Aina Yaili Yano Yasonsile Ukuya Umwi Iumba Ilikatungulula
Pa 5 Okotoba, 2024, kwali icimanyisho iciiyele pa kukomaana kwa pa mwaka icakuti: Umwina Jody Jedele nu mwina Jacob Rumph iyasontwa ukuya umwi Iumba Ilikatungulula lyakwe Ya Nte Yakwe Yeova. Aina yaa yoili yaombela Yeova na ucisinka pa myaka iingi.
Ya Jody Jedele na aci yao ya Damaris
Umwina Jedele wavyalilwe umu Missouri, ku U.S. nupya avyazi yakwe yali aa Nte Yakwe Yeova. Avyazi yakwe iikalanga umu ncende umwali sile Ya Nte Yakwe Yeova anono. Fwandi wamanyile aina na ya nkazi aingi afumanga uku mpanga zyuze nu kuya umu kwazwilizyako ukusimikila uku ncende yii. Vino yali nu kutemwa nupya alemane, vyakomelizye sana umwina Jedele. Umwina Jedele wizile abatiziwa lino wali ni myaka pakasi kwakwe 13 na 15, pa 15 Okotoba, mu 1983. Waipakizyanga ukuomba umulimo wa kusimikila, nupya lino wamazile isukulu lya ku sekondali, watandike upainiya wa nsita yonsi umu Sepetemba mu 1989.
Lino Umwina Jedele wali umwance, avyazi yakwe yayasendanga pamwi na kaci wakwe ukuya mu kutandala pa Bethel. Ukutandala kuu kwalenzile ana ukwimika uyo wa kulondesha ukuombela pa Bethel, nupya izile iyaombako. Umwina Jedele watandike ukuombela pa Bethel ya ku Wallkill umu Sepetemba 1990. Watandikile ukuombela uku Dipatiment ya Kuzifya lyene pa cisila wizile atandika ukuombela ku Dipatimenti Iikalolekesha pa Vya Cipatala.
Apa nsita iya ivilongano vya Cispanish ivyali umupipi vyakulilangako sile nupya kwalondekwanga aina. Fwandi Umwina Jedele watandike ukulongana umu cilongano conga nu kutandika ukusambilila Icispanish. Patalengiile, wizile amanyana na nkazi Damaris uwali painiya umu ciputulwa kwene cici. Izile iyatwalana nupya yatandike ukuombela pamwi pa Bethel.
Umu 2005 yatiile ukuombela pa Bethel nu kuya mu kusakamala avyazi yao. Apa nsita iya, yatwalilile ukuomba upainiya wa nsita yonsi. Umwina Jedele wazwilizyeko ukutungulula masukulu yakwe ya painiya 5, waomvileko muli Komiti ya Kulanzyanya ni Vipatala alino na muli Komiti ya Makuule.
Umu 2013, Umwina na Nkazi Jedele yayamile nupya ukuya mu kuombela pa bethel uku Warwick lino kwali makuule. Ukufuma liili kwene, yaombela pa Patterson nu mu Walllkill. Umwina Jedele waomba muli Dipatimenti Iikaangalila Umulimo wa Makuule nu Kuziifya Mang’anda ya Wene ni Vikuulwa Vya Kulonganilamo alino na muli Dipartment Ikaangalila Ivya Vipatala. Umu Maaci 2023 wasonsilwe ukuya kaazwa muli Komiti wa Mulimo. Nga yelenganya pa milimo yonsi ino yaombapo, yakalanda ukuti: “Ndi cakuti wapeelwa umulimo upya, insita zimwi unguvwa intete. Lelo ali nsita ino ulinzile ukwiusha ukutaila sana Yeova pa mulandu wakuti aliwe akalenga ivintu ukucitika.”
Ya Jacob Rumph na aci yao ya Inga
Umwina Rumph wavyalilwe umu California uku U.S.A. Lino wali umwance, ya nyina yataombangako umulimo wa kusimikila nanti ukuzanwa umu kulongana lelo yezyanga na maka ukumusambilizya icumi. Nupya cila mwaka, Umwina Rumph wayanga umu kutandala kuli nyinakulu uwali Nte. Nyinakulu wamwazwile ukumanyilapo na vyuze pali Baibo, nupya lino wali ni myaka 13 watandike ukusambilila Baibo. Wabatiziwe pa 27 Sepetemba umu 1992 ala acili umulumendo. Icazifileko i cakuti ya nyina izile iyatandika nupya ukulongana nu kusimikila nupya ato wao nayo izile iyatandika ukulunduluka nupya yabatiziwe.
Lino Umwina Rumph wali umwance walolanga vino ya painiya yali ni nsansa. Lino wamazile isukulu lya ku sekondali, watandike upainiya umu 1995. Umu 2000, wakuukile uku Ecuador umu kuombela ukwalondekwanga ya kasimikila. Lino wali kuuku, wizile amanyana na nkazi Inga painiya uwafumile uku Canada, nupya umu kuya kwa nsita izile iyatwalana. Pa cisila ca kutwalana, yatandike ukuombela umwi tauni lya mu Ecuador umwali sile ya kasimikila anono. Ndakai icilongano cii calunduluka.
Umwina na Nkazi Rumph izile iyasontwa ukuya ya painiya aiyele nupya umu kuya kwa nsita izile iyatandika ukutandalila ivilongano. Umu 2011 yayamile ukwi Sukulu lya Gilyadi ilyalenga 132. Pa cisila ca kumala isukulu yaombiile umu mpanga 5 nupya yaomvile imilimo ipusanepusane wakwe, ukuombela pa Bethel, umishonali alino nu kutandalila ivilongano. Umwina Rumph izile iyamupeela umulimo wa kusambilizya umwi Sukulu Lyakwe ya Kasimikila ya Wene.
Pa mulandu nu ulwalwe wakwe COVID-19, Umwina na nkazi Rumph izile iyaswilila uku United States. Yayamile uku Bethel ya ku Wallkill kuno umwina yamwamile uku sukulu kuli Dipatimenti ya Mulimo. Lino papisile insita, yayatumile ukuswilila uku Equador kuno umwina Rumph waile aya muli Komiti ya Musambo. Umu 2023 yayamile uku Warwick. Umu Januwale 2024, Umwina Rumph wasonsilwe ukuya kaazwa muli Komiti wa Mulimo. Ndi cakuti yelenganya pa ncende izipusanepusane kuno yaombela, yakalanda ukuti: “Icikalenga umulimo ukuya uiyele asi ncende kuno ukuombela, lelo antu yano ukaombela pamwi nayo.”
Tukataizya pali vino aina yaa yakaombesha, nupya ‘tukacindika sana antu ya musango uu.’—Filipi 2:29.