Mwasambilila Kuli ya Kasimikila Aakaomba Ningo

Umu cilongano, tukatemwa ukukwata ya kasimikila akaomba ningo. Yamwi yaombela Yeova na ucisinka pa myaka iingi. Yamwi nayo patalengile sana pano yasambilile ivya kuomba ningo umu mulimo. Ya kasimikila yaa yalola vino Yesu walenga umulimo wa kusimikila nu kupanga asambi ukulunduluka mu manda yaa akusyalikizya. (Mate. 28:​19, 20) Lino aina na ya nkazi yaa yakuomba umulimo wa kusimikila yakapeelwa “maka” kufuma kuli Leza pakuti yazizimizya intazi zino yakakwata. (2 Kol. 4:⁠7) Ala tungasambilila ivingi kuli ya kasimikila yaa aakaomba ningo. Aina yaa na ya nkazi yakatemwa sana ukusambizyako yauze pali vino yaamanya. (Masa. 71:18) Fwandi tutafwile ukulema nu kwisote ukusambilila uku ina yaa. Nga lyene tungacita uli pakuti tusambilile?

Lino Tukusimikila. Ya kasimikila yonsi apya alino na yano yatali yamanyikisye ukusimikila yakalondeka ukusambiliziwa, pakuti yaaomba ningo mu mulimo wa kusimikila. Yangasambilila ivingi ngi cakuti yakuombela pamwi na ya kasimikila aakaomba ningo umu mulimo nu kulola vino yakaomba. (Lolini cipande cakuti, “Twalililini Ukulondesya Ukusimikila” mu Lupungu Lwa Mulinzi lwa ciMambwe-Lungu lwakwe Febuluwale 1, 2015, muli palagalafu yakwe citatu pa kamutwe kakuti “Mwa-azwa Aatatala Yaelezya Ukusimikila”) Uzye ukuomba na ya kasimikila aakaomba ningo kwamwazwa uli?

Uzye mungalalikako ya kasimikila akaaomba ningo ukuti yaye namwe umu mulimo? Ndi cakuti kasimikila wiyo walwalilila, mungaya nu musambi uku ng’anda ukwakwe akuno mukatungulwile isambililo. Ndi mwamala, uzyini kasimikila wiyo alande vino isambililo iilili na pano mulinzile ukuombela.

Mwazanwa Nayo: Pakuti mumanye ningo ya kasimikila yaa, mulinzile ukulazanwa nayo ilingi. Mungayama ku ng’anda uwanda uno mukweti kupepa kwa lupwa nu kuyuzya vimwi vimwi pali vino yakaomba. Ndi cakuti kasimikila wiyo walwalilila mungatantika ukuyakwatila ukupepa kwa lupwa uku ng’anda ukwakwe. Mungamuzya vino wasambilile icumi, visuma vino wazanamo, vino walola umulimo wakwe Yeova walunduluka umu ncende kwene iyo, alino ni nsansa zino wazana umu kuombela Yeova.

Tulinzile ukuyamanya ningo nu kumanya vino yangatwazwilizyako. Ya kasimikila yaa nayo kwene yakwata mawila apusane pusane nga vino swensi twaya. (Loma 12:​6-8) Yamwi yangaya akalamba napya cii cingalenga yafilwa ukuya naswe insita itali. Nomba nanti cingaya vivyo, kuli navyuze ivingi vino tungasambililako kuli aliyo pano ala yalola vingi umwi uvi lyakwe Yeova, alino iyalengela nupya yaya acisinka lino yakumuombela.