Twatemwa Sana Tata Witu Yeova

1-2. U mulandu ci uno Yeova walekiile ukuti tuye mu lupwa lwakwe, nupya wacisile uli vivyo?

YEOVA watwama ukuti tuye mu lupwa lwakwe, lwakwe ya kapepa. Luu u lwamo lusuma sana! Mu lupwa luu mwaya antu aipeela kuli Leza nupya aaya nu utailo mu mpolelwa ya Mwanakwe. Lupwa lwitu u lwa nsansa. Tukaipakizya umi usuma ndakai nupya twaya ni nsansa pa upalilo uno twakwata uwa kwikala manda pe ukwi yulu nanti mu Paladaise pano nsi.

² Yeova walenzile ukuti tuye mu lupwa lwakwe pa mulandu wakuti watutemwa nupya wapeezile impolelwa ikulu cuze. (Yoa. 3:16) Leza watukazile “pa mutengo ukulu cuze.” (1 Kol. 6:20) Kupitila mu mpolelwa, Yeova walenzile ukuti tupalame kuli aliwe. Twakwata isyuko ilya kwama uwakwatisya amaka kuluta pa uumbo onsi ukuti Tata. Nupya wakwe vino twasambilile mu cipande icafumileko, Yeova a Tata musuma cuze.

3. A mauzyo ci yano tungayuzya sweineco? (Lolini na kambokosi kakuti “Uzye Yeova Wanjikako Mano?”)

³ Naswe kwene tunguzya iuzyo wakwe lino kalemba wakwe Baibo umwi uzizye, watiile: “Ivyani fwandi vino ningalipa kuli [Yeova] apa visuma vyonsi vino wancitila?” (Masa. 116:12) Icasuko i cakuti pasi cino tungalipila kuli Tata witu uwa kwi yulu. Nomba nanti ciye vivyo, twamutemwa. Mutumwa Yoane walemvile ukuti: “Swemo tukatemwa pano Leza uwatandike ukututemwa.” (1 Yoa. 4:19) U mu nzila ci muno tungalangila Tata witu uwa kwi yulu ukuti twamutemwa?

MWATWALILILA UKUPALAMA KULI YEOVA

4. Kulingana na Yakobo 4:8, u mulandu ci uno tulinzile ukwezezya na maka ukuya ya cuza yakwe Yeova?

⁴ Yeova akalonda tuye ya cuza yakwe nu kulalanzyanya nawe. (Welengini Yakobo 4:8.) Akatukomelezya “kupepa insita zyonsi” nupya akauvwa mapepo itu lyonsi. (Loma 12:12) Atapamviwa icakuti angavilwa ukuvwa mapepo itu. Nupya naswe tukauvwa kuli aliwe nga tukuwelenga Baibo ni mpapulo izikatwazwa kuvwikisya vino Baibo ikalanda. Nupya tukauvwa kuli aliwe ndi cakuti tukwikako mano lino tuli pa kulongana. Wakwe vino ana yakapalama sana ku avyazi yao ndi cakuti yakulanzyanya lyonsi, avino naswe tulapalama kuli Yeova ndi cakuti tukulanzyanya nawe insita zyonsi.

5. Tungacita uli pakuti tuzifyeko mapepo itu?

⁵ Elenganyini pali vino mapepo inu yaya kuli Leza. Yeova akalonda twapepa kuli aliwe nu kumunena vyonsi vino tukuyuvwa na vino tukwelenganya. (Masa. 62:8) Tungayuzya sweineco iuzyo lyakuti: ‘Uzye mapepo yane yakaya sile kwati inkopolola ivyeo kumwi nanti yakaya kwati i vyeo vya kuilembela kufuma pansi ya mwenzo? Ukwaula nu kutwisika mwatemwa Yeova, nupya mukalonda ukutwalilila ukuya na ucuza ukome na aliwe. Pakuti mucite vivyo, mulinzile kulalanzyanya nawe insita zyonsi. Mwamulondolwela vino mukuyuvwa. Mwamunena ivikumuzanzya ni vikumusakamika. Mwataila ukuti mungalenga consi cino mukulonda kuli aliwe.

