Vino Tungazwa Yano Tukasambilizya Baibo Ukulunduluka Ukufika Uku Lubatizyo​—Ciputulwa 1

1. Uzye ilembelo lyakwe 2 Kolinto 3:1-3 likatwazwa uli ukulataizya apisyuko lino twakwata ilya kusambilizya antu Baibo ukufika nu ku kubatiziwa (Lolini icikope icili pa nkupo.)

UZYE mukauvwa uli ndi cakuti umusambi wa Baibo umu cilongano cinu wabatiziwa? Ukwaula nu kutwisika mukauvwa ningo sana! (Mate. 28:19) Nupya ndi cakuti mwemwe mwatungululanga umuntu wiyo, mukaya sana ni nsansa! (1 Tesa. 2:19, 20) Asambi apya abatiziwa yakalondekwa ukuyataizya ukuya mu cilongano yonsi asi sile kuli yano yakayatungulula.—Welengini 2 Kolinto 3:1-3.

2. (a) Iuzyo ci licindame lino tulinzile ukwelenganyapo, nupya u mulandu ci? (b) Uzye isambililo lya Baibo ali cani? (Lolini futunoti.)

² Cikatuzanzya sana ukulola ukuti apa myaka iyapitapo 4 twatungululanga masambililo ya Baibob ukufika kuli avaleji wakwe 10,000,000 cila mwezi umu nsi yonsi. Nupya umu myaka kwene ii antu ukucila pali avaleji yakwe 280,000 yabatiziwanga cila mwaka ukuya ya Nte Yakwe Yeova nupya asambi yakwe Yesu Klistu. Uzye tungazwa uli asambi ya Baibo yaa aingi ukubatiziwa? Yeova acili wapeela antu isyuko lyakuya Inte zyakwe, ali mulandu uno tukaombesya pakuti tuyazwe ukulunduluka nu kubatiziwa lino kucili insita. Insita ikuya ikusila!—1 Kol. 7:29a; 1 Pet. 4:7.

3. I vyani vino tumasambilila mu cipande cii pa kutungulula masambililo ya Baibo?

³ Pa mulandu wakuti mulimo wa kupanga asambi wacindama sana, Iumba Ilikatungulula lyuzizye maofesi ya misambo pali vino yalinzile ukucita pa kwazwa asambi ukulunduluka ukufika uku lubatizyo. Mu cipande cii nu mu cipande icilondelilepo tumalola vino tungasambilila kuli ya painiya aakaomba ningo, ya misyonali na angalizi ya viputulwa.c (Mapi. 11:14; 15:22) Yalondolwile vino ya kasambilizya na yano yakasambilizya Baibo yangacita pakuti isambililo lyazipa. Mu cipande cii, tumasambilila vino umusambi wenga na wenga alinzile ukucita pakuti alunduluke ukufika uku lubatizyo.

MWASAMBILILA CILA MULUNGU

4. I vyani vino tulinzile ukwiusya pa masambililo yano tukatungulula pa nsita inono?

⁴ Aina na ya nkazi aingi yakatungulula masambililo ya Baibo panzi. Nanti icakuti ali nzila isuma iya kutandikilapo ukulanzyanya ivyaya muli Baibo, ukulanzyanya kuu kukaya sile pa kasita kanono nupya limwi kusitungululwa cila mulungu. Pakuti yalenge umuntu ukulondesya ukusambilila, aina na ya nkazi yakalenga ivyeo vimwi pa muntu wiyo ivili wakwe inamba yakwe foni pakuti yangalanzyanya nawe ivya muli Baibo pa foni nanti pa mameseji. Yangatwalilila ukulanzyanya pa myezi ingi ukwaula ukutandika isambililo lya Baibo. Umusambid atanga alunduluke ukufika ukulubatizyo ndi cakuti asikuomvya insita yakwe na maka ku kusambilila Baibo.

