Mungaya Ni Nsansa Na Pali Ndakai Kwene
UWANDA umwi kutalaya nanti umwi uwa kulwala, kukota, nanti kufwa. Namwe mungaya nu umi wa musango uwo! Nomba ndakai swensi kwene tukakwata intazi. I cani icingamwazwa ukuya nu umi usuma ndakai? Muli Baibo mwaya utunguluzi ungamwazwa ukuya ni nsansa alino nu umi usuma pali ndakai. Loliniko intazi zimwi izya mu umi na vino Baibo ingamwazwa ukuzicimvya.
UKULONDA IVINTU IVINGAMUKWANA
Vino Baibo Ikasambilizya: “Mwaikala umi uwa kuntatemwisya impiya, mwalola ukuti vino mukweti vyamukwana.”—Ayebulai 13:5.
Ndakai kwaya ivintu ivingi vino antu yakalanda ukuti avino tulinzile ukukwata. Nomba Baibo ikalanda ukuti mwalola ukuti vino “mukweti vyamukwana.” U munzila ci?
‘Mutatemwa impiya.’ Antu yakacita icili consi, nanti icakuti cingonona ucuza wao na ya lupwa, ivyuza, miyele yao nanti sile ucindami wao pa mulandu sile wa “kutemwa impiya.” (1 Timoti 6:10) Ukucita vivyo kutacindama. Antu aatemwa impiya “yasiikuta impiya zizyo.”—Kasambilizya 5:10.
Antu yacindama ukuluta ivintu. Ivintu vimwi vingatwazwa. Nomba vitange vitutemwe nanti ukututaizya, antu sile aliyo yangacita vivyo. Ukukwata “cuza umukundwe” kungatwazwa ukwika mano kuli vino tukweti sile.—Mapinda 17:17.
TUNGAYA NU UMI USUMA NDI CAKUTI TUKULONDELA VINO BAIBO IKATUSAMBILIZYA
KUZIZIMIZYA LINO MUKULWALA
Vino Baibo ikasambilizya: “Umwenzo wa nsansa umulembo usuma sana.” —Mapinda 17:22.
Wakwe vino “umulembo usuma” ukacita, ukuya nu luzango kungatwazwa ukuzizimizya lino tukulwala. Nomba tungacita uli pakuti tuye nu luzango ndi cakuti itulwala?
Mwataizya. Ndi cakuti tukwelenganya sile pa ntazi zitu, “amanda” yonsi yalaya aipe. (Mapinda 15:15) Baibo ikalanda ukuti “mulinzile mwataizya.” (Kolose 3:15) Mulinzile ukusambilila ivya kutaizya pa vintu ivisuma ivikamucitikila umu umi nanti sile ivintu vivyo ivinono. Mungataizya ndi cakuti ilanzi lyatunka, kwaya kamuza kasuma, nanti ndi cakuti wino mwatemwa wamusekela pano vyonsi vii vingalenga muye nu umi usuma.
Mwacitilako yauze ivisuma. Nanti icakuti umi witu usi ningo, “mukupeela mwaya upolelelo ukulu cuze kuluta mukupokelela!” (Milimo 20:35) Ndi cakuti yauze yatutaizya pali vino itucita, tukauvwa ningo sana nupya tukata nu kwelenganya sana pa ntazi zitu. Tungaya nu umi usuma ndi cakuti tukwazwilizyako yauze nu kulenga umi wao ukuzipa.
KUKOMYA ICUPO CINU
Vino Baibo ikasambilizya: “Mwamanya kusolola ivili visuma.”—Filipi 1:10.
Atwalane akazanwa pamwi pa nsita sile inono ucuza wao ukaononeka. Fwandi ya iya na aci yalinzile ukulola icupo ukuti caya pa vintu ivicindame sana umu umi wao.
Mwacitila ivintu pamwi. Ukucila mwacita vino mukulonda mwenga, mwapekanya ukucitila ivintu vimwi pamwi. Baibo ikati: “Ukuya yaili cazipa kuluta ukuya wenga.” (Kasambilizya 4:9) Mungelekela pamwi, ukutukusya umwili pamwi, ukupuzila pamwi.
Mwalanga ukuti mwatemwa ya winu. Baibo ikakomelezya ya iya na aci ukutemwana nu kucindikana. (Efeso 5:28, 33) Kumwentwila ya winu, ukuyalemako, nanti ukuyapeelako kawila kanono sile kungalenga icupo ukukoma. Atwalane yalinzile ukucita ivintu vya mu cupo kuli ya wao sile.—Ayebulai 13:4.