Mauzyo Yano Aakawelenga Yakauzya
Uzye imiyele iyaya api lembelo lyakwe Galatiya 5:22, 23 [NWT] ali miyele sile ino umupasi wa muzilo ukatulenga ukukwata?
Pa vikomo vivyo paya imiyele 9 ino Aina Klistu yalinzile ukukwata, pakati: “Lelo umupasi wa muzilo wene ukatulenga kuuya nu kutemwa, uluzango, mutende, kuteeka mwenzo, icikuuku, usuma, utailo, ufuuke, nu kuikanya.” Nomba tutalinzile ukulola kwati ii ali miyele sile isuma ino umupasi wa muzilo ukatwazwa ukukwata.
Uvwini vino umutumwa Paulo walemvile umu vikomo vyafumako, watiile: “Vintu vino untunze ukacita . . . vikaloleka mu vicitwa vya winyi, vikowele nga ni vya nsonyi, mu kupepa tuluwi nu mu ulozi. Antu yakaya anisi nga nu kulwa. Yene yakazuwilana nu kusokana, nu kupaatukana. Yene yaya nu muvimbila, akolesi nupya yakacita ya muzangalwe nga na vyuze vikoline na vii.” (Gala. 5:19-21) Fwandi Paulo nga walanzile na pa vintu vyuze ukuti navyo vyaya pa “vintu vino untunze ukacita” ivili wakwe vivi ivyaya pali Kolose 3:5. Vivyo kwene avino wacisile na pa cisila cakulanda pa miyele isuma 9, watiile: “Kutaya Masunde akalwisyanya ni micitile ii.” Fwandi Paulo atalanzile pa miyele yonsi isuma ino umupasi wa muzilo ungatwazwa ukukwata.
Tukauvwikisya vii nga twakolanya imiyele ino umupasi wa muzilo ukatulenga ukukwata uku miyele ya luswepo ino Paulo walembiile Aina Efeso, lino watiile: “Pano vizao vya luswepo vili umu usuma onsi, ni vya mpomvu ni cumi.” (Efes. 5:8, 9, The New testament in Mambwe-Lungu) Icacumi, “usuma” pamwi nu ololoke ni cumi vyalumbulwa pa miyele ya luswepo na pa miyele ino umupasi wa muzilo ukatulenga ukukwata.
Vivyo kwene avino na Paulo wakomelizye Timote ukwezya na maka ukucita “ivyaololoke, ukuya uwa muzilo, uwa utailo, kutemwa, kuposya, nga nu kufuuka” kuli kuti ukukwata imiyele ii 6. (1 Tim. 6:11) Pa miyele iyo, itatu sile (utailo, kutemwa, nu ufuuke) i yalumbulwa pa miyele ino umupasi wa muzilo ukatulenga ukukwata. Nomba Timote walondekwanga umupasi ukumwazwa ukukwata imiyele yuze iyalumbulwa ili wa: wololoke, ukuya uwa muzilo nu kuposya.—Loliniko na Kolose 3:12; 2 Petulo 1:5-7.
Fwandi ilembelo lyakwe Galatiya 5:22, 23 litalumbula imiyele yonsi ino Aina Klistu yalinzile ukukwata. Umupasi wa muzilo ungatwazwa ukukwata imiyele ii 9 yonsi. Nomba kwaya ni miyele na yuze iingi ino tukaya tukukwata lino tukukula muli ukapepa nu kuzwala “untu upya, uno waumvilwe mu mwata wakwe Leza. Lyene mulaya aololoke nupya amuzilo.”—Efes. 4:24.