VINO SWE INA KLISTU TWAAYA

Mwaya ni Nsansa Lino Mukukosoola pi Landwe Lisuma

Uzye insita imwi cikamutalila ukusimikila? Swe ingi tungasuka ukuti ee. U mulandu ci? Limwi lino tukusimikila umu cifulo citu tukakomanya aasilonda kuvwa na atupata nanti limwi tukauvwa intete kusimikila yano tutamanya. Mu cumi vintu vii vingalenga tutaya nu luzango pa kusimikila. Nomba, tukapepa Leza wa luzango akalonda twamuombela ni nsansa. (Masa. 100:2; 1 Tim. 1:11) I milandu ci itatu ingalenga twasimikila ni nsansa?

Cankoleelo, tukasimikila pi landwe lya upaalilo. Nanti cakuti antu aingi yatakwata upalilo ndakai, tungaombesya ukuneena antu pi “landwe lisuma lyakuleta ivintu visuma.” (Eza. 52:7, NWT.) Nomba ni landwe lisuma ilya Wene Wakwe Leza lingalenga tuye nu luzango. Lino mutatala mwaya umukusimikila, mwatala umwelengaya pa visuma vino Uwene Wakwe Leza ulacita uku nkoleelo.

Cakwe ciili, ilandwe lisuma lino tukasimikila lika-azwa antu mu umi wao na muli vyakwe Leza. Nupya likalenga iyataluka uku viipe nu kukwata upaalilo wakwiza ikala amanda pe uku nkoleelo. (Eza. 48:17, 18; Loma 1:16) Lyonsi twaelenganya ukuti twaya umu mulimo wakulonda antu nu kupususya. Nanti cakuti antu yamwi yasilonda ukuyapususya, tukatwalilila ukulonda yaayo angatemwa ukuyapususya.—Mate. 10:11-14.

Cakwe citatu nupya icicindamisye ukuluta, mulimo witu ukacindika Yeova. Yeova wacindika sana umulimo witu uwa kukosoola. (Eza. 43:10; Ayeb. 6:10) Nupya akatupeela nu mupasi wakwe uwa muzilo pakuti tungaomba ningo umu mulimo uu. Fwandi, mwaleenga Yeova ukuti mwaya nu luzango, imiyele ino umupasi ukalenga tukwate. (Gala. 5:22) Ndi Yeova watwazwa, tulacimvya intazi zyonsi nupya tulasimikila nu kusipa. (Mili. 4:31) Fwandi, asi mulandu na vino antu yatucita lino tukusimikila mu cifulo citu, tulaya ni nsansa umu mulimo wa kusimikila.—Ezek. 3:3.

Vino tungaayuvwa mu mulimo wa kusimikila—ulanda ni nsansa — Uzye mungatemwa ukuti mwalola uli umulimo wa kusimikila? Uzye mungalanga uli ukuti mwemwe ansansa?

TAMBINI VIDYO YAKUTI NUPYA KWENE MUNGAYA ANSANSA UMUKUWELENGA BAIBO NU KWELENGANYAPO, ALINO MWASUKE MAUZYO ALONDELELAPO:

U mulandu ci uno tulinzile ukwikila mano uku kuisambizya Baibo, nanti cakuti tukasimikila insita ikulu cila mwezi?
A muli vyani muno tungakolanya Maliya?
Insita ci ino mwasoolola ukuti mwaelenganya sana pi Zwi Lyakwe Leza?
I vyani ivikalenga mwaya ni nsansa lino mukusimikila ilandwe lisuma?