Dina Wailetelela

UZYE watuulola antu yano Dina akuya umu kutandalila? Akuya umukulola akazyana aakaikala uku mpanga ya Kenani. Uzye vwile isi Yakobo amatemwa ndi wamanya ukuti avino cili? Icimakwavwa ukwasuka ningo icuzyo cii, u kwiusya vino Abulaamu na Isaki yalolanga anaci aikalanga uku Kenani.

Uzye Abulaamu walondanga ukuti umwanakwe Isaki akatwale umukazyana umwina Kenani? Awe, ataalondanga. Uzye Isaki na Labeka yaalondanga ukuti Yakobo umwana wao akatwale umukazyana umwina Kenani? Awe foo. Uzye watuumanya umulandu?

Pano antu aikalanga uku Kenani yapepanga tu leza twaufi. Yataali antu asuma akuti umwi angaya akatwale nanti ukutwalilwako, nupya yataali antu asuma akupanga nayo icuza. Fwandi tungati Yakobo ataatemilwe ukuti umwanakwe umukazyana apange icuza na akazyana aku Kenani.

Ukwaula nu kutwisika, Dina wailetiile intazi. Uzye watuulola umonsi umwina Kenani apa cikope aakulolekesya Dina? Iziina lyakwe a Syekemu. Uwanda umwi lino Dina waile umukutandala, Syekemu wapatikizye Dina ukuti alaale nawe. Icintu cii cali iciipe sana, pano aonsi na anaci atwalana aliyo sile yalinzile ukulaala pamwi. Icintu kwene cii iciipisye cino Syekemu wacisile kuli Dina, caleesile sana intazi.

Lino yasilenzi yakwe Dina yuvwile ivyacitike, yaasosile sana. Yaili pali yaayo, Simeoni na Levi, yaasosile sana icakuti yaasenzile impanga nu kuya pumikizya aonsi umu musumba. Simeoni na Levi kumwi na ina yao, yumozile Syekemu na onsi yonsi. Yakobo wasosile sana pa cintu cii icipisye cino ana yakwe aonsi yaacisile.

Uzye i cani icalenzile ukuti ivintu vipisye vii? Pano Dina wapanzile icuza na antu aatuvwilanga amasunde yakwe Leza. Nafwe tutafwile ukupanga icuza na antu ya musango uu, uzye asi avivyo?