Imfwa Yakwe Yesu U Wila Uwakulisya Ukufuma Kuli Leza

1, 2. (a) Uzye i cani icingalenga ukuti mwemo mutemwe uwila umwi? (b) U mulandu ci uno tungalandila ukuti ukutukulula uku maifyo ni imfwa ali wila uwaluta amawila yonsi?

UZYE u wila ci usuma sana uno mwapokeeliilepo? Asi kuti uwila ufwile ukuya uwa mutengo sana pakuti uye uwa mpomvu. Pano icikalenga ukuti tutemwe sana uwila, asi u kuvula kwa mpiya zino yaakaliile icintu cico. Lelo ndi cakuti uwila kwene uuwo watuletela uluzango nanti ukutwazwa, ala tumautemwa.

² Pa mawila aingi yano mungatemwa ukuti mukapokelele, paaya uwila onga uwacindamisya ukuluta mawila yonsi. Leza u wapeela antunze uwila kwene uuwo. Kwaya ivintu ivingi sana vino Yeova watupeela, lelo uwila uwacila vyonsi vivyo u kutuma Yesu Klistu ukwizatufwila kuti atukulule. (Mateo 20:28) Mu cipande kwene cii tulasambilila ukuti uwila uu uwa kutukulula ali wila ucindamisye sana uno mungapokeelela, pano wene ungamulenga ukuya sana ni nsansa. I cumicumi uwila uu ukalangilila ukuti Yeova wamutemwa cuze.

U MULANDU CI UNO YESU WAFWILILE?

3. U mulandu ci uno Yesu wafwilile? Uzye i cani cino tufwile ukuvwikisya pakuti tumanye ucindami wamfwa yakwe Yesu?

³ Yeova watumile Yesu ukwiza-tufwila pakuti atukulule uku maifyo ni imfwa. (Efeso 1:7) Pakuti tuvwikisye muno icisambilizyo cii ica muli Baibo cilozile, tufwile ukwiusya ivyacitiike umu calo ca Edeni. Ndi tuvwikisya ivyacitikiile Adamu lino waifizye, alino tungamanya ningo vino imfwa yakwe Yesu yacindama kuli sweswe.

4. Uzye ivintu vyali uli lino Adamu wali umumalilike?

⁴ Lino Leza waumvile Adamu, wamupeezile icintu cimwi icicindame sana, kuli kuti wamuumvile umumaliilike. Uzye vino Adamu waumvilwe nu mwili umaliilike alino na melenganyo amaliilike, calozile mwi? Cii calozile umukuti wali nu kwikala ukwaula ukulwala, ukukota, nupya ataali nu kufwa. Nakapya, wali cuza wakwe Yeova umuiyeele. Baibo ikati Adamu wali u “mwana wakwe Leza.” (Luka 3:38) Fwandi Adamu wali a cuza wakwe Yeova, wakwe vino umwana umonsi akaaya sana cuza wakwe isi. Yeova wavwanganga na Adamu; wamunenanga imilimo iisuma sana ino walinzile ukuomba na vyonsi vino walondekwanga ukucita.—Utandiko 1:28-30; 2:16, 17.

5. Uzye calola mwi vino Baibo ikaati Adamu waumvilwe umu “cata cakwe Leza”?

⁵ Adamu waumvilwe umu “cata cakwe Leza.” (Utandiko 1:27) Cii citaalola umukuti Adamu wakoline na Leza imilolekele. Twasambiliile umu Cipande 1 umwibuku kwene lii ukuti Yeova u mupasi nupya asiloleka. (Yoane 4:24) Fwandi Yeova atakwata umwili nu wazi wakwe vino antunze yaaya. Vino Adamu waumvilwe umu cata cakwe Leza calola umukuti wakweti imiyele wakwe ino Leza wakwata. Imiyele imwi ino Leza wakwata, u kutemwa, amano, amaka, nu mulinganya. Adamu nupya wakoline na Isi umu nzila na yuze icindame, kuli kuti waipingwilanga ivyakucita. Fwandi Adamu wakweti amaka ya kuisoolwela ukucita ivisuma nanti viipe. Adamu asoolola ukuvwila Leza, nga watwaliliile ukuya nu umi umu Paladaise pano nsi.

