Ukuya Afuuke Kukalanga Ukuti Twakwata Amano
Ya Toñi, aasambilila sana ivya kusakamala antu yauze, yalizizye kabelu pa mulyango wa nga’anda imwi, lyene mama umwi uwali ni myaka uku ma 50 aiza afuma. Mama wiyo wavwanzile amazwi aipe nu kukalipila ya Toñi pa mulandu wakuti yatafisile zuwa ukuti yazwe nyina wakwe mama wiyo umukoloci. Ya Toñi yatacezilwe ukufika apa ncito. Lelo, yalenzile uwelelo kuli mama wiyo pa mulandu nu kukana uvwana ukwacitike.
LINO ya Toñi yaileko pa nsita yuze, mama wiyo nupya kwene waswilizyepo ukucita viivikwene vino wacisile pa muku wa kutandikilako. Uzye ya Toñi yacisile uli? Yalanzile yati, “Catazile sana. Pataali umulandu uno mama wiya walandilanga amazwi aipe.” Nomba, ya Toñi yalenzile uwelelo nu kunena mama wiyo ukuti yamanyile intazi zino wapitangamo.
Uzye ndi mwemwe mwali ya Toñi, mukwelenganya ukuti nga mwacisile uli? Uzye nga mwateesile umwenzo? Uzye nga camutalile sana ukukanasoka zuwa? Ukulanda sile icacumi, limwi cingatala sana ukuteeka umwenzo ndi vintu vyacitika wakwe vino ivilondololwa papela. Ndi cakuti umwi watusonka, cikatala sana ukuti tutwalilile ukuya afuuke.
Lelo, Baibo ikakomelezya Aina Klistu ukuya afuuke. Izwi Lyakwe Leza likalangilila ukuti umuntu umufuuke wakwata amano. Tukawelenga ukuti: “Uzye munomuli mungaya umwi akweti mano nu kumanyikisya? Ndi amunoli lekini aisininkizye kupitila mu kwikala umi wakucita visuma mu kufuuka na mano.” (Yako. 3:13) Uzye umuntu uwafuuka akalanga uli ukuti waya na mano? Nupya icani icingatwazwa ukuya ni miyele kwene ii?
VINO UMUNTU MUFUUKE AKALANGA UKUTI WAYA NA MANO
Ukuya umufuuke kungalenga pataya icipyu. “Ukwasuka luse luse kukamala icipyu, lelo akasa kakakatusya ukali.”—Mapi. 15:1.
Ukucita ivintu umu cipyu kungalenga ukuti ivintu vipileko pano cikaya kwati umuntu akwika inkwi pa moto. (Mapi. 26:21) Nomba, ndi cakuti umwi watafuuka pa kwasuka ilingi ivintu vikazipa. Cingalenga nu muntu ali nu lupato asenuke umu myelenganyizye yakwe.
Ya Toñi yaaweni ivyacitike. Lino mama wiya waweni vino ya Toñi yafuusile, watandike ukulila. Mama wiya walondolwile ukuti intazi zino wakweti ni zya mu lupwa i zyamulenzile acite vino wacisile. Ya Toñi yamusimikile, nupya watandike ukusambilila Baibo. Vyonsi vii vyacitike pa mulandu wakuti ya Toñi yaali afuuke nupya yali nu mutende.
Kufuuka kungalenga tuye ni nsansa. “[Ansansa] antu afuuke. Pano yalapyana insi.”—Mate. 5:5.
U mulandu ci uno afuuke yakayela ni nsansa? Ukufuuka kwaleenga aingi aali akalale sana ukutandika ukuya ni nsansa ndakai. Ivintu vyazipa lyene umu umi wa yantu yaayo, nupya yamanya ukuti uku nkoleelo ivintu vilazipa cuze. (Kolo. 3:12) Ya Adolfo, aakaomba umulimo wa kutandalila ivilongano uku Spain, yakaiusya vino ivintu vyali lino yatali yasambilile icumi.
Ya Adolfo yalanzile ukuti: “Umi wane utaakweti upiliulo. Nasokanga zuwa sana, cii calenzile ukuti anji yamwi yantiina pa mulandu ni cilumba cino nakweti, alino ni vicitwa vya unkalwe. Lyene kwacitiike vimwi ivyalenzile nsenuke. Wanda umwi lino twalwanga na yamwi, yancisile ivilonda 6 nupya uwazi wazwile sana icakuti kwasile sile panono ukuti imfwe.”
Lyene ndakai, umu mivwangile na muli vino yakacita, ya Adolfo yakasambilizya yauze ukuya afuuke. Aingi yatemwa sana ya Adolfo pa mulandu ni miyele isuma ino yaya nayo lyene. Nupya ya Adolfo nayo yakati yaya sana ni nsansa pali vino yasenuka. Nupya yakataizya sana Yeova pa kuyazwilizya ukuya afuuke.
Ndi cakuti twaya afuuke tukazanzya Yeova. “Mwanane, uye na mano, pakuti uzanzye umwenzo wane, pakuti ningakwata insambu zya kwasuka wensi wino anganzewanya.”—Mapi. 27:11.
Satana, umulwani mukalamba, aliwe akaazewanya Yeova. Fwandi Leza wakwata insambu zya kusoka pa mulandu nu muzewanya uwo, lelo Baibo ikalondolola Yeova ukuti “asisoka zuwa.” (Kufu. 34:6) Ndi cakuti tukukolanya Leza nu kukana soka zuwa nu kuya afuuke, tukaya sana na mano nupya tukazanzya sana Yeova.—Efes. 5:1.
Ndakai insi yaipa cuze. Limwi tungazana antu “aakaituumika, aacilumba, aasilonda ivya uleza, . . . aakwakwa, aakakate.” (2 Tim. 3:2, 3) Nomba ci citalinzile ukulenga Umwina Klistu ukufilwa ukuya umufuuke. Izwi Lyakwe Leza likatunena ukuti “mano yano yakafuma kwiyulu . . . acuvwano, yakatulenga kuntakwata vikanza.” (Yako. 3:17) Ndi cakuti tukuuvwana na yauze nupya tusi ni vikanza, tukalanga ukuti itukwata amano aakafuma ukwi yulu. Amano ya musango uwo yakatuleenga ukuya afuuke na lino yamwi yatusosya nupya yakatulenga ukuya sana ya cuza yakwe Yeova uwakwatisya amano.