CIPANDE 19
Ikalini Umu Kutemwa Kwakwe Leza
Uzye ukutemwa Leza kuli kutuuli?
Tungacita uli pakuti twikale umu kutemwa kwakwe Leza?
Uzye Yeova alalambula uli yonsi aakaikala umu kutemwa kwakwe?
Uzye mukaleka Yeova ukuya ali mwakufisama mwinu lino muli ni ntazi?
1, 2. Uzye aekwi kuno tungazana umwakufisama ndakai?
ELENGANYINI ukuti muli pa lwendo. Lyene mwalola catandika ukufutika. Inkuwa zyatandika ukumyansya, nu kupangalansya sana, nga alino imvula yatandika ukutoonya iya muza sana iingi cuze, iya citalawe. Lyene mwatandika ukuutuka kuti mulonde umwakuuwa. Awe mwasuka mwalola icikuulwa cimwi cikulu icakuuwamo. Cikuulwa cico cakoma nupya cikuloleka ningo sana. I cumicumi, mungatemwa sana icikuulwa cico, pano ala mwamanya ukuti mwakwata umwakufisama!
2 Ndakai twikala umu nsita itale wakwe cimwi. Ivintu umu nsi yii vikuya vikwipilako sile. Nomba kwaya umwakufisama. Uzye aemwi muno tungafisama? Tukawelenga muli Baibo amazwi yakuti: “Wewe uli cele lyane, muno nkauwa! Wewe Leza wane wino nataila.”—Masamu 91:2.
3. Tungacita uli pakuti Yeova aye umwakufisama mwitu?
3 Cintu cico cikatukomelezya sana! Yeova, Kaumba witu, nupya Kateeka mukulu aliwe akatucingilila. Wene angatucingilila, pano wakwata sana amaka ukucila aliwensi nanti iciliconsi icingatucuzya. Nanti sile tungacula uli, Yeova wakwata amaka yakutwazwa. Uzye tungacita uli pakuti twafisama muli Yeova? Tufwile ukumutaila sana. Nakapya, Izwi lyakwe Leza likatukomelezya ukuti: “Ikalini mu kutemwa kwakwe Leza.” (Yuda 21) Tulinzile ukwikala umu kutemwa kwakwe Leza nu kutwalilila ukucita ivingalenga ukuti Tata witu wa mwiyulu alukututemwa. Ndi twacita vivyo, ali lino tungataila ukuti cumicumi wene ali wa kufisamamo. Nomba, tungacita uli pakuti Leza atutemwe?
MWAILUKA UKUTEMWA KWAKWE LEZA NUPYA MWALANGA UKUTI MUKATAIZYA
4, 5. Iinzila ci zimwi-zimwi zino Yeova akalangilamo vino watutemwa?
4 Pakuti twikale umu kutemwa kwakwe Leza, tulinzile ukumanya vino Yeova akalangizya ukutemwa kwakwe. Mutale-mwelenganye pa visambilizyo vya muli Baibo ivingi vino mwatimusambilila ukuomvya ibuku kwene lii. Yeova a Kaumba, fwandi watupangiile insi pakuti twaikala mwenemo. Alino umu nsi kwene yii mwaya ivyakulya ivingi sana na manzi aingi sana, ni vimiti, isote, vinyama ivipusane-pusane, alino ni ncende izikaloleka ningo sana. Watupeela na Baibo muno watulondolwela izina lyakwe ni miyele yakwe isuma cuze. Nakapya, muli Baibo kwene ali muno tukasambilila ukuti Leza watumile Umwana wakwe ukufuma ukwiyulu nu kwiza pano nsi kuti aize atufwile. (Yoane 3:16) Uzye uwila uwo ukatwavwa uli? Ukatwavwa ukuya nu utailo wakuti uku nkoleelo ivintu vilazipa cuze.
5 Utailo uno twakwata uwakuti ivintu vilaziipa uku nkoleelo, ukakomelako pa mulandu ni cintu nacuze cino Leza wacita. Yeova wimika uteeko wa mwiyulu, kuli kuti Uwene wa Umesiya. Uteeko uwo, likwene sile wasya usisyepo ucuzi onsi, nu kulenga insi yonsi ukuya paladaise. Uzye asi cintu cisuma sana cico? Pano umu nsi iiyo, tulaya ni nsansa nu kwikala umutende amanda pe. (Masamu 37:29) Lelo na ndakai kwene Leza akatutungulula pakuti twaya ni nsansa. Nupya watupeela nu wila usuma cuze, uwakuti pa nsita iiliyonsi ino tukulonda, tungamuvwanzya umwipepo. Vino twalanda paa, a vimwi-vimwi sile pali vino Yeova akalangilamo vino watemwa antunze navino watemwa mwemwe mwenga.
