4 Kweleela

VINO CIKAPILIULA

Ukweleela cikapiliula kusulako kuli vyonsi vino yatiyakuluvyanya na vino ukuyuvwa pali vino vicitiike. Nupya ukweleela asi kucefya sile vino muzo atakuluvyanya nanti kwati pasi vino vicitiike.

CISINTE CA MULI BAIBO: “Mwatekelana nu kwelelana lyonsi lino umwi wailizyanya pa muze. Mulinzile kwelelana ndi vino Mwene wamwelela.”—Kolose 3:13.

“Ndi cakuti watutemwa muntu utalinzile ukwika mano kuli vino muntu wiyo akaluvyanya, lelo u kwika sana mano kuli vino muntu wiyo akuombesya.”—Aaron.

CINO CACINDAMILA

Ndi cakuti mukupita ni cikonko mungalenga umi winu ukuya mu uzanzo, nupya mungonona ni cupo cinu.

“Wanda umwi ya wane yalenzile uweleelo pali vino yansosizye sana. Cantaliile sana kuyeleela. Lelo nasusile nayeleela, nomba nkalanguluka ukuti ntaombiilepo zuwa. Calenzile ukuvwana kutaya ningo.”—Julia.

VINO MUNGACITA

MWAYEZYA MWEISIKULU

Lino mulapusana na ya winu pa mulandu na mazwi yano yalamuneena, muce muyuzye mweisikulu muti:

• ‘Uzye nkasoka zuwa?’

• ‘Uzye mulandu uu, ukulu sana icakuti ukulondekwa sile ukulenga uweleelo nanti sile limwi ningililako?’

MWALANZYANYA NA YA WINU MAUZYO YAA

• Uzye pafwile ukupita insita ikulu uli pakuti mweleelane?

• Uzye tungacita uli pakuti twaeleelana zuwa?

VYAKUCITA

• Ndi cakuti yamusosya, mutaelenganya iviipe pali ya winu.

• Mwaeleela ya winu pali vino yakuluvyanya nupya mwaiusya ukuti “lili lingi swensi kwene tukaluvyanya.”—Yakobo 3:2.

“Cangupala sana ukwelela ndi cakuti mwensi imuluvyanya, lelo cikatala sana ndi cakuti wenga aliwe ataluvyanya. Ukuzumila nga umuzo walenga uweleelo cikalondekwa sana kuicefya.”—Kimberly.

CISINTE CA MULI BAIBO: “Muvwane zuwa na similandu muzo.”—Mateo 5:25.