Watchtower LAIBULALE UWA PA INTANETI
Watchtower
LAIBULALE UWA PA INTANETI
Cimambwe-Lungu
  • BAIBO
  • MPAPULO
  • KULONGANA
  • wp18 na. 1 mafwa 12-13
  • 3 Ivingamwazwa Ukuzizimizya Intazi

Kutaaya vidyo pali vino mwasoolola

Awe icumi catala, vidyo wakaana ukuloleka

  • 3 Ivingamwazwa Ukuzizimizya Intazi
  • Lupungu Lwa Mulinzi Ulukamanyisya Antu pa Wene Wakwe Yeova (Lwa Yantu Yonsi)—2018
  • Utumitwe
  • Ivyeo Ivikolineko
  • KULWALILILA
  • UKUFWILWA
  • Uzye Mapepo Yangamwazwa Uli?
    Lupungu Lwa Mulinzi Ulukamanyisya Antu pa Wene Wakwe Yeova (Lwa Yantu Yonsi)—2021
  • Ipepo Vino Lingamwavwa
    Lupungu Lwa Mulinzi Ulukamanyisya Antu pa Wene Wakwe Yeova—2015
Lupungu Lwa Mulinzi Ulukamanyisya Antu pa Wene Wakwe Yeova (Lwa Yantu Yonsi)—2018
wp18 na. 1 mafwa 12-13
Umwanaci akuloosya ku malindi; umwanaci mulemale akukutika kwi landwe lya mu Baibo

3 Ivingamwazwa Ukuzizimizya Intazi

Kwaya intazi zino tutanga tusenkeko ndakai nanti ukuzimala. Wakwe ndi mwafwilwa umuntu wino mwatemwa nanti ndi mukalwalilila, pasi cino mungacita suka sile ukuzana inzila izingamwazwa ukuzizimizya ivintu vya musango uwo. Uzye Baibo ingamwazwa umu vintu ivitale wakwe vii?

KULWALILILA

Rose walanzile ukuti: “Nakwata ulwale uno navyalwa nao, nkawaika sana. Umi wane wasenuka sana.” Icintu conga icamusakamikanga sana icakuti insita zimwi wafilwanga ukwika mano kuli vino wasambililanga muli Baibo nu ku vintu vyuze vyakwe Leza. Nomba amazwi yano Yesu walanzile aya pali Mateo 19:26 yamwazwilizye sana. Pakati: “kuli Leza vintu vyonsi vingacitika.” Rose wasambilile ukuti kwaya inzila ukucila pali yonga izya kusambililamo Baibo. Vino vyawayanga umu mwili vyalenganga ukuti afilwa ukuwelenga Baibo pa nsita zimwi, fwandi watandike ukukutika uku mazwi amuli Baibo akopelwa limwi alino na amu mpapulo zyuze izikalanda pali Baibo.a Watile: “Ikukana ukuya inzila zii, nga cantalile ukutwalilila ukuya cuza wakwe Leza”

Ndi Rose uvwa uyi pa mulandu wakukana kwanisya ukuomba vino waombanga mpiti, akateekeziwa na mazwi aaya pali 2 Kolinto 8:12 apakati: “Ndi mukulondesya ukupeela, Leza alapokelela uwila winu pakulola pali vino mukweti, pano asilolekesya pali vino mutakweti.” Amazwi yaa yakaiusyako Rose ukuti Leza akazanga ndi walola vino akaombesya, pano akaezya ukuomba pano amaka yakwe yapezile.

UKUFWILWA

Ya Delphine, atiyalumbulwa mpiti, yalanzile ukuti: “Lino umwanane umukazyana uwa myaka 18 wafwile, nuvwile sana uyi icakuti ntenekelanga ukuti ningatwalilila ukuya nu umi. Ivintu vyasenwike sana.” Amazwi aaya pali Masamu 94:19, yayakomelizye sana. Kalemba wa masamu walanzile ukuti: “Amizu yane nanti yangamvulila uli, wemo ukantekezya nu kunsansamusya.” Yalanzile yati: “Napefile kuli Yeova pakuti angazwe ukuzana ivya kucita ivyali nu kungazwa ukucefyako ukuvwa uyi.”

Yatandike ukuombako umulimo wa kwazwa yauze umukuitemelwa. Umu kuya kwa nsita yatandike ukuikolanya kuli kleyoni wino ance yakaomvya, nanti icakuti wataputuka akaomviwa ukupentelako vimwi. Nanti icakuti ya Delphine yayuvwanga kwati iyaputuka, ilwike ukuti yangazwako antu yauze. Yalanzile ukuti: “Nazanyile ukuti ndi naomvya ivisinte vya muli Baibo na Malembelo pa kukomelezya yano nasambilizyanga Baibo, yali inzila ino Yeova waomvyanga pa kunteekezya.” Yalemvile umutande wa yantu alembwa muli Baibo afwililwe. Yazanyile ukuti antu yaayo yonsi yapepanga sana kuli Leza. Nupya ilwike ukuti yangazizimizya sile ndi cakuti yakuwelenga Baibo.

