Mwaya Nu Kutemwa

Intazi Iyayapo

Ukuya na kapatulula umu mwenzo kusisila zuwa. Wakwe vino cikalondekwa insita na maka pakuti tukome kazizi akakaleta ulwale, cikasenda insita nupya umuntu alinzile ukuombesya pakuti ate ukuya na kapatulula. Mungacita uli pakuti mute ukuya na kapatulula?

Cisinte ca Muli Baibo

Vikope ivipusanepusane ivili pa cikope conga: 1. Umonsi wa ku Asia wayulilila umonsi umutifi icisaasa uwatasenda kofi. 2. Umonsi mutifi wapeelako yano akaomba nayo kofi kumwi nu mwanaci wa ku India wino alakwazwilizya umu koloci.

“Na pa vintu vii vyonsi mulundepo ukutemwa kukakundanya vintu vyonsi pamwi mukulemana kumalilike.” —KOLOSE 3:14.

Uzye icikomo cii cikutusambilizya cani? Kucitilana visuma kukalenga antu kuya alemane. Ndi cakuti mukulanga kutemwa kuli yauze, kapatulula kakaya kakucepa. Nupya ndi cakuti mwasambilila kutemwa sana antu, cilamwazwa kuta kwelenganya iviipe pali aliyo.

Vino Mungacita

Vikope ivipusanepusane ivili pa cikope conga 1. Umwanaci wa ku India akwazilizya umu koloci wa ku Caucasus ukwingila mu ng’anda. 2. Mu koloci wa ku Caucasus watwalilila umwina mupalamano wa ku Asia utwakulya wino itulandapo.

Mwaelenganyako pa nzila zimwi zino mungalangilamo kutemwa ukwi iumba lya antu yano mukalola ukuti yatacindama. Inzila izyakucitilamo vivyo zilinzile ukuya izyangupale. Mukezye ukuomvya inzila yonga nanti inzila zimwi izili apisika.

Ndi cakuti mukucitako utuntu utunono utwakulanga ukuti mwatemwa umuntu umwi, mulataluka sana ukukuya na kapatulula

Ndi cakuti mwakwela nayo motoka iliimwi mwalangizya imiyele isuma ku yantu yayo ukupitila mu kuyayulila icisasa nanti kuyasiila icilimba pakuti ikalepo.
Mwaezya ukulanzyanya nayo panono nati icakuti mutamanya ningo ululimi luno yakavwanga.
Mwatekela ndi cakuti yacita vimwi vino mwafilwa ukuvwikisya mulandu uno yacitila vivyo.
Mwaya na mizu lino yakumulondwelela intazi zyao.

IVYACITIKILE YAMWI IVINGATWAZWA Ya Nazaré Aku Guinea-Bissau

“Pa nsita imwi nali na kapatulula ku antu afumile uku mpanga zyuze. Yanenyile ukuti antu afumanga uku mpanga zyuze yabepanga uku uteeko pakuti yayapeele impiya nanti yayazwilizye nupya aingi yacitanga iviipe. Cii calenzile cantalila ukuyapokelela. Lelo, ntelenganyanga ukuti nali na kapatulula pano ali vino antu aingi yelenganyanga pa yantu afumanga uku mpanga zyuze.

“Nomba lino papisile insita nilwike ukuti nali na kapatulula uku yantu afumanga uku mpanga zyuze. Amano asuma aya muli Baibo yangazwa sana kuya nu kutemwa ku yantu yayo. Lyene ndakai nsiyataluka. Nupya kulunda pali vii, nkayalamuka nu kulanda nayo. Nkaezya ukuyamanya yonsi wenga na wenga. Ndakai lyene nkaelenganya ivisuma pali aliyo, nupya nkauvwa ningo nga ndi pamwi nayo.”