Devedi na Golyati

Yeova waneenyile Samueli ati: ‘Yanga uku ng’anda yakwe Yese. Wenga apa yana yakwe aonsi alaya umwene wa Ina Izlaeli uwalondelelapo.’ Fwandi Samueli waile uku ng’anda yakwe Yese. Lino waweni umwana umukalambapo, welenginye ukuti: ‘Afwile ukuya aewikwene.’ Nomba Yeova waneenyile Samueli ukuti asi ali wino insoolola. Yeova watile: ‘Nemo nkalola umu mwenzo asi milolekele sile iya kunzi.’

Yese waleesile ana na yauze 6 kuli Samueli. Lelo Samueli walanzile ati: ‘Pasi wino Yeova watasoolola pali yaa. Uzye wakwata ana na yauze?’ Yese watile: ‘Kwasyala sile Devedi, umwancepo. Aataya umu kucema imfwele zyane.’ Lino Devedi wawezile, Yeova wanenyile Samueli ati: ‘Wii ali wino insoolola!’ Samueli witulwile amafuta pa mutwe wakwe Devedi pa kumupaka ukuti akaye umwene wa Ina Izlaeli.

Lino papisile insita, Aina Izlaeli yaile umu kulwa na Aina Filisiti aakweti musilika uwali cipombolo uwi zina ilyakuti Golyati uwayalwilanga. Cila wanda, Golyati watumfyanga Aina Izlaeli. Wapundanga ati: ‘Letini umuntu wakuti tulwe nawe. Ndi wancimvya tulaya azya inu. Lelo ndi cakuti nene namucimvya ale mwemwe mulaya azya itu.’

Devedi waile kuno asilika Aina Izlaeli yaapangiile inkambi kuti atwalile aina yakwe ivyakulya. Lino uvwile vino Golyati walandanga watile: ‘Nimalwa nawe!’ Umwene Saulo walanzile ati: ‘Wewe mwance.’ Devedi nawe waswike ukuti: ‘Yeova amangazwa.’

Saulo wapeezile Devedi ivyakuzwala vyakwe ivya nkondo, lelo Devedi watile: ‘Nemo ntanga indwe ni ivyakuzwala vii.’ Devedi watoziile ca kuvwintilako mawe aya ukuluzi. Nupya wasozile amawe 5 atelepe aika umu kacola. Lyene Devedi wasimwilile kuli Golyati. Cipombolo capunzile ati: ‘Iza kuno mwance we. Nimapela umwili wako uku vyunyi ni nyama zyampanga kuti zilye.’ Devedi ataatinyile. Nawe wapunzile ati: ‘Wemo ukwiza kuli neene nu lupanga ni sumo, lelo nemo nkwiza kuli wewe umwi zina lyakwe Yeova. Utakulwa naswe, lelo wemo ukulwa na Leza. Yonsi sile pano yamalola ukuti Yeova wakwata sana amaka ukucila ulupanga ni sumo. Mwensi amamipeela mu minwe itu.’

Devedi wisile iwe mu ca kuvwintilako mawe nupya watinsile ca kuvwintilako mawe cico na amaka yakwe yonsi. Kupitila mu kwazwa kwakwe Yeova, iwe ilyali muli ca kuvwintilako mawe lyalungime pampumi yakwe Golyati. Cipombolo caponyile pansi icifwa. Lyene Aina Filisiti yasimwile pakuti yapususye ama umi yao. Uzye wataila muli Yeova wakwe vino Devedi wali?