Ulayo Wakwe Yefuta

Nupya kwene Aina Izlaeli yaatile ukupepa Yeova nu kutandika ukupepa ya leza ya ufi. Lino Aina Amoni yaatandike ukulwa na Ina Izlaeli, ya leza ya ufi yano Aina Izlaeli yatandike ukupepa yatayazwilizye. Aina Izlaeli yacuzile pa myaka iingi. Yasusile iyaneena Yeova iyati: ‘Ituyembuka. Twapapata tupususye ukuyalwani itu.’ Aina Izlaeli yononyile ivilubi nu kutandika ukupepa Yeova nupya. Yeova aatalondanga ukuti yatwalilile ukucula.

Umusilika uwi zina lyakuti Yefuta, awino yasolwile ukuti atungulule Aina Izlaeli ukukulwa na Ina Amoni. Waneenyile Yeova ati: ‘Nkulaya ukuti ndi cakuti watwazwilizya ukucimvya ulwi uu, ndakupeela umuntu aalatandikilapo ukufuma umu ng’anda yane nu kwiza nkomenkanya lino ndaswilila uku ng’anda.’ Yeova uvwile ipepo lyakwe Yefuta nupya wamwazwilizye ukucimvya mu ulwi.

Lino Yefuta waswilile uku ng’anda, u muntu uwatandikilepo ukufuma nu kuya mukomenkanya, u mwanakwe umukanzyana wenga sile wino wakweti. Wacinanga ala akulizya na kangoma. Uzye Yefuta wali nu kucita uli? Wiwisye vino walavile nu kulanda ati: ‘Owe mwanane! Wandenga ukuya nu ulanda. Nalavile kuli Yeova. Pakuti mfikilizye, ndinzile ukukutuma uku kuombela pi tenti lya kupepelapo ku Syilo.’ Lelo umwana wakwe walanzile ati: ‘Tata, ndi cakuti mwalavile kuli Yeova, mulinzile ukufikilizya. Nkulenga sile ukuti: ‘ Munzumilizye inje ukumyamba nkamaleko imyezi iili na anaci yanji. Lyene apa cisila ndapita.’ Umwana wakwe Yefuta waombiile api tenti lya kupepelapo na ucisinka umi wakwe onsi. Cila mwaka auze yayanga umu kumutandalila uku Syilo.