6. Uzye mufwile ukucita uli pali vino Yeova wamutemwa?
6 Icuzyo cino mufwile ukuyuzya mweineco aeci: Uzye ningacita uli pa kutemwa kuno Yeova wantemwa? Antu aingi yangasuka yati, “Mfwile ukumutemwa nani kwene.” Uzye namwe avino mungasuka? Yesu walanzile ati isunde ilyaluta masunde yonsi aeli: “Uwatemwa Mwene Leza wako nu mwenzo wako onsi, nu umi wako onsi, na mano yako yonsi.” (Mateo 22:37) I cumicumi kwaya imilandu isuma iingi ino ifwile ukumulenga ukuti mwatemwa Yeova. Nomba uzye ukuyuvwa sile ukuti watemwa Leza ala vivyo kwene kuli kutemwa Yeova nu mwenzo wako onsi, nu umi wako onsi na mano yako yonsi?
7. Uzye ndi umwi akuyuvwa sile umu mwenzo ukuti watemwa Leza, ala wamutemwa umu cumi? Londololini.
7 Muli Baibo tukasambililamo ukuti ukutemwa Leza kusipelela sile apa kuyuvwa ukuti mwamutemwa. Ukuya kwene ukuyuvwa umu mwenzo ukuti watemwa Yeova kwacindama, nomba ukuyuvwa kuko uutandiko sile. Caya kwati aviivi vino ulumbezu lwa cizao lukalondekwa pakuti kuye icimuti icikaseeka ivizao. Nomba, ndi cakuti mukulonda ukulya icizao cimwi, uzye mungatemwa sana ndi cakuti umwi wamupeela sile ulumbezu lwa cizao cico? Awe foo! Fwandi nu kuyuvwa umu mwenzo ukuti watemwa Yeova ala alino mukutandika sile ukumutemwa. Baibo ikasambilizya iti: “Swemo tukalanga kutemwa kuno twatemwa Leza pa kuyela masunde yakwe. Na masunde yakwe angupale.” (1 Yoane 5:3) Kuli kuti ukutemwa kuno twatemwa Leza kufwile kwaloleka umu vicitwa vitu. Nga alino ukutemwa kuko kulaya u kwa cumi.—Mateo 7:16-20.
8, 9. Uzye tungalangizya uli ukuti twatemwa Leza nu kuti tukamutaizya?
8 Pa kulangizya ukuti twatemwa Leza, tufwile ukuyela masunde yakwe nu kuomba ivintu kulingana na vino tukasambilila muli Baibo. Ukucita vivyo kutaatala foo. Amasunde yakwe Yeova yatanyoma sana icakuti itufilwa nu kuyalondela, lelo yene yayelako uku kutwavwa ukuya ni nsansa umu umi witu. (Ezaya 48:17, 18) Nga tukucita ivintu kulingana na vino Yeova akatutungulula, ala tukulanga Tata witu wa mwiyulu ukuti tukataizya pali vino watucitila. Nomba iciipako i cakuti antu aingi yasitaizya foo. Swemo tutalinzile ukuya aasitaizya wa yantu yamwi aaliko lino Yesu wali pano nsi. Kwali lino Yesu wapozizye antu yakwe tembwe, lelo pali yonsi 10 yano wapozizye, a wenga sile uwawezile ku kwizataizya kuli Yesu. (Luka 17:12-17) I cumicumi, tulinzile ukukolanya umonsi wiya uwataizye, asi kuya wakwe yaaya 9 aatataizye!
9 Nga lyene, a masunde ci yakwe Yeova yano tulinzile ukuyela? Aingi twayasambilila umwibuku kwene lii, nomba lekini tupitulukemo muli yamwi-yamwi. Pano ukuyela masunde yakwe Leza, u kungatwavwa ukwikala umu kutemwa kwakwe Leza.
