MAUZYO YANO AAKABELENGA YAKAUZYA
Umulandu cii uno antu yamwi yakalandila ukuti amazwi akazanwa pali Masamu 12:7 yakalozya uku mazwi “yakwe Yawe,” (mu cikomo 6) lino muli Baibo Uwa Malembo ya Nsi Ipya yakalozya uku “alanda” (mu cikomo 5)?
Ivyalandwapo umu cikomo cii vikalangilila ukuti amazwi yaa yakalozya uku antu.
Apa Masamu 12:1-4, tukabelengapo ukuti “antu afumaluke yasila.” Lyene mulole amazwi aya pali Masamu 12:5-7, akati:
‘‘Pa mulandu wa kuzunya alanda,
Pa mulandu nu mupina akuilizyanya,
Namakatuka nu kumutuula,’ avino Yeova walanda.
‘Namapususya yayo akucuziwa.’
Amazwi yakwe Yawe acumi;
Yaya wakwe siluva umuzifiwe, wino yafumya umu kumwengulula, amaila cinimbali.
We Yawe, sungala walukutusunga;
Nu kutuwaka pe uku luko luu.’
Icikomo 5 cikalangilila vino Leza walanzile apa “alanda.” Alayapususya.
Icikomo 6 calanda ukuti “amazwi yakwe Yawe acumi,” ‘wakwe siluva umuzifiwe.’ Cii cikalangilila vino tukayuvwa pa mazwi yakwe Yeova.—Masa. 18:30; 119:140.
Lyene lolini amazwi aya umu cikomo calondelelapo, kuli kuti Masamu 12:7: “We Yawe, sungala walukutusunga nu kutuwaka pe uku luko luu.” Uzye amazwi akuti “walukutusunga” yakalozya mwi?
Pa mulandu wakuti umu cikomo 6 mwaya amazwi akuti “Amazwi yakwe Yawe,” limwi yamwi yangelenganya ukuti amazwi aya umu cikomo 7 yakalanda pali vino Leza wali nu kucingilila amazwi yakwe. Nupya twamanya ukuti Yeova watwalilila ukucingilila Baibo asi mulandu na yakakanya.—Eza. 40:8; 1 Pet. 1:25.
Nomba nanti cingaya vivyo, amazwi aya umu cikomo 5 acumi. Yeova alatwalilila ukwazwa alino nu kucingilila “alanda” alino na yayo ‘akucula.’—Yobo 36:15; Masa. 6:4; 31:1, 2; 54:7; 145:20.
Nomba, uzye amazwi akuti “walukutusunga” aya umu cikomo 7 yakalozya mwi?
Ivyalandwa umu cikomo cii vikalangilila ukuti amazwi akuti “walukutusunga” yakalanda pa antu.
Uku kutandika kwa Masamu icipande 12 Devedi walanda pa yaomvi yakwe Yeova yano yacuzyanga. Lyene amazwi alondelelapo yakati Yeova alakatukila antu akalanda iviipe pa antu yakwe. Kalemba wa masamu walenga tumanye ukuti Yeova alacingilila antu yakwe pano amazwi yakwe yonsi acumi.
Fwandi cikomo 7 calondolola ukuti Yeova alasunga alino nu ‘kucingilila’ antu yano yakacuzya.
Izwi lyakuti “walukutusunga” lyafuma muli ya kope atailwe amalembo ya Ciebele. Seputuwajinti wa Cigiliki waomvya izwi lyakuti “sweswe” Imiku ili umu cikomo 7, Ilikalozya uku yaomvi yakwe Yeova acisinka alanda alino na akucula. Amazwi yakusyalikizyako umu cikomo 7 yakati “walukutusunga nu kutuwaka” acisinka yalacingililawa “uku luko luu,” Ulwa antu aipe. (Masa. 12:7, 8) Asenulanga ya manyusikilipiti umu lulimi lwa Cialamaiki mu cikomo 7 nayo kwene yaomvya amazwi akalangilila ukuti yalandanga pa antu akuti: “MWENE, ulacingilila acisinka, uku antu yaa aipe.” Uu nao waya usininkizyo ukalangilila ukuti amazwi akazanwa pali Masamu 12:7 yasilozya uku mazwi yakwe Leza lelo yakalozya uku antu.
Amazwi yaa yakapeela upaalilo uku “antu afumaluke” ukuti Leza alayazwa.