Isambililo 5

Paladaise italaya wa nsi ino tukwikalamo ndakai. Leza atalondanga kuti insi izuulemo intazi na malanda, ukuwaika nu ucuzi. Ku nkolelo Leza alasenula insi ii, ukuya paladaise. Uzye Paladaise ilaya uli? Lekini tuvwe vino Baibolo ikalanda:

Antu asuma. Mu Paladaise mulaikala sile yacuza yakwe Leza. Cila muntu nu muze yalaombelana ivisuma vitupu. Yalaikala ukulingana ni nzila zya cumi zyakwe Leza.—Mapinda 2:21.

Vya kulya ivingi. Mu Paladaise mutalaya inzala. Baibolo ikati: “Ingano [nanti, ivya kulya] zilavulisya mu nsi.”—Masamu 72:16.

Mang’anda asuma ni milimo ya mpomvu. Lino insi ilaya Paladaise indupwa zyonsi zilaya ni ng’anda umwa kwikala. Antu yonsi yalaomba imilimo iilayazanzya.—Ezaya 65:21-23.

Mutende umu nsi yonsi. Kutalaya antu yano yalaalwa nu kufwa umu nkondo. Izwi lyakwe Leza likati: ‘Leza alalesya inkondo.’—Masamu 46:8, 9.

Uumi usuma. Baibolo yatulaya vii: ‘Paasi umwikazi [mu Paladaise] wino alavwanga ati: “Nene mulwale.”’ (Ezaya 33:24) Kapya mutalaya aalemale, impafu, yacipuuli nanti aciulu.—Ezaya 35:5, 6.

Kuwaika, malanda, ni mfwa vilasila. Izwi Lyakwe Leza likati: “Kutalaya imfwa nupya. Kutalaya kulosya nanti kulila, nanti kuvwa kuwaika. Vintu vya mpiti vyati vipita.”—Uumbwilo 21:4.

Mutalaya antu aipe. Yeova walaya ati: ‘Aipe yalaputulwamo umu nsi; na asi ya cumi yalasisiwamo.’—Mapinda 2:22.

Antu yonsi yalatemwana nu kucindikana. Kutalaya nupya antu a lufyengo, ankalwe, a lunkumbwa, na a lupato. Antu yalalemana kapya yalacita ivintu ukulingana ni nzila zya cumi zyakwe Leza.—Ezaya 26:9.