MWALEKA YEOVA ALUKUYA CUZA WINU
10. Londololini umulandu uno cacindamila ukutwalilila ukumanya Yeova.
10 Icintu icicindame sana nupya ica kutandikilako pakuti Yeova aye cuza winu, u kusambilila pali aliwe. Kusambilila kusisila. Lekini tulangilile: Tuti mutenzi apanzi usiku, mukoota umoto pano ala kwati kuzuka cuze. Uzye mungalekelezya umoto ukuti uzime? Awe foo. Mungaikapo inkwi pakuti umoto walukwaka. Pano limwi mungaya pa uzanzo ndi cakuti umoto uwo wazima! Vivikwene vino inkwi zikalenga ukuti umoto utazima, alivino “ukumanya Leza” nako kukalenga ukutemwa kuno twatemwa Yeova kwakomelako.—Mapinda 2:1-5.
Vivi kwene vino umoto ukalondekwa inkwi, ali vino ukutemwa Yeova kwaya
11. Uzye vino Yesu wasambilizyanga vyalenzile ukuti asambi yakwe yuvwe uli?
11 Yesu walondanga ukuti alondezi yakwe yaatwalilila ukutemwa Yeova ni Izwi lyakwe Leza. Lino Yesu watuutulwike, wasambilizye asambi yakwe yaili pa masesemo yamwi amu malembelo ya ciYebulai aafikiliziwe muli aliwe. Uzye asambi yaaya yuvwile uli pali vino wayalondolwelile? Lino paapisile amanda, yizile yalanda yati: “Uzye myenzo itu itali ikupya [“kwaka”, NW] uku luzango lino wali akulanda naswe mu nzila, nu kutulondolwela malembelo?”—Luka 24:32.
12, 13. (a) Uzye ukutemwa kuno antu aingi yaatemilwe Yeova na Baibo kwacitika uli ndakai? (b) Uzye tungacita uli pakuti ukutemwa kwitu kutaacepa?
12 Uzye lino mwatandike ukusambilila nu kuvwikisya ivya muli Baibo, mutuvwile kwati mwenzo winu ukwaka uku luzango, alino nu kutemwa Leza? Nanti ciye uli ali vino muvwile. Nupya aingi ali vino yakauvwa. Fwandi pano catalila sile a pakuti ukutemwa kuko kutwalilile nupya kwalunduluka. Swemo tusilonda ukuya wa yantu amuno nsi. Yesu wasoowile ati: “Kutemwa mu antu aingi kulacepa.” (Mateo 24:12) Uzye mungacita uli pakuti ukutemwa kuno mwatemwa Yeova ni visinka vya muli Baibo kutaacepa?
13 Mwalukusambilila pali Yeova na Yesu Klistu. (Yoane 17:3) Mwaezya na maka ukwelenganya sana pali vino mukusambilila, nu kuyuzya mweeneco imuti, ‘Uzye ivintu vii vikunsambilizya cani pali Yeova? U mulandu ci nauze uno ivintu vii vikunsambilizya uno ndinzile ukutemelwa Leza nu mwenzo wane onsi, na mano yane yonsi, nga nu umi wane onsi?’ (1 Timoti 4:15) Ukwelenganya kuko u kulamwavwa ukutwalilila ukutemwa sana Yeova.
14. Uzye ipepo lingatwavwa uli ukutwalilila ukutemwa Yeova?
14 Icintu nacuze icingamwazwa ukutwalilila ukutemwa Yeova, u kupepa kuli aliwe lyonsi. (1 Tesalonika 5:17) Umu Cipande 17 umwibuku kwene lii, twasambilile ukuti ipepo u wila uwampomvu sana uno Leza watupeela. Vivikwene vino antu yaili ndi yakulanzyanya maila ingi yakatemwana sana, ali vino naswe kwene ndi tukupepa kuli Yeova tulaya ya cuza yakwe yano watemwa. Cacindama sana ukuti tutaaleka mapepo itu yaaya ngati aakupanga sile, nanti kuomvya sile amazwi ya kusungila ukwaula nu kwikako amano. Tufwile ukupepa kuli Yeova wakwe vino umwana akavwanga kuli isi. Kuya kwene lino tukuvwanga na Leza tulinzile ukuya nu mucinzi, lelo tutafwile ukuvwa insonyi pa kucita vivyo, tufwile ukulanda vyonsi vino tukweti umu mwenzo. (Masamu 62:8) I cumicumi, ndi tukuisambilizya Baibo, alino nu kupepa kuli Leza nu mwenzo onsi, ala tukumulumbanya, nupya ivintu vii vikatwazwa ukwikala umu kutemwa kwakwe Leza.
NDI MWATWALILILA UKUPEPA LEZA MULAYA NU LUZANGO
15, 16. U mulandu ci uno tukalolela umulimo wa kusimikila pa Wene ukuti i syuko sana nu kuti ala umuntu wakwata icuma?
