Vya Kusambilizya Umwana Winu

Lino Leza walenzile ukuti kuye ulupwa, wapeezile avyazi umulimo wa kusakamala ana yao. (Kolose 3:20) U mulimo winu mwe yavyazi ukusambilizya ana inu ukutemwa Yeova nu kuti yace yakule ningo ukuya antu alondoloke. (2 Timoti 1:5; 3:15) Mufwile nu kumanya ivili umu mwenzo wa mwana winu umulumendo nanti umukazyana. Kwene, cacindama sana ukuti mwe yavyazi mwacita vino ana inu yangaakolanya. Mungasambilizya ningo umwana winu ndi cakuti mwemwe mwatandikilapo ukuisambilizya Izwi lyakwe Leza nu kuliika umu mwenzo winu.—Masamu 40:8.

1 MUTAALEKA CATALILA ANA INU UKUMUNEENA VIMWI

BAIBO IKATI: “Muntu wensi alinzile kuuvwa zuwa, lelo atekele kulanda.” (Yakobo 1:19) Mufwile ukuleka ana inu yayuvwa ukuti yali nu untungwa uwa kuvwanga namwe. Yalinzile ukumanya ukuti mumauvwa ndi cakuti yakulonda ukumunena vimwi. Mwaya pa mutende nayo pakuti yalanda ivili uku mwenzo. (Yakobo 3:18) Ndi cakuti yati-yamanya ukuti mumayakalipila nanti ukuyapeela umulandu, limwi yatanga yamunene vyonsi vino yafwile ukumunena. Mwateekela ana inu umwenzo, nupya mwayanena amaila aingi ukuti mwayatemwa.—Mateo 3:17; 1 Kolinto 8:1.

VINO MUNGACITA AEVI:

• Mutaaya apamviwe ndi cakuti ana inu yakulonda ukumunenako vimwi

• Mwalanzyanya na ana inu lyonsi, asi sile lino pali intazi

2 MWAEZYA SANA UKUVWIKISYA VINO YAMUNENA

BAIBO IKATI: “Wiyo akasakamala ukuvwa isunde alazana isyuko.” (Mapinda 16:20) Limwi-limwi, mulinzile ukumanya icalenga ana ukumunena vimwi pakuti muvwikisye vino ana inu yakuyuvwa. Caseeka sana uku yana anono ukulanda ivintu ngati vyati-vitala sana nanti ukulanda vimwi icakuti icimutalila ukuvwikisya muno yakulozya. “Umuntu wino akatolelela zuwa lino atatala uvwa, akalangizya sile uwelewele wakwe.” (Mapinda 18:13) Mutaasoka zuwa.—Mapinda 19:11.

VINO MUNGACITA AEVI:

• Mufwile ukupingulapo mweineco ukuti nanti umwana akaaneene ivya musango ci, ntafwile ukumuputukizya lino akuvwanga nanti ukumukalipila

• Mwaezya ukwiusya vino mwayuvwanga lino mwali umwance wakwe vino ana inu yali ndakai ni vintu vino mwalolanga ukuya ivicindame sana

3 MWAUVWANA UMUMIVWANGILE NI MICITILE YA VINTU

BAIBO IKATI: “Mwanane, ala uwasumba amano kuli vino yaso yakukulangizya na vino yanyoko yakukusambilizya.” (Mapinda 1:8) Yeova wapeela amaka yonsi yoili ya isi na ya nyina pa yana yao. Mulinzile ukusambilizya ana inu ukumucindika nu kumuuvwila. (Efeso 6:1-3) Ana yakamanya ndi cakuti avyazi yao yasi “na melenganyo ali yamwi.” (1 Kolinto 1:10) Ndi cakuti kuli pamwi pano mwafilwa ukuzumilizyanya, mutaapazyanya ala na ana inu apanoyali pano yangata ukumucindika ndi mukucita vivyo.

VINO MUNGACITA AEVI:

• Mwalanzyanya nu kuzumilizyanya pali vino muli nu kusambilizya ana inu

• Ndi cakuti mwemo nu winu mukwelenganya ivipusineko pa misundile ya yana, mwaezya ukuvwikisya vino uwin akwelenganyapo

4 MWAPEKANYIZIZYA LIMWI

BAIBO IKATI: “Sambilizya umwana inzila ya kupitamo.” (Mapinda 22:6) Ukusambilizya ana kusicitika sile ukwaula ukuombesya. Mufwile ukupekanya ningo vino muli nu kucita, ukwikako sile ni misambilizizye. (Masamu 127:4; Mapinda 29:17) Ukusambilizya ana cisipiliula sile ukwika masunde yano yafwile ukulondela, lelo, calola nu mukuti mufwile ukunena ana inu cino mwikilako isunde lilyo apa ng’anda. (Mapinda 28:7) Nupya, mwayasambilizya ukutemwa Yeova ni Izwi lyakwe nu kumanya ningo amasunde aaya muli Baibo. (Masamu 1:2) Cii cilaleenga ukuti yaye na kampingu musuma.—Ayebulai 5:14.

VINO MUNGACITA AEVI:

• Mwa-azwa ana inu ukumanya ukuti Yeova u Muntu wa cumi-cumi wino yangataila

• Mwayasambilizya ukumanya ivintu ivingayaleetelela na vino yangaasenkako, wakwe vivyo ivikazanwa pa Intaneti nu kutandana icuza na antu aipe. Mwayasambilizya ivya kutaluka kuli yaayo aakatitila ana