Kuomba Ningo Umu Mulimo—Kupekanya Ningo Amazwi ya Kutandikilapo

Cino Cacindamila: Ndi cakuti amazwi ya kutandikilapo yasikufika umuntu apa mwenzo, cingalenga ukuti akaane ukumusimikila. Acino, ya kasimikila aingi yakalola ukuti amazwi ya kutandikilapo aliyo yacindama sana pakuti tusimikile ningo umuntu. Nanti cakuti kwaya mazwi akutulangilila ivya kucita pa kutandika ukulanda nu muntu yano yakalemba umu Mulimo Witu Uwa Wene, alino na yano yalemba umwibuku lyakuti Ukupelulula, asi kuti mu mazwi yaayo mukaaya ivyeo vyonsi vino tufwile ukulanda, lelo tungaomvyako na mazwi yauze. Nanti cakuti amazwi yakutulangilila ivya kulanda yangaloleka ukuti yakweti vyeo vyonsi, ya kasimikila yangasisyamo amazwi yamwi nu kwikamo yauze, nanti yangapekanya amazwi yauze. Fwandi, tulaaomba ningo sana umu mulimo ndi tukupekanya amazwi ya kuyatandikilapo ukulanda, kucila kuyalanda sile iviiza umu mutwe lino umuntu wayula icisaasa.—Mapi. 15:28.

Vya Kucita:

Mwasoolola ilyasi lya kuyalanda. Ilyasi lilyo lifwile ukuuvwana nu lupapulo luno mukasi ukupeela umuntu, nupya lifwile ukuya i lyasi lino antu amu cifulo cico yangatemwa ukulanzyanyapo.
Mwapekanya ningo sana amazwi yano mumaya mukalande ndi mwamala ukulamukana nayo. Limwi mungaya mukatandike muti: “Kwene namutandalila kuti . . . ,” “Antu aingi iyasakamala pali . . . ,” “Uzye mwemo mungatuuli pa . . . ,” nanti mungaomvya amazwi yauze. Kuomvya amazwi anono sile angupale ukuvwa, kukaavwa sana. Ya kasimikila yamwi yakasungila mazwi ya kuyatandikilapo ukulanda.
Mwaezya ukupekanya iuzyo limwi ilingalenga wino mukusimikilako ukulondesya ukulanzyanya namwe. (Mate. 17:25) Mwaiusya ukuti lino mwazana umuntu, ala pali vino wali akwelenganyapo, fwandi iuzyo lino muuzya, litafwile ukuya ilikome sana nanti ilingamuvwisya insonyi.

Mwezi Uu Muce Mwezye Ukucita Vii:

Mungasyako akasita lino muli pa kupepa kwa lupwa, pakuti mwapekanya nu kupituluka umu mazwi ya kutandikilapo ukulanda.
Lino muli umu mulimo wa kusimikila, mwanenako wino mukuomba nawe pali vino mupekinye amazwi ya kutandikilako ukulanda. (Mapi. 27:17) Ndi cakuti amazwi yano mwapekanya yatange yaombe ningo, mwapekanya yauze.