Itumanyisya Antu pa Wene pa Myaka 100!
1. Uzye antu yakwe Yeova yayanenyile kucita cani mupipi ni myaka 100 iyatipitapo?
1 “Lolini, Umwene akuteeka! Mwemwe yaomvi yakwe aakumanyisya antu pa wene. Acino fwandi manyisyini antu, manyisyini antu, manyisyini antu pa Mwene nu wene wakwe.” Mazwi yaa yano Umwina Rutherford walanzile yakomelizye antu yakwe Yeova kukosoola sana ilandwe lya Wene insi yonsi. Nupya vikwene avino twaacita! Wakwe vino Aina Klistu akutandikilapo yaomvile, naswe kwene twasimikila ilandwe lisuma ilya Wene ku “antu yonsi pano nsi.” (Kol. 1:23) Mu myaka 100 iyatipitapo, uzye twamanyisya uli antu pa Wene Wakwe Leza? Uzye tungacita uli pakuti tutwalilile ukumanyisya antu pa Wene uu lino tukupalamila ukukumanya imyaka 100 kufuma pano watandikila ukuteeka?
2. Uzye mpapulo zitu zikalenga uli Uwene Wakwe Leza kumanyikwa?
2 Ivyacitika ku Cisila: Mu myaka iingi iyapitapo mpapulo zitu zikaazwilizya antu ukumanya Uwene Wakwe Leza. Ukutandika mu 1939, pali mangazini witu wino tukaomvya sana, pakaaya umutwe wakuti: Lupungu lwa Mulinzi Ulukamanyisya Antu pa Wene Wakwe Yeova. Mangazini wii akalanda sana pa Wene navino ulacita. Mangazini wakwe Loleni! nawe akalangilila ukuti Uwene Wakwe Leza sile uungazwa antunze. Ala fwandi caziipa wakwe cimwi vino ya mangazini yaa yoili yakasenulwa nu kusalangana insi yonsi ukuluta ya mangazini yonsi ayako ndakai!—Umbw. 14:6.
3. I nzila ci zimwi zino twaomvya pakuti Uwene umanyikwe?
3 Antu yakwe Yeova yaaomvya inzila izipusane-pusane izya kumanyisizyamo antu pa Wene. Mpiti twaomvyanga yamotoka akweti iviombelo vya mazwi, ya ledyo, alino ni vilimba vya kulizizyako amazwi aakopelwa limwi. Inzila zii zyatwavwile ukusalanganya ilandwe lisuma ku yantu aingi pa nsita ino kutaali ya kakosoola aingi. (Masa. 19:4) Mu myaka iya ndakai, twasalanganya ivyeo pali Webusaiti witu wa jw.org, na cii calenga antu aingi yuvwe ilandwe lya Wene, kumwi na yikala umu ncende muno tutakwata sana untungwa wa kusimikila.
4. Uzye i nzila ci ziiyeele zino tukaomvya pa kusimikila?
4 Antu yakwe Yeova nupya yakaomvya inzila iziiyeele izya kukosoolelamo ilandwe lya Wene. Mu 1995, kulunda pa kusimikila uku ng’anda ni ng’anda, twatandike ukusimikila mu vifulo muno antu yakaizizya, na muno yakaimika ya motoka, nu mu vifulo vya uculuzi. Ndakai, twatandika ukuomvya inzila iiyeele pa kusimikila umu misumba iikalamba mu nsi yonsi. Alino nupya, ivilongano ivingi vyateyanya ukusimikila ku ncende zyao ukukaapita sana antu; yakaika impapulo pa matebo na pa masitandi pakuti yaasimikila antu aakupita. Lelo, umulimo wa ku ng’anda ni ng’anda aali nzila ikalamba iya kusimikilililamo ino tukaomvya.—Mili. 20:20.
5. A masyuko ci yano sweingi tulakwata mu mwaka upya uwa mulimo?
5 Vino Tuli nu Kucita: Mu Sepetemba lino tulatandika umwaka upya uwa mulimo, aingi yalatandika upainiya wa nsita yonsi. Uzye namwe mutanga muce mutandike? Ndi cakuti mutalatandika, uzye mutanga muce mwalembesyako uwa nsita inono? Ndi cakuti mulakwanisya nanti foo, cikulu sile nga mwaombesya ukumanyisya antu pa Wene, Yeova alamupolelela.—Malaki 3:10.
6. U mulandu ci uno umwezi wakwe Okotoba 2014 ulaya uiyeele?
6 Mu Okotoba 2014, ale Uwene wakumanya imyaka 100 kufuma pano watandikila ukuteka. Ali cino ivyeo ivili mu Lupungu lwakwe Okotoba ulwa kusiila antu iivilinga sana pano vilalanda pa Wene Wakwe Leza. Fwandi cingaziipa kuti muce muombesye pakuti mukasiile antu aingi mangazini wii. Lino tukuloleela ivili inkoleelo, lekini swensi tutwalilile ‘ukukosoola pi landwe lisuma ilya Wene wakwe Leza’ kuli yonsi aakulonda ukuvwa.—Mili. 8:12.