Punda Wakwe Balamu Wavwanga

Aina Izlaeli yaali mulwanga mupiipi ni myaka 40. Yaacivinzye imisumba iingi iya maka. Lyene, yaapanzile inkambi umulwanga ulwa Moabu uku ufumondaka uwa luzi lwa Yodani, nupya ii yali insita yakuti ingile Mupanga ya Ulayo. Balaki, umwene wa ku Moabu, watiinyile ukuti yamamupoka impanga yakwe. Fwandi wamile umonsi uwi zina lya kuti Balamu ku Moabu kuti akatiipe Aina Izlaeli.

Nomba Yeova waneenyile Balamu ati: ‘Utakatiipe Aina Izlaeli.’ Fwandi Balamu wakanyile ukuyako. Umwene Balaki wamile Balamu umuku wake ciili nu kumuneena ukuti alamupeela consi cino akulonda. Balamu wakanyile nupya kwene. Lyene Leza wamunenyile ati: ‘Ungapita, lelo ukalande sile mazwi yano ndakunena.’

Balamu wakwezile punda nupya wapisile ku kaeya pa kuya ku Moabu. Walondanga ukuyatiipa Aina Izlaeli, nanti cakuti Yeova wamulesizye ukucita vivyo. Lino wali mu nzila malaika wakwe Yeova walolekiile kuli aliwe imiku itatu. Balamu ataaweni malaika, lelo punda wakwe wamuweni. Pa kutandika punda wapalwike afuma mu museo. Lyene punda waile apita uku mbali ya ciliwe, afyantikizya ikuulu lyakwe Balamu ku ciliwe kwene cico. Pa kusyalikizya punda waizi pakasi ka museo. Insita yonsi ii, Balamu umanga punda ni ntuwa.

Pa cisila cakwe vii, Yeova walenzile ukuti punda avwange. Punda uzizye Balamu ati: ‘U mulandu ci uno ukungumila?’ Balamu nawe aasuka ati: ‘Watulenga ndoleke wa ciwelewele. Inkwata ulupanga nga na kukoma.’ Punda nawe waswike ati: ‘Ukankwela apa myaka iingi. Uzye natala nakucitilapo icintu ica musango uu?’

Yeova walenzile ukuti Balamu alole malaika. Malaika walanzile ati: ‘Yeova wakuneenyile ukuti utakatiipe Aina Izlaeli.’ Balamu watile: ‘Natinduvyanya. Fwandi namaswilila uku ng’anda.’ Nomba malaika wamunenyile ati: ‘Pitanga uku Moabu lelo ukalande sile mazwi yano Yeova alakunena.’

Uzye Balamu wasambilileko kuli vii? Awe. Pa cisila cakwe vii, Balamu wezizye ukutiipa Aina Izlaeli pa miku itatu, lelo pa miku yonsi ii Yeova wamulenganga ukuti ayapaale. Aina Izlaeli yazanzile Aina Moabu, nupya Balamu wakomilwe. Uzye nga citazifile Balamu auvwila Yeova pa kutandika sile?