Kuomba Ningo Umu Mulimo—Ukuya Kazwa Musuma Lino Mukusimikila

Cino Cacindamila: Yesu wamanyile ukuti cacindama ukuya nu muzo pa kusimikila. Acino, lino watumile asambi yakwe 70 ukuya uku kusimikila, wayatumile yaili-yaili. (Luka 10:1) Ukuomba nu muzo umu mulimo kuka-avwa ndi kwacitika cimwi icitale, nanti ndi wino mukusimikila uuzya iuzyo ilitale ukwasuka. (Kasa. 4:9, 10) Umuntu wino mukuomba nawe angamunenako vino wene akaomba, nu kumunenako vino mungacita pakuti muye kasimikila musuma. (Mapi. 27:17) Nakupya, angamukomelezyako lino muzusile mukulanzyanya nawe.—Filipi. 4:8.

Vya Kucita:

Mwaikako amano lino umuzo akusimikila. (Yak. 1:19) Lino akuwelenga ilembelo, namwe mufwile ukukonkamo muli Baibo winu. Ndi mukucita vivyo alino cilamwavwa ukumanya pano mungavwila umuzo.
Mwacenjela pakuti mwamanya pano mungavwangila lino umuzo akuvwanga. (Mapi. 25:11) Ndi mwasukilila kasimikila muzo uku kutungulula isambililo lya Baibo, cikazipa ukuti mwalandako mumwi-mumwi. Lelo nga muzusile mukusimikila uku ng’anda ni ng’anda, cikaziipa ukuti mwaleka umuzo nawe alandapo. Ukuya kwene, ndi mukuomba na kasimikila umupya, nanti ndi cakuti umuzo yamuzya iuzyo lino camutalila ukwasuka, angatemwa sana ndi mwamwavwa. Lelo mwaiusya ukuti lyonsi lino muli na umwi umu mulimo wa ku ng’anda ni ng’anda, nanti ku kulola yano wasimikiileko, nanti ku kutungulula isambililo lyakwe, mutamuputukizya lino akulanda, nandi ukumupoka ilyasi pakuti mwemwe mwavwanga, nanti sile ukutandika ukulanda vyuze vino ataali akulandapo.
Mwa-azwa wino mukuomba nawe. Nga kuliko pano mungatemwa ukunenako umuzo ukuti aombelepo pakuti asimikila ningo, mwacita vivyo kwene. (Mapi. 3:27) Mungamunena lino calinga ukuti mucite vivyo. Pa kulanda mungatandika muti: “Uzye vwilini papa itwaomba uli?” nanti “Uzye ningamunenako vimwi pa kusimikila?” nanti “Nemo vino nkacita aevi.” Mwaiusya lyonsi ukuti antu yakataizya nga insita zimwi mukuyaneenako vino yangaombelapo, nomba yasiuvwa ningo nga mukuyanena pali tonsi tuno yakuluvyanya.

Mwezi uu Muce Mwezye Ukucita Vii:

Ndi mwamala ukusimikila na wino mulaomba nawe, muce mumunene pali vino alalanda nanti ukucita ivilalanga ukuti a kazwa musuma.