LYASI LYAKUTANDIKILAKO | VINO MUNGACITA PAKUTI MWAUVWIKISYA VINO MUKUWELENGA MULI BAIBO
U Mulandu ci Uno Mulinzile Ukuwelengela Baibo?
“Nelenganyanga ukuti Baibo yatala sana ukuvwa.”—Ya Jovy
“Nuvwanga kwati ikauvwisya ukasu ndi ukuwelenga.”—Ya Queennie
“Ndi nalola vino Baibo yakula, navilwanga ukutandika ukuwelenga.”—Ya Ezekiel
Uzye mwatala mwelenganyapo ukutandika ukuwelenga Baibo nomba muvilwa pa mulandu wakuti muvwanga wa yantu yano twalanda papela? Antu aingi yakauvwa ukasu ukuwelenga Baibo. Nomba cingaya uli ndi cakuti mwasambilile ukuti Baibo ingamwavwa ukuya ni nsansa alino nu kuya nu umi usuma? Nupya mungacita uli ndi cakuti mwazanyile ukuti kwaya inzila zimwi zisuma zino mungaomvya pakuti mwaipakizya ukuwelenga Baibo? Uzye mungatemwa ukuwelenga Baibo nu kuvwa vino ikalanda?
Uvwiniko vino yamwi yalanda azana ukuti Baibo yayazwa ukufuma pano yatandikiile ukuiwelenga.
Ezekiel, aali ni myaka pakasi kakwe 20 na 25, watiile: “Mpiti nali kwati umuntu akupisya motoka aatamanyile kuno akuya. Lelo ukuwelenga Baibo kwangavwa ukuya nu umi wa mpomvu. Muli Baibo mwaya ukusunda ukusuma kuno ningaomvya cila wanda.”
Frida, nawe kwene ali ni myaka pakasi kakwe 20 na 25, walanzile ukuti: “Natemilwe sana ukupazyanya na yauze. Nomba ukuwelenga Baibo kwangavwa ukumanya vino ningacita pakuti tutaapazyanya na anji. Ukucita vii kwangavwa ukuti twauvwana sana na yauze, nupya ndakai nakwata sana ivyuza.”
Ya Eunice aali ni myaka pakasi kakwe 50 na 55 yalanzile pali Baibo ukuti: “Ikangavwa ukuya umuntu umusuma, ukusenula imiyele yane iipe.”
Wakwe yano itulandapo alino na vino yauze aingi yasambilila, ukuwelenga Baibo kungamwavwa ukuipakizya umi. (Ezaya 48:17, 18) Nupya ingamwavwa na (1) ukupingulapo ningo ivya kucita, (2) ivya kucita pakuti mupange ya cuza asuma, (3) ivya kucita ndi mukusakamala sana, alino ni cicindamisye (4) u kusambilila icumi pali Leza. Kusunda ukwaya muli Baibo kukafuma kuli Leza, fwandi mutanga mwacita iviipe ndi mukulondela vino ikasunda. Leza asisunda antu ukucita iviipe.
Icintu icicindamisye cino mulinzile ukucita u kutandika ukuwelenga Baibo. I vyani vingamwavwa ukutandika ukuwelenga Baibo nu kuipakizya lino mukuwelenga?