5. I vyani vino Yesu walanzile pali Luka 14:27-33 vino tungaomvya uku kwazwa yano tukasambilizya Baibo?

⁵ Pa nsita imwi, Yesu walondolwile vino umwi alinzile ukucita pakuti aye umulondezi wakwe. Walanzile pa muntu umwi uwalondanga ukukuula ulupungu na pa mwene uwalondanga ukuya uku ulwi. Yesu walanzile ukuti kakuula alinzile ukwikala “pansi nu kupendulula impiya zino angasumbapo” pakuti amalile ukukuula, nupya umwene nawe alinzile ukwikala “pansi nu kulola” ndi ali na maka akuyalwisya mwene muze. (Welengini Luka 14:27-33.) Vikwene avino na Yesu wamanyile ukuti umuntu aakulonda ukuya umusambi wakwe alinzile ukwelenganyapo sana vino cikapiliula ukuya umulondezi. Ali mulandu kwene uno tulinzile ukukomelezezya asambi ya Baibo ukulasambilila cila mulungu. Tungacita uli vivyo?

6. I vyani vino tulinzile ukwezya na maka ukucita pakuti musambi aalunduluka?

⁶ Mwalundako insita ino mukasambilila na asambi inu. Limwi mungalanzyanyako malembelo yaili lyonsi lino mwayatandalila. Ndi cakuti wino mukasambilila nawe Baibo panzi akauvwa ningo ukusambilila apa nsita ikulu, mungamuuzya ndi cakuti kungaya incende kuno mungaalanzyanyizizya. Vino angasuka vingalangilila nga wacindika ukusambilila nanti foo. Ndi cakuti mukulonda umusambi alunduluke zuwa, mungamuzya nga angatemwa ukulasambilila imiku iili mu mulungu. Lelo kuli na vyuze ivikulondekwa ukucila sile ukulasambilila umuku onga nanti iili mu mulungu.

MWAPEKANYIZIZYA LIMWI ISAMBILILO LYONGA NA LYONGA

7. Uzye kasambilizya angapekanyizizya uli limwi isambililo lya Baibo?

⁷ Mwe ya kasambilizya, mulinzile kupekanya ningo isambililo lyonga na lyonga. Mungatandikilapo ukubelenga vino mumaya mukalanzyanye nu kulola malembelo alimo. Mwauvwikisya ivisinka ivikulandwapo. Mwaelenganya pa mutwe wi sambililo, tumitwe utunono, mauzyo ali umwi sambililo, malembelo yano iyati “welengini”, ni vikope nanti mavidyo angamwazwa ukulondolola ningo ivisinka. Lyene elenganyini pa musambi winu na vino mungamulondolwela ivyeo vivyo pakuti avyuvwikisye nu kulacita vivyo kwene.—Neem. 8:8; Mapi. 15:28a.

8. Uzye amazwi yano Paulo walanzile aaya pali Kolose 1:9, 10, yakatusambilizya cani pali vino tulinzile ukulapepela yano tukasambilizya Baibo?

⁸ Lino mukupekanya mwapepela umusambi pali vino akulondekwa. Mwalenga Yeova aamwazwa ukusambilizya ivya muli Baibo mu nzila iingalenga umusambi auvwikisye. (Welengini Kolose 1:9, 10.) Mwaezya ukwelenganyizizya limwi pali vino umusambi angafilwa ukuvwikisya zuwa. Mwaiusya ukuti uyo winu u wakwazwa musambi kulunduluka ukufika ku lubatizyo.

9. Uzye kasambilizya angazwa uli umusambi ukupekanya isambililo? Londololini.

⁹ Twataila ukuti ndi cakuti tukusambilila lyonsi nu musambi cilalenga tumwazwe ukulataizya pali vino Yeova na Yesu yacita nupya alalondesya ukusambilila na vyuze. (Mate. 5:3, 6) Pakuti umusambi aipakizya ukusambilila, alinzile kulaika mano kuli vino akusambilila. Pakuti mumwazwe ukucita vivyo, mulinzile ukulondolola vino cacindama ukupekanya isambililo lyonga na lyonga lino mutatala mwatandika ukusambilila nu kulaelenganya vino isambililo lilyo lingamwazwa. Uzye mungaazwa uli umusambi ukupekanya? Mungapekanyizizya pamwi isambililo nu musambi pakuti mumulange vino alinzile ukucita.e Mungamwazwa ukuzana masuko amu kulungatika, nupya mungamwazwa ukusila amazwi aangamwazwa ukwiusya zuwa icasuko. Lyene mungamunena ukwasukila umu mazwi yakwe. Nga wacita vivyo, cilalenga mumanye ndi cakuti watauvwikisya vino akusambilila. Lelo kuli na cuze kwene cino mulinzile ukukomelezya umusambi ukucita.