Ukusambililila Baibo kwazwa ya Delphine ukusambililako na vyuze, kuli kuti ukwika mano uku vintu vya ku nkoleelo asi pali vino vyacitika mpiti. Upaalilo uwalumbulwa pali Milimo 24:15 ukayateekezya sana. Pakati: “Antu onsi, asuma na aipe, yalazyukuka kufuma ku afwe.” Uzye yasininkizya uli ukuti umwana wao umukazyana alatuutuluka? Lekini ya Delphine yasuke. Yati: “Nasininkizya ukuti ndalola umwanane umukazyana uku nkoleelo. Yeova watantika mpiti ‘uwanda’ uno tulalolana, kwati waulemba pali kalenda. Nkaelenganya kwati tuli capamwi nawe apa ng’anda itu panzi, wakwe vino namuweni nu kumutemwa pa wanda uno wavilwe.”

a Impapulo izingi izyayako zino yakopela limwi zikazanwa pali webusaiti pa jw.org.

Baibo ingamwazwa nu kumukomelezya na pa nsita ino ivintu ivitala sana

Uzye Leza Akatwazwa Uli?

Muli Baibo mwaya icasuko. Baibo ikati: “Wene waya umupipi na yonsi akakuuta kunoli, yonsi akakuuta kunoli umusi mwisyente. Wene akapeela ivikalonda akamoopa, akauvwa ukukuuta kwao nu kuyatuula.” (Masamu 145:18, 19) Uzye asi cintu cisuma cii? Nomba uzye Leza akaasuka uli amapepo yano antu afumacumi yakapepa ukuti ayazwe?

AKATUPEELA AMAKA:

Ilingi intazi zingatutoovola nu kutumala maka, umu mwili, umu melenganyo, nu kutulenga ukuta ukuombela ningo Leza. (Mapinda 24:10) Nomba Yeova “akakomelezya yano yacepelwa amaka, na yano yatonta kwene.” (Ezaya 40:29) Umutumwa Paulo, uwazizimizye intazi izipisye, walanzile ukuti: “Klistu wampeela maka akulungatana ni miyele ili yonsi.” (Filipi 4:13) Umupasi wa muzilo wapeelanga Paulo maka. Mungalenga Leza ukumupeela umupasi wamuzilo.—Luka 11:13.

AKATUPEELA MANO:

Uzye mungacita uli ndi cakuti mukulondekwa uwazwilizyo pakuti muvwikisye vino Baibo ikatusunda nu kuviomvya? Umutumwa Yakobo walanzile ukuti: “Lelo ndi umwi uwa munomuli ulilwa mano, wene alinzile kulenga Leza, nga nawe alamupeela, pano Leza akapeela kuli yonsi kwaula kasoozi.” (Yakobo 1:5) Mungaomba ukulingana na mapepo inu ukupitila umu kuwelenga Baibo nu kuomvya vino ikasambilizya. (Yakobo 1:23-25) Ndi mukucita vivyo, mulamanya vino ukusunda ukwayamo kwazipa.

AKATUPEELA UMUTENDE:

Nanti lino mukusakamikwa sana, Yeova angamwazwa ukuya ateekele. Izwi Lyakwe likati: “Mutasakamikwa pa cintu cili consi, lelo pepini pamulandu wa vintu vyonsi, mule mukulenga Leza nu kutaizya mu myenzo. Lyene pa mulandu wakuti mwemwe yakwe Klistu, Leza alamupeela mutende uno kusi umuntu nanti wenga angaumanyikisya. Mutende kwene uu, ulatungulula umi winu ni myelenganyizizye inu.” (Filipi 4:6, 7) Uzye citanga cizipe ukupepa kuli Yeova ukuti amupeele umutende?

Nga ndi cakuti intazi zinu zikutwalilila sile? Kusi kwezya ukusondwelela ukuti Leza watamutazyela. Nanti icakuti intazi zino mukweti zingatwalilila, Yeova angamukomelezya nu kumupeela maka ya kuzizimizya. (1 Kolinto 10:13) Nupya Baibo yatulaya ukuti, insita ikwiza lino intazi zyonsi zilafumiziwapo amanda pe!

    Impapulo Zya Cimambwe-Lungu (2009-2025)
    Fumini
    Ingilini
    • Cimambwe-Lungu
    • Tumiliniko Yamwi
    • Vino mukulonda ukucita
    • Copyright © 2025 Watch Tower Bible and Tract Society of Pennsylvania
    • Masunde pa Miomvezye
    • Kusunga Inkaama
    • Privacy Settings
    • JW.ORG
    • Ingilini
    Tumiliniko Yamwi