Malaika Wakwe Yeova Wacingiliile Hezekiya

Aina Asilya yatandike ukuteeka imitundu 10 iya wene uwa Ina Izlaeli. Lyene Senakelibu, walondanga ukuti apoke ni mitundu iili iya wene uwa Yayuda. Watandike ukucimvya imisumba iya mu Yuda onga na onga. Nomba walondesyanga umusumba uwa Yelusalemu. Icintu cino Senakelibu ataamanyile i cakuti Yeova wacingililanga Yelusalemu.

Hezekiya umwene uwa mu Yuda, wapeezile Senakelibu impiya izingi pakuti atakazanze umusumba uwa Yelusalemu. Nanti cakuti Senakelibu waposile impiya, watumile asilika yakwe aa maka kuti yakazanze Yelusalemu. Antu yuvwile sana intete pa mulandu wakuti Aina Asilya yayanga yakupalamila umusumba. Lyene Hezekiya wayaneenyile ati: ‘Mutuvwa intete. Aina Asilya yakweti amaka, nomba Yeova alalenga tukwate sana amaka ukuyacila.’

Senakelibu watumile Labuseki inkombe yakwe, uku Yelusalemu kuti akatumfye antu. Labuseki wimilile ukunzi iya musumba nu kupunda ati: ‘Yeova atanga amwavwe. Mutaleka Hezekiya aamubepa. Kusi leza angamutuula kuli sweswe.’

Hezekiya uzizye Yeova kuti amuneene ivyakucita. Yeova nawe wamuneenyile ati: ‘Utuvwa intete pa mulandu na mazwi yano Labuseki watalanda. Senakelibu atalacimvya umusumba uwa Yelusalemu.’ Lyene, Hezekiya wapokeelile amakalata ukufuma kuli Senakelibu. Umu makalata mwali amazwi aakuti: ‘Mwemo uvwini sile kuli sweswe. Yeova atanga amwazwe.’ Hezekiya wapefile ati: ‘Yeova, twapaapata, tupususye, pakuti antu yonsi yamanye ukuti wewe uli Leza wa cumi.’ Yeova wamuneenyile ati: ‘Umwene uwa ku Asilya ataliza umu Yelusalemu. Ndacingilila umusumba wane.’

Senakelibu wasininkizye ukuti umusumba uwa Yelusalemu ulaya uwakwe. Wanda umwi usiku, Yeova watumile malaika wakwe kuno asilika yapangiile inkambi. Malaika wakomile asilika 185,000. Asilika aa Mwene Senakelibu aakweti sana maka yaafwile. Kutaali cili consi cino wali nu kucita kucila pa kuswilila uku ng’anda ala atacimviwa. Yeova wacingilile Hezekiya alino nu musumba uwa Yelusalemu, wakwe vino walavile. Uzye ngi cakuti uwaikala umu Yelusalemu nga wataile Yeova?