Yesu Umu Calo

LINO yafuma sile umu muputule uwa papela, Yesu na atumwa yakwe iyaya uku calo ca Getesemani. Iizanga sana uku ncende kwene ii. Lyene Yesu waneenyile atumwa yakwe ukuti yaapepa, nu kuti yatakasula. Lyene wayasiile apita aya akatalamukila, afukama nu kutandika ukupepa.

Lino paapisile akasita, waswilile ukwali atumwa yakwe. Uzye watuumanya vino wazanyile yakucita? Yaakasulanga! Yesu wayaneenyile imiku itatu ukuti yatafwile ukukasula, nomba, lyonsi lino waswililanga, wazananga ala iyakasula. Lino waswilile umuku wakwe citatu, wayaneenyile ati: ‘Uzye i cani cino mukukaswila apa nsita itale vii? Insita yatifika iyakuti impeelwe uku yalwani yane.’

Insita kwene iiya kuvwisile icongo ca yantu aingi. Ala kukwiza aonsi iyasenda na masumo, ni mpanga alino ni vyanzo vyuze! Yaasenzile ni vifumbo ivyaswefyanga umu nzila. Lino yaapaliime, umuntu umwi wafumile umwiumba nu kuya kuli Yesu. Alino umuntu kwene wiyo, ayatonsola Yesu, ndi vino ukulola apa cikope kwene cii. Umonsi kwene wii a Yuda Iskalyoti! Uzye i cani cino watonswela Yesu?

Yesu auzya ati: ‘Yuda, uzye wantonsola pakuti unkazye uku yalwani?’ Ee, ukutonsola kwali ica kumanyilako Yesu. Kwalenzile aonsi aali na Yuda ukumanya ukuti wiyakwene ali Yesu, wino yaalondanga. Lyene alwani yaapaliime yalema Yesu. Nomba, Petulo ataalondanga ukuti yasende Yesu. Avino watoozile ulupanga luno wasenzile nu kuluzunzula ukuti akome umonsi uwali apiipi nawe . Lupanga lwapusile umonsi wiyo nu kumuputulako sile ikutwi lya kwilunji. Nomba, Yesu walemile ikutwi lya monsi wiyo nu kulipozya.

Yesu waneenyile Petulo ati: ‘Swilizya ulupanga muno lukaikala. Uzye utamanyile ukuti nga nkulonda ningaleenga kuli Tata ukuti antumile angeli aingi cuze kuti iize yampususye?’ Ee, Leza angacita vivyo! Nomba, Yesu ataaleenzile kuli Leza ukuti amutumile angeli, pano wamanyile ukuti insita yafisile iyakuti alwani yamusende. Acino, walesile sile ukuti yamusende. Leka lyene tulole ivyacitikiile Yesu..