Ukwasuka Mauzyo Amuli Baibo
Uzye tulatala tukwatepo uteeko onga ulateeka insi yonsi?
U munzila ci muno uteeko uwa nsi ulalenga ukuti antu amunko zyonsi yauvwana? Ezaya 32:1, 17; 54:13
Mutale mwelenganya vino uteeko uulateeka insi yonsi ulacitila antuze. Ndakai antu yakacula pa mulandu wakuti aapina, alino yauze yene yaaya ni vyuma. Nomba uteeko uwaya ni cikuuku uku yantunze, wene ungasininkizya ukuti antu yonsi yaakwata ivikulondekwa. Uzye mukaelenganya ukuti antunze yalatala iikeko uteko wa musango uwo?—Welengini Yelemiya 10:23, NW.
Kufuma na mpiti, amauteeko yeezya inzila izingi izyakwavwilamo aateekwa yao, maka-maka ukwazwa aapina, lelo yaavilwa. Ama uteeko yamwi yaaya nu unkalwe. (Kasambilizya 4:1; 8:9) Lelo nanti caaya viivyo Leza wa Maka Yonsi walaya ukuti kulaya uteeko uulapyana amauteeko yonsi aaya pano nsi. Ukwaula nu kutwisika Kateeka wa uteeko uwo, alaasakamala sana antu.—Welengini Ezaya 11:4; Danieli 2:44.
I vyani vino Uwene Wakwe Leza ulacita?
Leza wasoolola Kateeka wa nsi umumaliilike—kulikuti Yesu, Umwana wakwe. (Luka 1:31-33) Lino Yesu wali pano nsi, watemilwe sana ukwazwa antu. Fwandi vino aali Mwene, alalenga ukuti antu amu nko zyonsi yace yauvwana nupya alakulula antunze uku ucuzi onsi uwayako.—Welengini Masamu 72:8, 12-14.
Uzye antu yonsi yazumila ukuti Yesu a Kateeka? Awe. Nomba Yeova wateekela. (2 Petulo 3:9) Wapeela antu akasita kaakuti yazumile ukuti Yesu ali Kateeka. Likwene sile, Yesu wasya ace aonone antu aipe aaya umu nsi kwene ii, nupya alaleeta umuteende umu nsi yonsi.—Welengini Mika 4:3, 4.