Kuomba Ningo Umu Mulimo—Vyakucita Ndi Umwi Wasuka Ivingalesya Ukulanzyanya

Cino Cacindamila: Mwelenganye ukuti mwemo mumanyile ukuti kuli uzanzo uwasya ucitike likwene. Imumanya nu kuti antu yafwile ukupuuka pakuti yatafwa. Lyene mwaya kuli yano mwapalamana nayo kuti mukayaneneko, lelo yene yakana ukuvwa, yamunena ukuti yati-yapamviwa. I cumicumi mutanga muyasye sile vivyokwene zuwa-zuwa! Antu aingi umu vifulo vino tukasimikilamo yakakana ukuvwa nga tukulonda ukuyasimikila, pano yatamanya ukuti umi wao waya umu uzanzo. Fwandi ilingi ndi twafika pamwao yakaya aapamviwe icakuti tukafilwa nu kuyasimikila. (Mate. 24:37-39) Nanti limwi yakakana pano ala yuvwapo amalyasi yaufi pali sweswe. (Mate. 11:18, 19) Fwandi yangatandika ukwelenganya ukuti limwi naswe kwene twaya wa yantu yonsi aya umu mipepele yaufi aakacita iviipe. (2 Pet. 2:1, 2) Ndi cakuti wino tukasi ukusimikilako, pa kutandika walangizya ukuti asikulonda, tutafwile ukutoovoka zuwa.

Vya Kucita:

• Lino mutatala mwaya uku kusimikila uku ng’anda ni ng’anda, mwatala imwelenganyizizya limwi pali vino antu aaya umu cifulo ca kusimikilamo yangaya yakaasuke pa kukaana, alino na vino mungaya mukacite.

• Ndi cakuti wino mukasi ukusimikila atazumiile vino mwalanda, mufwile ukumuteekelela pakuti mutwalilile ukulanzyanya nawe. Limwi mungezya sile ukumutaizya. Tuti limwi walanda ukuti wakwata kuno akapepa, limwi mungati, “Nali nkwelenganya inti inde nzane umuntu aali wakwe mwemwe uwatemwa vyakwe Leza.” Limwi-limwi ukulanga ukuti imucindika vino umuntu walanda nanti vino mwamuzana akucita, cikaavwa ukuti mutwalilile ukumusimikila. Wakwe vino cingaya ndi umuntu wamunena ukuti watapamviwa, limwi mungati: “Kwene nuvwa. Nomba lino ntatala napita, ningatemwa ukumusiila akantu kaa.” Inzila nayuze ino mungaomvya, u kuuzya icuzyo ndi umuntu walanda wati wakwata kuno akapepa. Limwi mungati, “Nali nkwelenganya inti inde nzane umuntu aali wakwe mwemwe uwatemwa vyakwe Leza. Uzye mwemo mukaelenganyapo uli pali vino Baibo yalaya ukuti Leza alasisyapo uyi onsi kwene pano wapela nu kusenula insi ii pakuti antu aololoke atupu aliyo yace yaikala penepo? Uzye mungatemwa ukwizaikala umu nsi iiyo?

• Mwapingula ningo ivya kucita. Mwaiusya ukuti Yeova asyapatikizya antu ukuvwa. (Malan. 30:19) Muntu wensi alinzile ukuisendela icisendo cakwe umwisikulu. (Gala. 6:5) Ndi cakuti umuntu wiyo wakanilila sile ukuvwa, ilingi cikazipa ukuti itufumapo sile nu kupita. Nga tukulanga ukuti itucindika vino umuntu walanda, limwi cingazwa ukuti kasimikila muze ace aize amusimikile.—1 Pet. 3:15.

Mwezi Uu Muce Mwezye Ukucita Vii:

• Ndi mwaca mwazana umwi aalasuka ivingalesya ukulanzyanya, lino mulafumapo, muce mulanzyanye na wino mulaomba nawe pali vino mwali muli nu kwasuka ningo.