“Ndakai Lyene Natemwa Umulimo wa Kusimikila!”

NATA UKUYA NU LUZANGO

Icaulanda i cakuti, lino nali ni myaka 13, ucuza wane na Yeova watandike ukucepa. Ya kasukulu yanji yakweti sana untungwa, nani kwene nalondanga ukukwata untungwa wa musango uwa. Nayuvwanga ukuti masunde ya avyazi na masunde ya Ina Klistu yali akome, nupya nayuvwanga ukuti kuombela Yeova wali umulimo ukome. Namanyile ukuti Yeova akuno waya, nomba ntayuvwanga ukuti napalime kuli aliwe.

Ntatiile ukusimikila, nomba nasimikilanga sile panono. Nga naya umu kusimikila, ntapekanyanga, fwandi cantalilanga ukutwalilila ukulanzyanya. Nizile impata sana mulimo wa kusimikila pa mulandu wa kuti ntaswililanga kuli yano nasimikila, nanti ukukwata masambililo ya Baibo. Nayuzyanga ne mwineco ukuti, ‘Uzye umuntu angaacita uli vii lyonsi cila mulungu na cila mwezi?’

Lino nafisizye imyaka 17, nalondesyanga kulaikalila. Fwandi nalonzile ivyola vyane nu kukuukila uku Australia. Avyazi yane yasosile sana lino nafumile pa ng’anda. Yasakamiile, nomba yelenginye ukuti ndatwalilila ukuombela Yeova.

Lino nali ku Australia, naweliile sana pansi muli vyakwe Leza. Natiile ukuya lyonsi mu kulongana. Napanzile ivyuza acance ali wakwe nene aatemilwe ukuya mu kulongana nomba usiku ale yakuya mu kumwa nu kucina mu vikuulwa vya kumwelamo. Nga nelenganya vino ivintu vyali mpiti mu umi wane, nkalola ukuti nali mu cumi ala pa nsita ili imwi kwene nkukonkelela ivintu ivya mu nsi, nomba pasi vino naipakizyanga pali vyonsi vyoili.

IVYACITIIKE UKWAULA UKWENEKELA NOMBA IVYANSAMBILIZYE ISAMBILILO ILICINDAME

Lino papisile imyaka yiili, nizile imanyana na nkazi umwi uwalenzile ntandike ukwelenganya sana pali vino umi wane wali. Nikalanga na yankazi asimbe 5, nupya twamileko umwangalizi wa ciputulwa na mamakwe, Tamara, ukuti yize yikale naswe pa mulungu onga. Lino ya iya yakuomba imilimo yuze iya cilongano, twayanga pamwi na ya Tamara na ya nkazi yanji ale tukwizizya pamwi nu kuseka. Nuvwanga ningo sana. Yapingulangapo ningo pa vintu nupya cangangukilanga ukulanda nayo. Nuvwile ningo sana kuzana ukuti muntu uwapamviwa mu mulimo wakwe Yeova angakwata ni nsita ya kuya pamwi na yauze.

Ya Tamara yatemilwe sana mulimo uno yaombanga. Kutemwa kuno yatemilwe icumi nu mulimo wa kusimikila, kwalenganga yauze yalondesya kuyakolanya. Yali sana ni nsansa pano yaombelanga Yeova papezile amaka yao, nomba nemo ntali ni nsansa pano ntaombesyanga. Imiyele isuma ino yakweti ni nsansa zya cumi zino yali nazyo, vyankomelizye sana. Vino yacitanga vyalenzile nelenganye pa cumi cicindame icakuti Yeova akalonda swensi twamuombela nu luzango “ni nyimbo zya kuzanga.”—Masa. 100:2.

VINO NATANDIKE KUTEMWA UMULIMO WA KUSIMIKILA NUPYA

Nalondanga ukuya nu luzango wakwe vino ya Tamara yali, nomba pa kuya nu luzango lulo, nalondekwanga ukusenuka mu vintu ivingi. Cansendiile imyaka itatu pakuti ntandike ukusenuka panono panono. Natandike ukupekanya pa kuya mu mulimo wa kusimikila, nupya insita zimwi naombangako na upainiya uwa nsita inono. Kucita vii kwangavwile kukanauvwa sana intete. Pa mulandu wakuti naomvyanga sana Baibo mu mulimo wa kusimikila, naipakizyanga sana umulimo. Lino papisile insita, natandike ukuombako upainiya uwa nsita inono cila mwezi.

Natandike ukusoolola ya cuza amisinku ipusanepusane aatemilwe icumi nupya aisile mano ku kuombela Yeova. Imiyele yao isuma yangavwile ukwelenganya pa cintu icali cicindame sana mu umi wane, nupya natandike ukubelenga Baibo cila wanda. Natandike ukuipakizya sana mulimo wa kusimikila, nupya nizile intandika na upainiya wa nsita yonsi. Lyene natandike ukuya ni nsansa, nupya nuvwanga ningo sana ukuya mu cilongano.

