LYASI LYAKUTANDIKILAKO | MWAMANYAPO VYANI PA NTE ZYAKWE YEOVA?
I vyani vino ya Nte Yakwe Yeova yazumilamo?
Ya Nte Yakwe Yeova yazumila ukuti “mazwi yonsi amu malembelo yene yafuma kuli Leza nupya yakaomviwa mu kusambilizya cumi.” (2 Timoti 3:16) Nupya tukaomvya Baibo ukusambilila pali Kaumba nupya ikatwavwa ivyakuya ni nsansa ndakai.
Baibo ikaati: “Yangala yamanye nu kuti awewe sile wenga ukaamwa Yawe [Yeova], nupya wenga mpo. Wewe uli Leza Wapapelapela umu nsi yonsi.” (Masamu 83:18) Fwandi, swemo tukapepa sile Yeova, Leza wenga, nupya vino sweswe ya Nte yakwe, tukaombesya pakuti izina lyakwe limanyikwe.—Ezaya 43:10-12.
Vino sweswe Aina Klistu, twazumila ukuti, Yesu “Umwana wakwe Leza,”a wizile pano nsi nu kuya Mesiya. (Yoane 1:34, 41; 4:25, 26) Nupya twazumila nu kuti, lino Yesu watuutulwike, waile ukwiyulu. (1 Kolinto 15:3, 4) Apa cisila wizile aya Umwene wa Wene Wakwe Leza. (Umbwilo 11:15) Uwene kwene uuwo aali uteeko ulalenga ukuti Paladaise iyaliko mpiti ikayeko nupya pano nsi. (Danieli 2:44) Baibo ikaati: “Aicefya yalapyana impanga nu kusyukila ulongo ulumalilike.”—Masamu 37:11, 29.
“Lino ya Nte yakuwelenga Baibo, yakalola ukuti Leza akulanda kuli aaliyo. Ndi cakuti yaaya ni ntazi zimwi, yakalondelezya ivyeo ivyaya muli Baibo ivingayazwa. . . . Fwandi yene yataila ukuti Baibo ikayazwa na ndakai kwene.”—I vyalanzile Benjamin Cherayath simapepo uwa ku Katolika, muli nyuzipepa (Münsterländische Volkszeitung) iyaku Germany
Ya Nte Yakwe Yeova yazumila nu kuti, amasunde aaya muli Baibo yangazwa antu na ndakai kwene. (Ezaya 48:17, 18) Acino fwandi tukalondela amasunde kwene yaayo. Baibo ikatucelula ukutaaluka uku vintu ivingakowezya imyelenganyizizye itu alino ni miili itu, aali cino tusipeepelako fwaka nanti ukuomvya imilembo ikavulunganya uwongo. (2 Kolinto 7:1) Nupya tukataluka nu ku vintu iviipe vino Baibo yalesya, ivili wa ukolesi, ulenzyo nanti uzelele, alino nu kwiya.—1 Kolinto 6:9-11.
a Baibo ikalanda ukuti Yesu u “mwana wakwe Leza wino wavilwe wenga,” pano aali ciumbwa cakutandikilako nupya a wino Yeova waiumbile umweneco umu kulungatika.—Yoane 3:18; Kolose 1:13-15.