6. I vyani vino tulinzile kucita pakuti tupalame sana kuli Tata witu uwa kwi yulu?

⁶ Pakuti tutwalilile ukuya ya cuza na Tata witu uwa kwi yulu, tulinzile kulamutaizya. Tukazumilizya amazwi yano kalemba wa masamu walemvile akuti: “We [Yeova], Leza wane, ala vino watucitila ivyakuzunguka ivivule, vino wemo watuteyanyizizya pasi pa wingi. Icacumi pasi nanti wenga uwaya wakwe wewe! Ndi cakuti nati nkandande vyonsi pano vyapela, awe cumi ntange nkume mwenemo, pano vyavula wakwe cimwi.” (Masa. 40:5) Tutafwile ukulayuvwa sile ukuti tukataizya, lelo tulinzile ukulanga ukuti tukataizya kuli Yeova muli vino tukalanda nu kucita. Kucita vii kukalenga twapusanako na antu amu nsi ii. Tukaikala mu nsi umwaya antu aasitaizya nanti panono pali vino Yeova wayacitila. Alino, icintu conga icaya pali vino vikalangilila ukuti tuli “mu manda akusyalikizya” i cakuti antu yasitaizya. (2 Tim. 3:1, 2) Tusilonda ukuya wa antu yaa!

7. I vyani vino Yeova akalonda twacita, nupya u mulandu ci?

⁷ Avyazi yasilonda ana yao ukuya nu lwete lelo yakalonda ukuti yaye na ucuza. Vikwene avino na Yeova kwene akalonda ukuti ya kapepa yakwe yauvwana na auze. Pano ukutemwa kuno twakwata, u kukatumanyisya ukuti sweswe Ina Klistu ya cumi. (Yoa. 13:35) Twazumila amazwi yano kalemba wa masamu walemvile ukuti: “Lolini vino cazipa na vino cazanzya antu yakwe Leza, ukwikala pamwi wa cina nyina!” (Masa. 133:1) Nga tukutemwa aina itu na ya nkazi, tukalanga Yeova ukuti twamutemwa. (1 Yoa. 4:20) Cazipa sana ukuya mu lupwa lwa ina na ya nkazi aaya ni cikuuku kuli wenga na wenga nupya aatemwana.

MWAUVWILA LEZA PAKUTI MWALANGA UKUTI MWAMUTEMWA

8. Kulingana na 1 Yoane 5:3, u mulandu ci ucindame sana uwalenga twauvwila Yeova?

⁸ Yeova akalonda ana yauvwila avyazi yao, nupya akalonda naswe kwene twamuvwila. (Efes. 6:1) Walinga kumuvwila pano ali Kaumba, Kapeela wa umi nupya umuvyazi uwakwatisya mano pa avyazi yonsi. Lelo umulandu ucindame sana uwalenga twamuvwila u wakuti twamutemwa. (Welengini 1 Yoane 5:3.) Nanti cakuti kwaya imilandu ingi iyalenga twauvwila Yeova, asitupatikizya kucita vivyo. Yeova watupeela amaka ya kuisoolwela ivyakucita, fwandi akauvwa ningo nga twasoolola kumuvwila pa mulandu wakuti twamutemwa.

9-10. U mulandu ci uno cacindamila ukuvwila masunde yakwe Leza nu kuyalondela?

⁹ Avyazi yakalonda ana yao ukuya acingililwe. Ali mulandu uno yakaikilako masunde angacingilila ana yao. Ana nga yakuvwila masunde yayo, yakalanga ukuti yataila avyazi yao nupya yayacindika. Fwandi icicindamisya kumanya masunde yano Tata witu uwa kwi yulu watupeela nu kuyalondela. Nga tukucita vivyo, tukalanga Yeova ukuti twamutemwa nu kumucindika nupya cilalenga ivintu vyatuzipila. (Eza. 48:17, 18) Nomba, yano yakakana Yeova nu kukanalondela masunde yakwe, ivintu visiyazipila.—Gala. 6:7, 8.

¹⁰ Ndi cakuti tukwikala kulingana nu kulonda kwakwe Yeova, tukacingililwa ku vintu ivingalenga umi witu kukanaya ningo, konona amelenganyo itu na ucuza witu na aliwe. Yeova wamanya ivingatuzipila. Aurora aakaikala uku United States watiile: “Namanya ukuti ukuvwila Yeova kukalenga umi witu ukuya ningo sana lyonsi.” I cisinka, vivyo kwene avino cikaya kuli swensi. I visuma ci vino mwalola ivikamucitikila nga mukuvwila Yeova?

11. Uzye ipepo likatwazwa ukucita cani?

¹¹ Ipepo likatwazwa ukuya ni cuvwila nanti icakuti ukucita vivyo kutanguka. Insita zimwi cikatutalila ukuvwila Yeova pa mulandu wakuti sweswe yayembu nomba tulinzile ukwezya na maka ukumuvwila. Kalemba wa masamu wapapatiile Leza ukuti: “Umpeele umwenzo wa kulondesya kukuvwila.” (Masa. 51:12, NWT.) Denise painiya wa nsita yonsi walanzile ukuti: “Ndi cakuti cantalila ukuvwila isunde lyonga lyakwe Yeova, nkapepa pakuti ampeele amaka ya kucita icisuma.” Tungataila ukuti Yeova lyonsi akaasuka mapepo ya musango uwo.—Luka 11:9-13.