NAZANA PAINIYA UWAKULAOMBELA PAMWI NAWE

Lino papisile umwaka, twizile itumanyana nu mwina Alex, uwali ni cikuuku nupya uwatemilwe Yeova nu mulimo wa kusimikila. Wali u muomvi akatumikila nupya ale waomba mulimo wa upainiya pa myaka 6. Ale waombako ni myezi 8 ku Malawi ukwalondekwanga ya kasimikila. Lino wali kuku, waombiile pamwi na ya misyonali aamwazwile nu kumukomelezya ukutwalilila ukwika vyakwe Leza inkoleelo.

Mu 2003, twatwaline na ya Alex, nupya kufuma lili kwene twatwalilila ukuomba umulimo wa nsita yonsi. Twasambilila vintu ivingi sana, nupya Yeova watupaala mu nzila izingi.

YEOVA WATUPAAZILE SANA

Mu 2009, yatutumile mu kuomba umisyonali ku Timor-Leste, impanga inono iyayela ku Indonesia. Twazungwike, itutemwa, nu kuvwa intete pa nsita yonga kwene. Lino papisile imyezi 5, twafisile mu musumba ukulamba uwa Dili.

Vintu vizile visenuka lino twakuukiile ku mpanga yuze. Twalinzile ukuyelezya intambi zyuze, lulimi, vyakulya, ni mikalile ya ku mpanga yuze. Nga tuli mu mulimo, twazananga antu apiina, aatasambilila, na yano yacuzyanga. Nupya twalolanga antu aingi sana aakweti iviyazi pa mulandu ni nkondo alino nu unkalwe uwacitikanga.a

Mulimo wa kusimikila wazipanga sana! Wakwe, insita imwi nakomenkinye Maria umukazyana uwa myaka 13 uwali sana nu ulanda.b Ala ya nyina yafwa mpiti, nupya insita zingi Maria atayanga pamwi na yaisi. Wakwe vino cali ku ance aingi a musinku wakwe, Maria atamanyile vino wali nu kucita mu umi. Nkaiusya vino walizile uwanda umwi lino wandondolwelanga vino wayuvwanga. Nomba ntuvwanga vino walandanga pano ale ntatala namanyikisya ululimi luno walandanga. Napefile kuli Yeova ukuti angazwe ukukomelezya Maria, lyene natandike ukumubelengela malembelo ya kumutekezya. Lino papisile myaka inono, naweni vino icumi casenwile miyele yakwe Maria, milolekele, alino nu umi wakwe onsi. Wabatiziwe, nupya ndakai wakwata na masambililo ya Baibo yano akatungulula. Ndakai, Maria wakwata ulupwa ulukulu ulwa antu yakwe Yeova nupya akayuvwa ukuti watemwikwa.

Yeova akupaala umulimo wa kusimikila mu Timor-Leste. Nanti cakuti ya kasimikila aingi yabatiziwe mu myaka 10 iyafumako, aingi aa painiya, aomvi aakatumikila, nanti ya eluda. Yamwi yakaombela pa maofesi yakwe ya kasenula nupya yakaazwilizyako ukusenula impapulo izikalanda pali Baibo umu mdimi zya kumyao. Nkaya sana ni nsansa ukuvwa vino yakwimba lino yali pa kulongana, kulola vino yakumwentula, alino na vino yakutwalilila kuya ya cuza yakwe Yeova.

NTELENGANYANGA UKUTI NINGAIPAKIZYA UMI USUMA

Vino twikalanga ku Timor-Leste vyapusine sana na vino twikalanga ku Australia, nomba twali sana ni nsansa. Insita zimwi twakwelanga muli basi ale muli antu aingi, iyalongamo ni inswi ni misaalu. Insita zimwi twatungululanga isambililo lya Baibo ala ikukaya mu tumang’anda utunono umutaali na sementi ni nkoko ale zikupitana. Nanti cakuti twakwatanga intazi, nomba ilingi twaipakizyanga mulimo.

Nga nelenganya pali vino ivintu vyali ku cisila, nkataizya avyazi yane pali vino yezizye na maka ukunsambilizya inzila zyakwe Yeova nu kungazwa lino ucuza wane na Yeova wakasi ononeke. Nasininkizya ukuti ivyaya pa Mapinda 22:6 i vya cumi. Ya mayo na ya tata yantemwa sana pamwi na ya Alex; nupya yakauvwa ningo sana kulola vino tukutwalilila kuombela Yeova. Kufuma mu 2016 tukaomba mulimo wa kutandalilila vilongano mu ncende ino iofesi lya musambo mu Australasia likaangalila.

Cikantalila kuzumila ukuti pa nsita imwi ntaipakizyanga umulimo wa kusimikila. Ndakai lyene natemwa umulimo wa kusimikila! Nasininkizya ukuti asi mulandu ni vingacitika mu umi, insansa zya cumi zikafuma umu kuombela Leza nu mwenzo onsi. Naya sana ni nsansa pa myaka 18 ino naombela Yeova pamwi na ya Alex. Ndakai nazumila ukuti amazwi yano Davidi wanenyile Yeova a cumi akuti: “Lelo leka yayo akazina munuli yazange, leka yimbile lyonsi apa kusansamuka. . . . Yayo atemwa izina lyako yazangile munuli.”—Masa. 5:11.