MWAMUSAMBILIZYA KULALANDA NA YEOVA CILA WANDA

10. U mulandu ci uno ukubelenga Baibo cila wanda kwacindamila, nupya i vyani vino umusambi alinzile ukucita pakuti vino akubelenga vimwazwe?

¹⁰ Kulunda pa kusambilila cila mulungu nu musambi, musambi alinzile ukukwata insita ya kuya wenga. Alinzile kulalanda na Yeova. U munzila ci? Lino akukutika nu kulanda na Yeova. Angakutika kuli Leza nga akubelenga Baibo cila wanda. (Yoswa 1:8; Masa. 1:1-3) Mulinzile kumulanga ivyakuomvya utantiko wa kubelenga Baibo uwaya pa jw.org.f Pakuti mumwazwe ukuvwikisya vino akubelenga muli Baibo, mulinzile ukumukomelezya ukulaelenganya pali vino Baibo ikumusambilizya pali Yeova na vino angaomvya vino akusambilila mu umi wakwe.—Mili. 17:11; Yako. 1:25.

11. Uzye umusambi angasambilila uli ukulapepa ningo, nupya u mulandu ci uno alinzile ukulapepela kuli Yeova cila nsita?

¹¹ Mwakomelezya umusambi ukulalanda na Yeova umwi pepo cila wanda. Mwapepa ukufuma pansi ya mwenzo lino mukutandika nu kumalila isambililo, nupya mwalumbula nu musambi winu umwi pepo. Lino akukutika kuli vino mukupepa, alasambilila ivya kupepa ukufuma pansi ya mwenzo nupya alapepa kuli Yeova Leza kupitila muli Yesu Klistu. (Mate. 6:9; Yoa. 15:16) Elenganyini pali vino ukubelenga Baibo cila wanda (kuli kuti kukutika kuli Yeova) nu kulapepa (kuli kuti kulanda na Yeova) kulaazwa umusambi winu ukupalama sana kuli Leza! (Yako. 4:8) Ndi cakuti musambi winu akucita vii cila wanda, cilalenga alunduluke kufika nu ku kuipeela nu kubatiziwa.

MWAMWAZWA UKULUNDULULA UCUZA WAKWE NA YEOVA

12. Uzye kasambilizya angaazwa uli umusambi ukuya cuza wakwe Yeova?

¹² Umusambi atalinzile sile ukumanya vino akusambilila, lelo vilinzile ukumufika pa mwenzo. U mulandu ci? Mu mwenzo witu u mwaya vino tukalondesya, vino tukaelenganya na vino tukayuvwa ivikalenga twalondesya ukucitapo cimwi. Yesu wasambilizyanga antu ivintu ivingi nupya yatemwanga ukusambilila kuli aliwe. Lelo antu yamulondelanga pa mulandu wakuti vino wasambilizyanga vyayafikanga pa mwenzo. (Luka 24:15, 27, 32) Asambi inu yakalondekwa ukulalola Yeova ukuti u muntu wa cumi cumi, wino yangapanga nawe ucuza, wino yangalola ukuti a Isi, Leza wao nupya Cuza wao. (Masa. 25:4, 5) Lino mukutungulula isambililo, mwaleka umusambi aelenganya sana pa miyele yakwe Leza. (Kufu. 34:5, 6; 1 Pet. 5:6, 7) Asi mulandu ni sambililo lino mukusambililapo, mwalanda sana pali vino Yeova waya. Mwaazwa umusambi ukuvwikisya imiyele isuma ino Yeova wakwata ili wa kutemwa, uluse ni cikuuku. Yesu walanzile ukuti “Uwatemwa Mwene Leza wako” lili “sunde likulu nupya ilyacindama kuluta masunde yonsi.” (Mate. 22:37, 38) Mwaezya ukwazwa umusambi ukutemwa Leza.

