‘Micitile Inu Pakasi ka Antu Iye Isuma Cuze’

1. U mulandu ci uno icicindamila sana ukuti tukatwalilile ukuya ni micitile isuma pa nsita ya maukongano aali nu kuyako?

¹ Antu aingi yakatulolekesya sana ndi insita ya maukongano yafika cila-mwaka, fwandi cacindama sana ukuti ivicitwa vitu vyacindika Leza wino tukapepa. (Levi. 20:26) Imiyele itu, imizwalile alino nu kuiyemvya vilinzile ukulanga ukuti sweswe yalondezi yakwe Klistu acumi. Uzye tungacita uli pakuti ‘micitile itu pakasi ka antu atataila Leza iye isuma cuze’ nu kupeela ululumbi kuli Tata witu uwa mwiyulu, lino tulakwata maukongano ya citungu nanti ampanga zingi aakwiza?—1 Pet. 2:12.

2. Uzye i syuko ci lino tulakwata ilya kulangizya imiyele ya wina Klistu pa nsita ya ukongano?

² Mwalanga Imiyele ya Wina Klistu: Vino twatemwana na Ina Klistu yanji na vino tukacitila “antu atataila” vyapusana sana ni micitile ya antu amu nsi. (Kolo. 3:10; 4:5; 2 Tim. 3:1-5) Tulinzile ukuya nu luse alino nu kuteekela umwenzo yano tukwikala nayo kuno tukulaala, nanti lino kwaya intazi. Kuya ni miyele isuma kukapiliula nu kuti ndi yamwi yatwazwa vimwi vino tungayapeelelapo kalupiya, tulinzile ukucita vivyo kwene ndi cakuti avino caaya uku ncende iiyo.

3. Uzye i vyani vino avyazi yafwile ukwiusya, nupya u mulandu ci?

³ Avyazi yalinzile ukusakamala ana yao pa cifulo ca ukongano na kuno yakulaala. (Mapi. 29:15) Maneja wa pi otela limwi wanenyile ulupwa lumwi ati: “Twamutemwa sana yantu mwe. Mwaya sana ni miyele isuma alino nu mucinzi umu ndupwa zinu pamwi na ana inu. Aomvi yonsi yamulandangapo, nupya tungatemwa ukuti mwaikala pakwene cila-mulungu.”

4. Uzye imilolekele itu ilinzile ukuya uli lino tuli umu musumba uno tulakwatilako ukongano?

⁴ Ivizwalo Ivilingine Ukuzwala: Pa nsita ya ukongano, imizwalile itu ifwile ukuya isuma nupya iliinge, itafwile ukukolana ni mizwalile ino antu aingi aatataila Leza muno nsi yaatemwa. (1 Tim. 2:9) Pa nsita ino tukuya umwiotela na lino tukufumamo alino na pa nsita zyuze izya kwizya sile, wakwe lino tutatala twatandika ukulongana na lino twinuka, imizwalile itu ilinzile ukuya isuma, kusi kuilekelezya. Ndi tukuzwala ningo, citalaatutalila ukuzwala mabaji ya ukongano nupya tutalauvwa insonyi ukusimikila antu pano calinga. Ndi cakuti tulaalanga imiyele isuma nu kuloleka ningo lino tulaya pa maukongano akwiza, antu aingi aufumacumi yalatandika ukulondesya ukusambilila Baibo nupya tulazanzya sana Yeova.—Zefa. 3:17.

Vyakwiusya pa Ukongano mu 2014

◼ Utantiko wa Nsita: Ku vikulwa vya ukongano, yalaayula ivisaasa apa 7 koloko. Injimbo zya kutandikilako pulogalamu zilaatandika pa 8:20 pa manda yonsi yatatu. Injimbo zizyo ndi zyatandika, fwensi kwene tulaalondekwa ukwikala pakuti ukulongana kukaatandika umu mucinzi. Ulwimbo lwa kuyalila ni pepo vilatandika pa 15:55 pa wanda wa kutandikilako na wakwe ciili, na 15:10 pa wanda wakwe citatu.

◼ Maukongano ya Mpanga Zingi: Ku ncende zimwi kulaya maukongano ya mpanga zingi. Mukwai mufwile ukumanya nu kwiusya lyonsi ukuti iofesi lyanena sile ivilongano vimwi-vimwi na ina itu akutali ukuti aliyo yakayeko pano ku maukongano yaayo ndi kwaya antu aingi, ivilimba, nu kwakwimika ya motoka, alino nu kwakulaala vingaya vikacepe. Ya kasimikila ndi yaaya uku kulongana uku ukongano wa mpanga zingi kuno yataayamile, cingalenga ukuti antu yakavulisye ukucila umu cipimo. Ndi cakuti kulalondekwa ukuti mukalongane ukongano uze usi wa kumwinu, mutaca musoolole ukuya uku ukongano wa mpanga zingi. Mukwai muce mwacita vino ya kaazwa yakumunena ukwakupitila pa vifulo vya ukongano.

◼ Kwakwimika Majinga na Yamotoka: Ku vifulo vya ukongano kuno twaikwatila apakwimika majinga na yamotoka, tulapekanya kacende apakuti aliwensi angaya akimikepo injinga nanti motoka. Ilingi akacende kako kakaaya akanono, fwandi yano yalaomvya yamotoka, cingazipa ukuti yace yaaya aingi muli motoka wenga.