6. Uzye i vyani ivyacitikiile Adamu pa mulandu nu kukana uvwila Leza, ngi cacitiike uku yana yakwe i cani?

⁶ Acino fwandi, lino Adamu wapondokiile Leza nu kupingulwa ukufwa, waileteliile sile umwineco. Pa mulandu wi-ifyo lino wacisile, calenzile ukuti apokwe isyuko lyakuya nu umi umalilike ni visuma vyonsi vino wali nu kuipakizya. (Utandiko 3:17-19) Icaifile sana i cakuti, Adamu waleteliile na ana yakwe kwene aali nu kuvyalwa kuli aliwe. Izwi lyakwe Leza likati: “Iifyo lingile muno nsi pa mulandu wa muntu wenga, nga ni iifyo lyakwe ilyaleta imfwa. Caleka, imfwa nayo yasalangine mu antu yonsi pano antu yonsi iifizye.” (Loma 5:12) Fwandi swensi kwene twapyana iifyo lyakwe Adamu. Acino Baibo ikalandila ukuti Adamu waikazizye pamwi na ana yakwe umu uzya wa maifyo ni imfwa. (Loma 7:14) Ivintu vitaali nu kuzipila Adamu nanti Eva pano yaasoolwile ukupondokela Leza. Nomba, nga ana yao kumwi naswe kwene, cali nu kuya uli?

7, 8. Uzye i vintu ci viili vino imfwa yakwe Yesu yaalenzile ukuti vicitike?

⁷ Yeova watumile Yesu ukwiza-fwila antunze ukuti ayakulule. U mulandu ci uno Yesu wafwilile? Imfwa yakwe Yesu yaalenzile ukuti ivintu viili vicitike. Icakutandikilako, imfwa yakwe Yesu yalenzile ukuti antu yakululwe. Tungakolanya ci ku lupiya luno yakalipila ukuti yasapule aali umu cifungo. Cakwe ciili i cakuti, imfwa yakwe Yesu yaali amalipilo ya cintu icononiike. Yaakolana na malipilo yano antu yakalipila ndi yonona cimwi nanti ndi yacisa umwi. Tungalangilila wakwe vii: Ndi cakuti umwi waleenga ukuti uzanzo ucitike, umuntu wiyo afwile ukulipila ulupiya ululingiine na vino onoona.

⁸ Uzye cali nu kuya uli pakuti Leza atukulule uku maifyo ni imfwa ivyafumile kuli Adamu? Lekini tulole vino Yeova wacisile pakuti akulule antu na vino imfwa yakwe Yesu ingamwazwa mwemwe.

VINO YEOVA WACISILE PAKUTI AKULULE ANTU

9. I cani icalondekwanga pakuti antu yakululwe?

⁹ Lino Adamu umumaliilike waifizye, kutaali umuntu nanti umwi uwali nu kukulula antu yauze pano pataali umumaliilike pano nsi. (Masamu 49:7, 8) Icalondekwanga, cali nu kuya icilingane umutengo ni cononiike. Ci cikauvwana sana ni sunde lyakwe Leza ilyaya muli Baibo ilimaliilike ilitaayamo ulufyengo, ilikaati: “Uwakoma nawe akomwe.” (Malango 19:21) Uzye i cani icali nu kulingana umutengo nu umi umaliilike uno Adamu wali nao lino atatala waifya? Kwalondekwanga umuntu umumaliilike uwali nu kukulula antu yonsi.—1 Timoti 2:6.

10. Uzye Yeova wacisile uli pakuti akulule antu?

¹⁰ Uzye Yeova wacisile uli pakuti akulule antu? Watumile umwanakwe wenga pa yana yakwe, kuli kuti angeli, ukufuma ukwiyulu ukwiza pano nsi. Watumile wino watemilwe sana, Umwana wakwe uwavilwe wenga sile. (1 Yoane 4:9, 10) Umwana kwene wii lino yaamutumile, waitemiilwe ukwiza pano nsi ukufuma ukwiyulu. (Filipi 2:7) Wakwe vino twasambiliile umu cipande icafumileko, Yeova wacisile icizungusyo lino wakusiizye umi wa Mwana wakwe nu kuwika umu ndilwa yakwe Maliya. Umupasi wakwe Leza u walenzile ukuti Yesu aize avyalwe umuntu umumaliilike uwaula iifyo.—Luka 1:35.

11. Uzye umuntu wenga sile wali nu kukulula uli imintapendwa ni mintapendwa ya yantu?

¹¹ Uzye umuntu wenga sile aaliwe angakulula imintapendwa ni mintapendwa ya yantu? I cisuma, nga cali uli pakuti antu avula vii ndakai, yaye ya kaifya? Iusyini ukuti lino Adamu waifizye, Leza wamuposile isyuko lyakutwalilila ukuya nu umi umaliilike. Fwandi ataali nu kukwata ana amaliilike. Yaali nu kuvyalwa ni ifyo alino yaali nu kufwa. Yesu wino Baibo ikaama ukuti “Adamu wakusyalikizya,” wali umumaliilike nupya atatazile aifyapo. (1 Kolinto 15:45) Acino tungati Yesu u wapyanyile pali Adamu kuti atukulule. Lino Yesu watuuzile umi wakwe umaliilike ukwaula ukwifya kuli Leza, watukulwile ukwiifyo lino twapyanyile kuli Adamu. Lyene walenzile ukuti yonsi avilwe kuli Adamu yaye ni syuko ilya kuya nu umi wa pe.—Loma 5:19; 1 Kolinto 15:21, 22.

