Kalata Ukufuma Kwi Umba Ilikatungulula
Ku Ina na ya Nkazi Yano Twatemwa:
“Lyonsi tukataizya Leza lino tukumulumbula mwensi umu mapepo itu, pano tukaiusya lyonsi milimo ino mukaomba pa mulandu nu utailo winu, na vino mukaombesya pa mulandu nu kutemwa kwinu, alino nu kuzizimizya pa mulandu na vino mwataila mu Mwene Yesu Klistu.” (1 Tesa. 1:2, 3, NW ) Cumi Kwene mazwi yaa yakalangilila vino naswe kwene tukayuvwa pali mwemwe! Tukamutaizizya kuli Yeova pa milimo inu isuma ino mukuomba. U mulandu ci?
Umwaka uwasizile mwaombisye mu milimo ya Wene pa mulandu nu “utailo winu” nu “kutemwa.” Mweingi mwazanako inzila zino mungaomvya pakuti mwaombesya umu mulimo wa kusimikila. Yamwi yaaya uku kuombela ku vifulo, nanti ku mpanga zyuze, ukukalondeka sana ya kakosoola ya Wene. Yauze yakaombesya lino yakusimikila umu ncende muno mukazanwa antu aingi. Ya kasimikila aingi yaatemilwe ukuombako upainiya wa nsita inono mu nsita ya Ciusyo, nu mu mwezi uno umwangalizi wa ciputulwa watandaliile icilongano, nanti lino kwali ukuombesya umu Ogasiti 2014. Nanti cakuti ivikamucitikila vyapusana-pusana, itulola ukuti mukuombela Yeova nu mwenzo onsi, kansi tukumutaizya. (Kolo. 3:23, 24) Vino mukaombela Yeova nu “utailo,” vikalenga twataizya Yeova lyonsi.
Nupya twataizye wakwe cimwi pa kuitemelwa kuomba umulimo wa kukuula ivikuulwa vyako Leza umu nsi yonsi. Vikuulwa vii vikulondekwa zuwazuwa pa mulandu wakuti antu yakwe Yeova yakuvulilako. (Eza. 60:22) Mutale mwelenganye, umwaka wasizile ya kasimikila yonsi yaafisile 8,201,545, na masambililo atungululwanga yaali 9,499,933 ngu kwankanya cila mwezi. Pa mulandu nu kuvula kuu, maofesi aingi yakulondekwa ukukuzyako. Cii cikupiliula nu kuti Mang’anda ya Wene na yauze yakulondekwa! Nakapya, kukulondekwa na maofesi yako ya kasenula mu ncende izingi umu nsi yonsi pakuti ya kasenula yangaya uku ncende kwene zizyo kuno ululimi lwao lukavwangwa akuno yakaikala nu kuombela.
Fwandi, tungayuzya sweineco tuti: ‘I vyani vino ningacita pakuti nazwilizyeko mulimo uu wa makuule?’ Limwi yamwi yangaipelesya ukuombako umulimo kwene uu. Nandi cakuti twamanya ivya kukuula nanti foo, swensi kwene tungasangwila consi cino tukweti pakuti twazwilizyeko umulimo kwene uu. (Mapi. 3:9, 10) Lino aina Izlaeli yaakuulanga ing’anda ya kupepelamo, yaipeelisye ukutwala uwila uwingi ukuluta nu walondekwanga mpaka sile iyayanena ukuti yate ukuleta. (Kufu. 36:5-7) Kwaula nu kutwisika malyasi ya musango uu yakatukomelezya cuze. Kuipelesya lino mukuomba umulimo uu ucindamisye, nako kukalenga ukuti twataizya Yeova!
Nupya tukaya nu luzango wakwe cimwi lino tukulola vino aina itu yakuzizimizya intazi. Nga twati tulande pa ina itu aku South Korea, ukufuma umu 1950 aina acance yayayalila umu cifungo pa myaka ipusane-pusane pa mulandu wa kulondela vino yakasambilila muli Baibo. Nupya aina aingi ankulo zipusane-pusane yazizimizya ukuzunyiwa kwa musango uu ukwaula ukutovoka. Ukuzizimizya kuu kukalenga naswe tuye nu utailo ukome!
Ku Eritrea, aina itu yatatu yayayalila umu cifungo pa myaka ukucila pali 20. Yauze nayo yayayalila umu vifungo pa nsita inono kumwi na ya nkazi na ana. Twezya inzila izingi zya kuti yafumilemo, lelo pataaya iiliyonsi iyaomba. Aina itu yatatoovoka. Yatwalilila ukuya na ucisinka nanti cakuti yakapita umu mavya. Lyonsi tusi-ilila ukupepelako aina itu yaa aatwalilila ukuya na ucisinka.—Loma 1:8, 9.
Kwene, mweingi yataamuyalila umu vifungo pa mulandu wa utailo winu. Lelo, mweingi mukutwalilila ukuzizimizya mavya ya mu ukote, yamwi mwalwalilila, yauze namwe yakamucuzya kuli yawinu nanti yalupwa asipepa Yeova, alino ni ntazi zyuze zino swemo tutanga tumanye. Nanti cakuti mwaya na mavya yaa, mukatwalilila ukuombela Yeova na ucisinka! (Yako. 1:12) Tukumutaizya wakwe cimwi. Kuzizimizya kwinu kuu, nako kukalenga twataizya Yeova.
I cumicumi, utailo winu, vino mwatemwa umulimo, alino nu kuzizimizya kwinu vikalenga ukuti lyonsi ‘twataizya Yeova, pano wene u musuma.’ (Masa. 106:1) Twamutemwa cuze mwensi kwene, nupya tukamupepelako kuli Yeova pakuti amukomya, nu kumwazwa lyonsi alino nu kumupaala pakuti mwamuombela amanda yonsi.
Sweswe ina inu,
Iumba Ilikatungulula Ilya Nte Zyakwe Yeova