LYASI LYA KUTANDIKILAKO | UZYE BAIBO YALANDA ULI PA ANGELI?
Vino Angeli Yaaya
Uzye mungatemwa ukumanya icumi pa angeli—vino yaya, vino cali pakuti yayeko, na vino yakaomba? Kusi kuze kuno mungazana masuko ku mauzyo yaa kuluta pa masuko aaya Umwi Zwi lyakwe Leza Baibo. (2 Timoti 3:16) Uzye Baibo ikatuuli?
Viivi kwene vino Leza umupasi, angeli nayo kwene i mipasi isyaloleka nupya yatakwata “munyefu na mafupa.” Angeli ya cumi yakaikala ukwi yulu nupya yakauvwila utunguluzi wakwe Leza.—Luka 24:39; Mateo 18:10; Yoane 4:24.
Insita zimwi angeli yalolekelanga uku yantu mu mili ya munyefu pa kuomba imilimo ino Leza wayatumanga ukuomba pa mpanga ya pansi nupya yaswililanga umu mili yao nga yamala kuomba imilimo.—Yakapingula 6:11-23; 13:15-20.
Nanti icakuti angeli yalondololwa muli Baibo ukuti aonsi nupya yalolekelanga umu musango wa onsi, kuli aliyo kutaya upusano wakuti wi umonsi nanti a mama. Yene yasitwala nanti ukuvyala ana. Nupya, yatatala yayapo antunze pano nsi—wakwe ukuya ana, ance, nanti sile aikolo. Yeova u wayaumvile; acino na Baibo ikayamila ukuti “ana yakwe Leza.”—Yobo 1:6; Masamu 148:2, 5.
Baibo ikalanda ukuti kwaya “indimi zya antu nga ni zya angeli,” ukulangilila ukuti ni viumbwa vya mupasi kwene vyakwata ululimi na mazwi yano vikaomvya. Nanti icakuti Yeova waomvyanga angeli pa kulanzyanya na antu, atatuzumilizya kulapepa angeli.—1 Kolinto 13:1; Umbwilo 22:8, 9.
Kwaya angeli mazimbi ni mintapendwa, icakuti yangafika nu ku mabilyoni.—Danieli 7:10; Umbwilo 5:11.
Angeli “yakwata sana maka”—kuluta antunze—nupya yacenjela wakwe cimwi. Yakapitisya sana ukuluta na vino swe yantu tungelenganya.—Masamu 103:20; Danieli 9:20-23.
Nanti icakuti yamanya sana ivingi pali Leza, angeli yakwata umwakupelela, nupya kwaya ni vintu vimwi vino yatamanya.—Mateo 24:36; 1 Petulo 1:12.
Angeli yaumvilwe ukuya ni miyele isuma, alino na maka ya kuisoolwela cino yakulonda ukucita. Wakwe, vino swe yantunze twaya, nayo kwene yakaisolwela icisuma ni cipe. Caulanda icakuti, angeli yamwi yasoolwilepo ukupondokela Yeova.—Yuda 6.