Leza Waumvile Iyulu ni Insi

Yeova Leza ali Kaumba witu. Waumvile ivintu vyonsi, vino tukalola na vino tusilola. Lino atatala waumba ivintu vino tukalola, waumvile ya malaika aingi sana. Uzye ya malaika wayamanya? Ya malaika aantu yano Yeova waumba aakolana na aliwe. Tutanga tuyalole, wakwe vivi kwene vino tutanga tulole Leza. Malaika wa kutandikilako wino Yeova waumvile, wali a kaazwa wakwe. Malaika wiyo wazwilizye Yeova ukupanga intanda, mapulaneti, ni vintu vyuze ivingi. Pulaneti wenga pa mapulaneti yayo, insi isuma sana ino tukaikalamo.

Lyene Yeova wapekinye insi kuti antu ni nyama yaikalamo. Wapanzile ilanzi kuti lyawala pano nsi. Wapanzile imyamba, viyemba, ni inguzi.

I vyani vyuze vino wacisile? Yeova watiile: ‘Nimapanga isote, vimelwa, ni miti.’ Misango ipusanepusane iya vizao, misalu, na maluwa, vyatandike ukukula. Lyene Yeova waumvile vyonsi ivikapapuka, ivikaowa, ivikasela, ni nyama izikapita panono panono. Waumvile izinono wakwe, tukalulu, alino ni zikulu, wakwe inzovu. I nyama ci ino watemwisya?

Lyene Yeova wanenyile malaika wino watandikiilepo ukuumba ati: “Katuumbe umuntu.” Antu yaali nu kupusanako ni nyama. Yaali nu kulapanga ivintu, kulanda, kuseka, alino nu kupepa Leza. Yaali nu kulasakamala insi ni nyama. Uzye wamanya umuntu wa kutandikilapo wino Leza waumvile? Leka tulole.