◼ Kusunga Paakwikala: Cila-katondo ndi yaayula umwakulonganila, mukwai, twapaapata, kusi kusimwilila utucende twa kwikalapo ngati mukulonda mwacimvyanya na auzo. Umwenzo wa kuipeelesya ukuleka ukuti anji ali yano cizipile ukuluta sweineco, i cikalanga ukuti sweswe Ina Klistu ya cumi, nupya antu aakutulola yakalumbanya Leza. (Yoa. 13:34, 35; 1 Kol. 13:4, 5; 1 Pet. 2:12) Yano mungasungilako sile apaakwikala, ayaaya yano mukaikala nayo apa ng’anda nanti yano mwiza nayo, nanti yaayo yano mukasambilila nayo Baibo. Akoloci na alwalilila nanti alemale aakalondeka ukuyasakamala, yene yakayasungila incende pano yafwile ukwikala. Incende iiyo itaakula sana, fwandi umuntu wenga sile nanti yaili akusakamala antu yaayo aliyo yafwile ukuyaikala nayo apa ncende kwene iiyo.

◼ Vyakulya Umusanya: Mukwai muce mwize ni vyakulya pa cifulo ca kulonganilapo ukucila mukafumapo imuya uku kulonda ivyakulya kuze pa nsita ya kupuuza. Ku maukongano aalayela umu viwansa vino yaakuulilila umwakwikala, mungasenda akacola nanti akalikonsi akakusendelamo ivyakulya akanono kano mungika nu mwisika lya cilimba cino mwikalapo. Ivyakusendelamo ivyakulya, ivikalamba ngati mukuya uku kucina, nanti iviya vya magalasi mutafwile ukuvileta ku vifulo vya musango uwo.

◼ Misangulo: Pa kulangizya vino tukataizya pa kukwata maukongano, tungasangwilako impiya ku kutungilila umulimo wa mu nsi yonsi lino tuli pa ukongano kwene. Nga mukulonda ukusangwilako ukuomvya ceeke, mufwile ukulembapo “Watch Tower Society” ukuti ali kuno impiya zifwile ukuya.

◼ Milembo: Ndi cakuti mukalwalilila, alino kwaya imilembo ino ya dokota yamunena ukuomvya, muce musende, pano apa ukongano patalaya ukupeela imilembo. Insindano ni vituwo vya nsindano vino limwi mukaomvya ku mulandu nu kulwalilila, vifwile ukusumbwa ningo pakuti vitaleesile uzanzo, kusi kuvisumbila umu viya vya vikoona ivili pa cifulo ca ukongano nanti uku otela ndi akuno mulaya. Nga mukulonda ukusumba ivintu vivyo mufwile ukuvilonga ningo nu kuyavisumbila uku ng’anda.

◼ Kucingilila Uzanzo: Mukwai muce mwaiusya lyonsi ukucingilila mazanzo nu kucisika ivingizako ndi umuntu wasyetuka nanti kupumika. Cila-mwaka kukaaya mazanzo aakaiza pa mulandu ni nsapato zino umwi azwite, sana-sana insapato izitali. Cikazipa ukuti imusoolola insapato izilinge, izyati zimwikala ningo pakuti imwatampula ningo pa kupita apasi ningo, pa mastepu, alino navyuze.

◼ Twakukunkulusizyapo Ana ni Mipando ya pa Lunkoto: Vintu vii yavizumilizya sile ukuvika umu ncende zino yatantikila limwi pa vifulo vya ukongano ivyayela uku mizi nanti pa vikuulwa vya ukongano. Ndi cakuti ukongano wacitilwa umu ciwansa cino yaakuulilila umwakwikala, utwakukunkulusizyapo ana ni mipando ya pa lunkoto mutafwile ukwiza navyo. Lelo, utulimba twa yana utunono tuno mungika apiipi na pano muli, mungiza nato. Mukwai muce muzye ya eluda pakuti yakamunene vino mungacita.

◼ Mafuta Acinunu Sana: Tungalanga ukuti twatemwa anji nga tukucefyanya ya pefyumu na mafuta ya cinunu cikali, angalenga yauze ukutandika ukukoola nu kutisya nanti sile ukuta ukufuuta ningo.—1 Kol. 10:24.

◼ Foomu Wakuti Mukwai Mulondini Wii (S-43): Muce mwaomvya foomu wakuti Mukwai Mulondini Wii ndi mwazana wino akulonda ukusambilila wino mwalanzyanya nawe ivya muli Baibo lino muli pa ukongano. Ndi mwalembamo muli foomu wiyo, mufwile ukutwala ukwi Ofesi lya Mabuku nanti ndi mwaca mwaswilila uku cilongano, mungaya mukapeele kalemba.

◼ Mulimo wa Kuitemelwa: Yonsi aakulonda ukuombako imilimo pa ukongano, yafwile ukuya ukwi Ofesi lya Mulimo wa Kuitemelwa. Ana aatatala yafisya imyaka 16 nayo kwene yangaombako ndi cakuti kuli umuvyazi nanti wensi aakasunga umwana wiyo, nanti sile umuntu muze umukalamba wino aakasunga umwana wiyo yatiyazumilizya.