13. Langililini vino mungazwa umusambi ukusambilila pa miyele isuma yakwe Yeova.

¹³ Lino mukulanzyanya nu musambi, mwamulondolwela umulandu uno mwatemelwa Yeova. Cico cilaazwa umusambi ukulola ukuti nawe kwene alinzile ukuya cuza wakwe Yeova nupya alasambilila vino angamutemwa. (Masa. 73:28) Uzye muli amazwi yamwi nanti ilembelo ilyatilimufika sana pa mwenzo ilikulanda pa miyele yakwe Yeova wakwe, kutemwa, mano, mulinganya nanti amaka? Munganenako umusambi nu kulenga amanye umulandu uno mwatemelwa sana Tata witu uwa kwi yulu. Kuli na vyuze vino umusambi alinzile ukucita pakuti alunduluke ukufika uku lubatizyo.

MWAMUKOMELEZYA UKUZANWA UMU KULONGANA

14. Uzye vino ilembelo lya Ayebulai 10:24, 25 likatunena pa kulongana vingaazwa uli umusambi ukulunduluka zuwa?

¹⁴ Swensi kwene tukalonda asambi ukulunduluka ukufika uku lubatizyo. Inzila yonga icindame ino tungayazwilamo, u kulayakomelezya ukuzanwa mu kulongana. Ya kasambilizya aakasambilizya ningo yalanda ukuti asambi aakazanwa uku kulongana yakalunduluka zuwa. (Masa. 111:1) Ya kasambilizya yamwi yalanda ukuti yakalondolwelako asambi yao ukuti kwaya ivingi vino yangasambilila mu kulongana ukuluta pali vino yakayasambilizya. Welengini Ayebulai 10:24, 25 lino muli pamwi nu musambi winu, nu kumulondolwela ivisuma vino angazana nga wazanwa umu kulongana. Mutambisyini vidyo yakuti: I Vyani Vikacitika pa Ng’anda ya Wene?g Mwaazwa umusambi ukulalola ukuti ukuzanwa umu kulongana cila mulungu kwacindama sana.

15. I vyani vino tungacita pa kukomelezya umusambi ukulazanwa lyonsi mu kulongana?

¹⁵ Mungacita uli ndi cakuti musambi winu atatala wazanwapo mu kulongana nanti akazanwako sile limwi limwi? Cingazipa nga mwamunenako vimwi vino mwacisambilile pa kulongana. Cingamukomelezya sana ukucila sile ukumunena ukwizazanwako. Mungamupeelako Lupungu Lwa Mulinzi nanti Kabuku Kakuomvya Pa Kulongana vino mukuomvya pa nsita iyo. Mungamulanga vino mulasambilila pa kulongana ukulondelilepo nu kumuzya vino watatemwamo sana. Vino umusambi alalola nu kuvwa pa muku wa kutandikilapo ukuzanwa umu kulongana vilazipa ukucila vino watala walolapo ku macalici yauze. (1 Kol. 14:24, 25) Alazana antu yano angatemwa ukukolanya nupya aalamwazwa ukulunduluka ukufika uku lubatizyo.

16. Tungatungulula uli masambililo ya Baibo aakalunduluka ukufika uku lubatizyo, nupya i vyani vino tulasambilila mu cipande icilondeliilepo?

¹⁶ Tungatungulula uli masambililo ya Baibo aakalunduluka ukufika uku lubatizyo? Tungakomelezya umusambi wenga na wenga ukulola vino isambililo lyacindama lino tukumukomelezya ukulasambilila cila mulungu nu kupekanya isambililo lyonga na lyonga. Tulinzile nu kumukomelezya ukulalanda na Yeova umwi pepo cila wanda nu kupanga ucuza usuma na aliwe. Tulinzile ukukomelezya umusambi ukulazanwa umu kulongana. (Lolini kambokosi apifwa 12 kakuti “Vino Asambi Yalinzile Ukucita Pakuti Yalunduluke Ukufika ku Lubatizyo.”) Nomba wakwe vino cipande icilondeliilepo cilalanda, kwaya ivintu na vyuze 5 vino kasambilizya alinzile ukucita pa kutungulula umuntu ukufika uku lubatizyo.