12. Uzye i cani cino Yesu wasininkiizye lino wazizimiizye amezyo?

¹² Baibo ikalondolola sana pali vino Yesu wacuzile lino wali apiipi nu kufwa. Yamumile ivikoti, iyamupampamila na pa cimuti pano wacuzile sana mpaka afwa. (Yoane 19:1, 16-18, 30; welengini Ivyeo Navyuze, apa mafwa 204 ukufika 206) U mulandu ci uno calondekwanga ukuti Yesu acule sana? Uku nkoleelo, tuli nu kusambilila pali vino Satana walanzile ukuti aomvi yakwe Leza yatanga-yatwalilile ukuya acumi lino yakweziiwa. Yesu walangiizye ukuti vino Satana walanzile vyali i vya ufi, lino wazizimiizye amezyo yonsi afumanga kuli Satana. Yesu wasininkizye ukuti umuntu umumaliilike uwakwata amaka yakuipingwila ivya kucita, angatwalilila ukuya uwa cumi kuli Leza nanti Satana angamwezya uli. Yeova afwile watemilwe sana lino Umwana wakwe wino watemwisya watwaliliile ukuya uwa cumi!—Mapinda 27:11.

13. Uzye caali uli pakuti antu yakululwe?

¹³ Uzye caali uli pakuti antu yakululwe? Apa Nisani 14 umu 33 C.E., Yeova walesile ukuti Umwana wakwe umumaliilike nupya uwaula iifyo aumoolwe. Avino Yesu “waipile lyonga nupya calimwi.” (Ayebulai 10:10) Apa wanda wakwe citatu ukufuma pano Yesu wafwiliile, Yeova wamutuutulwile, aya ndi vino wali lino atatala wiza pano nsi. Lino Yesu waiile ukwiyulu, waile alolekela kuli Leza. (Ayebulai 9:24) Yeova wazumiile vino Yesu watuuzile umi wakwe pakuti akulule antunze uku maifyo ni mfwa.—Loma 3:23, 24.

VINO IMFWA YAKWE YESU INGAMWAVWA

14, 15. Uzye apakuti “amaifyo itu yelelwe,” tufwile ukucita vyani?

¹⁴ Nanti cakuti swensi kwene tutaamalilika, imfwa yakwe Yesu ingatwavwa ukuipakizya ivintu ivisuma sana. Lekini tusambilile pa vintu vimwi-vimwi ivisuma vino imfwa yakwe Yesu yatucitila ndakai na vino ilatucitila uku nkoleelo.

¹⁵ Tukaelelwa maifyo. Swensi kwene tutamalilika, acino cikatutalila sana ukucita ivya ololoke. Swensi kwene tukaluvyanya muli vino tukalanda nanti vino tukacita. Lelo imfwa yakwe Yesu yatukulula, pano “maifyo itu yelelwa.” (Kolose 1:13, 14) Nomba pakuti amaifyo yelelwe, tufwile ukulapila nu mwenzo witu onsi. Nupya tufwile ukupepa kuli Yeova, nu kumulenga ukuti atwelele ukuomvya ilambo lyakwe Yesu lino twataila.—1 Yoane 1:8, 9.

16. I cani icikatwavwa ukupepa Leza na kampingu musuma, alino uzye u mulandu ci uno cacindamila ukuya na kampingu musuma?

¹⁶ Kampingu witu asitucuzya ndi tukuombela Leza. Ndi umuntu akucuziwa nu mwenzo pa mulandu ni viipe vino wacisile, cingalenga ukuti auvwa uyi sana, nu kwelenganya ukuti wene u wa silesile. Lelo ukutwelela kuno yatwelela amaifyo pa mulandu ni imfwa yakwe Yesu, kukalenga ukuti twapepa Yeova na kampingu musuma nanti cakuti tutaamalilika. (Ayebulai 9:13, 14) Cintu cii cikalenga ukuti twapepa kuli Yeova nu kumuneena vyonsi ivili uku mwenzo. Fwandi tukapepa kuli aliwe insita yonsi ino tukulonda. (Ayebulai 4:14-16) Ndi cakuti umuntu ali nu mwenzo uswepe akaaya na melenganyo yasuma, nu kuvwa ukuti wacindama, nupya akaya ni nsansa.

17. I vintu ci ivisuma vino tulapokelela pa mulandu wa kuti Yesu watufwilile?

¹⁷ Tulaya nu umi wa pe umu paladaise pano nsi. Pali Loma 6:23 pakati “malipilo yi ifyo, imfwa. Lelo uwila wakwe Leza umi wape muli Klistu Yesu Mwene witu.” Umu Cipande 3 umwibuku kwene lii twasambilile ivintu ivisuma ivilaya umu Paladaise pano nsi. (Umbwilo 21:3, 4) Ivintu vyonsi vivyo, kumwi nu umi usuma, vilayako pano Yesu watufwilile. Pa kupokelela ivintu vii, tufwile ukulangizya ukuti tukataizya pali vino Leza watutumiile Yesu ukwizatufwila.

