Kalata Ukufuma Ukwi Umba Ilikatungulula

Kuli ya Kapepa Yanji:

Swe yakapepa yakwe Yeova, twatemwa Izwi Lyakwe, Baibo. Twasininkizya ukuti mwaya malyasi ya mpiti acumi, utunguluzi uusuma, alino ni vintu ivikalanga ukuti Yeova watemwa sana antu. (Masamu 119:105; Luka 1:3; 1 Yoani 4:19) Tukalondesya ukwazwa antu ukusambilila icumi icaya umwi Zwi Lyakwe Leza. Pa mulandu kwene uu, tuli sana nu luzango ukupanga ibuku lii ilikuti, “Vino Mungasambilila Uku Malyasi ya Muli Baibo.” Lekini tumuneneko vimwi ivili umwi buku lii.

Yano yalembela ibuku lii aana. Lelo, tungaliomvya nu ku kwazwilizya aikolo akalondesya ukusambilila ivingi pali Baibo. Pa mulandu wakuti Baibo i buku lya yantu yonsi, ukwaula nu kutwisika, swensi kwene tungaipakizya ukusambilila masambililo ali umwi buku lii, aangatwazwa ukuya ni nsansa zya cumi.

Umwi buku lii, muli malyasi aa muli Baibo aakalanda pali vino vyacitikila antunze kufuma lino Leza wayaumvile. Twezizye sana ukulondolola malyasi ya muli Baibo mu nzila yuvwike nupya iyangupale, alino nu kulingana na muno yakonkanila.

Ibuku lii, lyacila na pa kulondolola sile malyasi ya muli Baibo. Lelo ivyeo ni vikope ivyayamo vikaazwa antu ukuvwikisya malyasi aa muli Baibo nu kwazwa aakubelenga ukumanya vino antu yayo yayuvwanga.

Ibuku lii likatwazwa ukulola vino Baibo yalanda pa antu auvwilile Yeova na atamuvwilile. Nupya likatucincizya ukusambililako kuli vino vyayacitikile. (Loma 15:4; 1 Kolinto 10:6) Ibuku lii lyakwata viputulwa 14. Apa tandikila cila ciputulwa paya visinka vino tungasambilila umu ciputulwa kwene cico.

Nga mwemwe avyazi, mungabelengela pamwi nu mwana winu isambililo lyonga na lyonga alino nu kulanzyanya ivikope. Lyene mungabelenga malembo apasintilile isambililo kwene lilyo. Mwaazwa umwana winu kulola vino ivyeo vino wabelenga muli Baibo vikuvwana ni sambililo ilya mwi buku. Mungaomvya inzila iliimwi kwene lino mukwazwa uwikolo ukusambilila malyasi aa muli Baibo.

Itutaila ukuti ulupapulo luu lumaazwa yonsi akwata umwenzo uwa kulondesya ukuvwa, ukusambilila Izwi Lyakwe Leza nu kuomvya vino yakusambilila. Cii cingalenga yatandike ukupepa Leza nu kuya umu lupwa lwa yantu yano watemwana.