa impanga ya yanaci yaa nayo kwene ilapeelwa ku mutundu uno yalatwalwako, cilalenga ukuti ipokwe uku mutundu wa vikolwe vitu.”

5 Lyene Mose wanenyile Aina Izlaeli vino Yeova walanzile ati: “Vino amu mutundu wakwe ya mwana Jozefu yakulanda i vya cumi. 6 Vino Yeova watalanda pali ya mwana Zelofeadi akazyana aevi: ‘Yangatwalwa kuli wensi wino yakulonda. Lelo yalinzile ukutwalwa ku ya mu mutundu wakwe isi. 7 Impanga iya Ina Izlaeli italinzile ukupeelwa uku mutundu uze, pano Ina Izlaeli yalinzile ukusunga impanga ya mutundu wa vikolwe vyao. 8 Nupya umwanaci wensi uwapeelwa impanga umu Ina Izlaeli alinzile ukutwalwa ku wa mu lupwa lwa mu mutundu wakwe isi, pakuti Aina Izlaeli yangasungilila impanga zya vikolwe vyao. 9 Kusi impanga iilinzile ukupeelwa ku mutundu uze pano amu mitundu ya Ina Izlaeli yalinzile ukusungilila impanga zyao.’”

10 Ya mwana Zelofeadi akazyana yacisile viivi kwene vino Yeova wanenyile Mose. 11 Fwandi Maala, Tiliza, Hogila, Milika na Nowa, kuli kuti ya mwana Zelofeadi akazyana, yatwazilwe uku yana yakwe ya lupwa yakwe isi. 12 Yatwazilwe uku yonsi amu ndupwa zyakwe Manase mwana Jozefu pakuti impanga yao ingatwalilila ukuya umu mutundu wa lupwa lwakwe isi.

13 Yakwene ali masunde yano Yeova wapeezile Aina Izlaeli ukupitila muli Mose umu lwanga lwa Moabu mupiipi nu Luzi Lwa Yodani incende iyalozyanya na Yeliko.