MUNGALANGIZYA ULI UKUTI MUKATAIZYA?

18. U mulandu ci uno tulinzile ukutaizizya Yeova pa kutuma Yesu ukuti aize atufwile?

¹⁸ U mulandu ci uno tulinzile ukutaizizya pali vino Yeova watukulula? Uwila onsi uno twapokelela ukaaya ucindame sana ndi cakuti wino watupeela wasumvilepo insita, amaka, ni impiya. Tukatemwa sana ndi twamanya ukuti umwi watupeela uwila pakuti alangizye ukuti watutemwa. Ukutukulula uku maifyo ni mfwa ali wila uwacindamisya sana pa mawila yonsi, pano Leza wacisile icintu icitale pakuti sile atukulule. Pali Yoane 3:16 pakati: “Leza watemilwe amu nsi nga apeela Mwana wakwe wino uwavilwe wenga.” Ukutuma Yesu ukuti aize atufwile uusininkizyo wakuti Yeova watutemwa cuze. Nakapya, uusininkizyo wakuti na Yesu kwene watutemwa, pano waitemiilwe ukutuula umi wakwe pakuti tukululwe. (Yoane 15:13) Fwandi ukutukulula kuno yatukulula uku mfwa uusininkizyo wakuti Yeova na Yesu yatutemwa swensi kwene cila-muntu.—Galatiya 2:20.

19, 20. U mu nzila ci muno mungalangila ukuti mukataizya pali vino Leza wamukulula?

¹⁹ Uzye mungalangizya uli ukuti mukataizya Yeova pali vino wacisile pa kuti amukulule? Inkoleelo, mufwile ukumanya ivingi pali Yeova. (Yoane 17:3) Ukusambilila Baibo ukuomvya ibuku kwene lii u kulamwazwa ukumanya Yeova. Ndi mwamanya ivingi pali Yeova, alino mulamutemwa sana. Lyene ndi mwatemwa sana Yeova, mulaalondesya ukumuzanzya.—1 Yoane 5:3.

²⁰ Mwataila sana umu mfwa yakwe Yesu. Yesu walanzile ukuti: “Wino wensi akataila Mwana wene ali nu umi wape.” (Yoane 3:36) Uzye tungalanga uli ukuti twataila umu mfwa yakwe Yesu? Tusilanda sile pa kanwa ukuti twataila umu mfwa yakwe Yesu. Pali Yakobo 2:26 pakati: “Utailo uwaula milimo isuma ufwe.” I cumicumi utailo wa cumi ukalolekela umu “milimo,” kuli kuti, ivicitwa vitu. Inzila yonga muno tungalangizya ukuti twaya nu utailo muli Yesu, u kuombesya ukuti twamukolanya muli vyonsi.—Yoane 13:15.

21, 22. (a) U mulandu ci uno tulinzile ukuzanilwako uku Cakulya ca Manguzi Ica Mwene? (b) I vyani vino icipande cilondeliilepo cilalondolola ningo?

²¹ Mwazanwako uku Ciusyo ca mfwa yakwe Yesu icikaayako umuku onga cila-mwaka. Apa Nisani 14, umu 33 C.E., insita ya manguzi, alino Yesu watandike Iciusyo ca mfwa yakwe cino Baibo ikati, “cakulya ca manguzi ica Mwene.” (1 Kolinto 11:20, NW; Mateo 26:26-28) Nupya cika-amwa ukuti Ciusyo ca Mfwa Yakwe Klistu. Yesu wacitandiike pakuti azwe atumwa yakwe alino na ina Klistu yonsi ukwiusya ukuti imfwa yakwe, ino wapeezile umi wakwe umalilike, ali nzila ya kutukulwilamo uku maifyo. Yesu wavwanzile ati: “Mwacita cii pa kunjiusya.” (Luka 22:19) Ndi tukuzanwa uku Ciusyo cikatwiusya ukuti Yeova na Yesu yaatutemwa wakwe cimwi. Tungalangizya ukuti tukataizya pali vino Leza watukulula ndi tukuzanwako uku Ciusyo ca mfwa yakwe Yesu icikaayako umuku onga cila-mwaka..a

²² Icumicumi ukutukulula kuno Yeova watukulula uku maifyo ni mfwa, ali wila uwa mpomvu ukuluta mawila yonsi. (2 Kolinto 9:14, 15) Uwila uu ungazwa na yano yafwa mpiti. Icipande icilondeliilepo cilalondolola ningo ilyasi lii.