15 Ukuisambilizya Baibo alino nu kupepa kuli Leza tukavicita ala tuli fwenga. Nomba lekini fwandi tulande pa mulimo uukaombwa pa lwalala, kulikuti umulimo wa kunenako yauze pali vino twataila. Uzye mwatandika mpiti ukuneenako yauze pali vino mukasambilila muli Baibo? Ndi cakuti mwatandika, ale namwe mwaya ni syuko ilya kutumikila Leza. (Luka 1:74) Lino tukunenako antu icumi cino twasambilila pali Yeova, ala tukuomba umulimo umwi ucindame sana uno aina Klistu yonsi yaapeelwa, kulikuti ukukosoola ilandwe lisuma ilya Wene wakwe Leza.—Mateo 24:14; 28:19, 20.
16 Umutumwa Paulo walolanga umulimo wa kusimikila ukuti wali ucindame sana, nupya wawamanga akuti i cuma. (2 Kolinto 4:7) Ukunenako antu pali Yeova na vino akaalonda ali mulimo ucindamisye uno mungaomba. Pano ukuomba umulimo uu ala mukuombela Umwene wa mpomvu, nupya umulimo uwo ukaleta sana uluzango. Nga mukuomba umulimo uu ala mukwavwa antu afuke ukuti nayo yaye ya cuza yakwe Tata witu uwa mwiyulu, nu kuti yaye umu nzila ya ku umi wa pe! I cumicumi, kutaaya umulimo uwazipa wakwe uu! Nakupya, ukukosoola pali Yeova ni Izwi lyakwe kukatwavwa ukukomya utailo witu nu kutwavwa ukuti twamutemwa sana. Nakapya, Yeova akataizya pa mulimo uno mukaomba. (Ayebulai 6:10) Ukuomba umulimo wa kusimikila na maka yonsi, kulamwavwa ukwikala umu kutemwa kwakwe Leza.—1 Kolinto 15:58.
17. U mulandu ci uno umulimo wa kusimikila upamvizye sana ndakai?
17 Cacindama sana ukwiusya ukuti umulimo wa kusimikila ufwile ukuombwa likwene. Baibo ikati: “Kosola ilandwe, komaila penepo.” (2 Timoti 4:2) Uzye u mulandu ci uno tulinzile ukuombela zuwa umulimo uu? Izwi lyakwe Leza likati: “Uwanda ukulu wakwe Yawe [“Yeova,” NW] uli mupipi, watiupalama, ala pasi pakukalauka ukufika!” (Zakaliya 1:14) I cumicumi, insita ikukalauka ukufika lino Yeova alasisyapo ivicitwa vyakwe Satana pano nsi. Antu yafwile ukucelulwa likwene! Yalinzile ukumanya ukuti likwene ali lino yafwile ukusoolola Yeova ukuya ali Kateeka wao uwa Papelapela. Uwanda wa mpela “ulafikiliziwa ukwaula kucelwa.”—Habakuku 2:3.
18. U mulandu ci uno tulinzile ukupepela Yeova pamwi na ina Klistu ya cumi?
18 Yeova akaalonda ukuti twamupepa pamwi na ina Klistu yanji. Fwandi ali cino Baibo ikatunenela iti: “Lekini twasakamalana nu kwazwana nu kutemwa ukucita visuma. Tutata kukongana pamwi, ndi vino yamwi yakucita. Lelo lekini twakomelezyanya, nu kuluta, pano mwati mulola ukuti wanda wa Mwene ukupalama pipi.” (Ayebulai 10:24, 25) Lino tukukongana pamwi na ya kapepa yanji, tukaaya ni syuko lya kulumbanya nu kupepa Leza witu wino twatemwa. Nakapya, tukakomelezyanya na anji.
19. Uzye tungacita uli pakuti twauvwana sana umu cilongano?
19 Lino tukulonganila pamwi na ya kapepa yakwe Yeova, cikalenga ukuti mu cilongano mwaya sana ukuvwana. Cacindama sana ukuti twalolamo ivisuma umu yanji wakwe vino Yeova akalolamo ivisuma muli fwefwe. Kusi kutaila ukuti auzo yaye amaliilike. Mwaiusya lyonsi ukuti swe yantu tusilundulukila pamwi muli vyakwe ukapepa, nu kuti swensi kwene tukaluvyanya. (Kolose 3:13) Mwalemasya ukuti mwatandana icuza na yaayo aatemwa sana Yeova, alino mulalola ukuti mukulunduluka muli ukapepa. I cumi kwene, ndi mwatandika ukupepa Yeova pamwi na ina inu na ya nkazi amu cilongano, cilamwavwa ukwikala umu kutemwa kwakwe Leza. Uzye Yeova akalambula uli yonsi aakamupepa umu cumi, nupya aakaikala umu kutemwa kwakwe?
