Gidyoni Na Onsi 300

UZYE watuulola ivikucitika paa? Yonsi aali paa aasilika, aina Izlaeli. Aonsi aati yinama, yakumwa amanzi. Na wiyo umonsi uwataimilila apiipi nayo a Gidyoni. Akulola vino yakumwa manzi.

Lolekesya vino aonsi yaa yakumwa manzi. Yamwi iyinamila umu manzi kwene. Nomba umwi wene akutapula manzi uku minwe nga alino amwa, pakuti aalola ivikucitika. Ivikucitika paa ivicindama sana pano Yeova waneenyile Gidyoni ukusoolola sile aonsi acampuke pa kumwa manzi. Aasyala yene Leza watiile yafwile ukuswilila uku mwao. Leka tulole icalenzile vyonsi vii.

Nupya kwene aina Izlaeli yaali ni ntazi sana. Ni calenzile ukuti yacule u mulandu wa kuti yatuvwilile Yeova. Antu yaku Midyani izile yaya na maka sana ukucila aina Izlaeli nupya yayacuzyanga sana. Acino aina izlaeli yaliliile kuli Yeova pakuti ayavwe, nawe Yeova uvwile.

Lyene Yeova waneenyile Gidyoni ukukolonganya asilika, nawe Gidyoni wakolonginye aonsi ya ulwi 32,000. Nomba yano aina Izlaeli yaali nu kuyalwa nayo yene yaali 135,000. Nomba Yeova waneenyile Gidyoni ati: ‘Aonsi yano wakolonganya yavulisya.’ Ngi cani cino Yeova walandiile vii?

Umulandu u wakuti aina Izlaeli iyacimvya ulwi, nga yaatandike ukuilola kwati aliyo yaacimvizye na maka yao sile. Ndi yaatandike ukwelenganya ukuti nanti Yeova atayavwilizye, yangacimvya. Acino, Yeova waneenyile Gidyoni ati: ‘Neena aonsi yonsi kwene aakuvwa intete ukuti yaswilile uku mwao.’ Lino Gidyoni wayaneena, aonsi ya ulwi 22,000 yaswilila uku ng’anda. Lyene wasiile sile na onsi 10,000 aakuyalwisya asilika yonsi kwene 135,000.

Nomba umvwa vwile! Yeova walanzile ati: ‘Aonsi yacili iyavulisya.’ Lyene aneena Gidyoni ukuti aneene aonsi yonsi ukuti yaye uku kumwa amanzi uku luzi, pakuti yonsi aamaya yakaamwa ala iyinamila umu manzi, u kuya-swilizya uku ng’anda. Yeova aiza-mulaya ati: ‘Ndakwavwa ukuti uce ucimvye pamwi na yakwene aonsi 300 aasi-inama pa kumwa manzi.’

Lyene insita ya kulwa inkondo yafisile. Gidyoni wakolonginye aonsi 300 umu maumba yatatu. Lyene wapeezile cila-muntu ipenga, iciviya ci ivu, na toci umukasi ka civiya cico. Lino cafisile usiku pakasi, yaaile yakolongana ukuzinguluka inkambi ya alwani yao. Nga alino pa nsita kwene iiya, yonsi kwene yaapuusile mapenga yao nu kutamoola iviya vyao ivi ivu, nu kwiza-pundila pamwi yati: ‘Ulupanga lwakwe Yeova na lwakwe Gidyoni!’ Lino alwani yaaya yaazyusile, izile yavulungana nu kuvwa intete sana. Yaatandiike sile ukupuuka yonsi kwene, ali vino aina Izlaeli yacimvizye ulwi.