Swensi Tukalondekwa Uwa kututeekezya

Uzye mungiusya uwanda uno mwaponyile ala mucili ance? Limwi mwaponyile imucisika nu kucisika. Uzye mungiusya vino ya mayo inu yacisile pakuti yamumyalalike? Limwi yamufuliile icilonda iikapo nu mulembo. Mwalizile, lelo amazwi yano ya mayo iinu yaomvizye akumuteekezya nu kumikumbatila yalenzile muvwe ningo. Apa nsita iiya, mwaweni kwati ukuteekeziwa kutaatala.

Nomba lino tukukula ivintu vikasenuka. Intazi zikavulilako sile, nupya cikatala sana pakuti tuteekeziwe. Ca ulanda i cakuti amavya ya ikolo yene yataaya wa mavya ya yana anono aakasila sile zuwa. Lekini tusambilile pali vino vyacitikila yamwi.

• Uzye yatala yamuzingapo incito? Ya Julian aasakamiile sana lino yayazinzile incito, yalanzile iyati, ‘Ndasunga uli ulupwa? U mulandu ci uno yanzingila incito lino nayaombela pa myaka ingi vii?’

• Limwi namwe kwene mukasakamala sana pa mulandu wakuti icupo casila. Ya Raquel yalanzile iyati: “Nuvwile uyi sana lino papisile imyezi 18 kufuma pano ya wane yansiilile. Naweni kwati insi yansilila, pasi vino ningacita. Nuvwanga uyi sana.”

• Limwi mukalwalilila icakuti mukalola nu kuti mutalapola. Limwi nsita zimwi mukaelenganya wakwe vino Yobo welenganyanga uwalanzile ukuti: “Nemo napata umi wane, nsilonda ukwikalilila pano nsi.” (Yobo 7:16) Limwi namwe kwene mwakolana na ya Luis, aali ni myaka kucila pali 80, yailandile ukuti, “Insita zimwi nkayuvwa kwati nkuloleela sile imfwa.”

• Nanti limwi ukufwilwa u kukalenga ukuti mwalondesya sana ukuteekeziwa. Ya Robert nayo yalanzile iyati: “Lino umwanane umonsi wafwile umu uzanzo wa mu ndeke, ntasininkizye. Lyene alino nizile nuvwa uyi sana, uyi uno Baibo ikakolanya ku lupanga lukali, ulukacisa umu mwenzo.”—Luka 2:35.

Ya Robert, ya Luis, ya Raquel, na ya Julian, yazanyile uwa kuyateekezya. Yazanyile Leza wa Maka Yonsi uwa kuyateekezya umu cumi. Uzye Leza akateekezya uli? Uzye angamuteekezya namwe kwene?