MWAAZWA YAUZE UKUTEMWA TATA WITU

12. Ukulingana ni lembelo lyakwe Efeso 5:1, i vyani vino tulinzile ukucita?

¹² Welengini Efeso 5:1. Pa mulandu wakuti sweswe “ana yakundwe” yakwe Yeova tukaezya na maka ukumukolanya. Tukakolanya imiyele yakwe ili wa kutemwa, icikuuku nu kweleela antu yauze. Ndi cakuti yano yatamanya Leza yalola imiyele itu isuma, yangatandika ukulondesya ukusambilila pali aliwe. (1 Pet. 2:12) Avyazi Aina Klistu yalinzile ukwezya na maka ukusunga ana yao ukulingana na vino Yeova akatusunga. Nga yakukolanya Yeova, ana yao yalalondesya ukuya ya cuza yakwe Tata witu uwaya nu kutemwa.

13. I vyani vino tulinzile ukucita pakuti tuye asipe?

¹³ Ana anono ilingi yakaya sana ni cilumba pali ya isi nupya yakatemwa kulanda sana pali aliyo. Vivyo kwene avino tukayuvwa na pali Tata witu uwa kwi yulu Yeova, nupya tukalonda na yauze yamumanye. Swensi kwene tukayuvwa wakwe vino Umwene Davidi wayuvwanga ukuti: “Umwenzo wane ukazangila muli Yeova.” (Masa. 34:2) Nomba tungacita uli ndi cakuti tukuvwa insonyi zya kulanda pali Yeova? Tungacita uli pakuti tuye asipe? Tukaya asipe nga twelenganya pali vino Yeova angaya ni nsansa ndi cakuti tukulanda pali aliwe ni visuma vino yangazana nga yasambilila pali aliwe. Yeova alatwazwa ukuya asipe. Vivi kwene vino wazwilizye aina umu nsita ya Ina Klistu akutandikilako ukuya asipe, avino naswe kwene alatwazwa.—1 Tesa. 2:2.

14. I milandu ci imwi iikalenga twaomba umulimo wa kupanga asambi?

¹⁴ Yeova ataya na kapatulula, fwandi akatemwa nga walola tukulanga ukutemwa kuli yauze, asi mulandu na kuno yafuma. (Mili. 10:34, 35) Inzila yonga ino tungalangilamo ukutemwa kuli yauze u kuyasimikila ilandwe lisuma. (Mate. 28:19, 20) I visuma ci vino umulimo uu ungacita? Yonsi akuvwa ukwi landwe lisuma yangaya nu umi usuma ndakai nu kuya nu upalilo wa kwikala umi wa manda pe uku nkoleelo.—1 Tim. 4:16.

MWATEMWA TATA WINU PAKUTI MUYE NI NSANSA

15-16. I vintu ci ivikalenga tuye ni nsansa?

¹⁵ Yeova a Tata uwaya nu kutemwa nupya akalonda amu lupwa lwakwe ukuya ni nsansa. (Eza. 65:14) Kwaya ivingi ivyalenga tuye ni nsansa ndakai nanti icakuti tukakwata intazi. Twasininkizya ukuti Tata witu uwa kwi yulu watutemwa sana. Twamanya icumi icaya umwi Izwi Lyakwe Leza Baibo. (Yele. 15:16) Nupya twaya mu lupwa uluiyele umwaya antu atemwa Yeova na masunde yakwe nupya yatemwana cuze.—Masa. 106:4, 5.

¹⁶ Tungatwalilila ukuya ni nsansa pa mulandu wakuti twakwata upalilo wakuti vintu vilazipa ku nkoleelo. Twamanya ukuti likwene sile Yeova wasya afumyepo iviipe vyonsi nupya alaomvya Uwene wakwe ukulenga insi yonsi ukuya Paladaise. Nupya twakwata upalilo usuma uwakuti afwe yonsi yalatuutuluka nupya tulaya pamwi nayo nupya. (Yoa. 5:28, 29) Ala cilazipa wakwe cimwi! Ni cicindamisye cakuti twasininkizya ukuti likwene sile yonsi aya umwi yulu na pano nsi yalapeela Tata witu uwaya nu kutemwa, umucinzi nu kumulumbanya nu kumupepa ukulingana na vino alinzile ukupepwa.