MWALEMASYA PAKUTI MUKAYE NU “UMI WAPE UWA CUMI”
20, 21. Uzye “umi wape uwa cumi” kuli kutuuli, nupya u mulandu ci uno cilaziipila ukuya nu umi uwo?
20 Yonsi aakaombela Yeova umu cumi, alayapeela umi. Nomba uzye umi uwo u wa musango ci? I cisuma, uzye mwemo mwaya nu umi? Swe ingi tungasuka tuti, ‘ee naya nu umi.’ Pano ala itumanya ukuti tukafuuta, tukalya, nu kumwa. Kuli kuti twaya nu umi. Nupya insita zimwi ivintu ndi vyaziipa sana, tungalanda nu kuti, “Eya, ali umi wampomvu uu!” Lelo Baibo yene ikati ndakai kutaaya umuntu uwaya nu umi wa cumi.
Yeova akaalonda ukuti muce muye nu “umi wa pe uwa cumi.” Uzye mukaalonda?
21 Izwi lyakwe Leza likatukomelezya ukuti ‘twalemasya umi wape uwa cumi.’ (1 Timoti 6:19) Amazwi yaayo yakalangilila ukuti fwandi uku nkoleelo tulaya nu “umi wape uwa cumi.” Tulaya amalilike, nga alino tulaya nu umi uwa cumi, pano lyene tulaikala wakwe vino Leza walondanga ukuti twaikala. Lino tulaikala umu paladaise pano nsi, tulaya nu umi usuma, nupya tulaikala umutende, ni nsansa, nga alino tulaipakizya umi wa cumi uwa manda pe. (1 Timoti 6:12) Uzye vwilini citalazipa sana ukwikala vivyo?
22. Uzye mungacita uli pakuti mukaye nu “umi wape uwa cumi”?
22 Uzye tungacita uli pakuti tukaye nu “umi wa cumi”? Amazwi aaya papela ya cikomo icikalanda pa umi uwa cumi yakalanga vino Paulo wakomeliizye aina Klistu ati “yacita visuma” nu “kuya akama mu milimo isuma.” (1 Timoti 6:18) Fwandi tungati, umulimo ukome waya pa kucita vino tukasambilila muli Baibo. Nomba uzye Paulo walozizye umukuti ndi tukuomba imilimo isuma ala casila tulalipilwa “umi wape uwa cumi?” Awe, asi muno walozizye, pano ukukwata umi wape uwa cumi a pa mulandu sile ni “cikuku nu wila wakwe Leza.” (Loma 5:15) Lelo kwene, Yeova akalondesya ukulambula yonsi aakamuombela umu cumi. Namwe kwene akalonda ukuti mukaye nu “umi wape uwa cumi.” Yonsi aakaikala umu kutemwa kwakwe Leza yalaya nu umi uwo uwa pe uwa nsansa nupya uwa mutende.
23. I vyani vino tufwile ukucita pakuti twikale umu kutemwa kwakwe Leza?
23 Swensi kwene cila-muntu tulinzile ukuyuzya sweeneco tuti, ‘Uzye nkapepa Leza umu nzila ino umweneco walondolola muli Baibo?’ Ndi cakuti cila-wanda uwasuko ukaya u wakuti ee, ale tukaomba ningo. Tungataila sana ukuti Yeova ali mwakufisama mwitu. Alatwalilila ukucingilila aomvi yakwe lino yakucuziwa sana ni vintu viipe ndakai. Nakupya, Yeova alatupususya pakuti tuce twingile umu nsi ipya isuma cuze ino yasya ize likwene sile. I cumi kwene tulaya nu luzango cuze ukwikala umu nsi ya musango uwo! Nupya tulazanga wakwe cimwi lino tulaiusya ukuti fwandi umu manda yaa atale twaombanga ningo sana. Fwandi, ndi mukusoolola ukucita ivisuma ndakai, mulaya nu “umi wape uwa cumi,” nupya uwo ali umi uno Yeova Leza walondanga ukuti antu yaaipakizya imyaka yonsi!